ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ꠔꠤꠍꠞꠣ ꠍꠤꠙꠣꠞꠣ
ꠀꠟ-ꠟꠥꠇ
১
১-২ ꠝꠢꠣꠝꠣꠁꠘ꠆ꠘ ꠕꠤꠅꠚꠤꠟꠣꠍ,
ꠀꠙꠘꠣꠞ ꠔ ꠎꠣꠘꠣ ꠀꠍꠦ,
ꠀꠝꠞꠣꠞ ꠝꠣꠎꠦ ꠎꠦꠔꠣ ꠎꠦꠔꠣ ꠊꠐꠤꠍꠦ,
ꠁꠔꠣ ꠎꠦꠞꠣ ꠙꠄꠟꠣ ꠕꠣꠇꠤꠃ ꠘꠤꠎꠞ ꠌꠃꠈꠦ ꠖꠦꠈꠍꠂꠘ ꠀꠞ ꠔꠛꠟꠤꠉꠅ ꠇꠞꠍꠂꠘ,
ꠄꠞꠣꠞ ꠝꠥꠈꠞ ꠇꠕꠣ ꠢꠥꠘꠤꠀ ꠜꠣꠟꠣꠝꠘ꠆ꠔꠦ ꠡꠝꠎꠤꠀ ꠢꠣꠞꠤ,
ꠛꠃꠔ ꠝꠥꠝꠤꠘꠦ ꠟꠦꠈꠣꠔ ꠟꠣꠉꠍꠂꠘ।
৩ ꠄꠞꠟꠣꠉꠤ ꠅꠈꠘ ꠀꠝꠤꠅ ꠀꠖꠤ-ꠅꠘ꠆ꠔ ꠢꠇ꠆ꠇꠟꠔꠣ ꠔꠣꠟ꠆ꠟꠣꠡ ꠇꠞꠤꠀ,
ꠄꠇ ꠄꠇ ꠇꠞꠤ ꠟꠦꠈꠤꠀ ꠀꠙꠘꠣꠞꠦ ꠎꠣꠘꠣꠘꠤ ꠈꠣꠘ ꠜꠣꠟꠣ ꠝꠘꠅ ꠇꠞꠟꠣꠝ।
৪ ꠅꠈꠣꠘ ꠕꠣꠇꠤ ꠀꠙꠘꠦ ꠡꠝꠎꠤꠔꠣ ꠙꠣꠞꠛꠣ,
ꠀꠙꠘꠦ ꠀꠉꠦ ꠎꠦꠔꠣ ꠔꠣꠟꠤꠝ ꠢꠥꠘꠍꠂꠘ,
ꠁꠔꠣ ꠄꠇ꠆ꠇꠦꠛꠣꠞꠦ ꠑꠤꠇ।
ꠢꠎꠞꠔ ꠄꠢꠤꠀ ꠀꠞ ꠢꠎꠞꠔ ꠁꠍꠣꠞ ꠎꠘꠝ ꠀꠞ ꠙꠄꠟꠣ ꠎꠤꠘ꠆ꠖꠦꠉꠤ (১:৫-২:৫২)
ꠢꠎꠞꠔ ꠄꠢꠤꠀ (ꠀ꠩) ꠘꠛꠤꠞ ꠎꠘꠝꠞ ꠉꠣꠁꠛꠤ ꠈꠛꠞ
৫ ꠞꠣꠎꠣ ꠢꠦꠞꠥꠖꠦ ꠎꠦꠛꠟꠣ ꠄꠢꠥꠖꠤꠀ ꠎꠤꠟꠣ ꠌꠣꠟꠣꠁꠞꠣ,
ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠁꠝꠣꠝ ꠅꠇꠟꠞ ꠝꠣꠎꠞ ꠄꠇꠎꠘꠞ ꠘꠣꠝ ꠀꠍꠤꠟ ꠎꠣꠇꠣꠞꠤꠀ।
ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠝꠥꠟ ꠁꠝꠣꠝ ꠢꠣꠞꠥꠘꠞ ꠈꠣꠘ꠆ꠖꠣꠘꠞ ꠀꠛꠤꠀ ꠖꠟꠞ ꠝꠣꠘꠥꠡ।
ꠔꠣꠘ ꠛꠤꠛꠤꠞ ꠘꠣꠝ ꠄꠟꠤꠍꠣꠛꠦꠔ,
ꠄꠁꠘꠅ ꠢꠣꠞꠥꠘꠞ ꠛꠋꠡꠞ ꠝꠣꠘꠥꠡ।
৬ ꠄꠞꠣ ꠖꠥꠁꠅꠎꠘꠃ ꠀꠟ꠆ꠟꠣꠞ ꠘꠎꠞꠅ ꠇꠣꠝꠤꠟ ꠖꠤꠘꠖꠣꠞ ꠀꠍꠟꠣ।
ꠝꠣꠛꠥꠖꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠡꠥꠟ꠆ꠟꠀꠘꠣ ꠀꠖꠣꠄ ꠇꠞꠔꠣ।
৭ ꠅꠁꠟꠦ ꠄꠞꠣ ꠀꠍꠟꠣ ꠘꠤꠀꠅꠟꠣꠖꠤ,
ꠛꠤꠛꠤ ꠄꠟꠤꠍꠣꠛꠦꠔ ꠅꠁꠟꠣ ꠀꠐꠈꠥꠞꠣ ꠛꠦꠝꠣꠞꠤ।
ꠅꠃ ꠢꠣꠟꠔꠦ ꠖꠥꠁꠅꠎꠘ ꠝꠥꠞꠛ꠆ꠛꠤ ꠅꠁꠉꠦꠍꠂꠘ।
৮ ꠄꠞꠝꠣꠎꠦ ꠅꠁꠘ꠆ꠘ ꠖꠟꠞ ꠁꠝꠣꠝꠔꠤꠞ ꠖꠤꠘ ꠡꠦꠡ ꠅꠁꠀ ꠔꠣꠘ ꠘꠤꠎꠞ ꠖꠟꠞ ꠁꠝꠣꠝꠔꠤꠞ ꠛꠣꠞꠤ ꠀꠁꠟ,
ꠔꠦꠃ ꠎꠣꠇꠣꠞꠤꠀ ꠀꠟ꠆ꠟꠣꠞ ꠊꠞꠅ ꠁꠝꠣꠝꠔꠤꠔ ꠀꠍꠟꠣ।
৯ ꠁꠝꠣꠝꠔꠤ ꠇꠣꠝꠞ ꠘꠤꠅꠝ ꠝꠣꠚꠤꠇ ꠟꠐꠣꠞꠤ ꠝꠣꠞꠤꠀ ꠔꠣꠘꠦ ꠙꠍꠘ꠆ꠖ ꠇꠞꠣ ꠅꠁꠟ,
ꠎꠣꠔꠦ ꠔꠣꠁꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠙꠛꠤꠔ꠆ꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠀ ꠀꠉꠞ-ꠈꠥꠡꠛꠄ ꠎꠣꠟꠣꠁꠘ।
১০ ꠔꠣꠁꠘ ꠜꠤꠔꠞꠦ ꠅꠔꠣ ꠎꠣꠟꠣꠁꠞꠣ,
ꠀꠞ ꠛꠣꠞꠦ ꠛꠃꠔ ꠝꠣꠘꠡꠦ ꠖꠥꠀ-ꠖꠥꠞꠥꠖ ꠇꠞꠞꠣ।
১১ ꠀꠈꠔꠣꠃ ꠀꠉꠞ-ꠈꠥꠡꠛꠥ ꠎꠣꠟꠣꠘꠤ ꠐꠦꠛꠥꠟꠞ ꠒꠣꠁꠘꠦꠖꠤ ꠀꠟ꠆ꠟꠣꠞ ꠄꠇꠎꠘ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠖꠞꠡꠘ ꠖꠤꠟꠣ।
১২ ꠚꠤꠞꠤꠡ꠆ꠔꠣꠞꠦ ꠖꠦꠈꠤꠀꠃ ꠔꠣꠘ ꠖꠤꠟ ꠇꠣꠙꠤꠉꠦꠟ,
ꠎꠣꠘꠅ ꠒꠞ ꠀꠁꠟ।
১৩ ꠚꠤꠞꠤꠡ꠆ꠔꠣꠄ ꠇꠁꠟꠣ,
“ꠅ ꠎꠣꠇꠣꠞꠤꠀ,
ꠒꠞꠣꠁꠅ ꠘꠣ।
ꠢꠥꠘꠅ,
ꠀꠟ꠆ꠟꠣꠞ ꠖꠞꠛꠣꠞꠅ ꠔꠥꠝꠣꠞ ꠖꠥꠀ ꠇꠛꠥꠟ ꠅꠁꠍꠦ।
ꠔꠥꠝꠣꠞ ꠛꠤꠛꠤ ꠄꠟꠤꠍꠣꠛꠦꠔꠞ ꠊꠞꠅ ꠄꠇ ꠙꠥꠀ ꠅꠁꠛꠣ,
ꠔꠥꠝꠤ ꠄꠘ ꠘꠣꠝ ꠞꠣꠈꠤꠅ ꠄꠢꠤꠀ।
১৪ ꠅꠃ ꠙꠥꠔꠦ ꠔꠥꠝꠣꠞ ꠎꠤꠘ꠆ꠖꠦꠉꠤꠔ ꠛꠃꠔ ꠈꠥꠡꠤ ꠛꠣꠠꠣꠁꠛꠣ,
ꠔꠣꠁꠘ ꠎꠘꠝ ꠟꠅꠀꠄ ꠀꠞꠅ ꠛꠃꠔ ꠎꠘ ꠈꠥꠡꠤ ꠅꠁꠛꠣ।
১৫ ꠄꠁꠘ ꠔ ꠝꠣꠛꠥꠖꠞ ꠘꠎꠞꠅ ꠛꠃꠔ ꠛꠠ ꠁꠎ꠆ꠎꠔꠤ ꠅꠁꠛꠣ।
ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘꠃ ꠀꠋꠉꠥꠞꠞ ꠡꠞꠣꠛ ꠛꠣ ꠇꠥꠘꠥꠎꠣꠔ ꠘꠤꠡꠣ ꠈꠣꠁꠔꠣ ꠘꠣꠄ।
ꠔꠣꠘ ꠝꠣʼꠞ ꠙꠦꠐꠅ ꠕꠣꠇꠔꠦꠃ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠛꠣ।
১৬ ꠀꠞ ꠛꠘꠤ ꠁꠍꠞꠣꠁꠟꠞ ꠛꠃꠔ ꠝꠣꠘꠡꠞꠦ ꠔꠣꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠛꠣꠄ ꠚꠤꠞꠣꠁ ꠀꠘꠛꠣ।
১৭ ꠔꠣꠁꠘ ꠁꠟꠤꠀꠍ ꠘꠛꠤꠞ ꠟꠣꠈꠣꠘ ꠢꠤꠝ꠆ꠝꠔ ꠀꠞ ꠔꠣꠇ꠆ꠇꠔꠦ ꠝꠣꠟꠤꠇꠞ ꠀꠉꠦ ꠅꠁꠀ ꠀꠁꠛꠣ।
ꠀꠁꠀ ꠛꠣꠚ ꠅꠇꠟꠞ ꠖꠤꠟꠞꠦ ꠀꠅꠟꠣꠖꠞ ꠛꠣꠄ,
ꠀꠞ ꠘꠣꠚꠞꠝꠣꠘ ꠅꠇꠟꠞ ꠖꠤꠟꠞꠦ ꠙꠞꠦꠎꠉꠣꠞꠤꠞ ꠛꠣꠄ ꠚꠤꠞꠣꠁꠛꠣ।
ꠅꠃ ꠟꠣꠈꠣꠘ ꠝꠣꠛꠥꠖꠞ ꠟꠣꠉꠤ ꠄꠇ ꠖꠟ ꠛꠘ꠆ꠖꠣꠞꠦ ꠔꠣꠁꠘ ꠙꠥꠞꠣꠙꠥꠞ ꠔꠤꠀꠞ ꠇꠞꠛꠣ।”
১৮ ꠁꠔꠣ ꠢꠥꠘꠤꠀ ꠎꠣꠇꠣꠞꠤꠀꠄ ꠚꠤꠞꠤꠡ꠆ꠔꠣꠞꠦ ꠇꠁꠟꠣ,
“ꠄꠞ ꠙꠞꠝꠣꠘ ꠇꠤꠔꠣ,
ꠀꠝꠤ ꠇꠦꠝꠘꠦ ꠄꠇꠤꠘ ꠇꠞꠔꠣꠝ?
ꠀꠝꠤ ꠔ ꠛꠥꠠꠣ ꠅꠁꠉꠦꠍꠤ,
ꠀꠝꠣꠞ ꠛꠃꠅ ꠄꠇ꠆ꠇꠦꠞꠦ ꠝꠥꠞꠛ꠆ꠛꠤ ꠅꠁꠉꠦꠍꠂꠘ।”
১৯ ꠚꠤꠞꠤꠡ꠆ꠔꠣꠄ ꠇꠁꠟꠣ,
“ꠀꠝꠤ ꠎꠤꠛꠞꠣꠁꠟ,
ꠀꠝꠤ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠕꠣꠇꠤ।
ꠔꠥꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠤꠀ,
ꠅꠃ ꠈꠥꠡ-ꠈꠛꠞꠤ ꠔꠥꠝꠣꠞꠦ ꠎꠣꠘꠣꠘꠤꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠣꠞꠦ ꠛꠦꠎꠤꠍꠂꠘ।
২০ ꠖꠦꠈꠤꠅ,
ꠀꠝꠣꠞ ꠇꠕꠣ ꠡꠝꠄ ꠝꠔ ꠚꠟꠤꠛ।
ꠅꠁꠟꠦ ꠀꠝꠣꠞ ꠝꠣꠔ ꠄꠇꠤꠘ ꠘꠣ ꠇꠞꠣꠄ,
ꠁꠈꠣꠘ ꠚꠟꠤꠛꠣꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠤ ꠛꠥꠛꠣ ꠛꠘꠤꠎꠤꠛꠣꠄ,
ꠇꠥꠘ꠆ꠔꠣ ꠝꠣꠔꠔꠣꠄ ꠙꠣꠞꠔꠣꠄ ꠘꠣꠄ।”
২১ ꠁꠛꠣꠄ ꠝꠣꠘꠡꠦ ꠎꠣꠇꠣꠞꠤꠀꠞ ꠟꠣꠉꠤ ꠛꠣꠞ ꠌꠣꠁꠞꠣ।
ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠞ ꠅꠃ ꠙꠣꠇ ꠎꠣꠉꠣꠔ ꠔꠣꠘ ꠖꠦꠞꠤ ꠅꠞ ꠖꠦꠈꠤꠀ,
ꠔꠣꠞꠣ ꠢꠇꠟ ꠌꠤꠘ꠆ꠔꠣꠔ ꠙꠠꠤꠉꠦꠟꠣ।
২২ ꠛꠣꠖꠦ ꠎꠣꠇꠣꠞꠤꠀ ꠛꠣꠞꠅꠁꠀ ꠀꠁꠟꠣ,
ꠅꠁꠟꠦ ꠔꠣꠁꠘ ꠇꠥꠘ꠆ꠔꠣꠃ ꠝꠣꠔꠔꠣ ꠙꠣꠞꠟꠣ ꠘꠣ।
ꠔꠣꠁꠘ ꠛꠥꠛꠣ ꠅꠁꠉꠦꠟꠣ ꠀꠞ ꠁꠡꠣꠞꠣ-ꠀꠡꠣꠞꠣꠄ ꠛꠥꠎꠣꠁꠟꠣ।
ꠁ ꠢꠣꠟꠔ ꠖꠦꠈꠤꠀ ꠝꠣꠘꠡꠦ ꠛꠥꠎꠤꠟꠤꠟꠣ,
ꠙꠣꠇ ꠎꠣꠉꠣꠞ ꠜꠤꠔꠞꠦ ꠔꠣꠁꠘ ꠇꠥꠘꠥ ꠖꠞꠡꠘ ꠙꠣꠁꠍꠂꠘ।
২৩ ꠁꠝꠣꠝꠔꠤ ꠇꠣꠝꠞ ꠛꠣꠞꠤ ꠡꠦꠡ ꠅꠁꠀ ꠢꠣꠞꠟꠦ,
ꠔꠣꠁꠘ ꠘꠤꠎꠞ ꠛꠣꠠꠤꠔ ꠉꠦꠟꠣꠉꠤ।
২৪ ꠄꠞꠛꠣꠖꠦ ꠔꠣꠘ ꠛꠤꠛꠤ ꠄꠟꠤꠍꠣꠛꠦꠔꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ,
ꠄꠞꠖꠣꠄ ꠄꠟꠤꠍꠣꠛꠦꠔ ꠙꠣꠌ ꠝꠣꠡ ꠛꠣꠠꠤꠞ ꠛꠣꠞꠦ ꠛꠣꠞꠅꠁꠟꠣ ꠘꠣ।
২৫ ꠔꠣꠁꠘ ꠇꠁꠟꠣ,
“ꠁꠔꠣ ꠔ ꠀꠟ꠆ꠟꠣꠁ ꠟꠤꠟꠣ-ꠈꠦꠟꠣ।
ꠝꠣꠘꠡꠞ ꠉꠦꠍꠦ ꠀꠝꠤ ꠎꠦ ꠈꠥꠐꠣꠞ ꠜꠣꠉꠤ ꠅꠁꠍꠤ,
ꠅꠃ ꠈꠥꠐꠣꠞ ꠡꠞꠝ ꠢꠞꠣꠘꠤꠞ ꠟꠣꠉꠤ ꠔꠣꠁꠘ ꠀꠝꠣꠞ ꠛꠣꠄ ꠈꠤꠀꠟ ꠇꠞꠍꠂꠘ।”
ꠁꠍꠣ ꠞꠥꠢꠥꠟ꠆ꠟꠣꠞ ꠎꠘꠝꠞ ꠉꠣꠁꠛꠤ ꠈꠛꠞ
২৬-২৭ ꠄꠟꠤꠍꠣꠛꠦꠔꠞ ꠙꠦꠐꠅ ꠎꠦꠛꠟꠣ ꠍꠄ ꠝꠣꠡꠞ ꠢꠥꠞꠥꠔ꠆ꠔꠣ,
ꠅꠃ ꠡꠝꠄ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃꠔ ꠄꠇꠎꠘ ꠀꠛꠤꠀꠔꠤ ꠡꠔꠤ ꠘꠣꠞꠤ ꠀꠍꠟꠣ,
ꠄꠘ ꠘꠣꠝ ꠛꠤꠛꠤ ꠝꠞꠤꠅꠝ।
ꠀꠟ꠆ꠟꠣꠄ ꠎꠤꠛꠞꠣꠁꠟ ꠚꠤꠞꠤꠡ꠆ꠔꠣꠞꠦ ꠔꠣꠘ ꠉꠦꠍꠦ ꠛꠦꠎꠤꠟꠣ।
ꠔꠣꠘ ꠛꠤꠀ ꠑꠤꠇ ꠅꠁꠍꠤꠟ,
ꠛꠣꠖꠡꠣ ꠖꠣꠃꠖꠞ ꠈꠣꠘ꠆ꠖꠣꠘꠞ ꠁꠃꠍꠥꠚ ꠘꠣꠝꠞ ꠄꠇꠎꠘꠞ ꠟꠉꠦ।
২৮ ꠚꠤꠞꠤꠡ꠆ꠔꠣꠄ ꠀꠁꠀ ꠛꠤꠛꠤ ꠝꠞꠤꠅꠝꠞꠦ ꠇꠁꠟꠣ,
“ꠀꠍꠍꠣꠟꠣꠝꠥ ꠀꠟꠣꠁꠇꠥꠝ;
ꠀꠟ꠆ꠟꠣ ꠙꠣꠇꠦ ꠀꠙꠘꠣꠞꠦ ꠞꠢꠝꠔ ꠇꠞꠍꠂꠘ,
ꠔꠣꠁꠘ ꠀꠙꠘꠣꠞ ꠟꠉꠦ ꠀꠍꠂꠘ।”
২৯ ꠁꠈꠣꠘ ꠢꠥꠘꠤꠀ ꠝꠞꠤꠅꠝꠞ ꠝꠘ ꠙꠦꠞꠦꠡꠣꠘ ꠅꠁꠉꠦꠟ।
ꠔꠣꠁꠘ ꠝꠘꠦ ꠝꠘꠦ ꠇꠁꠟꠣ,
ꠁ ꠍꠣꠟꠣꠝꠞ ꠝꠣꠘꠤ ꠇꠤꠔꠣ?
৩০ ꠚꠤꠞꠤꠡ꠆ꠔꠣꠄ ꠇꠁꠟꠣ,
“ꠅ ꠝꠞꠤꠅꠝ,
ꠀꠙꠘꠦ ꠒꠞꠣꠁꠛꠣ ꠘꠣ,
ꠀꠟ꠆ꠟꠣꠄ ꠀꠙꠘꠣꠞꠦ ꠞꠢꠝꠔ ꠇꠞꠍꠂꠘ।
৩১ ꠢꠥꠘꠃꠇ꠆ꠇꠣ,
ꠀꠙꠘꠣꠞ ꠊꠞꠅ ꠄꠇ ꠙꠥꠀ ꠙꠄꠖꠣ ꠅꠁꠛꠣ,
ꠀꠙꠘꠦ ꠄꠘ ꠘꠣꠝ ꠞꠣꠈꠛꠣ,
ꠁꠍꠣ।
৩২ ꠔꠣꠁꠘ ꠛꠃꠔ ꠛꠠ ꠁꠎ꠆ꠎꠔꠤ ꠅꠁꠛꠣ।
ꠔꠣꠘꠞꠦ ꠇꠅꠀ ꠅꠁꠛ ꠁꠛꠘꠥꠟ꠆ꠟꠣ,
ꠀꠟ꠆ꠟꠣꠔꠣꠟꠣꠞ ꠈꠣꠍ ꠝꠣꠄꠀꠞ ꠎꠘ।
ꠀꠟ꠆ꠟꠣ ꠝꠣꠛꠥꠖꠦ ꠔꠣꠘ ꠈꠣꠘ꠆ꠖꠣꠘꠞ ꠝꠥꠞꠛ꠆ꠛꠤ ꠛꠣꠖꠡꠣ ꠖꠣꠃꠖꠞ ꠉꠖꠤ ꠔꠣꠘꠞꠦ ꠖꠤꠛꠣ।
৩৩ ꠔꠣꠁꠘ ꠖꠥꠘꠤꠀ ꠀꠈꠦꠞꠣꠔꠅ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠛꠣꠖꠡꠣꠁ ꠇꠞꠛꠣ,
ꠔꠣꠘ ꠛꠣꠖꠡꠣꠁ ꠇꠥꠘꠥꠖꠤꠘꠃ ꠚꠥꠞꠣꠁꠔ ꠘꠣꠄ।”
৩৪ ꠔꠦꠃ ꠛꠤꠛꠤ ꠝꠞꠤꠅꠝꠦ ꠚꠤꠞꠤꠡ꠆ꠔꠣꠞꠦ ꠇꠁꠟꠣ,
“ꠁꠔꠣ ꠇꠤꠟꠣꠘ ꠅꠁꠛ?
ꠀꠝꠣꠞ ꠔ ꠛꠤꠀ-ꠡꠣꠖꠤꠃ ꠅꠁꠍꠦ ꠘꠣ।”
৩৫ ꠚꠤꠞꠤꠡ꠆ꠔꠣꠄ ꠇꠁꠟꠣ,
“ꠙꠣꠇ ꠞꠥꠢꠥ ꠀꠙꠘꠣꠞ ꠃꠙꠞꠦ ꠘꠣꠎꠤꠟ ꠅꠁꠛꠣ,
ꠀꠞ ꠀꠟ꠆ꠟꠣꠞ ꠇꠥꠖꠞꠔꠤ ꠍꠣꠄꠀ ꠀꠙꠘꠣꠞ ꠃꠙꠞꠦ ꠀꠁꠛ।
ꠄꠞꠖꠣꠄꠃ ꠀꠙꠘꠣꠞ ꠊꠞꠅ ꠎꠦ ꠙꠣꠇ ꠀꠅꠟꠣꠖꠦ ꠎꠘꠝ ꠟꠁꠛꠣ,
ꠔꠣꠘꠞꠦ ꠁꠛꠘꠥꠟ꠆ꠟꠣ,
ꠝꠣꠘꠤ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠇꠁꠀ ꠒꠣꠇꠣ ꠅꠁꠛ।
৩৬ ꠢꠥꠘꠃꠇ꠆ꠇꠣ,
ꠀꠙꠘꠣꠞ ꠇꠥꠐꠥꠝ ꠛꠤꠛꠤ ꠄꠟꠤꠍꠣꠛꠦꠔꠞ ꠛꠦꠙꠣꠞꠦ ꠝꠣꠘꠡꠦ ꠇꠁꠔꠣ ꠘꠣ ꠘꠤ,
ꠔꠣꠘ ꠇꠥꠘꠥ ꠢꠥꠞꠥꠔ꠆ꠔꠣꠃ ꠅꠁꠔꠣ ꠘꠣꠄ?
ꠅꠁꠟꠦ ꠅꠈꠘ ꠔ ꠅꠃ ꠝꠥꠞꠛ꠆ꠛꠤ ꠛꠄꠅꠡꠅ ꠔꠣꠘ ꠙꠦꠐꠅꠅ ꠍꠄ ꠝꠣꠡꠞ ꠙꠥꠀ ꠀꠍꠦ।
৩৭ ꠔꠦ ꠀꠟ꠆ꠟꠣꠄ ꠙꠣꠞꠂꠘ ꠘꠣ,
ꠁꠟꠣ ꠇꠥꠘ꠆ꠔꠣꠃ ꠘꠣꠁ।”
৩৮ ꠝꠞꠤꠅꠝꠦ ꠇꠁꠟꠣ,
“ꠀꠝꠤ ꠔ ꠀꠟ꠆ꠟꠣꠞ ꠛꠣꠘ꠆ꠖꠤ;
ꠀꠙꠘꠣꠞ ꠇꠕꠣꠝꠔꠃ ꠢꠇꠟꠔꠣ ꠚꠟꠃꠇ।”
ꠛꠣꠖꠦ ꠚꠤꠞꠤꠡ꠆ꠔꠣ ꠔꠣꠘ ꠉꠦꠍ ꠕꠣꠇꠤ ꠛꠤꠖꠣꠄ ꠅꠁꠉꠦꠟꠣ।
ꠛꠤꠛꠤ ꠝꠞꠤꠅꠝ ꠛꠤꠛꠤ ꠄꠟꠤꠍꠣꠛꠦꠔꠞ ꠛꠣꠠꠤꠔ ꠉꠦꠟꠣ
৩৯ ꠄꠞꠛꠣꠖꠦ ꠛꠤꠛꠤ ꠝꠞꠤꠅꠝ ꠃꠠꠣ-ꠔꠣꠠꠣ ꠇꠞꠤ,
ꠄꠢꠥꠖꠤꠀ ꠎꠤꠟꠣꠞ ꠄꠇ ꠙꠣꠠꠤꠀ ꠉꠣꠃꠔ ꠉꠦꠟꠣ।
৪০ ꠉꠤꠀ ꠢꠘꠅ ꠁꠝꠣꠝ ꠎꠣꠇꠣꠞꠤꠀꠞ ꠛꠣꠠꠤꠔ ꠢꠣꠝꠣꠁꠀ,
ꠔꠣꠘ ꠛꠤꠛꠤ ꠄꠟꠤꠍꠣꠛꠦꠔꠞꠦ ꠍꠣꠟꠣꠝ ꠇꠞꠟꠣ।
৪১ ꠄꠟꠤꠍꠣꠛꠦꠔꠦ ꠝꠞꠤꠅꠝꠞ ꠀꠅꠀꠎ ꠢꠥꠘꠣꠞ ꠟꠉꠦ ꠟꠉꠦꠃ,
ꠔꠣꠘ ꠙꠦꠐꠞ ꠢꠥꠞꠥꠔ꠆ꠔꠣ ꠀꠈꠔꠣ ꠟꠠꠤꠀ ꠃꠑꠤꠟꠣ।
ꠔꠣꠁꠘ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ,
৪২ ꠎꠥꠞꠦ ꠎꠥꠞꠦ ꠇꠁꠟꠣ,
“ꠖꠥꠘꠤꠀꠞ ꠔꠣꠝꠣꠝ ꠛꠦꠐꠤꠘ꠆ꠔꠞ ꠝꠣꠎꠦ ꠔꠥꠝꠤꠃ ꠇꠙꠣꠟꠤ,
ꠔꠥꠝꠣꠞ ꠙꠦꠐꠞ ꠍꠣꠛꠣꠟꠅ ꠇꠙꠣꠟꠤ।
৪৩ ꠀꠝꠣꠞ ꠝꠥꠘꠤꠛꠞ ꠝꠣ ꠀꠝꠣꠞ ꠊꠞꠅ ꠔꠡꠞꠤꠚ ꠀꠘꠍꠂꠘ,
ꠀꠝꠣꠞ ꠅꠔ ꠛꠠ ꠇꠙꠣꠟ ꠇꠤꠟꠣ ꠅꠁꠟ?
৪৪ ꠀꠝꠤ ꠔꠥꠝꠣꠞ ꠀꠅꠀꠎ ꠢꠥꠘꠣꠞ ꠟꠉꠦ ꠟꠉꠦꠃ,
ꠀꠝꠣꠞ ꠙꠦꠐꠞ ꠉꠦꠖꠣꠄꠅ ꠈꠥꠡꠤꠄ ꠟꠠꠤꠀ ꠃꠑꠤꠍꠂꠘ।
৪৫ ꠔꠥꠝꠤ ꠔ ꠇꠙꠣꠟꠤ ꠛꠦꠐꠤ,
ꠇꠣꠞꠘ ꠝꠣꠛꠥꠖꠦ ꠔꠥꠝꠣꠞꠦ ꠎꠦꠔꠣ ꠎꠣꠘꠣꠁꠍꠂꠘ,
ꠔꠥꠝꠤ ꠖꠤꠟꠦ-ꠎꠣꠘꠦ ꠁꠔꠣ ꠄꠇꠤꠘ ꠇꠞꠍ।”
৪৬ ꠅꠃ ꠛꠤꠛꠤ ꠝꠞꠤꠅꠝꠦ ꠇꠁꠟꠣ,
“ꠀꠝꠣꠞ ꠇꠟꠛꠦ ꠔꠣꠞꠤꠚ ꠇꠞꠦꠞ ꠀꠝꠣꠞ ꠝꠣꠛꠥꠖꠞ,
৪৭ ꠛꠦꠢꠦꠡ꠆ꠔꠤ ꠈꠥꠡꠤꠄ ꠜꠞꠤꠉꠦꠍꠦ ꠀꠝꠣꠞ ꠅꠘ꠆ꠔꠞ,
ꠔꠞꠣꠃꠞꠣ ꠌꠣꠘ꠆ꠖ ꠀꠁꠍꠂꠘ,
ꠅꠜꠣꠉꠤꠘꠤꠞ ꠊꠞ।
৪৮ ꠌꠃꠈ ꠔꠥꠟꠤꠀ ꠌꠣꠁꠍꠂꠘ ꠖꠄꠀꠟ,
ꠇꠣꠋꠉꠣꠟ ꠛꠣꠘ꠆ꠖꠤꠞ ꠛꠣꠄ,
ꠄꠞꠖꠣꠄꠃ ꠔꠣꠝꠣꠝ ꠎꠣꠔꠤꠄ ꠡꠣꠛꠣꠡ ꠡꠣꠛꠣꠡ ꠉꠣꠄ,
ꠛꠠ ꠇꠙꠣꠟꠤ ꠇꠁꠛꠣ ꠝꠞꠦ,
ꠎꠥꠉ-ꠎꠥꠉꠣꠘ꠆ꠔꠞ।
৪৯ ꠡꠇ꠆ꠔꠤꠝꠣꠘꠦ ꠇꠞꠟꠣ ꠝꠞꠦ ꠅꠔ ꠛꠠ ꠇꠣꠝ,
ꠀꠝꠣꠞ ꠟꠣꠉꠤ ꠅꠁꠍꠂꠘ ꠔꠣꠁꠘ ꠇꠥꠖꠞꠔꠤ ꠀꠍꠣꠘ,
ꠔꠣꠁꠘꠃ ꠔ ꠍꠥꠛꠢꠣꠘ ꠀꠟ꠆ꠟꠣ,
ꠙꠣꠇ-ꠙꠛꠤꠔ꠆ꠞ ꠔꠣꠁꠘ।
৫০ ꠎꠦꠞꠣ ꠔꠣꠘꠦ ꠔꠣꠎꠤꠝ ꠇꠞꠤ ꠞꠂꠘ ꠒꠞꠣꠁꠀ,
ꠞꠢꠝ ꠇꠞꠂꠘ ꠔꠣꠁꠘ ꠁꠔꠣꠞꠦ ꠘꠤꠎꠞ ꠎꠣꠘꠤꠀ,
ꠅꠀꠞꠤꠡꠦ ꠅꠀꠞꠤꠡꠦ ꠞꠢꠝ,
ꠔꠣꠁꠘꠃ ꠛꠤꠟꠣꠁꠘ।
৫১ ꠔꠣꠘꠃ ꠇꠥꠖꠞꠔꠤ ꠀꠔꠦ ꠇꠞꠍꠂꠘ ꠝꠢꠣ ꠇꠣꠝ,
ꠝꠘꠞ ꠉꠞꠤꠝꠣꠄ ꠎꠦꠔꠣꠄ ꠇꠞꠦ ꠛꠠꠣꠁ ꠡꠣꠘ,
ꠁꠔꠣꠞꠦ ꠈꠦꠖꠣꠁꠀ ꠖꠤꠀ,
ꠛꠂꠔꠟ ꠛꠣꠘꠣꠁꠍꠂꠘ।
৫২ ꠞꠣꠎꠣ-ꠛꠣꠖꠡꠣꠁꠘ ꠢꠇꠤꠞ ꠅꠁꠟꠣ ꠉꠖꠤ ꠈꠥꠀꠁꠀ,
ꠢꠇꠤꠞ ꠅꠇꠟ ꠛꠣꠖꠡꠣ ꠅꠁꠟꠣ ꠞꠢꠝꠔ ꠙꠣꠁꠀ,
ꠃꠌꠣ-ꠘꠤꠌꠣ ꠢꠇꠤꠞ-ꠛꠣꠖꠡꠣ,
ꠔꠣꠁꠘꠃ ꠛꠣꠘꠣꠁꠍꠂꠘ।
৫৩ ꠃꠙꠣꠡꠤ ꠇꠣꠋꠉꠣꠟꠞꠦ ꠖꠤꠟꠣ ꠜꠣꠟꠣ ꠜꠣꠟꠣ ꠈꠣꠘꠤ,
ꠜꠥꠇꠣꠡꠤꠞ ꠙꠦꠐꠅ ꠉꠦꠟ ꠖꠣꠝꠤ ꠖꠣꠘꠣ-ꠙꠣꠘꠤ,
ꠗꠘꠤ ꠎꠘꠞꠦ ꠈꠣꠟꠤ ꠀꠔꠦ,
ꠈꠦꠖꠣꠁꠀ ꠖꠤꠍꠂꠘ।
৫৪ ꠔꠣꠁꠘ ꠎꠦꠟꠣ ꠅꠀꠖꠣ ꠇꠞꠍꠟꠣ ꠝꠄ-ꠝꠥꠞꠛ꠆ꠛꠤꠞ ꠟꠉꠦ,
ꠅꠟꠣꠃ ꠔ ꠀꠍꠣꠘ ꠇꠞꠍꠂꠘ ꠛꠘꠤ ꠁꠍꠞꠣꠁꠟꠞꠦ,
ꠛꠘꠤ ꠁꠍꠞꠣꠁꠟ ꠅꠁꠟꠣ ꠀꠟ꠆ꠟꠣꠞ ꠀꠙꠘ ꠉꠥꠟꠣꠝ।
৫৫ ꠁꠛ꠆ꠞꠣꠢꠤꠝꠞꠦ ꠁꠀꠖ ꠞꠣꠈꠍꠂꠘ ꠞꠢꠝ ꠛꠞꠇꠔ ꠖꠤꠛꠣ,
ꠟꠉꠦ ꠔꠣꠘ ꠈꠣꠘ꠆ꠖꠣꠘꠦꠅ ꠅꠃ ꠖꠄꠀ ꠙꠣꠁꠛꠣ,
ꠌꠤꠞꠇꠣꠟꠤꠘ ꠅꠃ ꠅꠀꠖꠣ ꠝꠘꠅ ꠞꠣꠈꠤꠍꠂꠘ॥”
৫৬ ꠛꠤꠛꠤ ꠝꠞꠤꠅꠝ ꠔꠣꠘ ꠇꠥꠐꠥꠝ ꠄꠟꠤꠍꠣꠛꠦꠔꠞ ꠉꠦꠍꠦ ꠔꠤꠘ ꠝꠣꠡ ꠞꠁꠟꠣ,
ꠢꠦꠡꠦ ꠔꠣꠘ ꠘꠤꠎꠞ ꠛꠣꠠꠤꠔ ꠉꠦꠟꠣꠉꠤ।
ꠢꠎꠞꠔ ꠄꠢꠤꠀ (ꠀ꠩) ꠘꠛꠤꠞ ꠎꠘꠝ
৫৭ ꠛꠣꠖꠦ ꠝꠤꠀꠖ ꠙꠥꠞꠣ ꠅꠁꠀ ꠢꠣꠞꠟꠦ ꠄꠟꠤꠍꠣꠛꠦꠔꠞ ꠊꠞꠅ ꠄꠇ ꠙꠥꠀ ꠅꠁꠟꠣ।
৫৮ ꠝꠣꠛꠥꠖꠦ ꠔꠣꠘꠞꠦ ꠅꠔ ꠛꠠ ꠞꠢꠝ ꠇꠞꠍꠂꠘ ꠢꠥꠘꠤꠀ,
ꠀꠞꠤ-ꠚꠞꠤ ꠀꠞ ꠈꠦꠡ-ꠇꠥꠐꠥꠝ ꠅꠇꠟ ꠀꠁꠀ ꠔꠣꠘ ꠟꠉꠦ ꠈꠥꠡꠤ-ꠛꠣꠡꠤ ꠇꠞꠟꠣ।
৫৯ ꠁꠢꠥꠖꠤ ꠅꠇꠟꠞ ꠞꠦꠅꠀꠎ ꠝꠣꠚꠤꠇ ꠎꠘꠝꠞ ꠀꠐ ꠖꠤꠘꠞ ꠖꠤꠘ,
ꠙꠥꠀꠞ ꠝꠍꠟꠝꠣꠘꠤ ꠀꠞ ꠀꠇꠤꠇꠣ ꠇꠞꠣꠘꠤꠞ ꠟꠣꠉꠤ ꠔꠣꠞꠣ ꠢꠇꠟ ꠖꠟꠣ ꠅꠁꠟꠣ।
ꠔꠣꠞꠣ ꠌꠣꠁꠟꠣ,
ꠛꠣꠚꠞ ꠘꠣꠝꠞ ꠟꠣꠈꠣꠘ ꠙꠥꠀꠞ ꠘꠣꠝꠅ ꠅꠃꠇ।
৬০ ꠅꠁꠟꠦ ꠝꠣʼꠄ ꠁꠈꠣꠘ ꠝꠣꠘꠟꠣ ꠘꠣ,
ꠔꠣꠁꠘ ꠇꠁꠟꠣ,
“ꠘꠣ,
ꠄꠞ ꠘꠣꠝ ꠅꠁꠛ ꠄꠢꠤꠀ।”
৬১ ꠔꠣꠞꠣ ꠇꠁꠟꠣ,
“ꠔꠥꠝꠣꠞ ꠈꠦꠡ-ꠇꠥꠐꠥꠝꠞ ꠝꠣꠎꠦ ꠔ ꠁꠟꠣ ꠘꠣꠝ ꠇꠦꠃꠞꠞ ꠘꠣꠁ।”
৬২ ꠔꠦꠃ ꠔꠣꠞꠣ ꠁꠡꠣꠞꠣꠄ ꠙꠥꠀꠞ ꠛꠣꠚꠞꠦ ꠎꠤꠇꠣꠁꠟꠣ,
ꠔꠣꠁꠘ ꠇꠥꠘ ꠘꠣꠝ ꠙꠍꠘ꠆ꠖ ꠇꠞꠂꠘ।
৬৩ ꠎꠣꠇꠣꠞꠤꠀꠄ ꠔꠣꠞꠣꠞ ꠉꠦꠍ ꠕꠣꠇꠤ ꠈꠣꠔꠣ-ꠇꠟꠝ ꠘꠤꠀ ꠟꠦꠈꠟꠣ,
“ꠔꠣꠞ ꠘꠣꠝ ꠄꠢꠤꠀ।”
ꠅꠃ ꠔꠣꠞꠣ ꠢꠇꠟ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
৬৪ ꠀꠞ ꠟꠉꠦ ꠟꠉꠦꠃ ꠎꠣꠇꠣꠞꠤꠀꠞ ꠎꠛꠣꠘ ꠈꠥꠟꠤꠉꠦꠟ,
ꠔꠣꠁꠘ ꠝꠣꠔ-ꠇꠕꠣ ꠝꠣꠔꠤꠟꠣ ꠀꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
৬৫ ꠁꠔꠣ ꠖꠦꠈꠤꠀ ꠀꠞꠤ-ꠚꠞꠤ ꠢꠇꠟꠦ ꠒꠞꠣꠁ ꠉꠦꠟꠣ।
ꠄꠢꠥꠖꠤꠀ ꠎꠤꠟꠣꠞ ꠙꠣꠠꠤꠀ ꠅꠘ꠆ꠌꠟꠞ ꠢꠇꠟ ꠝꠣꠘꠡꠞ ꠝꠥꠈꠦ ꠝꠥꠈꠦ ꠅꠃ ꠈꠛꠞ ꠞꠐꠤꠉꠦꠟ।
৬৬ ꠎꠔ ꠝꠣꠘꠡꠦ ꠁ ꠊꠐꠘꠣ ꠢꠥꠘꠍꠤꠟ,
ꠔꠣꠞꠣ ꠢꠇꠟꠦꠃ ꠝꠘꠦ ꠝꠘꠦ ꠌꠤꠘ꠆ꠔꠣ ꠇꠞꠤ ꠇꠂꠟ,
ꠛꠠ ꠅꠁꠀ ꠢꠣꠞꠟꠦ ꠁ ꠙꠥꠀ ꠇꠤꠔꠣ ꠅꠁꠛ।
ꠇꠣꠞꠘ ꠝꠣꠛꠥꠖꠞ ꠇꠥꠖꠞꠔꠤ ꠀꠔ ꠔꠣꠘ ꠃꠙꠞꠦ ꠀꠍꠤꠟ।
ꠢꠎꠞꠔ ꠎꠣꠇꠣꠞꠤꠀ (ꠀ꠩) ꠘꠛꠤꠞ ꠝꠥꠈꠅ ꠉꠣꠁꠛꠤ ꠈꠛꠞ
৬৭ ꠛꠣꠖꠦ ꠙꠥꠀꠞ ꠛꠣꠚ ꠎꠣꠇꠣꠞꠤꠀ,
ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠅꠃ ꠉꠣꠁꠛꠤ ꠈꠛꠞ ꠇꠁꠟꠣ,
৬৮ “ꠡꠥꠇꠞꠤꠀ ꠎꠣꠘꠣꠁ ꠀꠝꠤ ꠛꠘ꠆ꠖꠣꠄ ꠀꠟ꠆ꠟꠣ ꠝꠣꠛꠥꠖꠞ,
ꠀꠍꠣꠘ ꠇꠞꠍꠂꠘ ꠔꠣꠁꠘ ꠘꠤꠎꠦ ꠀꠙꠘ ꠁꠍꠞꠣꠁꠟꠞ,
ꠈꠤꠀꠟ ꠇꠞꠤ ꠇꠞꠟꠣ ꠀꠎꠣꠖ ꠘꠤꠎꠞ ꠉꠥꠟꠣꠝ ꠖꠟ।
৬৯ ꠀꠝꠞꠣꠞ ꠟꠣꠉꠤ ꠙꠍꠘ꠆ꠖ ꠇꠞꠟꠣ ꠖꠣꠃꠖ ꠈꠣꠘ꠆ꠖꠣꠘꠞꠦ,
ꠛꠟ-ꠔꠣꠇ꠆ꠇꠔꠤ ꠇꠣꠘ꠆ꠒꠣꠞꠤꠞꠦ ꠀꠘꠟꠣ ꠅꠈꠣꠘ ꠕꠘꠦ,
ꠖꠦꠈꠣꠁꠟꠣꠄ ꠖꠄꠀꠟ ꠝꠞꠦ ꠘꠣꠎꠣꠔ ꠇꠞꠞꠣ ꠎꠘ।
৭০ ꠘꠛꠤ ꠅꠇꠟꠦ ꠎꠛꠣꠘꠖꠤ ꠇꠁꠍꠟꠣ ꠛꠃꠔ ꠀꠉꠦ,
ꠔꠣꠁꠘꠃ ꠇꠣꠁꠍꠟꠣ ꠁꠔꠣ ꠘꠛꠤ ꠅꠇꠟꠞ ꠝꠥꠈꠦ,
ꠔꠣꠇ꠆ꠇꠔꠤ ꠇꠣꠘ꠆ꠒꠣꠞꠤꠃ ꠅꠁꠛꠣ ꠖꠣꠃꠖ ꠇꠥꠟꠞ ꠛꠟ।
৭১ ꠖꠥꠡꠝꠘ ꠅꠇꠟꠞ ꠇꠛꠎꠣ ꠕꠣꠇꠤ ꠔꠣꠁꠘ ꠛꠣꠌꠣꠁꠟꠣ,
ꠊꠤꠘ-ꠁꠋꠡꠣ ꠇꠞꠞꠣ ꠕꠣꠇꠤ ꠅꠈꠘ ꠚꠣꠘꠣ ꠖꠤꠟꠣ,
ꠀꠝꠞꠣꠞꠦ ꠛꠣꠌꠣꠁꠟꠣ ꠀꠁꠀ ꠖꠄꠀꠟ ꠝꠃꠟꠣꠞ ꠎꠘ।
৭২ ꠛꠣꠌꠣꠁꠟꠣ ꠀꠝꠞꠣꠞꠦ ꠈꠣꠟꠤ ꠝꠄ-ꠝꠥꠞꠛ꠆ꠛꠤꠞ ꠈꠣꠔꠤꠞꠦ,
ꠇꠍꠝ ꠇꠞꠣ ꠙꠣꠇ ꠅꠀꠖꠣ ꠙꠥꠞꠣꠘꠤꠞ ꠘꠤꠅꠔꠦ,
ꠝꠄ-ꠝꠥꠞꠛ꠆ꠛꠤꠞꠦ ꠎꠛꠣꠘ ꠖꠦꠅꠀꠄ ꠀꠝꠞꠣ ꠛꠣꠌꠤꠟꠣꠝ।
৭৩ ꠇꠍꠝ ꠇꠞꠤ ꠅꠀꠖꠣ ꠇꠞꠍꠟꠣ ꠖꠄꠀꠟ ꠀꠟ꠆ꠟꠣꠄ,
ꠁꠛ꠆ꠞꠣꠢꠤꠝꠞꠦ ꠎꠣꠘꠣꠁꠟꠣ ꠔꠣꠁꠘ ꠘꠣꠎꠣꠔꠞ ꠃꠙꠣꠄ,
ꠁꠛ꠆ꠞꠣꠢꠤꠝ ꠘꠛꠤꠃ ꠅꠁꠟꠣ ꠀꠝꠞꠣꠞ ꠀꠍꠟ ꠛꠣꠚ।
৭৪-৭৫ ꠀꠝꠞꠣꠞꠦ ꠛꠣꠌꠣꠁꠔꠣ ꠇꠞꠤ ꠝꠃꠟꠣꠞ ꠅꠃ ꠇꠍꠝ,
ꠖꠥꠡꠝꠘ ꠕꠣꠇꠤ ꠛꠣꠌꠣꠞ ꠟꠣꠉꠤ ꠛꠣꠔꠣꠁ ꠖꠤꠟꠣ ꠘꠤꠅꠝ,
ꠎꠤꠘ꠆ꠖꠣ ꠎꠥꠖꠤꠘ ꠀꠍꠤ ꠀꠝꠞꠣ ꠘꠤꠌꠤꠘ꠆ꠔꠣ ꠞꠁꠔꠣꠝ।
ꠒꠞ-ꠈꠚ ꠍꠣꠠꠣ ꠀꠝꠞꠣ ꠎꠣꠘꠥ ꠇꠞꠤ ꠄꠛꠣꠖꠔ,
ꠙꠞꠦꠎꠉꠣꠞ ꠀꠞ ꠍꠢꠤ ꠙꠕꠦ ꠕꠣꠇꠤ ꠘꠤꠞꠣꠙꠖ,
ꠔꠣꠘ ꠍꠣꠝꠘꠦ ꠞꠁꠀ ꠎꠣꠔꠦ ꠇꠞꠤ ꠔꠣꠘ ꠈꠦꠎꠝꠔ।
৭৬ ꠅꠞꠦ ꠀꠝꠣꠞ ꠝꠣꠄꠀꠞ ꠙꠥꠔ ꠄꠢꠤꠀ ꠛꠣꠛꠣꠎꠤ,
ꠔꠥꠝꠣꠞꠦ ꠔ ꠒꠣꠇꠣ ꠅꠁꠛ ꠀꠟ꠆ꠟꠣꠔꠣꠟꠣꠞ ꠘꠛꠤ,
ꠝꠥꠘꠤꠛꠞ ꠀꠉꠦ ꠞꠁꠀ ꠍꠢꠤ ꠇꠞꠛꠣꠄ ꠙꠕ।
৭৭ ꠛꠣꠔꠣꠁ ꠖꠤꠛꠣꠄ ꠔꠥꠝꠤ ꠔꠣꠘ ꠛꠘ꠆ꠖꠣ ꠅꠇꠟꠞꠦ,
ꠉꠥꠘꠣ ꠝꠣꠚꠤꠞ ꠙꠕ ꠌꠤꠘꠛꠣ ꠔꠥꠝꠣꠞ ꠔꠣꠟꠤꠝꠦ,
ꠛꠣꠔꠣꠁꠀ ꠖꠤꠛꠣꠄ ꠛꠣꠛꠣ ꠘꠣꠎꠣꠔ ꠙꠣꠅꠀꠞ ꠙꠕ।
৭৮ ꠀꠝꠞꠣꠞ ꠀꠟ꠆ꠟꠣꠞ ꠞꠢꠝ ꠀꠞ ꠢꠃ ꠝꠢꠛ꠆ꠛꠔꠦ,
ꠛꠦꠢꠦꠡ꠆ꠔꠤ ꠘꠥꠞꠞ ꠄꠇ ꠡꠥꠞꠥꠎ ꠀꠁꠛꠣ ꠃꠙꠞꠦꠔꠦ,
ꠀꠝꠞꠣꠞ ꠃꠙꠞꠦ ꠀꠁꠀ ꠢꠣꠞꠤ ꠞꠣꠈꠤꠛꠣ ꠘꠎꠞ।
৭৯ ꠝꠃꠔ ꠀꠞ ꠀꠘ꠆ꠖꠣꠞꠤꠞ ꠉꠣꠔꠅ ꠎꠦꠞꠣ ꠇꠣꠐꠣꠄ ꠖꠤꠘ,
ꠘꠥꠞꠞ ꠙꠕ ꠖꠦꠈꠛꠣ ꠔꠣꠞꠣ ꠇꠞꠤꠀ ꠄꠇꠤꠘ,
ꠀꠝꠞꠣꠞꠦꠅ ꠡꠣꠘ꠆ꠔꠤꠞ ꠙꠕꠦ ꠌꠣꠟꠣꠁꠛꠣ ꠅꠃ ꠎꠘ।
ꠅꠃ ꠢꠥꠎꠥꠞ ꠘꠣꠎꠤꠟ ꠅꠁꠀ ꠖꠦꠈꠣꠁꠛꠣ ꠇꠥꠖꠞꠔ,
ꠔꠣꠁꠘꠃ ꠢꠃ ꠅꠀꠖꠣ ꠇꠞꠣ ꠀꠟ꠆ꠟꠣꠁ ꠞꠢꠝꠔ॥”
৮০ ꠛꠣꠖꠦ ꠄꠢꠤꠀ ꠀꠡ꠆ꠔꠦ ꠀꠡ꠆ꠔꠦ ꠛꠠ ꠅꠁꠟꠣ,
ꠟꠉꠦ ꠅꠁꠀ ꠔꠣꠘ ꠞꠥꠢꠣꠘꠤ ꠛꠟꠅ ꠛꠣꠠꠤꠟ।
ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠈꠥꠟꠣ-ꠝꠦꠟꠣ ꠎꠣꠁꠞ ꠅꠁꠛꠣꠞ ꠀꠉ ꠙꠞ꠆ꠎꠘ꠆ꠔ,
ꠔꠣꠁꠘ ꠝꠞꠥꠜꠥꠝꠤꠞ ꠝꠣꠎꠦ ꠖꠤꠘ ꠇꠣꠐꠣꠁꠟꠣ।