ꠅꠞ꠆ꠖꠋ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠣ
২
১ ꠇꠄꠖꠤꠘ ꠛꠣꠖꠦ ꠢꠎꠞꠔ ꠁꠍꠣ ꠢꠤꠞꠛꠣꠞ ꠇꠚꠞꠘꠣꠃꠝ ꠐꠣꠃꠘꠅ ꠚꠤꠞꠤꠀ ꠀꠁꠟꠦ ꠝꠣꠘꠡꠦ ꠢꠥꠘꠤꠟꠤꠟꠣ ꠔꠣꠁꠘ ꠊꠞꠅ ꠀꠍꠂꠘ।
২ ꠔꠦꠃ ꠅꠔ ꠝꠣꠘꠥꠡ ꠁꠘꠅ ꠎꠝꠣ ꠅꠁꠟꠣ,
ꠊꠞꠅ ꠔ ꠖꠥꠞꠞ ꠇꠕꠣ,
ꠊꠞꠞ ꠛꠣꠞꠦꠅ ꠀꠞ ꠎꠣꠉꠣ ꠞꠁꠟ ꠘꠣ।
ꠔꠣꠁꠘ ꠄꠞꠣ ꠢꠇꠟꠞ ꠉꠦꠍꠦ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠣꠔ ꠀꠍꠟꠣ।
৩ ꠅꠃ ꠡꠝꠄ ꠌꠣꠁꠞ ꠎꠘ ꠝꠣꠘꠡꠦ ꠄꠇꠎꠘ ꠅꠞ꠆ꠖꠋ ꠛꠦꠝꠣꠞꠤꠞꠦ ꠛꠁꠀ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟ,
ꠄꠞꠣꠞ ꠟꠉꠦ ꠀꠞꠅ ꠝꠣꠘꠥꠡ ꠀꠍꠟꠣ।
৪ ꠅꠁꠟꠦ ꠜꠤꠠꠞ ꠟꠣꠉꠤ ꠔꠣꠞꠦ ꠁꠍꠣꠞ ꠉꠦꠍꠦ ꠟꠁꠀ ꠎꠣꠁꠔꠣ ꠙꠣꠞꠟꠣ ꠘꠣ।
ꠄꠞꠖꠣꠄ ꠔꠣꠁꠘ ꠎꠦ ꠎꠣꠉꠣꠔ ꠛꠅꠀꠔ ꠀꠍꠟꠣ,
ꠑꠤꠇ ꠔꠣꠞ ꠃꠙꠞꠞ ꠌꠣꠟ ꠚꠥꠠ ꠇꠞꠤꠀ ꠙꠟꠅ ꠡꠥꠖ꠆ꠖꠣ ꠅꠃ ꠛꠦꠝꠣꠞꠤꠞꠦ ꠟꠣꠝꠣꠔ ꠟꠣꠝꠣꠁ ꠖꠤꠟ।
৫ ꠔꠣꠞꠣꠞ ꠁꠝꠣꠘꠞ ꠛꠟ ꠖꠦꠈꠤꠀ ꠔꠣꠁꠘ ꠅꠃ ꠅꠞ꠆ꠖꠋ ꠛꠦꠝꠣꠞꠤꠞꠦ ꠇꠁꠟꠣ,
“ꠛꠣꠛꠣ,
ꠔꠥꠝꠣꠞ ꠔꠣꠝꠣꠝ ꠉꠥꠘꠣ ꠝꠣꠚ ꠇꠞꠤ ꠖꠤꠟꠣꠁꠟꠣꠝ।”
৬ ꠅꠁꠟꠦ ꠢꠤꠈꠣꠘꠅ ꠇꠄꠎꠘ ꠝꠃꠟꠣꠘꠣ ꠛꠅꠀꠔ ꠀꠍꠟꠣ।
ꠔꠣꠁꠘ ꠔꠣꠁꠘ ꠝꠘꠦ ꠝꠘꠦ ꠇꠁꠟꠣ,
৭ “ꠁ ꠝꠣꠘꠡꠦ ꠁꠟꠣꠈꠣꠘ ꠝꠣꠔꠦꠞ ꠇꠦꠘꠦ?
ꠢꠦ ꠔ ꠡꠤꠞꠤꠇꠤ ꠇꠞꠦꠞ।
ꠄꠇꠝꠣꠔ꠆ꠞ ꠀꠟ꠆ꠟꠣ ꠍꠣꠠꠣ ꠀꠞ ꠇꠦ ꠉꠥꠘꠣ ꠝꠣꠚ ꠇꠞꠔ ꠙꠣꠞꠦ?”
৮ ꠔꠣꠘꠞꠦ ꠟꠁꠀ ꠝꠃꠟꠣꠘꠣ ꠅꠇꠟꠦ ꠎꠦ ꠅꠟꠣꠈꠣꠘ ꠌꠤꠘ꠆ꠔꠣ ꠇꠞꠞꠣ,
ꠁꠍꠣꠄ ꠔꠣꠘ ꠉꠣꠁꠛꠤ ꠛꠟꠦ ꠁꠈꠣꠘ ꠛꠥꠎꠤꠟꠤꠟꠣ,
ꠛꠥꠎꠤꠀ ꠄꠞꠣꠞꠦ ꠇꠁꠟꠣ,
“ꠀꠙꠘꠣꠞꠣ ꠇꠦꠘꠦ ꠝꠘꠦ ꠝꠘꠦ ꠁꠟꠣ ꠌꠤꠘ꠆ꠔꠣ ꠇꠞꠞꠣ?
৯ ꠁ ꠅꠞ꠆ꠖꠋ ꠛꠦꠝꠣꠞꠤꠞꠦ ꠇꠥꠘꠈꠣꠘ ꠇꠅꠀ ꠀꠝꠣꠞ ꠟꠣꠉꠤ ꠡꠥꠎꠣ,
ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠟ,
ꠘꠣ,
ꠃꠑꠅ ꠔꠥꠝꠣꠞ ꠙꠟꠅ ꠟꠁꠀ ꠀꠐꠤꠀ ꠎꠣꠅꠉꠤ?
১০ ꠔꠦ ꠅꠈꠘ ꠀꠙꠘꠣꠞꠣ ꠙꠞꠝꠣꠘ ꠖꠦꠈꠃꠇ꠆ꠇꠣ,
ꠁ ꠖꠥꠘꠤꠀꠔ ꠉꠥꠘꠣ ꠝꠣꠚ ꠇꠞꠣꠞ ꠈꠦꠝꠔꠣ ꠀꠝꠤ ꠛꠤꠘ-ꠀꠖꠝꠞ ꠀꠍꠦ,”
ꠅꠈꠣꠘ ꠇꠁꠀꠃ ꠔꠣꠁꠘ ꠛꠦꠝꠣꠞꠤ ꠛꠦꠐꠣꠞꠦ ꠇꠁꠟꠣ,
১১ “ꠀꠝꠤ ꠔꠥꠝꠣꠞꠦ ꠇꠁꠀꠞ,
ꠃꠑꠅ,
ꠔꠥꠝꠣꠞ ꠙꠟꠅ ꠟꠁꠀ ꠔꠥꠝꠣꠞ ꠛꠣꠠꠤꠔ ꠎꠣꠅ।”
১২ ꠔꠦꠃ ꠟꠉꠦ ꠟꠉꠦ ꠅꠃ ꠛꠦꠝꠣꠞꠤ ꠛꠦꠐꠣ ꠃꠑꠤꠀ ꠔꠣꠞ ꠙꠟꠅ ꠟꠁꠀ ꠢꠇꠟꠞ ꠍꠣꠝꠘꠦꠃ ꠛꠣꠞꠅꠁꠀ ꠉꠦꠟ।
ꠁꠈꠣꠘ ꠖꠦꠈꠤꠀ ꠢꠇꠟꠦ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ,
“ꠍꠥꠛꠢꠣꠘ ꠀꠟ꠆ꠟꠣ,
ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠁꠟꠣꠈꠣꠘ ꠇꠣꠝ ꠖꠦꠈꠍꠤ ꠘꠣ।”
ꠢꠎꠞꠔ ꠁꠍꠣ ꠉꠥꠘꠣꠉꠣꠞꠞ ꠇꠣꠘ꠆ꠒꠣꠞꠤ
১৩ ꠛꠣꠖꠦ ꠢꠎꠞꠔ ꠁꠍꠣ ꠢꠤꠞꠛꠣꠞ ꠛꠣꠞꠅꠁꠀ ꠉꠣꠟꠤꠟ ꠀꠅꠞꠞ ꠗꠣꠞꠅ ꠉꠦꠟꠣ,
ꠔꠦꠃ ꠢꠇ꠆ꠇꠟ ꠝꠣꠘꠥꠡ ꠔꠣꠘ ꠇꠣꠘ꠆ꠖꠣꠔ ꠀꠁꠟ,
ꠔꠣꠁꠘ ꠔꠣꠞꠣꠞꠦ ꠔꠣꠟꠤꠝ ꠖꠦꠅꠀꠔ ꠟꠣꠉꠟꠣ।
১৪ ꠔꠣꠟꠤꠝ ꠖꠤꠀ ꠙꠕꠦꠖꠤ ꠎꠣꠁꠔꠦ ꠎꠣꠁꠔꠦ ꠖꠦꠈꠟꠣ,
ꠀꠟꠚꠤꠞ ꠙꠥꠀ ꠟꠦꠛꠤ ꠈꠣꠎꠘꠣ ꠔꠥꠟꠣꠞ ꠅꠚꠤꠡꠅ ꠛꠁ ꠞꠁꠍꠂꠘ।
ꠖꠦꠈꠤꠀ ꠔꠣꠘꠞꠦ ꠇꠁꠟꠣ,
“ꠀꠅ ꠀꠝꠣꠞ ꠃꠝ꠆ꠝꠔ ꠅꠅ।”
ꠔꠦꠃ ꠟꠦꠛꠤ ꠃꠑꠤꠀ ꠁꠍꠣꠞ ꠟꠉꠦ ꠟꠉꠦ ꠉꠦꠟꠣ।
১৫ ꠛꠣꠖꠦ ꠔꠣꠁꠘ ꠟꠦꠛꠤꠞ ꠛꠣꠠꠤꠔ ꠉꠤꠀ ꠈꠣꠅꠀꠔ ꠛꠁꠟꠣ।
ꠛꠃꠔ ꠈꠣꠎꠘꠣ ꠔꠥꠟꠞꠣ ꠀꠞ ꠉꠥꠘꠣꠉꠣꠞ ꠝꠣꠘꠥꠡꠅ ꠁꠍꠣ ꠀꠞ ꠔꠣꠘ ꠃꠝ꠆ꠝꠔ ꠅꠇꠟꠞ ꠟꠉꠦ ꠈꠣꠘꠤꠔ ꠀꠍꠟꠣ।
ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠊꠥꠞꠣꠔ ꠀꠍꠤꠟ।
১৬ ꠅꠁꠟꠦ ꠔꠣꠁꠘ ꠉꠥꠘꠣꠉꠣꠞ ꠅꠇꠟꠞ ꠟꠉꠦ ꠛꠁꠀ ꠈꠣꠘꠤ ꠈꠣꠁꠞꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠝꠃꠟꠣꠘꠣ ꠅꠇꠟꠦ ꠔꠣꠘ ꠃꠝ꠆ꠝꠔ ꠅꠇꠟꠞꠦ ꠇꠁꠟꠣ,
“ꠄꠁꠘ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠈꠛꠤꠍ ꠅꠇꠟꠞ ꠟꠉꠦ ꠈꠣꠅꠀ-ꠖꠣꠅꠀ ꠇꠞꠂꠘ ꠇꠦꠘꠦ?”
১৭ ꠁꠈꠣꠘ ꠢꠥꠘꠤꠀ ꠁꠍꠣꠄ ꠅꠃ ꠝꠃꠟꠣꠘꠣ ꠅꠇꠟꠞꠦ ꠇꠁꠟꠣ,
“ꠜꠣꠟꠣ ꠝꠣꠘꠡꠞ ꠇꠛꠤꠞꠣꠎ ꠟꠣꠉꠦ ꠘꠣ,
ꠅꠁꠟꠦ ꠛꠦꠝꠣꠞꠤꠞ ꠔ ꠟꠣꠉꠦ।
ꠀꠝꠤ ꠙꠞꠦꠎꠉꠣꠞꠞ ꠉꠦꠍꠦ ꠀꠁꠍꠤ ꠘꠣ,
ꠉꠥꠘꠣꠉꠣꠞ ꠅꠇꠟꠞꠦꠃ ꠖꠣꠅꠔ ꠖꠤꠔꠣꠝ ꠀꠁꠍꠤ।”
ꠙꠥꠞꠣꠘ ꠔꠣꠟꠤꠝ ꠕꠣꠇꠤ ꠢꠎꠞꠔ ꠁꠍꠣꠞ ꠘꠄꠀ ꠔꠣꠟꠤꠝ ꠜꠣꠟꠣ
১৮ ꠄꠇꠛꠣꠞ ꠢꠎꠞꠔ ꠄꠢꠤꠀꠞ ꠃꠝ꠆ꠝꠔ ꠀꠞ ꠚꠞꠤꠡꠤ ꠅꠇꠟ ꠞꠥꠎꠣ ꠀꠍꠟꠣ,
ꠁꠔꠣ ꠖꠦꠈꠤꠀ ꠇꠤꠍꠥ ꠝꠣꠘꠡꠦ ꠁꠍꠣꠞ ꠉꠦꠍꠦ ꠀꠁꠀ ꠇꠁꠟꠣ,
“ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠀꠞ ꠚꠞꠤꠡꠤ ꠅꠇꠟꠦ ꠞꠥꠎꠣ ꠞꠣꠈꠂꠘ,
ꠅꠁꠟꠦ ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠞꠥꠎꠣ ꠞꠣꠈꠂꠘ ꠘꠣ ꠇꠦꠘꠦ?”
১৯ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠘꠡꠣ ꠟꠉꠦ ꠕꠣꠇꠔꠦ ꠇꠤꠔꠣ ꠛꠂꠞꠣꠔꠤ ꠅꠇꠟꠦ ꠞꠥꠎꠣ ꠞꠣꠈꠔ ꠙꠣꠞꠦ ꠘꠤ?
ꠘꠣ,
ꠇꠦꠃ ꠞꠥꠎꠣ ꠞꠄ ꠘꠣ,
ꠎꠔꠖꠤꠘ ꠘꠡꠣ ꠟꠉꠦ ꠕꠣꠇꠂꠘ,
ꠅꠔ ꠖꠤꠘ ꠔꠣꠞꠣ ꠞꠥꠎꠣ ꠞꠣꠈꠔ ꠙꠣꠞꠦ ꠘꠣ।
২০ ꠅꠁꠟꠦ ꠅꠟꠣ ꠅꠇ꠆ꠔ ꠀꠁꠛ,
ꠎꠦꠛꠟꠣ ꠘꠡꠣꠞꠦ ꠔꠣꠞꠣꠞ ꠉꠦꠍ ꠕꠘꠦ ꠢꠞꠣꠁꠟ ꠅꠁꠎꠤꠛ,
ꠅꠃ ꠡꠝꠄ ꠔꠣꠞꠣ ꠞꠥꠎꠣ ꠞꠣꠈꠛꠣ।
২১ ꠙꠥꠞꠣꠘ ꠇꠣꠙꠠꠞ ꠝꠣꠎꠦ ꠇꠦꠃ ꠘꠄꠀ ꠇꠣꠙꠠ ꠎꠥꠠꠣ ꠖꠦꠄ ꠘꠣ।
ꠎꠥꠠꠣ ꠖꠤꠟꠦ ꠅꠃ ꠇꠣꠙꠠ ꠗꠁꠀ ꠢꠣꠞꠟꠦ ꠈꠥꠍ ꠅꠁꠀ ꠍꠤꠠꠤꠀ ꠁ ꠚꠥꠠ ꠀꠞꠅ ꠛꠠ ꠅꠁꠎꠣꠄ।
২২ ꠙꠥꠞꠣꠘ ꠌꠣꠝꠠꠣꠞ ꠕꠟꠤꠔ ꠇꠦꠃ ꠔꠣꠎꠣ ꠀꠋꠉꠥꠞꠞ ꠞꠡ ꠜꠞꠦ ꠘꠣ।
ꠜꠞꠟꠦ ꠅꠃ ꠔꠣꠎꠣ ꠞꠡꠞ ꠚꠣꠚꠦ ꠕꠟꠤ ꠚꠣꠐꠤꠀ ꠞꠡ ꠀꠞ ꠕꠟꠤ ꠖꠥꠁꠅꠔꠣ ꠛꠞꠛꠣꠖ ꠅꠄ।
ꠔꠣꠎꠣ ꠞꠡ ꠘꠄꠀ ꠕꠟꠤꠔ ꠕꠁꠔꠦ ꠅꠄ।”
ꠎꠥꠝ꠆ꠝꠣꠛꠣꠞꠞ ꠛꠦꠙꠣꠞꠦ ꠘꠄꠀ ꠔꠣꠟꠤꠝ
২৩ ꠄꠇ ꠎꠥꠝ꠆ꠝꠣꠛꠣꠞꠦ ꠢꠎꠞꠔ ꠁꠍꠣ ꠈꠦꠔꠞ ꠀꠁꠟꠦꠖꠤ ꠀꠐꠤꠀ ꠎꠣꠅꠀꠔ ꠀꠍꠟꠣ।
ꠀꠐꠤ ꠀꠐꠤ ꠔꠣꠘ ꠃꠝ꠆ꠝꠔ ꠅꠇꠟꠦ ꠗꠣꠘꠞ ꠍꠠꠣ ꠍꠤꠠꠣꠔ ꠟꠣꠉꠟꠣ।
২৪ ꠁꠔꠣ ꠖꠦꠈꠤꠀ ꠚꠞꠤꠡꠤ ꠖꠟꠦ ꠁꠍꠣꠞꠦ ꠇꠁꠟꠣ,
“ꠀꠝꠞꠣꠞ ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠔ ꠎꠥꠝ꠆ꠝꠣꠛꠣꠞꠦ ꠇꠥꠘꠥꠎꠣꠔ ꠇꠣꠝ ꠇꠞꠣ ꠎꠣꠁꠎ ꠘꠣꠄ,
ꠔꠦ ꠔꠣꠞꠣ ꠁ ꠗꠣꠘꠞ ꠍꠠꠣ ꠍꠤꠠꠤꠞꠣ ꠇꠤꠔꠣꠞ ꠟꠣꠉꠤ?”
২৫ ꠁꠍꠣꠄ ꠎꠥꠀꠙ ꠖꠤꠟꠣ,
“ꠖꠣꠃꠖ ꠘꠛꠤ ꠀꠞ ꠔꠣꠘ ꠟꠉꠞ ꠢꠇꠟꠦ ꠄꠇꠛꠣꠞ ꠙꠦꠐꠞ ꠜꠥꠈꠦ ꠎꠦꠔꠣ ꠇꠞꠍꠟꠣ,
ꠁꠔꠣ ꠇꠤꠔꠣ ꠔꠥꠝꠤꠔꠣꠁꠘ ꠇꠥꠘꠥ ꠡꠝꠄ ꠙꠠꠍ ꠘꠣ ꠘꠤ?
২৬ ꠔꠣꠁꠘ ꠔ ꠙꠞꠗꠣꠘ ꠁꠝꠣꠝ ꠀꠛꠤꠀꠕꠞꠞ ꠀꠝꠟꠅ ꠀꠟ꠆ꠟꠣꠞ ꠊꠞꠅ ꠢꠣꠝꠣꠁꠀ,
ꠎꠦ ꠙꠛꠤꠔ꠆ꠞ ꠞꠥꠐꠤ ꠁꠝꠣꠝ ꠍꠣꠛ ꠛꠣꠖꠦ ꠀꠞ ꠇꠦꠃ ꠈꠣꠅꠀ ꠎꠣꠁꠎ ꠘꠣꠄ,
ꠅꠃ ꠞꠥꠐꠤ ꠈꠣꠁꠍꠟꠣ ꠀꠞ ꠔꠣꠘ ꠟꠉꠞ ꠝꠣꠘꠡꠞꠦꠅ ꠖꠤꠍꠟꠣ।”
২৭ ꠁꠍꠣꠄ ꠔꠣꠞꠣꠞꠦ ꠀꠞꠅ ꠇꠁꠟꠣ,
“ꠎꠥꠝ꠆ꠝꠣꠛꠣꠞꠞ ꠜꠣꠟꠣꠁꠞ ꠟꠣꠉꠤ ꠔ ꠝꠣꠘꠡꠞꠦ ꠛꠣꠘꠣꠁꠟ ꠅꠁꠍꠦ ꠘꠣ,
ꠅꠁꠟꠦ ꠝꠣꠘꠡꠞ ꠜꠣꠟꠣꠁꠞ ꠟꠣꠉꠤꠃ ꠎꠥꠝ꠆ꠝꠣꠛꠣꠞ ꠛꠣꠘꠣꠁꠟ ꠅꠁꠍꠦ।
২৮ ꠢꠥꠘꠅ,
ꠎꠥꠝ꠆ꠝꠣꠛꠣꠞꠞ ꠔꠣꠝꠣꠝ ꠄꠈꠔꠤꠀꠞ ꠀꠝꠤ ꠛꠤꠘ-ꠀꠖꠝꠞ ꠀꠔꠅ ꠀꠍꠦ।”