ꠢꠎꠞꠔ ꠙꠣꠃꠟꠥꠍꠞ ꠈꠣꠍ ꠖꠞꠡꠘ
১২
১ ꠔꠦ ꠀꠝꠣꠞ ꠀꠞꠅ ꠇꠤꠍꠥ ꠛꠠꠣꠁ ꠇꠞꠣ ꠖꠞꠇꠣꠞ,
ꠁ ꠛꠠꠣꠁꠄ ꠇꠥꠘꠥ ꠚꠣꠄꠖꠣ ꠘꠣꠁ,
ꠅꠁꠟꠦ ꠝꠣꠟꠤꠇ ꠁꠍꠣꠄ ꠎꠦ ꠖꠞꠡꠘ ꠖꠦꠈꠣꠁꠍꠂꠘ ꠀꠞ ꠎꠦꠔꠣ ꠎꠣꠘꠣꠁꠍꠂꠘ,
ꠁꠔꠣ ꠅꠈꠘ ꠇꠁꠞꠣꠝ।
২ ꠢꠎꠞꠔ ꠁꠍꠣꠞ ꠄꠇꠎꠘ ꠈꠣꠖꠤꠝꠞꠦ ꠀꠝꠤ ꠌꠤꠘꠤ,
ꠅꠈꠘ ꠕꠣꠇꠤ ꠌꠃꠖ꠆ꠖ ꠛꠍꠞ ꠀꠉꠦ ꠝꠦꠞꠣꠎ ꠡꠞꠤꠚꠞ ꠟꠣꠉꠤ ꠔꠣꠘꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀ ꠅꠁꠍꠤꠟ।
ꠔꠣꠁꠘ ꠎꠣꠘ꠆ꠘꠣꠔꠥꠟ-ꠚꠦꠞꠖꠃꠍꠅ ꠉꠦꠟꠣ,
ꠁ ꠡꠝꠄ ꠔꠣꠁꠘ ꠡ-ꠡꠞꠤꠟꠦ ꠉꠦꠍꠂꠘ ꠇꠤ ꠘꠣ ꠎꠣꠘꠤ ꠘꠣ,
ꠈꠣꠟꠤ ꠀꠟ꠆ꠟꠣꠄꠃ ꠎꠣꠘꠂꠘ।
৩ ꠔꠦ ꠄꠘꠞꠦ ꠀꠝꠤ ꠌꠤꠘꠤ,
ꠅꠁꠟꠦ ꠔꠣꠘꠦ ꠡ-ꠡꠞꠤꠟꠦ ꠘꠦꠅꠀ ꠅꠁꠍꠦ ꠇꠤ ꠘꠣ ꠀꠝꠤ ꠎꠣꠘꠤ ꠘꠣ,
ꠈꠣꠟꠤ ꠀꠟ꠆ꠟꠣ ꠙꠣꠇꠦ ꠎꠣꠘꠂꠘ।
৪ ꠝꠦꠞꠣꠎ ꠡꠞꠤꠚꠅ ꠘꠤꠀ ꠢꠣꠞꠟꠦ ꠔꠣꠘ ꠟꠉꠦ ꠛꠃꠔ ꠛꠣꠔꠌꠤꠔ ꠇꠞꠣ ꠅꠁꠍꠦ,
ꠁꠔꠣ ꠛꠣꠔꠌꠤꠔ ꠝꠣꠘꠡꠞꠦ ꠢꠥꠘꠣꠘꠤ ꠑꠤꠇ ꠘꠣꠄ।
৫ ꠅꠃꠟꠣ ꠝꠣꠘꠡꠞꠦ ꠟꠁꠀ ꠀꠝꠤ ꠛꠠꠣꠁ ꠇꠞꠝꠥ।
ꠀꠝꠣꠞ ꠘꠤꠎꠞꠦ ꠟꠁꠀ ꠇꠥꠘꠥ ꠛꠠꠣꠁ ꠘꠣꠄ,
ꠈꠣꠟꠤ ꠀꠝꠣꠞ ꠇꠝꠎꠥꠞꠤꠞ ꠟꠣꠉꠤ ꠛꠠꠣꠁ ꠇꠞꠝꠥ।
৬ ꠅꠃ ꠛꠠꠣꠁ ꠖꠦꠈꠣꠁꠔꠦ ꠌꠣꠁꠟꠦꠅ,
ꠀꠝꠤ ꠇꠥꠘꠥ ꠛꠦꠀꠈꠟꠤ ꠇꠞꠔꠣꠝ ꠘꠣꠄ,
ꠈꠣꠟꠤ ꠢꠣꠍꠣ ꠝꠣꠔ ꠝꠣꠔꠤꠝꠥ।
ꠔꠣ-ꠅ ꠀꠝꠤ ꠛꠠꠣꠁ ꠖꠦꠈꠣꠘꠤ ꠛꠣꠖ ꠖꠤꠟꠣꠁꠟꠣꠝ,
ꠇꠤꠎꠣꠘꠥ ꠀꠝꠣꠞ ꠇꠣꠝ-ꠇꠣꠎ ꠖꠦꠈꠤꠀ ꠛꠣ ꠀꠝꠣꠞ ꠝꠥꠈꠞ ꠎꠛꠣꠘꠛꠘ꠆ꠖꠤ ꠢꠥꠘꠤꠀ,
ꠝꠣꠘꠡꠦ ꠅꠈꠘ ꠀꠝꠣꠞꠦ ꠎꠔꠈꠣꠘ ꠝꠘꠅ ꠇꠞꠂꠘ,
ꠄꠞ ꠌꠣꠁꠔꠦ ꠛꠦꠡꠤ ꠝꠘꠅ ꠇꠞꠤꠟꠣꠁꠘ।
৭ ꠀꠟ꠆ꠟꠣꠄ ꠀꠝꠣꠞꠦ ꠅꠔ ꠛꠣꠔꠥꠘꠤ ꠛꠦꠙꠣꠞ ꠎꠣꠘꠣꠘꠤꠄ ꠀꠝꠣꠞ ꠖꠤꠟꠅ ꠎꠣꠘꠥ ꠅꠢꠋꠇꠣꠞ ꠘꠣ ꠀꠄ,
ꠅꠃ ꠘꠤꠅꠔꠦ ꠔꠣꠁꠘ ꠀꠝꠣꠞ ꠡꠞꠤꠟꠅ ꠄꠇꠐꠣ ꠞꠤꠙꠥ ꠖꠤꠟꠣ,
ꠀꠝꠣꠞꠦ ꠇꠡ꠆ꠐ ꠖꠤꠛꠣꠞ ꠟꠣꠉꠤ,
ꠅꠃ ꠞꠤꠙꠥ ꠅꠁꠟ ꠁꠛꠟꠤꠍꠞ ꠌꠦꠟꠣ।
৮ ꠝꠣꠟꠤꠇ ꠁꠍꠣꠞ ꠖꠞꠛꠣꠞꠅ ꠀꠝꠤ ꠔꠤꠘꠛꠣꠞ ꠀꠞꠎ ꠇꠞꠍꠟꠣꠝ,
ꠅꠃ ꠞꠤꠙꠥꠉꠥ ꠀꠝꠣꠞ ꠉꠦꠍ ꠕꠣꠇꠤ ꠢꠞꠣꠁꠀ ꠘꠤꠔꠣꠉꠤ।
৯ ꠅꠁꠟꠦ ꠔꠣꠁꠘ ꠎꠥꠀꠙ ꠖꠤꠟꠣ,
“ꠀꠝꠣꠞ ꠞꠢꠝꠔꠃ ꠔꠥꠝꠣꠞ ꠛꠃꠔꠔꠣ,
ꠀꠝꠣꠞ ꠛꠟ-ꠡꠇ꠆ꠔꠤ ꠝꠤꠟꠦ ꠈꠣꠟꠤ ꠇꠝꠎꠥꠞ ꠢꠣꠟꠔꠦ।”
ꠄꠞꠟꠣꠉꠤ ꠀꠝꠣꠞ ꠇꠝꠎꠥꠞꠤꠞ ꠛꠦꠙꠣꠞꠦ ꠀꠝꠤ ꠈꠥꠡꠤ ꠝꠘꠦꠃ ꠛꠠꠣꠁ ꠇꠞꠝꠥ,
ꠎꠣꠔꠦ ꠀꠟ-ꠝꠍꠤꠞ ꠅꠃ ꠛꠟ-ꠡꠇ꠆ꠔꠤ ꠀꠝꠣꠞ ꠝꠣꠎꠦ ꠛꠡꠔ ꠇꠞꠦ।
১০ ꠔꠦ ꠀꠟ-ꠝꠍꠤꠞ ꠘꠣꠝꠞ ꠟꠣꠉꠤ ꠘꠣꠘꠣꠘ ꠟꠣꠈꠣꠘ ꠇꠝꠎꠥꠞꠤ,
ꠛꠦꠁꠎ꠆ꠎꠔꠤ,
ꠅꠜꠣꠛ-ꠅꠘꠐꠘ,
ꠎꠥꠟꠥꠝ-ꠝꠍꠤꠛꠔ,
ꠀꠞ ꠛꠦꠚꠣꠘꠣꠔ ꠙꠠꠟꠦꠅ ꠀꠝꠤ ꠈꠥꠡꠤ ꠅꠁ।
ꠇꠣꠞꠘ ꠇꠝꠎꠥꠞ ꠢꠣꠟꠔꠦꠃ ꠀꠝꠤ ꠛꠟꠛꠣꠘ ꠅꠁ।
ꠇꠞꠤꠘ꠆ꠔ ꠎꠝꠣꠔꠞ ꠟꠣꠉꠤ ꠌꠤꠘ꠆ꠔꠣ-ꠜꠣꠛꠘꠣ
১১ ꠀꠝꠤ ꠙꠣꠉꠟ ꠅꠁꠍꠤ ꠑꠤꠇꠃ,
ꠅꠁꠟꠦ ꠔꠥꠝꠞꠣꠃ ꠀꠝꠣꠞꠦ ꠙꠣꠉꠟ ꠅꠁꠔꠦ ꠛꠣꠁꠖ꠆ꠖ ꠇꠞꠍ।
ꠔꠥꠝꠞꠣꠞ ꠃꠌꠤꠔ ꠀꠍꠤꠟ ꠀꠝꠣꠞ ꠔꠣꠞꠤꠚ ꠇꠞꠣ।
ꠀꠝꠤ ꠎꠥꠖꠤꠅ ꠈꠥꠛ ꠡꠣꠗꠣꠞꠘ ꠝꠣꠘꠥꠡ,
ꠔꠦꠛꠃ ꠔꠥꠝꠞꠣꠞ ꠢꠃ ꠘꠣꠝ-ꠒꠣꠇꠤ ꠍꠣꠢꠣꠛꠤ ꠖꠟ ꠕꠣꠇꠤ ꠇꠥꠘꠥꠝꠘ꠆ꠔꠦꠃ ꠢꠥꠞꠥ ꠘꠣꠄ।
১২ ꠀꠝꠤ ꠘꠤꠎꠞꠦ ꠄꠇꠎꠘ ꠢꠇ ꠍꠣꠢꠣꠛꠤ ꠢꠤꠡꠣꠛꠦ ꠙꠞꠝꠣꠘ ꠇꠞꠍꠤ,
ꠛꠃꠔ ꠡꠁꠎ꠆ꠎ ꠇꠞꠤꠀ ꠔꠥꠝꠞꠣꠞ ꠝꠣꠎꠦ ꠘꠣꠘꠣꠘ ꠘꠝꠥꠘꠣꠞ ꠇꠦꠞꠣꠝꠔꠤ ꠇꠣꠝ,
ꠇꠥꠖꠞꠔꠤ ꠘꠤꠡꠣꠘꠣ ꠀꠞ ꠝꠥꠎꠦꠎꠣ ꠖꠦꠈꠣꠁꠍꠤ।
১৩ ꠀꠁꠌ꠆ꠍꠣ ꠇꠅ ꠌꠣꠁꠘ,
ꠅꠁꠘ꠆ꠘ ꠎꠝꠣꠔ ꠅꠇꠟ ꠕꠣꠇꠤ ꠔꠥꠝꠞꠣ ꠇꠥꠘꠥꠝꠘ꠆ꠔꠦ ꠢꠥꠞꠥ ꠘꠤ?
ꠅꠄ,
ꠈꠣꠟꠤ ꠄꠇꠐꠣ ꠛꠦꠙꠣꠞꠦ ꠢꠥꠞꠥ ꠀꠍ,
ꠁꠔꠣ ꠅꠁꠟ,
ꠀꠝꠤ ꠔꠥꠝꠞꠣꠞ ꠉꠦꠍꠦ ꠛꠥꠏꠣ ꠅꠁꠍꠤ ꠘꠣ।
ꠁ ꠜꠥꠟꠞ ꠟꠣꠉꠤ ꠀꠝꠣꠞꠦ ꠝꠣꠚꠤ ꠖꠦꠅ।
১৪ ꠢꠥꠘꠅ,
ꠀꠝꠤ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠅꠃ ꠔꠤꠘ ꠘꠝ꠆ꠛꠞ ꠛꠣꠞ ꠎꠥꠁꠔ ꠅꠁꠟꠣꠝ,
ꠔꠦ ꠀꠝꠤ ꠇꠥꠘꠥ ꠛꠥꠏꠣ ꠅꠁꠔꠣꠝ ꠘꠣꠄ,
ꠔꠥꠝꠞꠣꠞ ꠉꠦꠍꠦ ꠇꠥꠘꠥ ꠗꠘ-ꠍꠣꠝꠣꠘꠣ ꠌꠣꠁꠞꠣꠝ ꠘꠣ,
ꠈꠣꠟꠤ ꠔꠥꠝꠞꠣꠞꠦ ꠌꠣꠁꠞꠣꠝ।
ꠝꠣ-ꠛꠣꠚꠞ ꠟꠣꠉꠤ ꠗꠘ-ꠍꠣꠝꠣꠘꠣ ꠎꠝꠣꠘꠤ ꠔ ꠀꠅꠟꠣꠖꠞ ꠚꠞꠎ ꠘꠣꠄ,
ꠛꠞꠋ ꠝꠣ-ꠛꠣꠚꠞ ꠃꠌꠤꠔ ꠅꠁꠟ ꠀꠅꠟꠣꠖꠞ ꠟꠣꠉꠤ ꠗꠘ ꠎꠝꠣꠘꠤ।
১৫ ꠔꠦ ꠀꠝꠤ ꠈꠥꠛ ꠈꠥꠡꠤ ꠅꠁꠀꠃ ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠢꠇꠟꠔꠣ ꠈꠞꠌ ꠇꠞꠝꠥ,
ꠀꠝꠣꠞ ꠘꠤꠎꠞꠦꠅ ꠛꠤꠟꠣꠁ ꠖꠤꠝꠥ।
ꠀꠝꠤ ꠎꠦꠛꠟꠣ ꠔꠥꠝꠞꠣꠞꠦ ꠛꠦꠡ ꠇꠞꠤ ꠝꠣꠄꠀ-ꠝꠢꠛ꠆ꠛꠔ ꠇꠞꠤꠀꠞ,
ꠔꠦ ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠇꠝ ꠝꠣꠄꠀ ꠇꠞꠞꠣꠄ?
১৬ ꠎꠣꠁ ꠅꠃꠇ,
ꠀꠝꠤ ꠔꠥꠝꠞꠣꠞ ꠃꠙꠞꠦ ꠛꠥꠏꠣ ꠅꠁꠍꠤ ꠘꠣ,
ꠀꠞꠘꠣꠄ ꠇꠦꠃ ꠇꠁꠟꠤꠔ ꠙꠣꠞꠦ,
ꠀꠝꠤ ꠌꠣꠟꠣꠇꠤ ꠇꠞꠤꠀ ꠔꠥꠝꠞꠣꠞꠦ ꠗꠥꠇꠣ ꠖꠤꠍꠤ।
১৭ ꠀꠞ ꠔꠥꠝꠞꠣꠞ ꠉꠦꠍꠦ ꠀꠝꠤ ꠎꠦꠞꠣꠞꠦ ꠙꠣꠑꠣꠁꠍꠟꠣꠝ,
ꠄꠞꠣꠞꠦꠖꠤ ꠔꠥꠝꠞꠣꠞꠦ ꠐꠉꠣꠁꠍꠤ ꠘꠤ?
১৮ ꠔꠤꠔꠣꠍ ꠜꠣꠁꠞꠦ ꠀꠝꠤ ꠝꠤꠘꠔ ꠇꠞꠟꠣꠝ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ,
ꠔꠣꠘ ꠟꠉꠦ ꠢꠃ ꠜꠣꠁꠞꠦꠅ ꠙꠣꠑꠣꠁꠟꠣꠝ।
ꠔꠦ ꠅꠃ ꠔꠤꠔꠣꠍꠦ ꠔꠥꠝꠞꠣꠞꠦ ꠐꠉꠤꠍꠂꠘ ꠘꠤ?
ꠀꠝꠤ ꠀꠞ ꠔꠤꠔꠣꠍ,
ꠀꠝꠞꠣ ꠖꠥꠁꠅꠎꠘꠦ ꠔ ꠄꠇꠁ ꠞꠥꠢꠦ ꠀꠞ ꠄꠇꠁ ꠘꠤꠅꠔꠦ ꠇꠣꠝ ꠇꠞꠤ।
১৯ ꠀꠁꠌ꠆ꠍꠣ,
ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ,
ꠅꠃ ꠌꠤꠑꠤ ꠟꠦꠈꠤꠀ ꠀꠝꠞꠣ ꠘꠤꠎꠞ ꠖꠥꠡ ꠇꠣꠐꠣꠁꠞꠣꠝ?
ꠘꠣ,
ꠁꠈꠣꠘ ꠑꠤꠇ ꠘꠣꠄ,
ꠅ ꠖꠥꠡ꠆ꠔ ꠅꠇꠟ,
ꠀꠝꠞꠣ ꠀꠟ-ꠝꠍꠤꠞ ꠈꠣꠖꠤꠝ ꠢꠤꠡꠣꠛꠦ ꠀꠟ꠆ꠟꠣ ꠙꠣꠇꠞꠦ ꠀꠎꠤꠞ-ꠘꠣꠎꠤꠞ ꠞꠣꠈꠤꠀ ꠟꠦꠈꠞꠣꠝ,
ꠔꠥꠝꠞꠣꠞꠦ ꠉꠠꠤꠀ ꠔꠥꠟꠣꠞ ꠘꠤꠅꠔꠦꠃ ꠁꠔꠣ ꠇꠁꠞꠣꠝ।
২০ ꠀꠍꠟꠦ ꠀꠝꠣꠞ ꠈꠥꠛ ꠒꠞ ꠇꠞꠦꠞ,
ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ,
ꠀꠁꠀ ꠢꠣꠞꠤ ꠔꠥꠝꠞꠣꠞꠦ ꠎꠦꠟꠣ ꠖꠦꠈꠔꠣꠝ ꠌꠣꠁꠞꠣꠝ,
ꠔꠥꠝꠞꠣ ꠎꠥꠖꠤ ꠁꠟꠣꠈꠣꠘ ꠎꠥꠁꠔ ꠘꠣ ꠅꠅ,
ꠀꠞ ꠔꠥꠝꠞꠣꠅ ꠀꠝꠣꠞ ꠎꠦ ꠞꠥꠙ ꠖꠦꠈꠔꠣꠄ ꠌꠣꠅ ꠘꠣ,
ꠀꠝꠤ ꠎꠥꠖꠤ ꠢꠃ ꠞꠥꠙ ꠖꠦꠈꠣꠘꠤ ꠟꠣꠉꠦ।
ꠛꠣ ꠀꠁꠀ ꠖꠦꠈꠤ ꠔꠥꠝꠞꠣꠞ ꠝꠣꠎꠦ ꠇꠣꠁꠎ꠆ꠎꠣ-ꠚꠍꠣꠖ,
ꠁꠋꠡꠣ-ꠘꠤꠘ꠆ꠖꠣ,
ꠞꠣꠉ-ꠉꠥꠍꠣ,
ꠖꠟꠣꠖꠟꠤ,
ꠙꠞꠞ ꠛꠖꠘꠣꠝ ꠉꠣꠅꠀ,
ꠉꠤꠛꠔ ꠉꠣꠅꠀ,
ꠛꠠꠣꠁ-ꠛꠦꠐꠣꠉꠤꠞꠤ ꠀꠞ ꠉꠥꠟꠝꠣꠟ ꠀꠍꠦ।
২১ ꠀꠝꠣꠞ ꠜꠤꠔꠞꠦ ꠒꠞ ꠇꠞꠦꠞ,
ꠀꠝꠤ ꠀꠞꠇꠛꠣꠞ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ,
ꠅꠃ ꠡꠝꠄ ꠀꠝꠣꠞ ꠀꠟ꠆ꠟꠣꠄ ꠘꠤ ꠔꠥꠝꠞꠣꠞ ꠍꠣꠝꠘꠦ ꠀꠝꠣꠞꠦ ꠡꠞꠝꠤꠘ꠆ꠖꠣ ꠛꠣꠘꠣꠁꠟꠣꠁꠘ,
ꠎꠦꠔꠣ ꠝꠣꠘꠡꠦ ꠉꠥꠘꠣ ꠇꠞꠍꠂꠘ,
ꠎꠦꠔꠣꠄ ꠘꠣꠙꠣꠇꠤ ꠇꠣꠝ,
ꠎꠤꠘꠣ,
ꠀꠞ ꠛꠖꠝꠣꠁꠡꠤ ꠇꠞꠤꠀ ꠔꠃꠛꠣ ꠇꠞꠍꠦ ꠘꠣ,
ꠅꠔꠣꠞꠦ ꠖꠦꠈꠤꠀ ꠘꠤ ꠀꠝꠤ ꠝꠘꠞ ꠝꠣꠎꠦ ꠇꠡ꠆ꠐ ꠙꠣꠁ।