ꠀꠟ꠆ꠟꠣꠄ ꠝꠥꠝꠤꠘ ꠅꠇꠟꠞꠦ ꠡꠣꠡꠘ ꠇꠞꠂꠘ
১২
১ ꠔꠦ ꠀꠝꠞꠣ ꠖꠦꠈꠞꠣꠝ,
ꠁꠝꠣꠘꠤ ꠔꠦꠎꠞ ꠛꠃꠔ ꠡꠣꠇ꠆ꠇꠤ ꠀꠝꠞꠣꠞ ꠌꠣꠁꠞꠅꠛꠣꠄ ꠀꠍꠦ।
ꠄꠞꠟꠣꠉꠤ ꠀꠅ,
ꠀꠝꠞꠣꠅ ꠢꠇꠟ ꠎꠣꠄ-ꠎꠣꠝꠦꠟꠣ ꠢꠞꠣꠁ,
ꠎꠦ ꠉꠥꠘꠣꠄ ꠀꠝꠞꠣꠞꠦ ꠙꠦꠌꠣꠁꠀ ꠞꠣꠈꠦ,
ꠅꠔꠣꠞꠦ ꠢꠞꠣꠁꠀ ꠚꠣꠟꠣꠁ,
ꠀꠞ ꠖꠃꠠꠣꠅꠞꠣ ꠖꠟꠞ ꠟꠉꠦ ꠅꠁꠀ ꠗꠂꠎ꠆ꠎ ꠗꠞꠤ ꠢꠦꠡ ꠙꠞ꠆ꠎꠘ꠆ꠔ ꠖꠃꠠꠣꠁ।
২ ꠀꠃꠇ꠆ꠇꠣ,
ꠀꠝꠞꠣꠞ ꠘꠎꠞ ꠞꠣꠈꠤ ꠝꠣꠟꠤꠇ ꠁꠍꠣꠞ ꠛꠣꠄ,
ꠀꠃꠀꠟ ꠕꠣꠇꠤ ꠀꠈꠦꠞ ꠙꠞ꠆ꠎꠘ꠆ꠔ ꠔꠣꠁꠘ ꠅꠁꠟꠣ ꠀꠝꠞꠣꠞ ꠁꠝꠣꠘꠞ ꠝꠥꠟ ꠈꠥꠐꠤ।
ꠔꠣꠘ ꠟꠣꠉꠤ ꠎꠦ ꠈꠥꠡꠤ ꠞꠣꠈꠣ ꠅꠁꠍꠦ,
ꠅꠃ ꠈꠥꠡꠤꠞ ꠛꠣꠄꠖꠤ ꠌꠣꠁꠀ,
ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠃꠙꠞꠞ ꠝꠃꠔꠞꠦꠅ ꠇꠛꠥꠟ ꠇꠞꠟꠣ,
ꠁ ꠛꠦꠁꠎ꠆ꠎꠔꠤꠞꠦ ꠇꠥꠘꠥ ꠖꠣꠝ ꠖꠤꠟꠣ ꠘꠣ।
ꠀꠞ ꠅꠈꠘ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠔꠣꠁꠘ ꠔꠡꠞꠤꠚ ꠞꠣꠈꠍꠂꠘ।
৩ ꠔꠦ ꠎꠦꠁꠘ ꠉꠥꠘꠣꠉꠣꠞ ꠝꠣꠘꠡꠞ ꠅꠔ ꠛꠠ ꠖꠥꠡꠝꠘꠤꠞꠦ ꠡꠁꠎ꠆ꠎ ꠇꠞꠟꠣ,
ꠔꠣꠘ ꠛꠦꠙꠣꠞꠦ ꠌꠤꠘ꠆ꠔꠣ ꠇꠞꠅ,
ꠎꠣꠔꠦ ꠔꠥꠝꠞꠣꠞ ꠖꠤꠟꠅ ꠇꠥꠘꠥ ꠇꠝꠎꠥꠞꠤ ꠛꠣ ꠘꠤꠞꠣꠡꠣ ꠘꠣ ꠀꠄ।
৪ ꠉꠥꠘꠣꠞ ꠟꠉꠦ ꠟꠣꠠꠣꠁꠔ ꠟꠣꠉꠤꠀ ꠔ ꠟꠃ ꠛꠣꠞꠅꠘꠤꠞ ꠖꠡꠣ ꠔꠥꠝꠞꠣꠞ ꠅꠈꠘꠅ ꠅꠁꠍꠦ ꠘꠣ।
৫ ꠔꠥꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ,
ꠔꠣꠘ ꠀꠅꠟꠣꠖ ꠢꠤꠡꠣꠛꠦ ꠔꠥꠝꠞꠣꠞꠦ ꠎꠦ ꠘꠍꠤꠅꠔ ꠇꠞꠍꠂꠘ,
ꠔꠥꠝꠞꠣ ꠔ ꠁꠔꠣ ꠚꠣꠃꠞꠤꠟꠤꠍ ꠘꠤ?
ꠇꠤꠔꠣꠛꠅ ꠀꠍꠦ,
ꠅ ꠀꠝꠣꠞ ꠙꠥꠔ,
ꠝꠣꠛꠥꠖꠞ ꠡꠣꠡꠘꠞꠦ ꠄꠟꠣꠝꠤ ꠇꠞꠤꠅ ꠘꠣ,
ꠔꠣꠁꠘ ꠇꠥꠘꠥ ꠗꠣꠝꠇꠤ ꠖꠤꠟꠦ,
ꠛꠦꠎꠣꠞ ꠅꠁꠅ ꠘꠣ।
৬ ꠇꠣꠞꠘ ꠝꠣꠛꠥꠖꠦ ꠎꠦꠞꠣꠞꠦ ꠝꠢꠛ꠆ꠛꠔ ꠇꠞꠂꠘ,
ꠔꠣꠞꠣꠞꠦꠃ ꠡꠣꠡꠘ ꠇꠞꠂꠘ,
ꠎꠦꠞꠣꠞꠦ ꠔꠣꠁꠘ ꠀꠅꠟꠣꠖ ꠢꠤꠡꠣꠛꠦ ꠇꠛꠥꠟ ꠇꠞꠤꠟꠣꠁꠘ,
ꠄꠞꠣ ꠙꠞꠔꠦꠇ ꠎꠘꠞꠦ ꠔꠣꠁꠘ ꠡꠣꠎꠣ ꠖꠦꠁꠘ।
৭ ꠡꠣꠡꠘ ꠝꠘꠅ ꠇꠞꠤꠀ ꠔꠥꠝꠞꠣ ꠇꠡ꠆ꠐ ꠡ꠆ꠛꠤꠇꠣꠞ ꠇꠞꠅ।
ꠛꠣꠚꠦ-ꠙꠥꠔꠦ ꠎꠦꠟꠣꠈꠣꠘ ꠡꠝ꠆ꠙꠞ꠆ꠇ,
ꠀꠟ꠆ꠟꠣꠄꠅ ꠔꠥꠝꠞꠣꠞ ꠟꠉꠦ ꠅꠃꠟꠣ ꠡꠝ꠆ꠙꠞ꠆ꠇ ꠞꠣꠈꠍꠂꠘ।
ꠁꠟꠣ ꠇꠥꠘꠥ ꠙꠥꠔ ꠀꠍꠦ ꠘꠤ,
ꠎꠣꠞꠦ ꠔꠣꠞ ꠛꠣꠚꠦ ꠡꠣꠡꠘ ꠇꠞꠂꠘ ꠘꠣ?
৮ ꠢꠇ꠆ꠇꠟ ꠙꠥꠔꠞꠦꠃ ꠡꠣꠡꠘ ꠇꠞꠣ ꠅꠄ।
ꠔꠥꠝꠞꠣꠞꠦ ꠎꠥꠖꠤ ꠡꠣꠡꠘ ꠇꠞꠣ ꠘꠣ ꠅꠄ,
ꠔꠦ ꠔ ꠔꠥꠝꠞꠣ ꠚꠥꠋꠉꠣ,
ꠀꠍꠟ ꠙꠥꠔ ꠘꠣꠄ।
৯ ꠎꠣꠘꠅ ꠔ,
ꠀꠝꠞꠣꠞ ꠖꠥꠘꠤꠀꠛꠤ ꠛꠣꠚ ꠅꠇꠟꠦ ꠀꠝꠞꠣꠞꠦ ꠡꠣꠡꠘ ꠇꠞꠂꠘ,
ꠀꠞ ꠀꠝꠞꠣ ꠔꠣꠞꠣꠞꠦ ꠁꠎ꠆ꠎꠔ ꠇꠞꠤ।
ꠔꠦ ꠎꠦꠁꠘ ꠀꠝꠞꠣꠞ ꠀꠍꠝꠣꠘꠤ ꠛꠣꠚ,
ꠔꠣꠘ ꠉꠦꠍꠦ ꠉꠞ꠆ꠖꠘꠣ ꠘꠥꠀꠁꠀ ꠌꠟꠣ ꠀꠝꠞꠣꠞ ꠟꠣꠉꠤ ꠎꠞꠥꠞ ꠘꠣꠄ ꠘꠤ,
ꠎꠣꠔꠦ ꠀꠝꠞꠣ ꠎꠤꠘ꠆ꠖꠦꠉꠤ ꠙꠣꠁ?
১০ ꠀꠝꠞꠣꠞ ꠖꠥꠘꠤꠀꠛꠤ ꠛꠣꠚ ꠅꠇꠟꠦ ꠎꠦꠟꠣ ꠜꠣꠟꠣ ꠝꠘꠅ ꠇꠞꠔꠣ,
ꠅꠟꠣ ꠀꠝꠞꠣꠞꠦ ꠡꠣꠡꠘ ꠇꠞꠔꠣ,
ꠀꠞ ꠁꠔꠣ ꠔ ꠕꠥꠠꠣ ꠇꠄꠖꠤꠘꠞ ꠟꠣꠉꠤ,
ꠅꠁꠟꠦ ꠀꠟ꠆ꠟꠣꠄ ꠔ ꠀꠝꠞꠣꠞꠦ ꠡꠣꠡꠘ ꠇꠞꠞꠣ ꠎꠣꠔꠦ ꠀꠝꠞꠣꠅ ꠔꠣꠘ ꠙꠣꠇ-ꠙꠛꠤꠔ꠆ꠞꠔꠣ ꠢꠣꠍꠤꠟ ꠇꠞꠤ।
১১ ꠇꠥꠘꠥ ꠡꠣꠡꠘꠞꠦꠃ ꠈꠥꠡꠤꠞ ꠛꠦꠙꠣꠞ ꠝꠘꠅ ꠇꠞꠣ ꠅꠄ ꠘꠣ,
ꠖꠥꠈꠞ ꠛꠦꠙꠣꠞꠃ ꠝꠘꠅ ꠅꠄ,
ꠅꠁꠟꠦ ꠎꠦꠞꠣ ꠡꠣꠡꠘ ꠝꠣꠘꠤꠀ ꠌꠟꠦ,
ꠔꠣꠞꠣ ꠛꠣꠖꠦ ꠖꠤꠘꠖꠣꠞꠤꠞ ꠡꠣꠘ꠆ꠔꠤꠀꠟꠣ ꠎꠤꠘ꠆ꠖꠦꠉꠤ ꠙꠣꠄ।
১২ ꠄꠞꠟꠣꠉꠤ ꠔꠥꠝꠞꠣꠞ ꠇꠝꠎꠥꠞ ꠀꠔꠞꠦ ꠝꠎꠛꠥꠔ ꠇꠞꠅ,
ꠖꠥꠞꠛꠟ ꠀꠐꠥꠞꠦ ꠡꠛꠟ ꠇꠞꠅ।
১৩ ꠔꠥꠝꠞꠣ ꠡꠤꠖꠣ ꠙꠕꠦ ꠀꠐꠅ,
ꠎꠣꠔꠦ ꠟꠦꠋꠠꠣ ꠙꠣꠅ ꠀꠞ ꠘꠣ ꠇꠌꠇꠦ,
ꠛꠞꠋ ꠜꠣꠟꠣ ꠅꠁꠎꠣꠄ।
ꠀꠟ꠆ꠟꠣꠞ ꠉꠎꠛ ꠕꠣꠇꠤ ꠎꠣꠘ ꠛꠣꠌꠣꠅ
১৪ ꠢꠇꠟ ꠝꠣꠘꠡꠞ ꠟꠉꠦ ꠡꠣꠘ꠆ꠔꠤꠄ ꠛꠡꠔ ꠇꠞꠣ ꠀꠞ ꠙꠣꠇ-ꠙꠣꠇꠤꠎꠣ ꠅꠁꠀ ꠌꠟꠣꠞ ꠟꠣꠉꠤ ꠈꠤꠀꠟꠤ ꠅꠅ,
ꠁꠟꠣ ꠘꠣ ꠌꠟꠟꠦ ꠇꠦꠃ ꠝꠣꠟꠤꠇꠞ ꠖꠞꠡꠘ ꠙꠣꠁꠔꠣꠄ ꠘꠣꠄ।
১৫ ꠢꠥꠡꠤꠀꠞ ꠞꠁꠅ,
ꠎꠣꠔꠦ ꠇꠦꠃ ꠀꠟ꠆ꠟꠣꠞ ꠞꠢꠝꠔ ꠕꠣꠇꠤ ꠛꠣꠖ ꠘꠣ ꠙꠠꠅ।
ꠈꠤꠀꠟ ꠞꠣꠈꠤꠅ,
ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠣꠘꠥ ꠛꠤꠡꠣꠇ꠆ꠔ ꠔꠤꠔ꠆ꠔꠣ ꠉꠣꠍꠞ ꠎꠠꠞ ꠟꠣꠈꠣꠘ ꠛꠣꠞꠅꠁꠀ ꠘꠣ ꠍꠣꠔꠣꠄ,
ꠀꠞ ꠛꠃꠔ ꠝꠣꠘꠡꠞꠦ ꠘꠣꠙꠣꠇ ꠘꠣ ꠛꠣꠘꠣꠄ।
১৬ ꠢꠎꠞꠔ ꠁꠀꠇꠥꠛꠞ ꠜꠣꠁ ꠁꠡꠞ ꠟꠣꠈꠣꠘ ꠇꠥꠘꠥ ꠛꠦ-ꠙꠕꠤ ꠘꠣꠚꠞꠝꠣꠘ ꠙꠄꠖꠣ ꠘꠣ ꠅꠄ।
ꠁꠡꠦ ꠔ ꠈꠣꠟꠤ ꠄꠇ ꠅꠇ꠆ꠔꠞ ꠈꠣꠘꠤꠞ ꠟꠣꠉꠤ,
ꠔꠣꠞ ꠘꠤꠎꠞ ꠝꠃꠞꠡꠤ ꠝꠣꠟꠤꠇꠣꠘꠣ ꠛꠦꠌꠤꠟꠣꠁꠍꠦ।
১৭ ꠔꠥꠝꠞꠣꠞ ꠔ ꠎꠣꠘꠣꠃ ꠀꠍꠦ,
ꠎꠥꠖꠤꠅ ꠛꠣꠖꠦ ꠢꠦ ꠌꠈꠥꠞ ꠙꠣꠘꠤ ꠚꠣꠟꠣꠁꠀ ꠇꠣꠘ꠆ꠖꠤ ꠇꠣꠘ꠆ꠖꠤ ꠖꠥꠀ ꠝꠣꠋꠉꠤꠍꠤꠟ,
ꠅꠁꠟꠦ ꠔꠃꠛꠣ ꠇꠞꠣꠞ ꠡꠥꠎꠥꠉ ꠀꠞ ꠢꠦ ꠙꠣꠁꠍꠦ ꠘꠣ।
১৮ ꠔꠥꠝꠞꠣ ꠘꠤꠌ꠆ꠌꠄ ꠁꠟꠣ ꠇꠥꠘꠥ ꠙꠣꠠꠞ ꠇꠣꠘ꠆ꠖꠣꠔ ꠀꠁꠍ ꠘꠣ,
ꠎꠦ ꠙꠣꠠꠅ ꠀꠔꠖꠤ ꠍꠅꠀ ꠎꠣꠄ।
ꠢꠃ ꠔꠥꠞ ꠙꠣꠠꠞ ꠎꠣꠟꠣꠁꠟ ꠀꠉꠥꠁꠘ,
ꠉꠁꠘ ꠀꠘ꠆ꠖꠣꠁꠞ,
ꠢꠤꠟ-ꠔꠥꠚꠣꠘ,
১৯ ꠡꠤꠋꠉꠣꠞ ꠀꠅꠀꠎ,
ꠛꠣ ꠎꠥꠞꠦ ꠎꠥꠞꠦ ꠝꠣꠔ-ꠇꠕꠣꠞ ꠇꠥꠘꠥ ꠀꠅꠀꠎꠞ ꠉꠦꠍꠦꠅ ꠀꠁꠍ ꠘꠣ।
ꠎꠥꠞꠦ ꠎꠥꠞꠦ ꠝꠣꠔꠞ ꠅꠃ ꠀꠅꠀꠎ ꠎꠦꠞꠣ ꠢꠥꠘꠍꠤꠟ,
ꠔꠣꠞꠣ ꠝꠤꠘꠔ ꠇꠞꠤ ꠇꠁꠍꠤꠟ,
ꠎꠣꠔꠦ ꠔꠣꠞꠣꠞ ꠟꠉꠦ ꠀꠞ ꠛꠣꠔꠌꠤꠔ ꠇꠞꠣ ꠘꠣ ꠅꠄ।
২০ ꠔꠣꠞꠣ ꠀꠟ꠆ꠟꠣꠞ ꠅꠃ ꠢꠥꠇꠥꠝ ꠡꠁꠔ ꠙꠣꠞꠍꠤꠟ ꠘꠣ,
ꠀꠟ꠆ꠟꠣꠄ ꠇꠁꠍꠟꠣ,
“ꠎꠥꠖꠤ ꠇꠥꠘꠥ ꠙꠡꠥꠄꠅ ꠁ ꠙꠣꠠꠅ ꠍꠄ,
ꠔꠦ ꠔꠣꠞꠦꠅ ꠇꠣꠋꠇꠠ ꠝꠣꠞꠤꠀ ꠝꠣꠞꠤꠟꠤꠔꠦ ꠅꠁꠛ।”
২১ ꠅꠃ ꠡꠝꠄ ꠎꠦꠞꠣ ꠝꠣꠛꠥꠖꠞ ꠖꠤꠖꠣꠞ ꠖꠦꠈꠍꠤꠟ,
ꠔꠣꠞꠣ ꠅꠔ ꠒꠞ ꠒꠞꠣꠁꠍꠤꠟ ꠎꠦꠘ,
ꠡ꠆ꠛꠄꠅꠋ ꠝꠥꠍꠣ ꠘꠛꠤꠄ ꠇꠁꠟꠣ,
“ꠒꠞꠞ ꠌꠥꠐꠦ ꠀꠝꠤ ꠇꠣꠙꠤꠞꠣꠝ।”
২২ ꠅꠁꠟꠦ ꠔꠥꠝꠞꠣ ꠔ ꠙꠛꠤꠔ꠆ꠞ ꠍꠤꠅꠘ ꠙꠣꠠ ꠀꠞ ꠎꠤꠘ꠆ꠖꠣ ꠀꠟ꠆ꠟꠣꠞ ꠐꠣꠃꠘꠞ ꠇꠣꠍꠣꠔ ꠀꠁꠍ,
ꠀꠎꠣꠞ ꠀꠎꠣꠞ ꠚꠤꠞꠤꠡ꠆ꠔꠣꠄ ꠎꠦꠈꠣꠘꠅ ꠈꠥꠡꠤ-ꠛꠣꠡꠤꠞ ꠝꠣꠢꠚꠤꠟ ꠇꠞꠞꠣ,
ꠢꠘꠅ ꠀꠁꠍ।
ꠁ ꠐꠣꠃꠘ ꠅꠁꠟꠉꠤ,
ꠛꠦꠢꠦꠡ꠆ꠔꠤ ꠎꠦꠞꠥꠎꠣꠟꠦꠝ।
২৩ ꠛꠦꠢꠦꠡ꠆ꠔꠤ ꠈꠣꠔꠣꠔ ꠎꠦꠞꠣꠞ ꠘꠣꠝ ꠟꠦꠈꠣ ꠅꠁꠉꠦꠍꠦ,
ꠛꠠ ꠙꠥꠀꠞ ꠟꠣꠈꠣꠘ ꠎꠦꠞꠣꠞꠦ ꠁꠎ꠆ꠎꠔ ꠖꠦꠅꠀ ꠅꠁꠍꠦ,
ꠄꠞꠣꠞ ꠛꠣꠘꠣꠁꠟ ꠎꠝꠣꠔꠞ ꠗꠣꠞꠅ ꠀꠁꠍ।
ꠎꠦꠁꠘ ꠔꠣꠝꠣꠝ ꠝꠣꠘꠡꠞ ꠛꠤꠌꠣꠞ ꠇꠞꠂꠘ,
ꠢꠃ ꠀꠟ꠆ꠟꠣꠞ ꠇꠣꠍꠣꠔ ꠀꠁꠍ।
ꠎꠦ ꠙꠞꠦꠎꠉꠣꠞ ꠅꠇꠟ ꠙꠥꠞꠣꠙꠥꠞ ꠇꠣꠝꠤꠟ ꠅꠁꠉꠦꠍꠂꠘ,
ꠄꠞꠣꠞ ꠞꠥꠢꠥꠞ ꠝꠎꠟꠤꠍꠅ ꠀꠁꠍ।
২৪ ꠎꠦ ꠁꠍꠣ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠘꠄꠀ ꠃꠍꠤꠟ꠆ꠟꠣꠞ ꠎꠤꠝ꠆ꠝꠣꠖꠣꠞ,
ꠢꠃ ꠁꠍꠣꠞ ꠉꠦꠍꠦ ꠀꠁꠍ।
ꠢꠣꠛꠤꠟꠞ ꠟꠃ ꠕꠣꠇꠤ ꠀꠞꠅ ꠝꠞꠔꠥꠛꠣꠀꠟꠣ ꠎꠦ ꠟꠃ,
ꠔꠥꠝꠞꠣ ꠍꠤꠐꠣꠁꠟ ꠢꠃ ꠟꠃꠞ ꠇꠣꠍꠣꠔ ꠀꠁꠍ।
২৫ ꠝꠥꠍꠣ ꠘꠛꠤꠄ ꠀꠟ꠆ꠟꠣꠁ ꠢꠥꠡꠤꠀꠞꠤꠞ ꠇꠕꠣ ꠖꠥꠘꠤꠀꠞ ꠝꠣꠘꠡꠞꠦ ꠎꠣꠘꠣꠘꠤꠞ ꠛꠣꠖꠦ ꠎꠦꠞꠣ ꠔꠣꠘ ꠢꠥꠡꠤꠀꠞꠤꠞꠦ ꠄꠟꠣꠝꠤ ꠇꠞꠍꠤꠟ,
ꠄꠞꠣ ꠎꠦꠛꠟꠣ ꠞꠦꠢꠣꠁ ꠙꠣꠁꠍꠂꠘ ꠘꠣ,
ꠔꠦ ꠎꠦꠁꠘ ꠛꠦꠢꠦꠡ꠆ꠔꠅ ꠕꠣꠇꠤꠀ ꠀꠝꠞꠣꠞꠦ ꠢꠥꠡꠤꠀꠞ ꠇꠞꠞꠣ,
ꠔꠣꠘ ꠢꠥꠡꠤꠀꠞꠤꠞꠦ ꠄꠟꠣꠝꠤ ꠇꠞꠟꠦ ꠔ ꠄꠇ꠆ꠇꠦꠛꠣꠞꠦ ꠘꠤꠌ꠆ꠌꠤꠔꠃ ꠀꠝꠞꠣ ꠇꠥꠘꠥ ꠞꠦꠢꠣꠁ ꠙꠣꠁꠔꠣꠝ ꠘꠣꠄ।
ꠄꠞꠟꠣꠉꠤ ꠈꠤꠀꠟ ꠞꠣꠈꠤꠅ,
ꠎꠦꠁꠘ ꠢꠃ ꠛꠣꠔꠌꠤꠔ ꠇꠞꠍꠂꠘ,
ꠔꠣꠘ ꠢꠥꠇꠥꠝꠞꠦ ꠄꠟꠣꠝꠤ ꠇꠞꠤꠅ ꠘꠣ।
২৬ ꠢꠤ ꠀꠝꠟꠅ ꠀꠟ꠆ꠟꠣ ꠙꠣꠇꠞ ꠝꠥꠈꠞ ꠀꠅꠀꠎꠦ ꠢꠣꠞꠣ ꠖꠥꠘꠤꠀꠞꠦ ꠇꠣꠙꠣꠁꠍꠤꠟ,
ꠅꠁꠟꠦ ꠅꠈꠘ ꠔꠣꠁꠘ ꠅꠃ ꠅꠀꠖꠣ ꠇꠞꠍꠂꠘ,
“ꠀꠝꠤ ꠖꠥꠍꠞꠣꠛꠣꠞ ꠈꠣꠟꠤ ꠁ ꠖꠥꠘꠤꠀꠞꠦ ꠘꠣꠄ,
ꠀꠍꠝꠣꠘꠞꠦꠅ ꠇꠣꠙꠣꠁꠝꠥ।”
২৭ ꠔꠦ “ꠖꠥꠍꠞꠣꠛꠣꠞ” ꠅꠃ ꠡꠛ꠆ꠖ ꠕꠣꠇꠤ ꠛꠥꠎꠣ ꠎꠣꠄ ꠎꠦꠘ,
ꠎꠦꠔꠣ ꠎꠤꠘꠤꠡ ꠅꠇꠟ ꠟꠣꠠꠣ-ꠌꠣꠠꠣ ꠇꠞꠣꠁꠟ ꠎꠣꠄ,
ꠝꠣꠘꠤ ꠎꠦꠔꠣ ꠙꠄꠖꠣ ꠇꠞꠣ ꠅꠁꠍꠦ,
ꠁꠔꠣꠞꠦ ꠛꠣꠖ ꠖꠦꠅꠀ ꠅꠁꠎꠤꠛ,
ꠀꠞ ꠎꠦꠔꠣꠞꠦ ꠟꠣꠠꠣ-ꠌꠣꠠꠣ ꠇꠞꠣ ꠎꠣꠄ ꠘꠣ,
ꠅꠔꠣ ꠇꠣꠁꠝ ꠞꠄ।
২৮ ꠛꠥꠎꠞꠣ ꠘꠤ,
ꠎꠦ ꠛꠣꠖꠡꠣꠁꠞꠦ ꠟꠣꠠꠣ-ꠌꠣꠠꠣ ꠇꠞꠣ ꠎꠣꠄ ꠘꠣ,
ꠀꠝꠞꠣ ꠔ ꠢꠃ ꠛꠣꠖꠡꠣꠁ ꠙꠣꠁꠞꠣꠝ,
ꠄꠞꠟꠣꠉꠤ ꠀꠃꠇ꠆ꠇꠣ,
ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠡꠥꠇꠞꠤꠀ ꠎꠣꠘꠣꠁ।
ꠀꠟ꠆ꠟꠣ ꠙꠣꠇ ꠎꠦ ꠘꠝꠥꠘꠣꠄ ꠈꠥꠡꠤ ꠅꠁꠘ,
ꠅꠃ ꠘꠝꠥꠘꠣꠄ ꠀꠝꠞꠣ ꠔꠣꠘ ꠄꠛꠣꠖꠔ ꠇꠞꠔꠣꠝ ꠙꠣꠞꠝꠥ,
ꠔꠣꠘꠞꠦ ꠒꠞꠣꠁꠀ,
ꠔꠣꠎꠤꠝ ꠇꠞꠤꠀ ꠄꠛꠣꠖꠔ ꠇꠞꠝꠥ।
২৯ ꠇꠣꠞꠘ ꠀꠝꠞꠣꠞ ꠀꠟ꠆ꠟꠣ ꠔ ꠛꠤꠘꠣꠡ ꠇꠞꠞꠣ ꠀꠉꠥꠘꠤꠞ ꠟꠣꠈꠣꠘ।