ꠇꠞꠤꠘ꠆ꠔ ꠎꠝꠣꠔꠞꠦ ꠀꠈꠦꠞꠤ ꠢꠥꠡꠤꠀꠞꠤ
১৩
১ ꠜꠣꠁꠀꠂꠘꠞꠦ,
ꠀꠝꠤ ꠅꠃ ꠔꠤꠘ ꠘꠝ꠆ꠛꠞ ꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠞꠣꠝ।
ꠎꠣꠘꠅ ꠔ,
ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
“ꠖꠥꠁ ꠛꠣ ꠔꠤꠘ ꠎꠘ ꠝꠣꠘꠡꠦ ꠄꠇꠁ ꠟꠣꠈꠣꠘ ꠡꠣꠇ꠆ꠇꠤ ꠖꠤꠟꠦ ꠅꠃ ꠛꠦꠙꠣꠞ ꠢꠣꠍꠣ ꠙꠞꠝꠣꠘ ꠅꠄ।”
২ ꠔꠦ ꠀꠝꠤ ꠎꠦꠛꠟꠣ ꠖꠥꠍꠞꠣꠛꠣꠞ ꠔꠥꠝꠞꠣꠞ ꠉꠦꠍꠦ ꠉꠦꠍꠟꠣꠝ,
ꠢꠃ ꠍꠚꠞꠞ ꠀꠉꠦ ꠎꠦꠞꠣ ꠉꠥꠘꠣ-ꠇꠍꠥꠞꠤ ꠇꠞꠍꠤꠟ,
ꠀꠝꠤ ꠔꠣꠞꠣꠞꠦ ꠀꠞ ꠛꠣꠖ-ꠛꠣꠇꠤ ꠢꠇꠟꠞꠦ ꠢꠥꠡꠤꠀꠞ ꠇꠞꠤ ꠖꠤꠍꠟꠣꠝ।
ꠀꠞ ꠅꠈꠘ ꠀꠝꠤ ꠘꠤꠎꠦ ꠀꠎꠤꠞ ꠘꠣ ꠅꠁꠟꠦꠅ ꠔꠣꠞꠣꠞꠦ ꠅꠟꠣ ꠢꠥꠡꠤꠀꠞ ꠇꠞꠤ ꠖꠤꠞꠣꠝ,
ꠀꠝꠤ ꠀꠞꠇꠛꠣꠞ ꠀꠁꠟꠦ ꠔꠣꠞꠣ ꠇꠦꠃ ꠞꠦꠢꠣꠁ ꠙꠣꠁꠔꠣ ꠘꠣꠄ।
৩ ꠔꠥꠝꠞꠣ ꠛꠥꠟꠦ ꠙꠞꠝꠣꠘ ꠌꠣꠁꠞꠣꠄ,
ꠀꠝꠣꠞ ꠝꠥꠈ ꠖꠤꠀ ꠀꠟ-ꠝꠍꠤꠄ ꠝꠣꠔꠤꠞꠣ ꠘꠤ।
ꠀꠍꠟꠦ ꠀꠟ-ꠝꠍꠤ ꠔ ꠔꠥꠝꠞꠣꠞ ꠛꠦꠙꠣꠞꠦ ꠇꠥꠘꠥꠝꠘ꠆ꠔꠦꠃ ꠇꠝꠎꠥꠞ ꠘꠣꠄ,
ꠔꠣꠘ ꠘꠤꠎꠞ ꠛꠟ-ꠡꠇ꠆ꠔꠤ ꠔꠥꠝꠞꠣꠞ ꠝꠣꠎꠦ ꠀꠎꠤꠞ ꠀꠍꠦ।
৪ ꠎꠥꠖꠤꠅ ꠔꠣꠘꠞꠦ ꠇꠝꠎꠥꠞ ꠢꠣꠟꠔꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠎꠣꠘꠦ ꠝꠣꠞꠣ ꠅꠁꠍꠤꠟ,
ꠔꠣ-ꠅ ꠀꠟ꠆ꠟꠣꠞ ꠇꠥꠖꠞꠔꠤ ꠛꠟꠦ ꠔꠣꠁꠘ ꠅꠈꠘ ꠎꠤꠘ꠆ꠖꠣ ꠀꠍꠂꠘ।
ꠀꠞ ꠀꠝꠞꠣꠅ ꠅꠟꠣ ꠔꠣꠘ ꠟꠣꠈꠣꠘ ꠇꠝꠎꠥꠞ ꠀꠍꠤ,
ꠅꠁꠟꠦ ꠔꠣꠘ ꠟꠉꠦ ꠎꠤꠘ꠆ꠖꠣ ꠞꠅꠀꠄ ꠀꠟ꠆ꠟꠣꠁ ꠇꠥꠖꠞꠔꠤ ꠛꠟꠦ ꠔꠥꠝꠞꠣꠞ ꠉꠦꠍꠦ ꠀꠁꠀ ꠝꠥꠇꠣꠛꠤꠟꠣ ꠅꠁꠝꠥ।
৫ ꠔꠥꠝꠞꠣ ꠘꠤꠎꠞꠦ ꠎꠣꠌꠣꠁ ꠇꠞꠤ ꠖꠦꠈꠅ,
ꠀꠟ-ꠝꠍꠤꠞ ꠃꠙꠞꠦ ꠢꠣꠍꠣꠞꠞ ꠁꠝꠣꠘ ꠀꠍꠦ ꠘꠤ?
ꠔꠥꠝꠞꠣ ꠛꠥꠎꠅ ꠘꠣ ꠘꠤ,
ꠁꠍꠣ ꠀꠟ-ꠝꠍꠤ ꠔꠥꠝꠞꠣꠞ ꠖꠤꠟꠅ ꠀꠍꠂꠘ।
ꠈꠤꠀꠟ ꠞꠣꠈꠤꠅ,
ꠎꠣꠌꠣꠁ ꠇꠞꠣꠔ ꠉꠤꠀ ꠎꠣꠘꠥ ꠔꠥꠝꠞꠣꠞ ꠝꠣꠎꠦ ꠜꠦꠎꠣꠟ ꠘꠣ ꠝꠤꠟꠦ।
৬ ꠀꠞ ꠀꠝꠤ ꠀꠡꠣ ꠇꠞꠤ ꠔꠥꠝꠞꠣ ꠛꠥꠎꠛꠣꠄ,
ꠀꠝꠞꠣ ꠔ ꠈꠣꠐꠤ ꠢꠤꠡꠣꠛꠦ ꠙꠞꠝꠣꠘ ꠅꠁꠉꠦꠍꠤ।
৭ ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠝꠥꠘꠣꠎꠣꠔ ꠇꠞꠞꠣꠝ,
ꠔꠥꠝꠞꠣ ꠢꠇꠟ ꠟꠣꠈꠣꠘ ꠛꠖ ꠇꠣꠝ ꠕꠣꠇꠤ ꠛꠣꠌꠤꠀ ꠞꠅ।
ꠀꠝꠞꠣ ꠘꠤꠎꠞ ꠙꠞꠦꠎꠉꠣꠞꠤꠞ ꠙꠞꠝꠣꠘ ꠖꠦꠈꠣꠘꠤꠞ ꠟꠣꠉꠤ ꠁꠈꠣꠘ ꠇꠁꠞꠣꠝ ꠘꠣ।
ꠀꠞ ꠝꠣꠘꠡꠦ ꠀꠝꠞꠣꠞꠦ ꠙꠞꠦꠎꠉꠣꠞ ꠝꠘꠅ ꠘꠣ ꠇꠞꠟꠦꠅ,
ꠔꠥꠝꠞꠣ ꠢꠣꠝꠦꠡꠣ ꠘꠦꠇ ꠇꠣꠝ ꠇꠞꠣꠔ ꠞꠅ।
৮ ꠀꠝꠞꠣꠞ ꠈꠦꠝꠔꠣ ꠅꠁꠟ ꠢꠇꠞ ꠙꠇ꠆ꠇꠦ,
ꠘꠣ-ꠢꠇꠞ ꠙꠇ꠆ꠇꠦ ꠀꠝꠞꠣꠞ ꠇꠥꠘꠥ ꠛꠟ ꠘꠣꠁ।
৯ ꠔꠦ ꠀꠝꠞꠣ ꠎꠦꠛꠟꠣ ꠇꠝꠎꠥꠞ ꠀꠞ ꠔꠥꠝꠞꠣ ꠛꠟꠛꠣꠘ,
ꠁꠔꠣ ꠖꠦꠈꠟꠦ ꠀꠝꠞꠣ ꠈꠥꠡꠤ।
ꠀꠝꠞꠣ ꠖꠥꠀ ꠇꠞꠤꠀꠞ,
ꠔꠥꠝꠞꠣ ꠔꠃꠛꠣ ꠇꠞꠤꠀ ꠢꠣꠞꠤ ꠙꠥꠞꠣꠙꠥꠞ ꠈꠣꠐꠤ ꠅꠅ।
১০ ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞ ꠉꠦꠍ ꠕꠣꠇꠤ ꠖꠥꠞꠁ ꠞꠁꠀ ꠁꠔꠣ ꠟꠦꠈꠞꠣꠝ,
ꠎꠣꠔꠦ ꠔꠥꠝꠞꠣꠞ ꠍꠣꠝꠘꠦ ꠀꠁꠀ ꠢꠣꠞꠟꠦ ꠝꠣꠟꠤꠇ ꠁꠍꠣꠞ ꠖꠦꠅꠀ ꠈꠦꠝꠔꠣ ꠈꠣꠐꠣꠁꠀ ꠇꠐꠥ ꠛꠦꠛꠢꠣꠞ ꠇꠞꠣ ꠘꠣ ꠟꠣꠉꠦ।
ꠝꠣꠟꠤꠇꠦ ꠀꠝꠣꠞꠦ ꠁ ꠈꠦꠝꠔꠣ ꠖꠤꠍꠂꠘ ꠔꠥꠝꠞꠣꠞꠦ ꠉꠠꠤꠀ ꠔꠥꠟꠣꠞ ꠟꠣꠉꠤ,
ꠈꠦꠔꠤ ꠇꠞꠣꠞ ꠟꠣꠉꠤ ꠘꠣꠄ।
ꠛꠤꠖꠣꠄꠁ ꠍꠣꠟꠣꠝ ꠀꠞ ꠖꠥꠀ
১১ ꠅ ꠜꠣꠁ ꠅꠇꠟ,
ꠢꠦꠡ-ꠝꠦꠡ ꠇꠁꠞꠣꠝ,
ꠔꠥꠝꠞꠣ ꠈꠥꠡꠤ-ꠛꠣꠡꠤ ꠇꠞꠅ,
ꠘꠤꠎꠞꠦ ꠇꠣꠝꠤꠟ ꠛꠣꠘꠣꠅ,
ꠄꠇꠦ-ꠅꠁꠘ꠆ꠘꠞꠦ ꠘꠍꠤꠅꠔ ꠇꠞꠅ,
ꠄꠇꠁ ꠝꠘꠜꠣꠛꠦ ꠞꠅ,
ꠡꠣꠘ꠆ꠔꠤꠄ ꠛꠡꠔ ꠇꠞꠅ।
ꠔꠦꠃ ꠡꠣꠘ꠆ꠔꠤꠞ ꠀꠞ ꠝꠢꠛ꠆ꠛꠔꠞ ꠀꠟ꠆ꠟꠣꠅ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛꠣ।
১৪ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝꠔ,
ꠀꠟ꠆ꠟꠣ ꠙꠣꠇꠞ ꠝꠢꠛ꠆ꠛꠔ,
ꠀꠞ ꠙꠣꠇ ꠞꠥꠢꠥꠞ ꠈꠣꠔꠤꠞ-ꠎꠔꠘ ꠔꠥꠝꠞꠣ ꠢꠇꠟꠞ ꠖꠤꠟꠅ ꠞꠃꠇ।
ꠀꠝꠤꠘ॥