ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ꠖꠥꠍꠞꠣ ꠍꠤꠙꠣꠞꠣ
ꠀꠟ-ꠝꠣꠞ꠆ꠇꠥꠍ
ꠢꠎꠞꠔ ꠁꠍꠣꠄ ꠈꠦꠟꠣꠚꠔꠤ ꠙꠣꠁꠟꠣ (১:১-১৩)
ꠢꠎꠞꠔ ꠄꠢꠤꠀ (ꠀ꠩)-ꠅꠞ ꠔꠛꠟꠤꠉ
১
১ ꠀꠟ꠆ꠟꠣ ꠙꠣꠇꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠁꠘ꠆ꠎꠤꠟ,
ꠝꠣꠘꠤ ꠈꠥꠡ-ꠈꠛꠞꠤ ꠛꠄꠀꠘꠤꠞ ꠡꠥꠞꠥ।
২ ꠛꠃꠔ ꠖꠤꠘ ꠀꠉꠦ,
ꠢꠎꠞꠔ ꠁꠡꠣꠄꠀ ꠘꠛꠤꠞ ꠇꠤꠔꠣꠛꠅ ꠀꠟ꠆ꠟꠣ ꠙꠣꠇꠦ ꠛꠣꠔꠣꠁꠍꠂꠘ,
ꠢꠥꠘꠅ,
ꠀꠝꠤ ꠔꠥꠝꠣꠞ ꠀꠉꠦ
ꠀꠝꠣꠞ ꠙꠦꠉꠣꠝ꠆ꠛꠞꠞꠦ ꠛꠦꠎꠤꠀꠞ,
ꠄꠁꠘ ꠔꠥꠝꠣꠞ ꠙꠕ ꠍꠢꠤ ꠇꠞꠛꠣ।
৩ ꠝꠞꠥꠜꠥꠝꠤꠞ ꠝꠣꠎꠦ ꠎꠥꠞꠦ ꠎꠥꠞꠦ ꠄꠇꠎꠘꠦ ꠄꠟꠣꠘ ꠇꠞꠞꠣ,
ꠔꠥꠝꠞꠣ ꠝꠣꠟꠤꠇꠞ ꠙꠕ ꠍꠢꠤ ꠇꠞꠅ,
ꠔꠣꠘ ꠌꠟꠣꠞ ꠞꠣꠡ꠆ꠔꠣ ꠅꠇꠟ ꠡꠤꠖꠣ ꠇꠞꠅ।
৪ ꠅꠃ ꠀꠄꠀꠔ ꠝꠣꠚꠤꠇ ꠢꠎꠞꠔ ꠄꠢꠤꠀ ꠘꠛꠤꠄ ꠝꠞꠥꠜꠥꠝꠤꠔ ꠉꠤꠀ ꠔꠛꠟꠤꠉ ꠇꠞꠔꠣ ꠀꠞ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ।
ꠔꠣꠁꠘ ꠄꠟꠣꠘ ꠇꠞꠔꠣ,
ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠔꠃꠛꠣ ꠇꠞꠅ,
ꠔꠞꠤꠇꠣꠛꠘ꠆ꠖꠤ ꠟꠅ।
৫ ꠔꠦꠃ ꠀꠡ꠆ꠔꠣ ꠄꠢꠥꠖꠤꠀ ꠎꠤꠟꠣ ꠀꠞ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠢꠇꠟ ꠝꠣꠘꠥꠡ ꠛꠣꠞꠅꠁꠀ ꠄꠢꠤꠀꠞ ꠉꠦꠍꠦ ꠀꠁꠀ,
ꠎꠣꠞꠎꠤꠞ ꠉꠥꠘꠣꠞ ꠟꠣꠉꠤ ꠔꠃꠛꠣ ꠇꠞꠟꠣ,
ꠀꠞ ꠄꠢꠤꠀꠄ ꠔꠣꠞꠣꠞꠦ ꠎꠞ꠆ꠖꠣꠘ ꠉꠣꠋꠉꠞ ꠙꠣꠘꠤꠔ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ।
৬ ꠄꠢꠤꠀ ꠘꠛꠤꠄ ꠃꠐꠞ ꠞꠥꠝꠞ ꠇꠣꠙꠠ ꠚꠤꠘ꠆ꠖꠤꠔꠣ ꠀꠞ ꠇꠝꠞꠅ ꠌꠣꠝꠠꠣꠞ ꠛꠦꠟꠐ ꠛꠣꠘ꠆ꠖꠤꠔꠣ।
ꠔꠣꠁꠘ ꠙꠣꠠꠤꠀ ꠝꠃ ꠀꠞ ꠚꠠꠤꠋ ꠈꠣꠁꠔꠣ।
৭ ꠔꠣꠁꠘ ꠝꠣꠘꠡꠞꠦ ꠇꠁꠔꠣ,
“ꠀꠝꠣꠞ ꠛꠣꠖꠦ ꠀꠞꠅ ꠄꠇꠎꠘꠦ ꠔꠡꠞꠤꠚ ꠀꠘꠞꠣ,
ꠄꠁꠘ ꠀꠝꠣꠕꠘꠦꠅ ꠢꠤꠝ꠆ꠝꠔ ꠀꠟꠣ।
ꠃꠘ꠆ꠖꠣ ꠅꠁꠀ ꠔꠣꠘ ꠙꠣꠅꠞ ꠎꠥꠔꠣꠞ ꠚꠤꠔꠣ ꠈꠥꠟꠣꠞ ꠟꠣꠈꠅ ꠀꠝꠤ ꠘꠣꠄ।
৮ ꠀꠝꠤ ꠔꠥꠝꠞꠣꠞꠦ ꠙꠣꠘꠤꠖꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠟꠣꠝ,
ꠅꠁꠟꠦ ꠔꠣꠁꠘ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠤꠀ ꠉꠥꠍꠟ ꠇꠞꠣꠁꠛꠣ।”
ꠢꠎꠞꠔ ꠁꠍꠣꠞ ꠙꠣꠇ ꠉꠥꠍꠟ ꠀꠞ ꠙꠞꠤꠇ꠆ꠇꠣ
৯ ꠅꠃ ꠡꠝꠄ ꠢꠎꠞꠔ ꠁꠍꠣ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃ ꠕꠘꠦ ꠄꠢꠤꠀꠞ ꠉꠦꠍꠦ ꠀꠁꠀ,
ꠎꠞ꠆ꠖꠣꠘ ꠉꠣꠋꠉꠅ ꠔꠞꠤꠇꠣꠛꠘ꠆ꠖꠤ ꠟꠁꠟꠣ।
১০ ꠀꠞ ꠙꠣꠘꠤꠔ ꠛꠥꠠ ꠖꠤꠀ ꠃꠑꠔꠦꠃ ꠁꠍꠣꠄ ꠟꠉꠦ ꠟꠉꠦ ꠖꠦꠈꠟꠣ ꠀꠍꠝꠣꠘ ꠖꠥꠁ ꠜꠣꠉ ꠅꠁꠉꠦꠍꠦ,
ꠀꠟ꠆ꠟꠣꠞ ꠞꠥꠢꠥ ꠙꠣꠞꠅꠞ ꠍꠥꠞꠔ ꠗꠞꠤꠀ ꠔꠣꠘ ꠃꠙꠞꠦ ꠟꠣꠝꠤꠀ ꠀꠁꠞꠣ।
১১ ꠅꠃ ꠡꠝꠄ ꠀꠍꠝꠣꠘ ꠕꠘꠦ ꠀꠅꠀꠎ ꠅꠁꠟ,
“ꠅ ꠙꠥꠔ,
ꠔꠥꠝꠤꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ,
ꠔꠥꠝꠣꠞ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ।”
১২ ꠄꠞꠛꠣꠖꠦꠃ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠔꠣꠉꠤꠖꠦ ꠔꠣꠘꠞꠦ ꠝꠞꠥꠜꠥꠝꠤꠔ ꠛꠦꠎꠣ ꠅꠁꠟ।
১৩ ꠅꠃ ꠝꠞꠥꠜꠥꠝꠤꠔ ꠡꠄꠔꠣꠘꠦ ꠌꠣꠟ꠆ꠟꠤꠡ ꠖꠤꠘ ꠗꠞꠤ ꠁꠍꠣꠞꠦ ꠟꠣꠟꠌ ꠖꠦꠈꠣꠁꠀ ꠉꠥꠘꠣ ꠇꠞꠣꠁꠔ ꠌꠣꠁꠟ।
ꠢꠤꠘꠅ ꠎꠋꠟꠤ ꠎꠣꠘꠥꠀꠞꠞ ꠟꠉꠦ ꠔꠣꠁꠘ ꠞꠁꠟꠣ ꠀꠞ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠘ ꠈꠦꠎꠝꠔ ꠇꠞꠔꠣ।
ꠉꠣꠟꠤꠟ ꠎꠤꠟꠣꠔ ꠢꠎꠞꠔ ꠁꠍꠣꠞ ꠝꠥꠎꠦꠎꠣ ꠀꠞ ꠔꠛꠟꠤꠉ (১:১৪-৭:২৩)
ꠢꠎꠞꠔ ꠁꠍꠣꠞ ꠙꠄꠟꠣ ꠔꠛꠟꠤꠉ ꠇꠣꠝ
১৪ ꠢꠎꠞꠔ ꠄꠢꠤꠀ ꠎꠦꠟꠈꠣꠘꠣꠔ ꠛꠘ꠆ꠖꠤ ꠅꠀꠞ ꠛꠣꠖꠦ ꠁꠍꠣ ꠉꠣꠟꠤꠟ ꠎꠤꠟꠣꠔ ꠀꠁꠀ ꠀꠟ꠆ꠟꠣꠞ ꠛꠣꠔꠣꠁꠟ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ,
১৫ “ꠡꠝꠄ ꠙꠥꠞꠣ ꠅꠁꠉꠦꠍꠦ,
ꠀꠟ꠆ꠟꠣꠞ ꠛꠣꠖꠡꠣꠁ ꠘꠎꠖꠤꠇ ꠀꠁꠌ꠆ꠍꠦ।
ꠀꠙꠘꠣꠞꠣ ꠔꠃꠛꠣ ꠇꠞꠃꠇ꠆ꠇꠣ ꠀꠞ ꠅꠃ ꠈꠥꠡ-ꠈꠛꠞꠤꠞ ꠃꠙꠞꠦ ꠁꠝꠣꠘ ꠀꠘꠃꠇ꠆ꠇꠣ।”
১৬ ꠛꠣꠖꠦ ꠔꠣꠁꠘ ꠉꠣꠟꠤꠟ ꠀꠅꠞꠞ ꠙꠣꠞꠦꠖꠤ ꠀꠐꠤꠀ ꠎꠣꠁꠞꠣ,
ꠅꠃ ꠡꠝꠄ ꠖꠦꠈꠟꠣ,
ꠍꠣꠁꠝꠘ ꠀꠞ ꠔꠣꠘ ꠜꠣꠁ ꠀꠘ꠆ꠖ꠆ꠞꠤꠀꠍꠦ ꠀꠅꠞꠅ ꠎꠣꠟ ꠛꠣꠁꠞꠣ।
ꠄꠞꠣ ꠔ ꠝꠣꠁꠝꠟ ꠀꠍꠟꠣ।
১৭ ꠁꠍꠣꠄ ꠄꠞꠣꠞꠦ ꠇꠁꠟꠣ,
“ꠀꠝꠣꠞ ꠟꠉꠦ ꠀꠅ,
ꠀꠝꠤ ꠔꠥꠝꠞꠣꠞꠦ ꠝꠣꠘꠥꠡ ꠗꠞꠣꠞ ꠎꠣꠟꠥꠀ ꠛꠣꠘꠣꠁꠝꠥ।”
১৮ ꠟꠉꠦ ꠟꠉꠦ ꠄꠞꠣ ꠎꠣꠟꠞ ꠟꠉ ꠍꠣꠠꠤꠀ ꠁꠍꠣꠞ ꠟꠉꠦ ꠟꠉ ꠗꠞꠟꠣ।
১৯ ꠅꠘ ꠕꠘꠦ ꠕꠥꠠꠣ ꠀꠉꠦ ꠉꠤꠀ ꠔꠣꠁꠘ ꠖꠦꠈꠟꠣ,
ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ ꠖꠥꠁꠅ ꠜꠣꠁꠄ ꠘꠣꠅꠅ ꠛꠁꠀ ꠎꠣꠟ ꠎꠥꠁꠔ-ꠎꠣꠁꠔ ꠇꠞꠞꠣ,
ꠄꠞꠣꠞ ꠛꠣꠚꠞ ꠘꠣꠝ ꠎꠤꠛꠥꠖꠤꠀ।
২০ ꠁꠍꠣꠄ ꠄꠞꠣꠞꠦ ꠖꠦꠈꠤꠀꠃ ꠒꠣꠇ ꠖꠤꠟꠣ,
ꠒꠣꠇ ꠢꠥꠘꠤꠀ ꠄꠞꠣꠅ ꠘꠤꠎꠞ ꠛꠣꠚ ꠎꠤꠛꠥꠖꠤꠀꠞꠦ ꠇꠣꠝꠟꠣꠁꠘ꠆ꠔꠞ ꠟꠉꠦ ꠘꠣꠅꠅ ꠕꠁꠀ ꠁꠍꠣꠞ ꠟꠉ ꠗꠞꠟꠣ।
ꠎꠤꠘꠞ ꠀꠍꠞ ꠀꠟꠣ ꠛꠦꠐꠣꠞꠦ ꠡꠤꠚꠣ ꠇꠞꠣ
২১ ꠛꠣꠖꠦ ꠄꠞꠣ ꠢꠇꠟꠦ ꠝꠤꠟꠤꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ,
ꠀꠞ ꠁꠢꠥꠖꠤꠞ ꠎꠥꠝ꠆ꠝꠣꠛꠣꠞꠦ ꠔꠣꠞꠣꠞ ꠝꠍꠤꠖꠅ ꠢꠣꠝꠣꠁꠀ ꠁꠍꠣꠄ ꠔꠣꠟꠤꠝ ꠖꠤꠟꠣ।
ꠢꠎꠞꠔ ꠝꠥꠍꠣꠞ ꠞꠦꠅꠀꠎ ꠝꠣꠚꠤꠇ ꠁꠢꠥꠖꠤꠞ ꠎꠥꠝ꠆ꠝꠣꠛꠣꠞ ꠅꠁꠟ ꠡꠥꠇ꠆ꠞꠛꠣꠞ ꠡꠥꠞꠥꠎ ꠒꠥꠛꠣ ꠕꠣꠇꠤ ꠡꠘꠤꠛꠣꠞꠞ ꠡꠥꠞꠥꠎ ꠒꠥꠛꠣ ꠙꠞ꠆ꠎꠘ꠆ꠔ।
ꠁ ꠖꠤꠘ ꠇꠥꠘꠥꠎꠣꠔ ꠇꠣꠝ ꠇꠞꠣ ꠢꠣꠞꠣꠝ।
২২ ꠔꠣꠘ ꠔꠣꠟꠤꠝ ꠢꠥꠘꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ,
ꠔꠣꠁꠘ ꠔ ꠔꠣꠞꠣꠞ ꠀꠟꠤꠝ-ꠃꠟꠣꠝꠣꠞ ꠟꠣꠈꠣꠘ ꠛꠄꠀꠘ ꠇꠞꠞꠣ ꠘꠣ,
ꠔꠣꠁꠘ ꠈꠦꠝꠔꠣꠀꠟꠣ ꠝꠣꠘꠡꠞ ꠟꠣꠈꠣꠘ ꠔꠣꠟꠤꠝ ꠖꠤꠞꠣ।
২৩ ꠅꠃ ꠡꠝꠄ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣꠅ ꠅꠃ ꠝꠍꠤꠖꠞ ꠜꠤꠔꠞꠦ ꠀꠍꠤꠟ।
২৪ ꠢꠦ ꠌꠤꠟ꠆ꠟꠣꠁꠀ ꠇꠂꠟ,
“ꠅ ꠘꠣꠍꠣꠞꠔꠞ ꠁꠍꠣ,
ꠀꠝꠞꠣꠞ ꠟꠉꠦ ꠀꠙꠘꠣꠞ ꠇꠥꠘꠥ ꠎꠣꠄ-ꠎꠞꠥꠞ ꠀꠍꠦ ꠘꠤ?
ꠀꠙꠘꠦ ꠇꠤꠔꠣ ꠀꠝꠞꠣꠞꠦ ꠛꠤꠘꠣꠡ ꠇꠞꠣꠔ ꠀꠁꠍꠂꠘ ꠘꠤ?
ꠀꠝꠤ ꠔ ꠀꠙꠘꠣꠞꠦ ꠌꠤꠘꠤ,
ꠀꠙꠘꠦꠃ ꠀꠟ꠆ꠟꠣꠞ ꠢꠃ ꠙꠣꠇ ꠎꠘ।”
২৫ ꠁꠈꠣꠘ ꠢꠥꠘꠤꠀ ꠁꠍꠣꠄ ꠔꠣꠞꠦ ꠗꠣꠝꠇꠤ ꠖꠤꠟꠣ,
“ꠌꠥꠙ,
ꠅꠈꠘꠃ ꠄꠞꠦ ꠍꠣꠠꠤꠀ ꠎꠣ।”
২৬ ꠅꠃ ꠢꠤ ꠎꠤꠘꠦ ꠛꠦꠐꠣꠞꠦ ꠝꠥꠞꠣꠘꠤ ꠝꠣꠞꠤꠀ ꠎꠥꠞꠦ ꠌꠤꠇ ꠖꠤꠀ ꠍꠣꠠꠤꠀ ꠉꠦꠟꠉꠤ।
২৭ ꠁꠔꠣ ꠖꠦꠈꠤꠀ ꠢꠇꠟꠦ ꠔꠣꠁꠎ꠆ꠎꠥꠛ ꠅꠁꠀ ꠄꠇꠦ-ꠅꠁꠘ꠆ꠘꠦ ꠇꠂꠟ,
“ꠖꠦꠈꠞꠣꠄ ꠘꠤ!
ꠀꠌꠣꠘꠇ ꠇꠣꠞꠛꠣꠞ!
ꠁꠔꠣ ꠇꠥꠘ ꠎꠣꠔꠞ ꠘꠄꠀ ꠔꠣꠟꠤꠝ?
ꠔꠣꠘ ꠈꠦꠝꠔꠣ ꠈꠣꠐꠣꠁꠀ ꠎꠤꠘ꠆ꠘꠣꠔꠞꠦ ꠢꠥꠇꠥꠝ ꠖꠦꠁꠘ,
ꠀꠞ ꠔꠣꠞꠣꠅ ꠝꠣꠘꠦ।”
২৮ ꠄꠞꠖꠣꠄ ꠁꠍꠣꠞ ꠘꠣꠝ ꠀꠡ꠆ꠔꠣ ꠉꠣꠟꠤꠟ ꠎꠤꠟꠣꠞ ꠌꠣꠁꠞꠅꠛꠣꠄ ꠈꠥꠛ ꠎꠟꠖꠤ ꠃꠠꠤ ꠉꠦꠟ।
ꠍꠣꠁꠝꠘꠞ ꠢꠠꠤꠞ ꠛꠣꠠꠤꠔ ꠢꠎꠞꠔ ꠁꠍꠣ
২৯ ꠝꠍꠤꠖ ꠕꠣꠇꠤ ꠛꠣꠞꠅꠁꠀ ꠔꠣꠁꠘ ꠔꠣꠁꠘ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞ ꠟꠉꠦ ꠅꠁꠀ ꠍꠣꠁꠝꠘ ꠀꠞ ꠀꠘ꠆ꠖ꠆ꠞꠤꠀꠍꠞ ꠛꠣꠠꠤꠔ ꠉꠦꠟꠣ।
৩০ ꠍꠣꠁꠝꠘꠞ ꠢꠠꠤꠞ ꠈꠥꠛ ꠔꠣꠙ ꠅꠁꠍꠤꠟ,
ꠔꠣꠁꠘ ꠛꠤꠍꠘꠣꠔ ꠙꠠꠘꠅ ꠀꠍꠟꠣ।
ꠁꠍꠣꠄ ꠔꠡꠞꠤꠚ ꠀꠘꠔꠦꠃ ꠔꠣꠘꠞꠦ ꠛꠦꠝꠣꠞꠤꠞ ꠇꠕꠣ ꠎꠣꠘꠣꠁꠟ ꠅꠁꠟ।
৩১ ꠛꠦꠝꠣꠞ ꠢꠥꠘꠤꠀ ꠔꠣꠁꠘ ꠅꠃ ꠛꠦꠐꠤꠞ ꠀꠔꠅ ꠗꠞꠤ ꠔꠥꠟꠟꠣ,
ꠀꠞ ꠟꠉꠦ ꠟꠉꠦ ꠔꠣꠙꠦ ꠍꠣꠠꠤ ꠖꠤꠟ,
ꠛꠦꠐꠤ ꠃꠑꠤꠀ ꠉꠤꠀ ꠄꠞꠣꠞ ꠝꠦꠝꠣꠘꠖꠣꠞꠤ ꠇꠞꠣꠔ ꠟꠣꠉꠟꠣ।
৩২ ꠅꠃ ꠎꠥꠝ꠆ꠝꠣꠞ ꠖꠤꠘ ꠡꠦꠡꠦ ꠢꠣꠁꠘ꠆ꠎꠣꠛꠣꠟꠣ,
ꠡꠥꠞꠥꠎ ꠒꠥꠛꠣꠞ ꠛꠣꠖꠦ ꠝꠣꠘꠡꠦ ꠢꠇꠟ ꠛꠦꠝꠣꠞꠤꠞꠦ ꠀꠞ ꠎꠤꠘꠞ ꠀꠍꠞ ꠀꠟꠣ ꠝꠣꠘꠡꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟ।
৩৩ ꠀꠡ꠆ꠔꠣ ꠐꠣꠃꠘꠞ ꠝꠣꠘꠥꠡ ꠀꠁꠀ ꠅꠃ ꠛꠣꠠꠤꠞ ꠃꠑꠣꠘꠅ ꠖꠟꠣ ꠅꠁꠉꠦꠟ।
৩৪ ꠔꠦꠃ ꠁꠍꠣꠄ ꠘꠣꠘꠣꠘ ꠘꠝꠥꠘꠣꠞ ꠛꠃꠔ ꠛꠦꠝꠣꠞꠤꠞ ꠡꠤꠚꠣ ꠇꠞꠟꠣ ꠀꠞ ꠛꠃꠔꠞ ꠟꠉ ꠕꠘꠦ ꠎꠤꠘ꠆ꠘꠣꠔ ꠍꠣꠠꠣꠁꠟꠣ।
ꠅꠁꠟꠦ ꠎꠤꠘ꠆ꠘꠣꠔꠦ ꠔꠣꠘ ꠙꠞꠤꠌꠄ ꠎꠣꠘꠣꠁ ꠖꠤꠛꠣ ꠇꠞꠤ,
ꠔꠣꠁꠘ ꠁꠔꠣꠞꠦ ꠇꠥꠘꠥ ꠝꠣꠔ-ꠝꠣꠔꠣꠞ ꠡꠥꠎꠥꠉ ꠖꠤꠟꠣ ꠘꠣ।
ꠉꠣꠟꠤꠟ ꠎꠤꠟꠣꠔ ꠔꠛꠟꠤꠉ
৩৫ ꠛꠣꠖꠦ ꠙꠔꠣꠛꠣꠟꠣ ꠃꠑꠤꠀ ꠔꠣꠁꠘ ꠘꠤꠞꠣꠁ ꠎꠣꠉꠣꠔ ꠉꠤꠀ ꠖꠥꠀ ꠇꠞꠣꠔ ꠛꠁꠟꠣ।
৩৬ ꠔꠦꠃ ꠍꠣꠁꠝꠘ ꠀꠞ ꠔꠣꠘ ꠟꠉꠞ ꠢꠇꠟꠦ ꠁꠍꠣꠞꠦ ꠔꠣꠟ꠆ꠟꠣꠡ ꠇꠞꠣꠔ ꠛꠣꠞꠅꠁꠟꠣ।
৩৭ ꠛꠣꠞꠅꠁꠀ ꠔꠣꠘꠞꠦ ꠙꠣꠁꠀ ꠇꠁꠟꠣ,
“ꠢꠥꠎꠥꠞ,
ꠢꠇ꠆ꠇꠟ ꠝꠣꠘꠡꠦ ꠀꠙꠘꠣꠞ ꠔꠣꠟ꠆ꠟꠣꠡ ꠇꠞꠦꠞ।”
৩৮ ꠁꠍꠣꠄ ꠇꠁꠟꠣ,
“ꠀꠅ,
ꠀꠝꠞꠣ ꠅꠃ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠀꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠤ।
ꠄꠞꠟꠣꠉꠤꠃ ꠔ ꠀꠝꠤ ꠀꠁꠍꠤ।”
৩৯ ꠛꠣꠖꠦ ꠔꠣꠁꠘ ꠢꠣꠞꠣ ꠉꠣꠟꠤꠟ ꠎꠤꠟꠣꠞ ꠝꠍꠤꠖꠣꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠟꠣ ꠀꠞ ꠎꠤꠘ꠆ꠘꠣꠔ ꠍꠣꠠꠣꠁꠟꠣ।
ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠣ
৪০ ꠄꠇꠖꠤꠘ ꠄꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠄ ꠢꠎꠞꠔ ꠁꠍꠣꠞ ꠇꠣꠘ꠆ꠖꠣꠔ ꠀꠁꠀ ꠔꠣꠘ ꠙꠣꠅꠔ ꠙꠠꠤꠀ ꠝꠤꠘꠔ ꠇꠞꠤꠀ ꠇꠂꠟ,
“ꠢꠥꠎꠥꠞ,
ꠀꠙꠘꠣꠞ ꠝꠞ꠆ꠎꠤ ꠅꠁꠟꠦ ꠀꠝꠣꠞꠦ ꠡꠤꠚꠣ ꠇꠞꠤꠀ ꠙꠣꠇ-ꠍꠣꠚ ꠇꠞꠃꠇ꠆ꠇꠣ।”
৪১ ꠛꠦꠐꠣꠞ ꠛꠣꠄ ꠔꠣꠘ ꠈꠥꠛ ꠖꠄꠀ ꠢꠣꠝꠣꠁꠟ।
ꠔꠣꠁꠘ ꠘꠤꠎꠞ ꠀꠔ ꠛꠣꠠꠣꠁꠀ ꠔꠣꠞꠦ ꠍꠁꠀ ꠇꠁꠟꠣ,
“ꠅꠄ ꠀꠝꠤ ꠌꠣꠁꠞꠣꠝ,
ꠔꠥꠝꠤ ꠙꠣꠇ-ꠍꠣꠚ ꠅꠅ।”
৪২ ꠇꠅꠀꠞ ꠟꠉꠦ ꠟꠉꠦ ꠔꠣꠞ ꠛꠦꠝꠣꠞ ꠜꠣꠟꠣ ꠅꠁꠀ ꠢꠦ ꠙꠣꠇ-ꠍꠣꠚ ꠅꠁꠉꠦꠟ।
৪৩ ꠁꠍꠣꠄ ꠅꠃ ꠡꠝꠄꠃ ꠔꠣꠞꠦ ꠛꠤꠖꠣꠄ ꠖꠤꠟꠣ ꠀꠞ ꠖꠠꠣꠁꠀ ꠇꠁꠟꠣ,
৪৪ “ꠢꠥꠘꠅ,
ꠁꠔꠣ ꠈꠛꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।
ꠈꠣꠟꠤ ꠁꠝꠣꠝ ꠍꠣꠛꠞ ꠉꠦꠍꠦ ꠉꠤꠀ ꠖꠦꠈꠣꠅ ꠀꠞ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠢꠎꠞꠔ ꠝꠥꠍꠣꠞ ꠇꠤꠔꠣꠛꠞ ꠢꠥꠇꠥꠝ ꠝꠣꠚꠤꠇ,
ꠇꠥꠞꠛꠣꠘꠤ ꠀꠖꠣꠄ ꠇꠞꠅ।
ꠔꠦꠃ ꠡꠝꠣꠎꠦꠅ ꠎꠣꠘꠤꠟꠤꠛ,
ꠔꠥꠝꠤ ꠜꠣꠟꠣ ꠅꠁꠉꠦꠍ।”
৪৫ ꠅꠁꠟꠦ ꠢꠦ ꠛꠣꠞꠦ ꠉꠤꠀꠃ ꠁꠔꠣ ꠢꠇ꠆ꠇꠟ ꠛꠣꠄ ꠞꠐꠣꠁ ꠖꠤꠟ।
ꠄꠞꠖꠣꠄ ꠁꠍꠣ ꠀꠞ ꠈꠥꠟꠣ-ꠝꠦꠟꠣ ꠇꠥꠘꠥ ꠉꠣꠃꠔ ꠎꠣꠁꠔꠣ ꠙꠣꠞꠟꠣ ꠘꠣ।
ꠔꠣꠁꠘ ꠛꠣꠞꠣ ꠘꠤꠞꠣꠁ ꠎꠣꠉꠣꠔ ꠉꠤꠀ ꠞꠅꠀ ꠟꠣꠉꠟ,
ꠅꠘꠅ-ꠅ ꠌꠣꠁꠞꠅꠛꠣꠄ ꠕꠘꠦ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟꠣ।