ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍꠦ (ꠞꠣ꠩) ꠝꠃꠔꠞ ꠕꠥꠠꠣ ꠀꠉꠦ ꠔꠞꠤꠇꠣꠞ ꠡꠣꠉꠞꠤꠖ ꠢꠎꠞꠔ ꠔꠤꠝꠕꠤꠞ (ꠞ:)

ꠉꠦꠍꠦ ꠅꠃ ꠍꠢꠤꠚꠣꠈꠣꠘ ꠌꠤꠑꠤꠞ ꠀꠇꠣꠞꠦ ꠟꠦꠈꠍꠂꠘ।

ꠢꠎꠞꠔ ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ৩১ ꠛꠍꠞ ꠛꠣꠖꠦ ꠁꠈꠣꠘ ꠟꠦꠈꠣ ꠅꠁꠍꠦ।

ꠁꠍꠣ ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠣꠝꠅ ꠛꠃꠔ ꠖꠥꠈ-ꠇꠡ꠆ꠐ ꠙꠣꠁꠔꠦ ꠙꠣꠁꠔꠦ ꠝꠥꠞꠛ꠆ꠛꠤ ꠛꠄꠅꠡꠅ ꠔꠣꠘ ꠡꠞꠤꠟ ꠈꠥꠛ ꠖꠥꠞꠛꠟ ꠅꠁꠉꠦꠍꠤꠟ।

ꠛꠤꠗꠞ꠆ꠝꠤ ꠞꠥꠝꠣꠘ ꠛꠣꠖꠡꠣꠞ ꠎꠦꠟ ꠈꠣꠘꠣꠔ ꠛꠘ꠆ꠖꠤ ꠢꠣꠟꠔꠦ ꠔꠣꠁꠘ ꠎꠦꠛꠟꠣ ꠘꠤꠎꠞ ꠉꠞ꠆ꠖꠣꠘ ꠎꠣꠅꠀꠞ ꠟꠣꠉꠤ ꠛꠣꠞ ꠌꠣꠁꠞꠣ,

ꠅꠃ ꠡꠝꠄ ꠔꠣꠁꠘ ꠁꠈꠣꠘ ꠟꠦꠈꠍꠂꠘ।

ꠁ ꠍꠢꠤꠚꠣꠞ ৪ ꠞꠥꠇꠥ ৭-৮ ꠀꠄꠀꠔꠅ ꠔꠣꠁꠘ ꠇꠁꠍꠟꠣ,

“ꠀꠝꠤ ꠔ ꠀꠟ-ꠝꠍꠤꠞ ꠟꠣꠉꠤ ꠎꠣꠘꠦ-ꠙꠞꠣꠘꠦ ꠟꠣꠠꠣꠁ ꠇꠞꠍꠤ,

ꠀꠝꠣꠞꠦ ꠛꠣꠔꠣꠁ ꠖꠦꠅꠀ ꠙꠕꠞ ꠢꠦꠡ ꠝꠣꠕꠣ ꠙꠞ꠆ꠎꠘ꠆ꠔ ꠖꠃꠠꠣꠁꠍꠤ,

ꠀꠝꠣꠞ ꠁꠝꠣꠘ ꠐꠤꠇꠣꠁꠀ ꠞꠣꠈꠍꠤ।

ꠔꠦ ꠀꠝꠣꠞ ꠙꠞꠦꠎꠉꠣꠞꠤꠞ ꠙꠥꠞꠥꠡ꠆ꠇꠣꠞ ꠔ ꠎꠝꠣ ꠀꠍꠦ,

ꠢꠃ ꠢꠇ-ꠁꠘꠍꠣꠚꠇꠣꠞꠤ ꠝꠣꠟꠤꠇꠦ ꠞꠥꠎ ꠢꠣꠡꠞꠞ ꠖꠤꠘ ꠀꠝꠣꠞꠦ ꠎꠄꠅꠞ ꠝꠣꠟꠣ ꠙꠥꠞꠥꠡ꠆ꠇꠣꠞ ꠖꠤꠛꠣ।

ꠁꠔꠣ ꠈꠣꠟꠤ ꠀꠝꠣꠞꠦ ꠘꠣꠄ,

ꠎꠔ ꠝꠣꠘꠥꠡ ꠀꠡꠤꠇ ꠅꠁꠀ ꠔꠣꠘ ꠟꠣꠉꠤ ꠛꠣꠞ ꠌꠣꠁꠞꠣ,

ꠔꠣꠞꠣ ꠢꠇꠟꠞꠦꠃ ꠖꠤꠛꠣ।”

ꠄꠞ ꠇꠁꠄꠇ ꠛꠍꠞ ꠀꠉꠦ ꠅꠃ ꠢꠎꠞꠔ ꠔꠤꠝꠕꠤꠞ ꠉꠦꠍꠦ ꠔꠣꠁꠘ ‘ꠙꠄꠟꠣ ꠔꠤꠝꠕꠤ’ ꠘꠣꠝꠦ ꠀꠞꠇ ꠍꠢꠤꠚꠣ ꠟꠦꠈꠍꠤꠟꠣ।

ꠀꠞ ꠅꠈꠘ ꠔꠣꠁꠘ ꠔꠤꠝꠕꠤꠞꠦ ꠝꠤꠘꠔꠤ ꠎꠣꠘꠣꠁꠞꠣ ꠀꠉꠞ ꠔꠣꠟꠤꠝ ꠅꠇꠟ ꠝꠘꠅ ꠞꠣꠈꠣꠞ ꠟꠣꠉꠤ।

ꠅꠃ ꠍꠤꠙꠣꠞꠣꠞ ২ ꠞꠥꠇꠥ ১৫ ꠀꠄꠀꠔꠅ ꠀꠍꠦ,

“ꠔꠥꠝꠤ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠘꠤꠎꠞꠦ ꠙꠞꠦꠎꠉꠣꠞ ꠢꠣꠟꠔꠦ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠅ,

ꠅꠃ ꠟꠣꠈꠣꠘ ꠇꠣꠝꠟꠣ ꠛꠘꠅ,

ꠎꠦ ꠇꠣꠝꠟꠣꠄ ꠀꠟ꠆ꠟꠣꠞ ꠖꠞꠛꠣꠞꠅ ꠡꠞꠝ ꠙꠣꠅꠀꠞ ꠇꠥꠘꠥ ꠇꠣꠞꠘ ꠘꠣꠁ।

ꠎꠦ ꠇꠣꠝꠟꠣꠄ ꠡꠑꠤꠇ ꠜꠣꠛꠦ ꠢꠇ ꠇꠣꠟꠣꠝ ꠔꠣꠟꠤꠝ ꠖꠦꠁꠘ,

ꠅꠃ ꠟꠣꠈꠣꠘ ꠅꠅ।”