ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ৮ ꠘꠝ꠆ꠛꠞ ꠍꠤꠙꠣꠞꠣ
ꠖꠥꠍꠞꠣ ꠇꠞꠤꠘ꠆ꠔꠤꠀ
ꠜꠥꠝꠤꠇꠣ (১:১-১১)
ꠍꠣꠟꠣꠝ ꠎꠣꠘꠣꠘꠤ
১
১ ꠀꠝꠤ ꠙꠣꠃꠟꠥꠍ,
ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤ ꠝꠣꠚꠤꠇ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ।
ꠇꠞꠤꠘ꠆ꠔ ꠐꠣꠃꠘꠞ ꠁꠍꠣꠄꠁ ꠎꠝꠣꠔ ꠀꠞ ꠀꠡ꠆ꠔꠣ ꠉ꠆ꠞꠤꠍ ꠖꠦꠡꠞ ꠝꠣꠎꠦ ꠀꠟ꠆ꠟꠣꠞ ꠎꠔ ꠙꠣꠇ ꠛꠘ꠆ꠖꠣ ꠅꠇꠟ ꠛꠡꠔ ꠇꠞꠂꠘ,
ꠄꠞꠣꠞ ꠉꠦꠍꠦ ꠀꠝꠤ ꠀꠞ ꠀꠝꠞꠣꠞ ꠝꠥꠝꠤꠘ ꠜꠣꠁ ꠔꠤꠝꠕꠤꠄ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ।
২ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠀꠙꠘꠣꠞꠣ ꠢꠇꠟꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠇꠞꠃꠇ꠆ꠇꠣ।
ꠛꠥꠎ ꠖꠦꠅꠀꠞ ꠝꠣꠟꠤꠇ ꠀꠟ꠆ꠟꠣ
৩ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠅꠃꠇ।
ꠔꠣꠁꠘꠃ ꠞꠢꠝꠣꠘꠥꠞ ꠞꠢꠤꠝ ꠀꠟ꠆ꠟꠣ,
ꠢꠇ꠆ꠇꠟꠞ ꠖꠤꠟꠞ ꠛꠥꠎ ꠖꠦꠅꠞꠣ ꠀꠟ꠆ꠟꠣ।
৪ ꠢꠇꠟ ꠎꠣꠔ ꠖꠥꠈ-ꠝꠍꠤꠛꠔꠞ ꠡꠝꠄ ꠔꠣꠁꠘ ꠀꠝꠞꠣꠞꠦ ꠛꠥꠎ ꠖꠦꠁꠘ,
ꠎꠣꠔꠦ ꠔꠣꠘ ꠉꠦꠍ ꠕꠣꠇꠤ ꠛꠥꠎ ꠙꠣꠁꠀ,
ꠅꠁꠘ꠆ꠘꠞ ꠖꠥꠈ-ꠝꠍꠤꠛꠔꠞ ꠡꠝꠄ ꠀꠝꠞꠣꠅ ꠔꠣꠞꠣꠞꠦ ꠛꠥꠎ ꠖꠤꠔꠣꠝ ꠙꠣꠞꠤ।
৫ ꠀꠟ-ꠝꠍꠤꠞ ꠟꠣꠈꠣꠘ ꠀꠝꠞꠣ ꠎꠦꠟꠣ ꠛꠃꠔ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠤꠀꠞ,
ꠅꠃꠟꠣ ꠔꠣꠘ ꠃꠍꠤꠟ꠆ꠟꠣꠄ ꠛꠃꠔ ꠛꠥꠎ-ꠡꠣꠘ꠆ꠔꠤꠅ ꠙꠣꠁꠀꠞ।
৬ ꠀꠝꠞꠣ ꠎꠦ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠤ,
ꠁꠔꠣ ꠔ ꠔꠥꠝꠞꠣꠞ ꠝꠘꠞ ꠡꠣꠘ꠆ꠔꠘꠣ ꠀꠞ ꠘꠣꠎꠣꠔꠞ ꠟꠣꠉꠤꠃ ꠇꠞꠤ।
ꠔꠥꠝꠞꠣꠞꠦ ꠛꠥꠎ ꠖꠦꠅꠀꠞ ꠘꠤꠅꠔꠦꠃ ꠀꠟ꠆ꠟꠣꠄ ꠀꠝꠞꠣꠞꠦ ꠛꠥꠎ ꠖꠦꠁꠘ।
ꠔꠥꠝꠞꠣ ꠎꠦꠛꠟꠣ ꠀꠝꠞꠣꠞ ꠟꠣꠈꠣꠘ ꠖꠥꠈ-ꠝꠍꠤꠛꠔꠅ ꠙꠠꠛꠣꠄ,
ꠅꠃ ꠡꠝꠄ ꠀꠝꠞꠣꠞ ꠖꠦꠅꠀ ꠛꠥꠎ ꠝꠣꠚꠤꠇ ꠔꠥꠝꠞꠣꠞ ꠇꠡ꠆ꠐꠞꠦ ꠡꠁꠎ꠆ꠎ ꠇꠞꠔꠦ ꠡꠣꠁꠎ꠆ꠎ ꠇꠞꠛ।
৭ ꠔꠥꠝꠞꠣꠞ ꠃꠙꠞꠦ ꠀꠝꠞꠣꠞ ꠝꠎꠛꠥꠔ ꠄꠇꠤꠘ ꠀꠍꠦ,
ꠔꠥꠝꠞꠣ ꠎꠦꠟꠣ ꠀꠝꠞꠣꠞ ꠖꠥꠈ-ꠝꠍꠤꠛꠔꠅ ꠡꠞꠤꠇ ꠀꠍ,
ꠅꠃꠟꠣ ꠀꠟ꠆ꠟꠣꠞ ꠖꠦꠅꠀ ꠛꠥꠎ-ꠡꠣꠘ꠆ꠔꠘꠣꠞ ꠝꠣꠎꠦꠅ ꠡꠞꠤꠇ ꠀꠍ।
৮ ꠔꠥꠞꠡ꠆ꠇꠞ ꠀꠍꠤꠀ ꠖꠦꠡꠅ ꠀꠝꠞꠣ ꠎꠦ ꠝꠍꠤꠛꠔꠅ ꠙꠠꠍꠟꠣꠝ,
ꠅꠔꠣ ꠔꠥꠝꠞꠣꠞꠦ ꠎꠣꠘꠣꠁꠔꠣꠝ ꠌꠣꠁ।
ꠢꠤꠘꠅ ꠕꠣꠇꠔꠦ ꠀꠝꠞꠣꠞ ꠃꠙꠞꠦ ꠎꠦ ꠀꠎꠣꠛ ꠀꠁꠍꠤꠟ,
ꠅꠃ ꠀꠎꠣꠛ ꠅꠟꠣ ꠝꠣꠞꠣꠔ꠆ꠔꠇ ꠀꠍꠤꠟ,
ꠄꠞꠟꠣꠉꠤ ꠀꠝꠞꠣ ꠎꠣꠘꠞ ꠝꠣꠄꠀ ꠍꠣꠠꠤ ꠖꠤꠍꠟꠣꠝ।
৯ ꠝꠘꠅ ꠇꠞꠍꠟꠣꠝ,
ꠀꠝꠞꠣ ꠘꠤꠌ꠆ꠌꠤꠔ ꠝꠣꠞꠣ ꠎꠣꠁꠝꠥ।
ꠔꠦ ꠀꠝꠞꠣꠞ ꠁ ꠢꠣꠟꠔ ꠅꠁꠍꠤꠟ,
ꠎꠣꠔꠦ ꠀꠝꠞꠣ ꠘꠤꠎꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ,
ꠎꠦ ꠀꠟ꠆ꠟꠣꠄ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠂꠘ,
ꠅꠃ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠤ।
১০ ꠄꠇ ꠛꠦꠎꠥꠁꠔꠣ ꠝꠃꠔꠞ ꠀꠔ ꠕꠣꠇꠤ ꠔꠣꠁꠘ ꠀꠝꠞꠣꠞꠦ ꠛꠣꠌꠣꠁꠍꠂꠘ,
ꠀꠞ ꠅꠈꠘꠅ ꠛꠣꠌꠣꠁꠞꠣ।
ꠀꠝꠞꠣ ꠔꠣꠘ ꠃꠙꠞꠦ ꠜꠞꠡꠣ ꠇꠞꠔꠣꠝ ꠙꠣꠞꠤ,
ꠔꠣꠁꠘ ꠢꠣꠝꠦꠡꠣꠃ ꠀꠝꠞꠣꠞꠦ ꠅꠟꠣꠈꠣꠘ ꠛꠣꠌꠣꠁꠛꠣ।
১১ ꠔꠥꠝꠞꠣꠅ ꠖꠥꠀ-ꠝꠥꠘꠣꠎꠣꠔ ꠇꠞꠤꠀ ꠀꠝꠞꠣꠞꠦ ꠡꠣꠁꠎ꠆ꠎ ꠇꠞꠞꠣꠄ,
ꠄꠞꠟꠣꠉꠤ ꠛꠃꠔ ꠎꠘꠞ ꠖꠥꠀꠞ ꠈꠣꠔꠤꠞꠦ ꠀꠝꠞꠣ ꠎꠦ ꠞꠢꠝ ꠙꠣꠁꠍꠤ,
ꠅꠔꠣꠞ ꠚꠟ ꠖꠦꠈꠤꠀ ꠛꠃꠔꠦ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠛꠣ।
ꠇꠞꠤꠘ꠆ꠔ ꠎꠝꠣꠔꠞ ꠟꠉꠦ ꠢꠎꠞꠔ ꠙꠣꠃꠟꠥꠍꠞ ꠡꠝ꠆ꠙꠞ꠆ꠇ (১:১২-৭:১৬)
ꠢꠎꠞꠔ ꠙꠣꠃꠟꠥꠍꠞ ꠍꠚꠞꠞ ꠖꠦꠞꠤ
১২ ꠀꠝꠞꠣ ꠎꠦꠔꠣ ꠟꠁꠀ ꠉꠃꠞꠛ ꠇꠞꠤꠀꠞ,
ꠀꠝꠞꠣꠞ ꠛꠤꠛꠦꠇꠦꠅ ꠅꠟꠣ ꠇꠄ,
ꠀꠟ꠆ꠟꠣꠞ ꠖꠦꠅꠀ ꠙꠛꠤꠔ꠆ꠞ ꠀꠞ ꠡꠞꠟ ꠝꠘ ꠟꠁꠀ ꠢꠇꠟ ꠝꠣꠘꠡꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠤ,
ꠈꠣꠍ ꠇꠞꠤ ꠔꠥꠝꠞꠣꠞ ꠝꠣꠎꠦꠃ ꠇꠣꠐꠣꠁꠍꠤ।
ꠁ ꠎꠤꠘ꠆ꠖꠦꠉꠤ ꠀꠝꠞꠣ ꠖꠥꠘꠤꠀꠛꠤ ꠀꠈꠟ-ꠢꠦꠇꠝꠔꠦ ꠘꠣꠄ,
ꠈꠣꠟꠤ ꠀꠟ꠆ꠟꠣꠞ ꠞꠢꠝꠔꠞ ꠛꠟꠦ ꠇꠣꠐꠣꠁꠍꠤ।
১৩ ꠀꠝꠞꠣ ꠔ ꠔꠥꠝꠞꠣꠞ ꠉꠦꠍꠦ ꠟꠥꠇꠣꠁ-ꠌꠣꠙꠣꠁ ꠇꠥꠘꠥꠔꠣ ꠟꠦꠈꠤꠀꠞ ꠘꠣ,
ꠔꠥꠝꠞꠣ ꠎꠦ ꠟꠦꠈꠣ ꠙꠠꠞꠣꠄ ꠀꠞ ꠛꠥꠎꠞꠣꠄ,
ꠈꠣꠟꠤ ꠅꠃ ꠛꠦꠙꠣꠞꠦꠃ ꠟꠦꠈꠤꠀꠞ।
ꠀꠞ ꠀꠡꠣ ꠇꠞꠤꠀꠞ,
ꠔꠥꠝꠞꠣ ꠢꠣꠝꠦꠡꠣꠃ ꠅꠟꠣ ꠛꠥꠎꠣꠔ ꠞꠁꠛꠣꠄ।
১৪ ꠀꠍꠟꠦ ꠀꠝꠞꠣꠞ ꠛꠦꠙꠣꠞꠦ ꠔꠥꠝꠞꠣ ꠕꠥꠠꠣ ꠇꠤꠍꠥ ꠎꠣꠘꠤꠀꠃ,
ꠀꠝꠞꠣꠞꠦ ꠟꠁꠀ ꠎꠦꠟꠣ ꠛꠠꠣꠁ ꠇꠞꠞꠣꠄ,
ꠝꠣꠟꠤꠇ ꠁꠍꠣꠄ ꠔꠡꠞꠤꠚ ꠀꠘꠣꠞ ꠡꠝꠄ ꠔꠥꠝꠞꠣꠞꠦ ꠟꠁꠀ ꠀꠝꠞꠣꠅ ꠅꠟꠣ ꠛꠠꠣꠁ ꠇꠞꠝꠥ।
১৫ ꠀꠞ ꠅꠃ ꠇꠕꠣꠞ ꠃꠙꠞꠦ ꠜꠞꠡꠣ ꠇꠞꠤꠀ ꠀꠝꠤ ꠈꠥꠛ ꠈꠤꠀꠟꠤ ꠅꠁꠍꠟꠣꠝ,
ꠀꠝꠤ ꠀꠅꠀ-ꠎꠣꠅꠀꠞ ꠙꠕꠅ ꠖꠥꠁꠅꠛꠣꠞ ꠔꠥꠝꠞꠣꠞ ꠉꠦꠍꠦ ꠎꠣꠁꠝꠥ,
ꠉꠦꠟꠦ ꠔꠥꠝꠞꠣ ꠖꠥꠁꠅꠛꠣꠞꠃ ꠞꠢꠝ-ꠘꠤꠀꠝꠔ ꠙꠣꠁꠛꠣꠄ।
১৬ ꠀꠝꠤ ꠝꠘꠅ ꠇꠞꠍꠟꠣꠝ,
ꠝꠣꠇꠤꠖꠘꠤꠀꠔ ꠎꠣꠅꠀꠞ ꠙꠕꠦ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠝꠥ ꠀꠞ ꠢꠘ ꠕꠣꠇꠤ ꠢꠤꠞꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠝꠥ,
ꠎꠣꠔꠦ ꠄꠢꠥꠖꠤꠀ ꠎꠤꠟꠣꠔ ꠎꠣꠅꠀꠞ ꠇꠣꠟꠅ ꠔꠥꠝꠞꠣ ꠀꠝꠣꠞꠦ ꠀꠉꠥꠀꠁꠀ ꠖꠦꠅ।
১৭ ꠅꠁꠟꠦ ꠀꠝꠤ ꠘꠣ ꠀꠅꠀꠄ ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ,
ꠀꠝꠤ ꠁꠔꠣ ꠓꠋ ꠇꠞꠍꠟꠣꠝ?
ꠎꠉꠔꠞ ꠝꠣꠘꠡꠦ ꠎꠦꠟꠣ ꠄꠇꠛꠣꠞ ꠇꠄ “ꠅꠄ,
ꠅꠄ” ꠀꠞꠇꠛꠣꠞ ꠇꠄ “ꠘꠣ,
ꠘꠣ”,
ꠀꠝꠤꠅ ꠅꠟꠣ ꠘꠤ?
১৮ ꠀꠟ꠆ꠟꠣ ꠙꠣꠇ ꠔ ꠢꠇ ꠀꠞ ꠈꠣꠐꠤ,
ꠁꠈꠣꠘ ꠎꠦꠟꠣ ꠢꠣꠍꠣ,
ꠅꠃꠟꠣ ꠄꠅꠈꠣꠘꠅ ꠢꠣꠍꠣ,
ꠔꠥꠝꠞꠣꠞ ꠉꠦꠍꠦ ꠀꠝꠞꠣꠞ ꠎꠛꠣꠘ ꠄꠇꠛꠣꠞ “ꠅꠄ” ꠀꠞ ꠀꠞꠇꠛꠣꠞ “ꠘꠣ” ꠅꠄ ꠘꠣ।
১৯ ꠀꠝꠤ,
ꠍꠤꠟꠣꠍ,
ꠀꠞ ꠜꠣꠁ ꠔꠤꠝꠕꠤꠄ ꠔꠥꠝꠞꠣꠞ ꠉꠦꠍꠦ ꠎꠣꠞ ꠇꠕꠣ ꠔꠛꠟꠤꠉ ꠇꠞꠍꠤ,
ꠢꠃ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ,
ꠔꠣꠁꠘ ꠄꠇꠛꠣꠞ “ꠅꠄ” ꠀꠞ ꠄꠇꠛꠣꠞ “ꠘꠣ” ꠘꠣꠄ,
ꠔꠣꠁꠘ ꠔ ꠢꠇꠟ ꠡꠝꠄꠃ “ꠅꠄ।”
২০ ꠀꠟ꠆ꠟꠣ ꠙꠣꠇꠞ ꠢꠇꠟ ꠅꠀꠖꠣꠃ ꠔ ꠀꠟ-ꠝꠍꠤꠞ ꠝꠣꠎꠖꠤ ꠙꠥꠞꠣ ꠅꠄ।
ꠄꠞꠟꠣꠉꠤ ꠝꠥꠘꠣꠎꠣꠔꠞ ꠡꠝꠄ ꠀꠟ꠆ꠟꠣꠞ ꠉꠃꠞꠛꠞ ꠟꠣꠉꠤ ꠀꠟ-ꠝꠍꠤꠞ ꠘꠣꠝꠞ ꠃꠍꠤꠟ꠆ꠟꠣꠄ ꠀꠝꠞꠣ “ꠀꠝꠤꠘ” ꠝꠣꠘꠤ “ꠅꠄ” ꠇꠁꠛ
২১ ꠀꠞ ꠀꠟ-ꠝꠍꠤꠞ ꠟꠣꠉꠤ ꠀꠝꠞꠣꠞꠦ ꠀꠞ ꠔꠥꠝꠞꠣꠞꠦ ꠎꠦꠁꠘ ꠝꠎꠛꠥꠔ ꠇꠞꠤ ꠐꠤꠇꠣꠁ ꠞꠣꠈꠍꠂꠘ,
ꠔꠣꠘ ꠘꠣꠝ ꠀꠟ꠆ꠟꠣ।
ꠔꠣꠁꠘꠃ ꠀꠝꠞꠣꠞꠦ ꠈꠦꠟꠣꠚꠔꠤ ꠖꠤꠍꠂꠘ।
২২ ꠔꠣꠘ ꠘꠤꠎꠞ ꠗꠘ ꠢꠤꠡꠣꠛꠦ ꠀꠝꠞꠣꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠤꠀ ꠞꠣꠈꠍꠂꠘ,
ꠀꠞ ꠔꠣꠁꠘ ꠎꠦꠔꠣ ꠀꠝꠞꠣꠞꠦ ꠖꠤꠛꠣꠞ ꠅꠀꠖꠣ ꠇꠞꠍꠂꠘ,
ꠁꠔꠣꠞ ꠙꠄꠟꠣ ꠇꠤꠡ꠆ꠔꠤ ꠢꠤꠡꠣꠛꠦ ꠀꠝꠞꠣꠞ ꠖꠤꠟꠞ ꠝꠣꠎꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ।