ꠝꠥꠝꠤꠘ ꠅꠇꠟꠞꠦ ꠍꠣꠟꠣꠝ ꠎꠣꠘꠣꠘꠤ
১৬
১ ꠔꠦ ꠅꠈꠘ ꠀꠝꠞꠣꠞ ꠛꠁꠘ ꠚꠂꠛꠤ ꠛꠤꠛꠤꠞꠦ ꠙꠣꠑꠣꠁꠞꠣꠝ,
ꠔꠣꠁꠘ ꠅꠁꠟꠣ ꠇꠤꠋꠇ꠆ꠞꠤꠀ ꠐꠣꠃꠘꠞ ꠁꠍꠣꠄꠁ ꠎꠝꠣꠔꠞ ꠈꠣꠖꠤꠝ,
ꠔꠣꠘ ꠛꠦꠙꠣꠞꠦ ꠇꠁꠀꠞ,
২ ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞꠦ ꠎꠦꠟꠣ ꠀꠙꠘ ꠇꠞꠣ ꠎꠞꠥꠞ,
ꠝꠣꠟꠤꠇ ꠁꠍꠣꠞ ꠘꠣꠝꠦ ꠄꠘꠞꠦꠅ ꠅꠟꠣ ꠀꠙꠘ ꠝꠘꠅ ꠇꠞꠤꠅ।
ꠔꠣꠁꠘ ꠔ ꠀꠝꠣꠞꠦ ꠀꠞ ꠀꠞꠅ ꠛꠃꠔ ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠍꠂꠘ,
ꠄꠞꠟꠣꠉꠤ ꠎꠦꠇꠥꠘꠥ ꠛꠦꠙꠣꠞꠦ ꠡꠣꠁꠎ꠆ꠎ ꠌꠣꠁꠟꠦ,
ꠔꠥꠝꠞꠣ ꠔꠣꠘꠞꠦ ꠡꠣꠁꠎ꠆ꠎ ꠇꠞꠤꠅ।
৩ ꠀꠝꠣꠞ ꠟꠉꠦ ꠅꠁꠀ ꠀꠟ-ꠝꠍꠤꠞ ꠟꠣꠉꠤ ꠎꠦꠞꠣ ꠇꠣꠝ ꠇꠞꠍꠂꠘ,
ꠅꠃ ꠚꠤꠍꠇꠤꠟꠣ ꠀꠞ ꠀꠇꠤꠟꠞꠦ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ।
৪ ꠀꠝꠣꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ,
ꠔꠣꠞꠣ ꠘꠤꠎꠞꠦ ꠝꠃꠔꠞ ꠀꠔꠅ ꠡꠙꠤ ꠖꠤꠍꠟꠣ।
ꠈꠣꠟꠤ ꠀꠝꠤ ꠘꠣꠄ,
ꠜꠤꠘ ꠎꠣꠔꠤꠞ ꠝꠣꠎꠞ ꠢꠇꠟ ꠎꠝꠣꠔꠃ ꠔꠣꠞꠣꠞ ꠉꠦꠍꠦ ꠞꠤꠘꠤ।
৫ ꠅꠈꠘ ꠔꠣꠞꠣꠞ ꠛꠣꠠꠤꠞ ꠎꠝꠣꠔꠅ ꠀꠁꠀ ꠎꠦꠞꠣ ꠡꠞꠤꠇ ꠅꠁꠘ,
ꠄꠞꠣ ꠢꠇꠟꠞꠦꠃ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ।
ꠔꠥꠞꠡ꠆ꠇꠞ ꠀꠍꠤꠀ ꠄꠟꠣꠇꠣꠔ ꠢꠇꠟ ꠙꠄꠟꠣ ꠎꠦꠁꠘ ꠀꠟ-ꠝꠍꠤꠞꠦ ꠇꠛꠥꠟ ꠇꠞꠍꠟꠣ,
ꠢꠃ ꠀꠙꠤꠘꠤꠔꠥꠍ ꠜꠣꠁꠞꠦ ꠍꠣꠟꠣꠝ ꠎꠣꠘꠣꠁꠅ,
ꠄꠁꠘ ꠀꠝꠣꠞ ꠝꠣꠄꠀꠞ ꠝꠣꠘꠥꠡ।
৬ ꠀꠞ ꠢꠃ ꠝꠞꠤꠅꠝ ꠛꠤꠛꠤꠞꠦꠅ ꠍꠣꠟꠣꠝ ꠎꠣꠘꠣꠁꠅ,
ꠎꠦꠁꠘ ꠔꠥꠝꠞꠣꠞ ꠟꠣꠉꠤ ꠛꠃꠔ ꠝꠦꠘꠔ ꠇꠞꠍꠂꠘ।
৭ ꠀꠝꠣꠞ ꠘꠤꠎꠞ ꠎꠣꠔꠤꠞ ꠝꠣꠘꠥꠡ ꠀꠘ꠆ꠖ꠆ꠞꠘꠤꠇꠥꠍ ꠀꠞ ꠎꠥꠘꠤꠀꠞꠦꠅ ꠍꠣꠟꠣꠝ ꠎꠣꠘꠣꠁꠅ,
ꠄꠞꠣ ꠔ ꠀꠝꠣꠞ ꠟꠉꠦ ꠅꠁꠀ ꠎꠦꠟ ꠈꠣꠐꠤꠍꠂꠘ।
ꠀꠟ-ꠝꠍꠤꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠄꠞꠣ ꠈꠥꠛ ꠁꠎ꠆ꠎꠔꠤ ꠎꠘ,
ꠄꠞꠣ ꠀꠝꠣꠞ ꠀꠉꠦ ꠁꠝꠣꠘ ꠀꠘꠍꠂꠘ।
৮ ꠀꠝꠣꠞ ꠝꠣꠄꠀꠞ ꠝꠥꠝꠤꠘ ꠜꠣꠁ ꠀꠝꠚꠤꠟꠥꠍꠞꠦ ꠍꠣꠟꠣꠝ ꠎꠣꠘꠣꠁꠅ।
৯ ꠀꠝꠞꠣꠞ ꠟꠉꠞ ꠔꠛꠟꠤꠉꠇꠣꠞꠤ ꠃꠞꠛꠣꠘ ꠜꠣꠁꠞꠦ,
ꠀꠞ ꠀꠝꠣꠞ ꠝꠣꠄꠀꠞ ꠖꠥꠡ꠆ꠔ ꠡ꠆ꠔꠣꠈꠤꠍꠞꠦꠅ ꠍꠣꠟꠣꠝ ꠇꠁꠅ।
১০ ꠀꠟ-ꠝꠍꠤꠞ ꠙꠞꠤꠇ꠆ꠇꠣꠔ ꠙꠣꠡ ꠇꠞꠣ ꠍꠤꠙꠣꠁ ꠀꠚꠤꠟꠤꠍ ꠜꠣꠁꠞꠦꠅ ꠍꠣꠟꠣꠝ ꠖꠤꠅ।
ꠜꠣꠁ ꠀꠞꠤꠡ꠆ꠔꠣꠛꠥꠟꠞ ꠛꠣꠠꠤꠞ ꠢꠇ꠆ꠇꠟꠞꠦ ꠍꠣꠟꠣꠝ ꠎꠣꠘꠣꠁꠅ।
১১ ꠀꠝꠣꠞ ꠎꠣꠔꠤꠞ ꠜꠣꠁ ꠢꠦꠞꠥꠖꠥꠘꠞꠦ ꠍꠣꠟꠣꠝ ꠖꠤꠅ।
ꠝꠞꠢꠥꠝ ꠘꠣꠇꠤꠍꠥꠍꠞ ꠛꠣꠠꠤꠞ ꠎꠦꠞꠣ ꠝꠣꠟꠤꠇ ꠁꠍꠣꠞ ꠃꠝ꠆ꠝꠔ ꠅꠁꠍꠂꠘ,
ꠔꠣꠞꠣꠞꠦꠅ ꠍꠣꠟꠣꠝ ꠎꠣꠘꠣꠁꠅ।
১২ ꠔꠥꠞꠚꠣꠘꠣ ꠀꠞ ꠔꠥꠞꠚꠣꠍꠣ ꠛꠤꠛꠤꠞꠦꠅ ꠍꠣꠟꠣꠝ ꠖꠤꠅ।
ꠅꠃ ꠛꠦꠐꠤꠘ꠆ꠔꠦ ꠝꠣꠟꠤꠇ ꠁꠍꠣꠞ ꠟꠣꠉꠤ ꠛꠠ ꠝꠦꠘꠔ ꠇꠞꠞꠣ।
ꠝꠣꠄꠀꠞ ꠛꠁꠘ ꠚꠣꠞ꠆ꠍꠤꠀꠞꠦꠅ ꠍꠣꠟꠣꠝ ꠇꠁꠅ,
ꠝꠣꠟꠤꠇꠞ ꠟꠣꠉꠤ ꠔꠣꠁꠘꠅ ꠛꠃꠔ ꠝꠦꠘꠔ ꠇꠞꠍꠂꠘ।
১৩ ꠝꠣꠟꠤꠇ ꠁꠍꠣꠞ ꠙꠍꠘ꠆ꠖꠞ ꠝꠣꠘꠥꠡ ꠞꠃꠚ ꠜꠣꠁꠞꠦ ꠍꠣꠟꠣꠝ ꠖꠤꠅ,
ꠔꠣꠘ ꠀꠝ꠆ꠝꠣꠞꠦꠅ ꠍꠣꠟꠣꠝ ꠇꠁꠅ,
ꠁ ꠛꠦꠐꠤ ꠔ ꠀꠝꠣꠞꠅ ꠝꠣ।
১৪ ꠍꠤꠋꠇꠤꠞꠣꠔ,
ꠚꠤꠟꠤꠉꠥꠘ,
ꠢꠣꠞ꠆ꠝꠤꠍ,
ꠚꠣꠔꠞꠥꠛ,
ꠢꠦꠞ꠆ꠝꠣꠍ ꠀꠞ ꠔꠣꠞꠣꠞ ꠟꠉꠦ ꠎꠔ ꠁꠝꠣꠘꠖꠣꠞ ꠛꠘ꠆ꠖꠣ ꠀꠍꠂꠘ,
ꠄꠞꠣ ꠢꠇꠟꠞꠦ ꠍꠣꠟꠣꠝ ꠎꠣꠘꠣꠁꠅ।
১৫ ꠜꠣꠁ ꠚꠤꠟꠣꠉꠤ,
ꠎꠥꠟꠤꠀ ꠛꠤꠛꠤ,
ꠘꠤꠞꠤꠀꠍ ꠀꠞ ꠔꠣꠘ ꠛꠁꠘꠞꠦ,
ꠀꠞ ꠅꠟꠤꠝ꠆ꠙꠣꠍꠞꠦ ꠍꠣꠟꠣꠝ ꠇꠁꠅ,
ꠀꠟ꠆ꠟꠣꠞ ꠎꠔ ꠛꠘ꠆ꠖꠣ ꠔꠣꠞꠣꠞ ꠟꠉꠦ ꠀꠍꠂꠘ ꠄꠞꠣ ꠢꠇꠟꠞꠦ ꠍꠣꠟꠣꠝ ꠖꠤꠅ।
১৬ ꠢꠥꠘꠅ,
ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠙꠛꠤꠔ꠆ꠞ ꠉꠟꠣꠉꠟꠤ ꠇꠞꠤꠅ।
ꠀꠟ-ꠝꠍꠤꠞ ꠢꠇꠟ ꠎꠝꠣꠔꠞ ꠜꠣꠁ-ꠛꠘꠤꠘ꠆ꠔꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
ꠢꠎꠞꠔ ꠙꠣꠃꠟꠥꠍꠞ (ꠞꠣ꠩) ꠛꠤꠖꠣꠄꠁ ꠘꠍꠤꠅꠔ
১৭ ꠅ ꠜꠣꠁ ꠅꠇꠟ,
ꠔꠥꠝꠞꠣꠞꠦ ꠝꠤꠘꠔ ꠇꠞꠤ ꠇꠁꠞꠣꠝ,
ꠀꠉꠦ ꠎꠦꠔꠣ ꠔꠣꠟꠤꠝ ꠙꠣꠁꠍ,
ꠅꠃ ꠔꠣꠟꠤꠝꠞ ꠃꠟꠐꠣ ꠔꠣꠟꠤꠝ ꠖꠤꠀ ꠎꠦꠉꠥꠁꠘ꠆ꠔꠦ ꠖꠟꠣꠖꠟꠤ ꠀꠞ ꠛꠣꠗꠣ-ꠛꠤꠊꠘꠞ ꠎꠘꠝ ꠖꠦꠁꠘ,
ꠅꠔꠣꠞ ꠛꠣꠄ ꠘꠎꠞ ꠞꠣꠈꠤꠅ,
ꠔꠥꠝꠞꠣ ꠁꠔꠣꠞ ꠉꠦꠍ ꠕꠣꠇꠤ ꠢꠞꠤꠀ ꠞꠁꠅ।
১৮ ꠇꠣꠞꠘ ꠁꠔꠣꠄ ꠀꠝꠞꠣꠞ ꠝꠣꠟꠤꠇ ꠀꠟ-ꠝꠍꠤꠞ ꠉꠥꠟꠣꠝꠤ ꠘꠣ ꠇꠞꠤꠀ,
ꠔꠣꠞꠣꠞ ꠙꠦꠐꠞ ꠉꠥꠟꠣꠝꠤ ꠇꠞꠦ।
ꠝꠤꠑꠣ ꠝꠤꠑꠣ ꠝꠣꠔ ꠝꠣꠔꠤꠀ ꠀꠞ ꠔꠦꠟ ꠝꠣꠟꠤꠡ ꠇꠞꠤꠀ ꠡꠞꠟ-ꠡꠥꠎꠣ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠄ।
১৯ ꠀꠞ ꠔꠥꠝꠞꠣ ꠎꠦꠘ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠞꠣꠄ,
ꠁꠔꠣ ꠔ ꠢꠇꠟꠦꠃ ꠎꠣꠘꠦ,
ꠁ ꠈꠛꠞ ꠢꠥꠘꠤꠀ ꠀꠝꠤꠅ ꠈꠥꠛ ꠈꠥꠡꠤ ꠅꠁꠍꠤ।
ꠔꠦ ꠀꠝꠤ ꠌꠣꠁꠞꠣꠝ,
ꠔꠥꠝꠞꠣ ꠘꠦꠇ ꠙꠕꠦ ꠇꠣꠝꠤꠟ ꠅꠅ,
ꠛꠖ ꠙꠕ ꠕꠣꠇꠤ ꠛꠣꠌꠤꠀ ꠞꠅ।
২০ ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣꠄ ꠁꠛꠟꠤꠍ-ꠡꠄꠔꠣꠘꠞꠦ ꠈꠥꠛ ꠎꠟꠖꠤ ꠇꠞꠤ ꠔꠥꠝꠞꠣꠞ ꠙꠣꠅꠞ ꠔꠟꠦ ꠚꠣꠟꠣꠁ ꠙꠤꠡꠣꠁꠛꠣ।
ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝ-ꠘꠤꠀꠝꠔ ꠔꠥꠝꠞꠣꠞ ꠃꠙꠞꠦ ꠎꠣꠞꠤ ꠞꠃꠇ।
২১ ꠀꠝꠣꠞ ꠟꠉꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠂꠘ ꠎꠦ ꠔꠤꠝꠕꠤ ꠜꠣꠁ,
ꠄꠁꠘ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
ꠀꠝꠣꠞ ꠎꠣꠔꠤ ꠜꠣꠁ ꠟꠥꠇꠤꠀꠍ,
ꠎꠣꠍꠥꠘ ꠀꠞ ꠍꠥꠙꠣꠔꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠇꠁꠞꠣ।
২২ ꠢꠎꠞꠔ ꠙꠣꠃꠟꠥꠍꠞ ꠛꠥꠟꠤ ꠢꠥꠘꠤꠀ ꠀꠝꠤ ꠔꠞ꠆ꠔꠤꠃꠍ ꠝꠢꠞꠤꠞꠦ ꠟꠦꠈꠞꠣꠝ,
ꠝꠣꠟꠤꠇ ꠁꠍꠣꠞ ꠘꠣꠝꠦ ꠀꠝꠤꠅ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
২৩-২৪ ꠀꠝꠤ ꠙꠣꠃꠟꠥꠍ ꠀꠞ ꠎꠝꠣꠔꠞ ꠢꠇꠟꠞꠦ ꠎꠦꠁꠘ ꠝꠦꠝꠣꠘꠖꠣꠞꠤ ꠇꠞꠂꠘ,
ꠢꠃ ꠉꠃꠍ ꠜꠣꠁꠄ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
ꠅꠃ ꠐꠣꠃꠘꠞ ꠡꠞꠇꠣꠞꠤ ꠇꠦꠡꠤꠀꠞ ꠁꠞꠣꠡ꠆ꠔꠣꠍ ꠜꠣꠁꠄ ꠀꠞ ꠝꠥꠝꠤꠘ ꠜꠣꠁ ꠇꠥꠀꠔꠥꠍꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
২৫ ꠀꠟ-ꠢꠣꠝꠖꠥꠟꠤꠟ꠆ꠟꠣ,
ꠀꠝꠤ ꠙꠣꠃꠟꠥꠍꠦ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ,
ꠀꠟ꠆ꠟꠣ ꠙꠣꠇꠞ ꠈꠦꠝꠔꠣ ꠀꠍꠦ ꠅꠃ ꠈꠥꠡ-ꠈꠛꠞꠤꠞ ꠃꠍꠤꠟ꠆ꠟꠣꠄ ꠔꠥꠝꠞꠣꠞꠦ ꠁꠝꠣꠘꠦ ꠕꠤꠞ ꠞꠣꠈꠣ।
ꠝꠘꠅ ꠞꠣꠈꠤꠅ,
ꠛꠃꠔ ꠎꠝꠣꠘꠣ ꠗꠞꠤ ꠀꠟ꠆ꠟꠣꠄ ꠔꠣꠘ ꠁ ꠛꠣꠔꠥꠘꠤ ꠝꠥꠘꠡꠣꠞ ꠇꠕꠣ ꠟꠥꠇꠣꠁ ꠞꠣꠈꠍꠤꠟꠣ,
২৬ ꠅꠁꠟꠦ ꠅꠈꠘ ꠁꠔꠣ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠉꠦꠍꠦ ꠎꠣꠁꠞ ꠅꠞ।
ꠌꠤꠞꠇꠣꠟꠤꠘ ꠎꠤꠘ꠆ꠖꠣ ꠀꠟ꠆ꠟꠣꠞ ꠢꠥꠇꠥꠝꠦ,
ꠀꠉꠞ ꠎꠝꠣꠘꠣꠞ ꠘꠛꠤ ꠅꠇꠟꠦ ꠎꠦꠔꠣ ꠟꠦꠈꠤꠀ ꠞꠣꠈꠍꠤꠟꠣ,
ꠅꠔꠣ ꠎꠣꠁꠞ ꠅꠞ,
ꠎꠣꠔꠦ ꠔꠣꠞꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠤꠀ ꠀꠟ꠆ꠟꠣ ꠙꠣꠇꠞ ꠛꠣꠁꠖ꠆ꠖ ꠅꠁꠘ।
ꠄꠞꠟꠣꠉꠤ ꠅꠃ ꠈꠥꠡ-ꠈꠛꠞꠤ ꠅꠈꠘ ꠔꠛꠟꠤꠉ ꠇꠞꠣ ꠅꠞ।
২৭ ꠔꠣꠁꠘꠃ ꠄꠇꠝꠣꠔ꠆ꠞ ꠀꠟ꠆ꠟꠣ,
ꠔꠣꠁꠘꠃ ꠀꠈꠟꠖꠣꠞ,
ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠔꠣꠘ ꠔꠣꠞꠤꠚ ꠅꠃꠇ।
ꠀꠝꠤꠘ॥