ꠀꠟ꠆ꠟꠣꠞ ꠘꠥꠞꠦ ꠘꠄꠀ ꠎꠤꠘ꠆ꠖꠦꠉꠤ ꠇꠣꠐꠣꠅ
৫
১ ꠔꠥꠝꠞꠣ ꠔ ꠀꠟ꠆ꠟꠣꠞ ꠝꠣꠄꠀꠞ ꠀꠅꠟꠣꠖ,
ꠔꠦ ꠙꠥꠔ ꠎꠦꠟꠣ ꠛꠣꠚꠞ ꠟꠣꠈꠣꠘ ꠅꠄ,
ꠔꠥꠝꠞꠣꠅ ꠅꠟꠣ ꠅꠅ।
২ ꠀꠟ-ꠝꠍꠤꠄ ꠎꠦꠟꠣ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠍꠂꠘ,
ꠔꠥꠝꠞꠣꠅ ꠅꠟꠣ ꠝꠣꠄꠀ-ꠝꠢꠛ꠆ꠛꠔꠞ ꠙꠕꠦ ꠌꠟꠅ।
ꠔꠣꠁꠘ ꠀꠝꠞꠣꠞꠦ ꠛꠣꠌꠣꠁꠔꠣ ꠇꠞꠤ ꠘꠤꠎꠞ ꠎꠣꠘꠞꠦ ꠈꠥꠡꠛꠄꠖꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠀꠟ꠆ꠟꠣꠞ ꠘꠣꠝꠦ ꠛꠤꠟꠣꠁ ꠖꠤꠍꠂꠘ।
৩ ꠇꠥꠘꠥ ꠘꠝꠥꠘꠣꠞ ꠎꠤꠘꠣ,
ꠘꠣꠙꠣꠇꠤ ꠀꠞ ꠟꠥꠜ-ꠟꠣꠟꠌꠞ ꠇꠕꠣ ꠔꠥꠝꠞꠣꠞ ꠝꠣꠎꠦ ꠎꠣꠘꠥ ꠘꠣ ꠢꠥꠘꠣ ꠎꠣꠄ,
ꠇꠣꠞꠘ ꠁꠔꠣ ꠇꠣꠝ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣꠞ ꠟꠣꠉꠤ ꠑꠤꠇ ꠘꠣꠄ।
৪ ꠀꠞ ꠛꠦꠢꠣꠄꠀ-ꠛꠦꠁꠎ꠆ꠎꠔꠤꠞ ꠎꠦꠇꠥꠘꠥ ꠝꠣꠔ-ꠇꠕꠣ,
ꠀꠌꠣꠞ-ꠛꠦꠛꠢꠣꠞ ꠛꠣ ꠈꠛꠤꠍꠤ ꠑꠣꠐ꠆ꠐꠣ-ꠝꠡꠇꠞꠣ ꠎꠣꠘꠥ ꠔꠥꠝꠞꠣꠞ ꠝꠣꠎꠦ ꠘꠣ ꠅꠄ,
ꠁꠔꠣꠄ ꠔꠥꠝꠞꠣꠞꠦ ꠝꠣꠘꠣꠄ ꠘꠣ।
ꠁꠔꠣꠞ ꠛꠖꠟꠣ ꠀꠟ꠆ꠟꠣꠞ ꠡꠥꠇꠥꠞ-ꠉꠥꠎꠣꠞ ꠇꠞꠅ।
৫ ꠔꠥꠝꠞꠣ ꠔ ꠎꠣꠘꠅꠃ,
ꠎꠤꠘꠣꠇꠥꠞ,
ꠘꠣꠙꠣꠇ ꠀꠞ ꠟꠣꠟꠌꠤ ꠝꠣꠘꠡꠦ,
ꠀꠟ꠆ꠟꠣ ꠙꠣꠇ ꠀꠞ ꠀꠟ-ꠝꠍꠤꠞ ꠛꠣꠖꠡꠣꠁꠞ ꠝꠣꠎꠦ ꠇꠥꠘꠥ ꠎꠣꠉꠣ ꠙꠣꠁꠔ ꠘꠣꠄ।
ꠁꠔꠣꠄ ꠔ ꠄꠇꠟꠣꠈꠣꠘ ꠝꠥꠞ꠆ꠔꠤꠙꠥꠎꠣ ꠇꠞꠞꠣ।
৬ ꠢꠥꠡꠤꠀꠞ ꠞꠁꠅ,
ꠝꠤꠍꠣ ꠝꠣꠔ ꠝꠣꠔꠤꠀ ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠣ ꠘꠦꠄ,
ꠀꠟ꠆ꠟꠣꠞ ꠘꠣꠚꠞꠝꠣꠘ ꠛꠘꠤꠀ ꠎꠦꠞꠣ ꠁꠔꠣ ꠛꠖ ꠇꠣꠝ ꠇꠞꠦ,
ꠔꠣꠞꠣꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ ꠟꠣꠝꠦ।
৭ ꠔꠥꠝꠞꠣ ꠁꠟꠣꠈꠣꠘ ꠝꠣꠘꠡꠞ ꠟꠉꠦ ꠝꠤꠡꠤꠅ ꠘꠣ,
৮ ꠇꠣꠞꠘ ꠔꠥꠝꠞꠣ ꠀꠉꠦ ꠀꠘ꠆ꠖꠣꠞꠤꠞ ꠝꠣꠎꠦ ꠕꠣꠇꠟꠦꠅ ꠅꠈꠘ ꠔ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠤꠀ ꠘꠥꠞꠞ ꠙꠕꠅ ꠀꠁꠍ।
ꠄꠞꠟꠣꠉꠤ ꠀꠟ꠆ꠟꠣꠞ ꠘꠥꠞꠦ ꠇꠣꠝꠤꠟ ꠎꠘꠦ ꠎꠦꠟꠣ ꠎꠤꠘ꠆ꠖꠦꠉꠤ ꠇꠣꠐꠣꠘꠤ ꠃꠌꠤꠔ,
ꠔꠥꠝꠞꠣ ꠅꠃꠟꠣ ꠌꠟꠅ।
৯ ꠀꠞ ꠘꠥꠞꠦ ꠌꠟꠣꠞ ꠚꠟ ꠅꠁꠟ,
ꠙꠞꠦꠎꠉꠣꠞꠤ,
ꠡꠔꠔꠣ,
ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝ।
১০ ꠄꠞꠟꠣꠉꠤ ꠎꠦ ꠇꠣꠝꠦ ꠝꠣꠟꠤꠇ ꠈꠥꠡꠤ ꠅꠁꠘ,
ꠔꠥꠝꠞꠣ ꠎꠣꠌꠣꠁ ꠇꠞꠤꠀ ꠅꠃ ꠇꠣꠝ ꠇꠞꠅ।
১১ ꠀꠘ꠆ꠖꠣꠁꠞ ꠎꠉꠔꠞ ꠛꠦꠚꠣꠄꠖꠣ ꠇꠣꠝꠞ ꠟꠉꠦ ꠇꠥꠘꠥ ꠘꠝꠥꠘꠣꠞ ꠡꠝ꠆ꠙꠞ꠆ꠇ ꠞꠣꠈꠤꠅ ꠘꠣ,
ꠛꠞꠋ ꠔꠥꠝꠞꠣ ꠅꠔꠣꠞ ꠖꠥꠡ ꠖꠦꠈꠣꠁ ꠖꠦꠅ।
১২ ꠝꠣꠘꠡꠦ ꠟꠥꠇꠣꠁꠀ ꠎꠦꠔꠣ ꠇꠣꠝ ꠇꠞꠂꠘ,
ꠁꠔꠣ ꠛꠦꠙꠣꠞꠦ ꠇꠥꠘ꠆ꠔꠣ ꠝꠣꠔꠣꠅ ꠡꠞꠝ।
১৩ ꠘꠥꠞꠞ ꠝꠣꠎꠖꠤ ꠖꠥꠡ ꠖꠦꠈꠣꠁꠀ ꠖꠤꠟꠣꠁꠟꠦ ꠁꠔꠣ ꠎꠣꠁꠞꠣ ꠅꠁꠎꠣꠄ,
১৪ ꠇꠣꠞꠘ ꠅꠃ ꠘꠥꠞꠦꠃ ꠢꠇꠟꠔꠣ ꠎꠣꠁꠞ ꠇꠞꠦ।
ꠄꠞꠟꠣꠉꠤ ꠍꠤꠟ꠆ꠟꠦꠈ ꠀꠍꠦ,
ꠅ ꠊꠥꠝꠞ ꠝꠣꠘꠥꠡ,
ꠢꠎꠣꠉ ꠅꠅ,
ꠝꠞꠣ ꠕꠣꠇꠤ ꠎꠤꠔꠣ ꠅꠅ,
ꠔꠦꠃ ꠀꠟ-ꠝꠍꠤꠞ ꠘꠥꠞꠦ,
ꠘꠥꠞꠣꠘꠤ ꠇꠞꠤꠛꠣ ꠔꠥꠝꠣꠞꠦ।
১৫ ꠔꠥꠝꠞꠣ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤ ꠖꠦꠈꠅ,
ꠔꠥꠝꠞꠣꠞ ꠌꠣꠟ-ꠌꠟꠘ ꠇꠤꠟꠣꠈꠣꠘ।
ꠛꠦꠀꠈꠟꠞ ꠟꠣꠈꠣꠘ ꠘꠣ ꠌꠟꠤꠀ,
ꠀꠈꠟꠖꠣꠞꠞ ꠟꠣꠈꠣꠘ ꠌꠟꠅ।
১৬ ꠘꠦꠇ ꠇꠣꠝ ꠇꠞꠣꠞ ꠎꠦ ꠡꠥꠎꠥꠉ ꠔꠥꠝꠞꠣꠞ ꠀꠔꠅ ꠀꠍꠦ,
ꠁꠔꠣ ꠡꠥꠟ꠆ꠟꠀꠘꠣ ꠇꠣꠝꠅ ꠟꠣꠉꠣꠅ,
ꠎꠣꠘꠅ ꠔ ꠅꠈꠘꠇꠥꠞ ꠎꠝꠣꠘꠣ ꠈꠣꠞꠣꠙ।
১৭ ꠄꠞꠟꠣꠉꠤꠃ ꠇꠁꠞꠣꠝ,
ꠔꠥꠝꠞꠣ ꠛꠦꠀꠈꠟ ꠛꠘꠤꠅ ꠘꠣ,
ꠛꠞꠋ ꠝꠣꠟꠤꠇꠞ ꠝꠞ꠆ꠎꠤꠞꠦ ꠛꠥꠎꠅ।
১৮ ꠝꠖꠞ ꠘꠤꠡꠣꠄ ꠐꠣꠟ ꠅꠁꠅ ꠘꠣ,
ꠁꠔꠣꠄ ꠎꠤꠘ꠆ꠖꠦꠉꠤ ꠘꠡ꠆ꠐ ꠇꠞꠤꠟꠣꠄ।
ꠛꠞꠋ ꠙꠥꠞꠣꠙꠥꠞ ꠙꠣꠇ ꠞꠥꠢꠥꠞ ꠛꠡꠦ ꠞꠅ,
১৯ ꠔꠥꠝꠞꠣ ꠢꠣꠝꠖ,
ꠇꠣꠅꠀꠟꠤ ꠀꠞ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠞ ꠉꠎꠟ ꠉꠣꠁꠀ ꠄꠇꠦ-ꠅꠁꠘ꠆ꠘꠦ ꠛꠣꠔꠌꠤꠔ ꠇꠞꠅ;
ꠔꠥꠝꠞꠣꠞ ꠖꠤꠟꠞ ꠜꠤꠔꠞꠦ ꠝꠣꠟꠤꠇꠞ ꠘꠣꠝꠦ ꠉꠎꠟ ꠉꠣꠅ।
২০ ꠢꠣꠝꠦꠡꠣ ꠢꠇꠟ ꠛꠦꠙꠣꠞꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠅ।
ꠎꠣꠝꠣꠁ-ꠛꠃꠞ ꠛꠦꠙꠣꠞꠦ ꠔꠣꠟꠤꠝ
২১ ꠀꠟ-ꠝꠍꠤꠞ ꠁꠎ꠆ꠎꠔ ꠀꠞ ꠒꠞꠦ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠖꠤꠟ ꠕꠣꠇꠤ ꠝꠣꠁꠘ꠆ꠘ ꠇꠞꠅ।
২২ ꠔꠥꠝꠞꠣ ꠎꠦꠞꠣ ꠛꠃ ꠅꠁꠍ,
ꠔꠥꠝꠞꠣ ꠎꠦꠟꠣ ꠝꠣꠟꠤꠇ ꠁꠍꠣꠞꠦ ꠝꠣꠁꠘ꠆ꠘ ꠇꠞꠅ,
ꠅꠃ ꠟꠣꠈꠣꠘ ꠎꠣꠞꠎꠤꠞ ꠎꠣꠝꠣꠁꠞꠦ ꠝꠣꠁꠘ꠆ꠘ ꠇꠞꠅ।
২৩ ꠇꠣꠞꠘ ꠀꠟ-ꠝꠍꠤ ꠎꠦꠟꠣ ꠎꠝꠣꠔꠞ,
ꠝꠣꠘꠤ ꠔꠣꠘ ꠡꠞꠤꠟꠞ ꠝꠣꠕꠣ,
ꠎꠣꠝꠣꠁꠅ ꠅꠟꠣ ꠛꠃꠞ ꠝꠣꠕꠣ।
ꠀꠍꠟꠦ ꠀꠟ-ꠝꠍꠤꠃ ꠅꠃ ꠀꠡ꠆ꠔꠣ ꠡꠞꠤꠟꠞ ꠔꠞꠣꠘꠦꠀꠟꠣ।
২৪ ꠀꠞ ꠎꠝꠣꠔ ꠎꠦꠟꠣ ꠀꠟ-ꠝꠍꠤꠞ ꠎꠤꠝ꠆ꠝꠣꠄ ꠀꠍꠦ,
ꠅꠃꠟꠣ ꠛꠃ ꠅꠇꠟꠅ ꠢꠇꠟ ꠛꠦꠙꠣꠞꠦ ꠎꠣꠝꠣꠁꠞ ꠎꠤꠝ꠆ꠝꠣꠄ ꠞꠅꠀ ꠃꠌꠤꠔ।
২৫ ꠔꠥꠝꠞꠣ ꠎꠦꠞꠣ ꠎꠣꠝꠣꠁ ꠅꠁꠍ,
ꠢꠥꠘꠅ,
ꠀꠟ-ꠝꠍꠤꠄ ꠎꠦꠟꠣ ꠎꠝꠣꠔꠞꠦ ꠝꠢꠛ꠆ꠛꠔ ꠇꠞꠍꠂꠘ,
ꠑꠤꠇ ꠅꠟꠣꠈꠣꠘ ꠔꠥꠝꠞꠣꠅ ꠎꠣꠞꠎꠤꠞ ꠛꠃꠞꠦ ꠝꠢꠛ꠆ꠛꠔ ꠇꠞꠤꠅ।
ꠔꠣꠁꠘ ꠔ ꠎꠝꠣꠔꠞ ꠟꠣꠉꠤ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ।
২৬ ꠔꠣꠘ ꠈꠤꠀꠟ ꠅꠁꠟ,
ꠔꠣꠁꠘ ꠎꠝꠣꠔꠞꠦ ꠙꠛꠤꠔ꠆ꠞ ꠇꠞꠣꠞ ꠟꠣꠉꠤ,
ꠔꠣꠘ ꠇꠣꠟꠣꠝꠞ ꠝꠣꠎꠖꠤ ꠝꠣꠘꠡꠞꠦ ꠔꠞꠤꠇꠣꠞ ꠉꠥꠍꠟ ꠇꠞꠣꠁꠀ,
২৭ ꠘꠥꠞꠞ ꠝꠢꠤꠝꠣꠄ ꠘꠤꠎꠞ ꠍꠣꠝꠘꠦ ꠀꠎꠤꠞ ꠇꠞꠣ।
ꠅꠃ ꠡꠝꠄ ꠎꠝꠣꠔꠞ ꠝꠣꠎꠦ ꠇꠥꠘꠥ ꠇꠟꠋꠇꠞ ꠖꠣꠉ,
ꠈꠥꠔ ꠛꠣ ꠁꠟꠣ ꠇꠥꠘ꠆ꠔꠣꠃ ꠞꠁꠔ ꠘꠣꠄ,
ꠁꠔꠣ ꠙꠣꠇ-ꠙꠛꠤꠔ꠆ꠞ ꠀꠞ ꠘꠤꠈꠥꠔ ꠅꠁꠛ।
২৮ ꠄꠞꠟꠣꠉꠤ ꠎꠣꠝꠣꠁꠄ ꠔꠣꠞ ꠘꠤꠎꠞ ꠡꠞꠤꠟꠞꠦ ꠎꠦꠟꠣ ꠝꠣꠄꠀ ꠇꠞꠦ,
ꠑꠤꠇ ꠔꠣꠞ ꠛꠃꠞꠦꠅ ꠅꠃꠟꠣ ꠝꠣꠄꠀ ꠇꠞꠣ ꠚꠞꠎ।
ꠘꠤꠎꠞ ꠛꠃꠞꠦ ꠝꠣꠄꠀ ꠇꠞꠣꠞ ꠝꠣꠘꠤ ꠅꠁꠟ,
ꠘꠤꠎꠞ ꠡꠞꠤꠟꠞꠦ ꠝꠣꠄꠀ ꠇꠞꠣ।
২৯ ꠇꠦꠃ ꠔ ꠇꠥꠘꠥ ꠡꠝꠄ ꠔꠣꠞ ꠘꠤꠎꠞ ꠡꠞꠤꠟꠞꠦ ꠊꠤꠘ꠆ꠘꠣꠄ ꠘꠣ,
ꠢꠇꠟꠦꠃ ꠎꠣꠞꠎꠤꠞ ꠡꠞꠤꠟꠞ ꠜꠞꠘ-ꠙꠥꠡꠘ ꠇꠞꠦ।
ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ,
ꠀꠟ-ꠝꠍꠤꠄꠅ ꠔꠣꠘ ꠎꠝꠣꠔꠞ ꠜꠞꠘ-ꠙꠥꠡꠘ ꠎꠥꠉꠣꠁꠘ।
৩০ ꠇꠣꠞꠘ ꠀꠝꠞꠣ ꠔꠣꠘ ꠡꠞꠤꠟꠞ ꠅꠋꠉ।
৩১ ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ,
“ꠄꠞꠟꠣꠉꠤꠃ ꠛꠦꠐꠣꠁꠘ꠆ꠔꠦ ꠝꠣ-ꠛꠣꠚꠞꠦ ꠍꠣꠠꠤꠀ ꠛꠃꠞ ꠟꠉꠦ ꠕꠣꠇꠛꠣ,
ꠔꠣꠞꠣ ꠖꠥꠁꠅꠎꠘ ꠄꠇ ꠡꠞꠤꠟ ꠅꠁꠛꠣ।”
৩২ ꠁꠈꠣꠘ ꠅꠁꠟ ꠛꠃꠔ ꠛꠠ ꠛꠣꠔꠥꠘꠤ ꠛꠦꠙꠣꠞ,
ꠀꠍꠟꠦ ꠀꠝꠤ ꠔ ꠀꠟ-ꠝꠍꠤ ꠀꠞ ꠔꠣꠘ ꠎꠝꠣꠔꠞ ꠛꠦꠙꠣꠞꠦ ꠇꠁꠞꠣꠝ।
৩৩ ꠎꠣꠁ ꠅꠃꠇ,
ꠔꠥꠝꠞꠣ ꠢꠇꠟꠦꠃ ꠎꠣꠞꠎꠤꠞ ꠛꠃꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ,
ꠀꠞ ꠛꠃ ꠅꠇꠟꠦꠅ ꠎꠣꠞꠎꠤꠞ ꠎꠣꠝꠣꠁꠞꠦ ꠁꠎ꠆ꠎꠔ ꠇꠞꠣ ꠎꠞꠥꠞ।