ꠁꠍꠣꠄꠁ ꠝꠥꠝꠤꠘ ꠅꠇꠟꠞ ꠌꠣꠟ-ꠌꠟꠘ (১২:১-১৬:২৭)
ꠀꠟ꠆ꠟꠣꠞ ꠘꠣꠝꠦ ꠎꠤꠘ꠆ꠖꠣ ꠇꠥꠞꠛꠣꠘꠤ
১২
১ ꠄꠞꠟꠣꠉꠤ ꠅ ꠜꠣꠁ ꠅꠇꠟ,
ꠀꠟ꠆ꠟꠣꠄ ꠔꠥꠝꠞꠣꠞꠦ ꠅꠟꠣ ꠝꠦꠢꠦꠞꠛꠣꠘꠤ ꠇꠞꠣꠄ,
ꠀꠝꠤ ꠔꠥꠝꠞꠣꠞꠦ ꠈꠣꠍ ꠝꠤꠘꠔꠤ ꠇꠞꠤꠀꠞ,
ꠔꠥꠝꠞꠣ ꠎꠣꠞꠎꠤꠞ ꠡꠞꠤꠟꠞꠦ ꠀꠟ꠆ꠟꠣꠞ ꠀꠔꠅ ꠡꠙꠤ ꠖꠦꠅ,
ꠁꠟꠣ ꠎꠤꠘ꠆ꠖꠣ ꠙꠛꠤꠔ꠆ꠞ ꠇꠥꠞꠛꠣꠘꠤ ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠄ,
ꠅꠇꠐꠣꠃ ꠅꠁꠛ ꠔꠥꠝꠞꠣꠞ ꠍꠢꠤ-ꠡꠥꠖ꠆ꠖ ꠄꠛꠣꠖꠔ।
২ ꠀꠞ ꠅꠃ ꠈꠣꠞꠣꠙ ꠎꠝꠣꠘꠣꠞ ꠔꠣꠟꠅ ꠙꠠꠤꠅ ꠘꠣ,
ꠛꠞꠋ ꠘꠤꠎꠞ ꠖꠤꠟꠞ ꠜꠣꠛ ꠛꠖꠟꠣꠁꠀ ꠘꠄꠀ ꠝꠣꠘꠥꠡ ꠅꠅ।
ꠔꠦꠃ ꠔꠥꠝꠞꠣ ꠀꠟ꠆ꠟꠣꠞ ꠝꠞ꠆ꠎꠤ ꠛꠥꠎꠛꠣꠄ।
ꠔꠣꠘ ꠝꠞ꠆ꠎꠤ ꠔ ꠜꠣꠟꠣ ꠀꠞ ꠙꠥꠞꠣꠙꠥꠞ ꠘꠤꠈꠥꠔ,
ꠅꠟꠣ ꠇꠞꠟꠦ ꠔꠣꠁꠘ ꠈꠥꠡꠤ ꠅꠁꠘ।
৩ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠀꠟ꠆ꠟꠣꠄ ꠀꠝꠣꠞꠦ ꠎꠦ ꠈꠣꠍ ꠘꠤꠀꠝꠔ ꠖꠤꠍꠂꠘ,
ꠅꠃ ꠘꠤꠀꠝꠔꠞ ꠛꠟꠦ ꠀꠝꠤ ꠔꠥꠝꠞꠣ ꠙꠞꠔꠦꠇ ꠎꠘꠞꠦ ꠇꠁꠞꠣꠝ,
ꠘꠤꠎꠞꠦ ꠎꠔꠈꠣꠘ ꠛꠠ ꠝꠘꠅ ꠇꠞꠣ ꠃꠌꠤꠔ,
ꠄꠞ ꠌꠣꠁꠔꠦ ꠛꠦꠡꠤ ꠝꠘꠅ ꠇꠞꠤꠅ ꠘꠣ।
ꠀꠟ꠆ꠟꠣꠄ ꠎꠣꠞꠦ ꠎꠔꠈꠣꠘ ꠁꠝꠣꠘꠤ ꠛꠟ ꠖꠤꠍꠂꠘ,
ꠢꠦ ꠎꠣꠘꠥ ꠘꠤꠎꠞꠦ ꠄꠞ ꠕꠣꠇꠤ ꠛꠦꠡꠤ ꠇꠥꠘ꠆ꠔꠣ ꠝꠘꠅ ꠘꠣ ꠇꠞꠦ।
৪ ꠈꠤꠀꠟ ꠞꠣꠈꠤꠅ,
ꠀꠝꠞꠣ ꠢꠇꠟꠞ ꠡꠞꠤꠟꠅ ꠛꠃꠔ ꠅꠋꠉ ꠀꠍꠦ,
ꠢꠇꠟ ꠅꠋꠉꠄ ꠔ ꠄꠇꠟꠣꠈꠣꠘ ꠇꠣꠝ ꠇꠞꠦ ꠘꠣ।
৫ ꠑꠤꠇ ꠅꠃ ꠟꠣꠈꠣꠘ,
ꠝꠥꠝꠤꠘ ꠢꠤꠡꠣꠛꠦ ꠀꠝꠞꠣ ꠛꠃꠔ ꠎꠘ ꠅꠁꠟꠦꠅ,
ꠀꠟ-ꠝꠍꠤꠞ ꠟꠉꠦ ꠡꠞꠤꠇ ꠅꠁꠀ ꠈꠣꠟꠤ ꠄꠇ ꠡꠞꠤꠟ ꠅꠁꠍꠤ।
ꠄꠇꠁ ꠡꠞꠤꠟꠞ ꠅꠋꠉ ꠉꠔꠤꠇꠦ ꠀꠝꠞꠣꠞ ꠄꠇꠦ-ꠅꠁꠘ꠆ꠘꠦ ꠝꠤꠟ ꠀꠍꠦ।
৬ ꠀꠟ꠆ꠟꠣꠞ ꠞꠢꠝꠔꠦ ꠀꠝꠞꠣ ꠘꠣꠘꠣꠘ ꠎꠘꠦ ꠘꠣꠘꠣꠘ ꠟꠣꠈꠣꠘ ꠘꠤꠀꠝꠔ ꠙꠣꠁꠍꠤ,
ꠅꠃ ꠘꠤꠀꠝꠔ ꠎꠥꠖꠤ ꠉꠣꠁꠛꠤ ꠅꠢꠤ ꠎꠣꠘꠣꠘꠤꠞ ꠛꠦꠙꠣꠞꠦ ꠅꠄ,
ꠔꠦ ꠀꠝꠞꠣꠞ ꠁꠝꠣꠘ ꠝꠣꠚꠤꠇ ꠅꠟꠤ-ꠀꠃꠟꠤꠀꠞ ꠟꠣꠈꠣꠘ ꠅꠢꠤ ꠇꠁꠔꠦ ꠕꠣꠇꠤ।
৭ ꠇꠦꠃ ꠎꠥꠖꠤ ꠈꠦꠎꠝꠔ ꠇꠞꠣꠞ ꠘꠤꠀꠝꠔ ꠙꠣꠄ,
ꠔꠦ ꠈꠦꠎꠝꠔ ꠇꠞꠃꠇ।
ꠀꠞ ꠔꠣꠟꠤꠝ ꠖꠤꠛꠣꠞ ꠘꠤꠀꠝꠔ ꠎꠦ ꠙꠣꠁꠍꠦ,
ꠢꠦ ꠔꠣꠟꠤꠝ ꠖꠦꠃꠇ।
৮ ꠃꠔꠡꠣꠢ ꠖꠤꠛꠣꠞ ꠘꠤꠀꠝꠔ ꠎꠦ ꠙꠣꠁꠍꠦ,
ꠢꠦ ꠝꠣꠘꠡꠞꠦ ꠃꠔꠡꠣꠢ ꠖꠦꠃꠇ।
ꠖꠣꠘ ꠇꠞꠣꠞ ꠘꠤꠀꠝꠔ ꠎꠦ ꠙꠣꠁꠍꠦ,
ꠢꠦ ꠈꠣꠟꠤꠍ ꠘꠤꠅꠔꠦ ꠖꠣꠘ ꠇꠞꠃꠇ।
ꠝꠥꠞꠛ꠆ꠛꠤꠀꠘꠣ ꠇꠞꠣꠞ ꠘꠤꠀꠝꠔ ꠎꠦ ꠙꠣꠁꠍꠦ,
ꠢꠦ ꠖꠤꠟꠦ-ꠎꠣꠘꠦ ꠢꠇꠟꠔꠣ ꠌꠣꠟꠣꠃꠇ।
ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠣꠞ ꠘꠤꠀꠝꠔ ꠎꠦ ꠙꠣꠁꠍꠦ,
ꠢꠦ ꠈꠥꠡꠤ ꠝꠘꠦ ꠡꠣꠁꠎ꠆ꠎ ꠇꠞꠃꠇ।
ꠝꠥꠝꠤꠘꠤ ꠌꠣꠟ-ꠌꠟꠘ
৯ ꠝꠣꠄꠀ-ꠝꠢꠛ꠆ꠛꠔꠞ ꠝꠣꠎꠦ ꠇꠥꠘꠥ ꠈꠣꠖ ꠝꠤꠡꠣꠁꠅ ꠘꠣ।
ꠈꠣꠞꠣꠙꠤꠞꠦ ꠊꠤꠘ꠆ꠘꠣꠅ,
ꠜꠣꠟꠣꠁꠞ ꠀꠡꠤꠇ ꠅꠅ।
১০ ꠄꠇꠦ-ꠅꠁꠘ꠆ꠘꠞꠦ ꠀꠙꠘ ꠜꠣꠁꠞ ꠟꠣꠈꠣꠘ ꠖꠤꠟꠦ-ꠎꠣꠘꠦ ꠝꠣꠄꠀ ꠇꠞꠅ,
ꠘꠤꠎ ꠕꠣꠇꠤ ꠅꠁꠘ꠆ꠘꠞꠦ ꠛꠦꠡꠤ ꠖꠣꠝ ꠖꠦꠅ।
১১ ꠈꠦꠎꠝꠔ ꠇꠣꠝꠅ ꠖꠥꠞꠛꠟ ꠅꠁꠅ ꠘꠣ,
ꠞꠥꠢꠥꠞꠦ ꠉꠞꠝ ꠞꠣꠈꠅ,
ꠝꠣꠟꠤꠇꠞ ꠉꠥꠟꠣꠝꠤ ꠇꠞꠣꠔ ꠞꠅ।
১২ ꠍꠣꠝꠘꠞ ꠙꠥꠞꠥꠡ꠆ꠇꠣꠞꠞ ꠀꠡꠣꠄ ꠢꠣꠝꠦꠡꠣ ꠈꠥꠡꠤ-ꠛꠣꠡꠤ ꠇꠞꠅ,
ꠖꠥꠈ-ꠝꠍꠤꠛꠔꠅ ꠍꠛꠞ ꠇꠞꠅ,
ꠢꠞ-ꠢꠣꠝꠦꠡꠣ ꠝꠥꠘꠣꠎꠣꠔ ꠇꠞꠣꠔ ꠞꠅ।
১৩ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠅꠜꠣꠛꠅ ꠡꠣꠁꠎ꠆ꠎ ꠇꠞꠅ।
ꠝꠦꠝꠣꠘꠖꠣꠞꠤ ꠇꠞꠔꠦ ꠈꠤꠀꠟꠤ ꠅꠅ।
১৪ ꠔꠥꠝꠞꠣꠞ ꠃꠙꠞꠦ ꠎꠦꠞꠣ ꠎꠥꠟꠥꠝ ꠇꠞꠦ,
ꠔꠣꠞꠣꠞ ꠟꠣꠉꠤ ꠘꠦꠇ ꠖꠥꠀ ꠇꠞꠤꠅ,
ꠛꠖ ꠖꠥꠀ ꠖꠤꠅ ꠘꠣ।
১৫ ꠎꠦꠞꠣ ꠈꠥꠡꠤ-ꠛꠣꠡꠤ ꠇꠞꠦꠞ,
ꠔꠣꠞꠣꠞ ꠟꠉꠦ ꠈꠥꠡꠤ ꠇꠞꠅ,
ꠎꠦꠞꠣ ꠇꠣꠘ꠆ꠖꠦꠞ ꠔꠣꠞꠣꠞ ꠟꠉꠦ ꠅꠁꠀ ꠇꠣꠘ꠆ꠖꠅ।
১৬ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠜꠣꠁ ꠜꠣꠁ ꠅꠁꠀ ꠞꠅ।
ꠛꠠꠟꠥꠇꠤ ꠜꠣꠛ ꠘꠣ ꠖꠦꠈꠣꠁꠀ,
ꠡꠣꠗꠣꠞꠘ ꠝꠣꠘꠡꠞ ꠟꠉꠦ ꠝꠤꠟꠤ-ꠝꠤꠡꠤ ꠌꠟꠅ।
ꠘꠤꠎꠞ ꠙꠘ꠆ꠒꠤꠔꠤ ꠖꠦꠈꠣꠁꠅ ꠘꠣ।
১৭ ꠈꠣꠞꠣꠙꠤꠞ ꠛꠖꠟꠣ ꠢꠤꠡꠣꠛꠦ ꠇꠦꠃꠞꠞ ꠈꠣꠞꠣꠙꠤ ꠇꠞꠤꠅ ꠘꠣ,
ꠢꠇꠟ ꠝꠣꠘꠡꠦ ꠎꠦꠔꠣꠞꠦ ꠜꠣꠟꠣ ꠝꠘꠅ ꠇꠞꠂꠘ,
ꠔꠥꠝꠞꠣ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤꠀ ꠅꠔꠣꠃ ꠇꠞꠅ।
১৮ ꠔꠥꠝꠞꠣꠞ ꠔꠞꠚ ꠕꠣꠇꠤ ꠎꠔꠈꠣꠘ ꠡꠝ꠆ꠛꠛ ꠢꠇꠟ ꠝꠣꠘꠡꠞ ꠟꠉꠦ ꠡꠣꠘ꠆ꠔꠤꠄ ꠛꠡꠔ ꠇꠞꠅ।
১৯ ꠅ ꠝꠣꠄꠀꠞ ꠜꠣꠁ ꠅꠇꠟ,
ꠔꠥꠝꠞꠣ ꠇꠦꠃꠞꠞ ꠛꠖꠟꠣ ꠟꠁꠅ ꠘꠣ,
ꠁꠔꠣ ꠀꠟ꠆ꠟꠣꠞ ꠀꠔꠅ ꠍꠣꠠꠤ ꠖꠦꠅ,
ꠛꠖꠟꠣ ꠖꠦꠅꠀ ꠔꠣꠘ ꠇꠣꠝ।
ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
“ꠘꠣꠚꠞꠝꠣꠘꠤꠞ ꠡꠣꠎꠣ ꠖꠤꠛꠣꠞ ꠄꠈꠔꠤꠀꠞ ꠈꠣꠟꠤ ꠀꠝꠣꠞꠃ ꠀꠍꠦ,
ꠎꠣꠞ ꠎꠦꠟꠣ ꠙꠣꠅꠘꠣ ꠀꠝꠤ ꠔꠣꠞꠦ ꠅꠟꠣ ꠛꠖꠟꠣ ꠖꠤꠝꠥ,
ꠁꠈꠣꠘ ꠀꠝꠤ ꠝꠣꠛꠥꠖꠦ ꠇꠁꠞꠣꠝ।”
২০ ꠛꠞꠋ ꠇꠤꠔꠣꠛꠦ ꠇꠄ,
“ꠔꠥꠝꠣꠞ ꠖꠥꠡꠝꠘꠞ ꠙꠦꠐꠅ ꠜꠥꠈ ꠟꠣꠉꠟꠦ,
ꠔꠣꠞꠦ ꠈꠣꠘꠤ ꠖꠦꠅ।
ꠙꠤꠀꠍꠦ ꠗꠞꠟꠦ ꠔꠣꠞꠦ ꠙꠣꠘꠤ ꠖꠦꠅ।
ꠅꠟꠣ ꠇꠞꠟꠦ ꠔ ꠔꠥꠝꠤ ꠔꠣꠞ ꠝꠣꠕꠣꠞ ꠃꠙꠞꠦ ꠎꠣꠟꠣꠁꠟ ꠀꠋꠞꠣꠞ ꠐꠥꠇꠞꠤ ꠕꠁꠟꠣꠄ।”
২১ ꠈꠣꠞꠣꠙꠤꠞ ꠉꠦꠍꠦ ꠇꠥꠘꠥꠝꠘ꠆ꠔꠦꠃ ꠀꠞꠤꠅ ꠘꠣ,
ꠛꠞꠋ ꠜꠣꠟꠣꠞꠦ ꠖꠤꠀ ꠈꠣꠞꠣꠙꠤꠞꠦ ꠀꠞꠣꠅ।