ꠝꠣꠘꠡꠞ ꠉꠥꠘꠣꠞ ꠛꠤꠌꠣꠞ
২
১ ꠄꠞꠟꠣꠉꠤꠃ ꠇꠁꠞꠣꠝ,
ꠅ ꠝꠣꠘꠥꠡ ꠎꠣꠔꠤ,
ꠔꠥꠝꠤ ꠔ ꠅꠁꠘ꠆ꠘ ꠎꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠞꠣꠄ,
ꠁꠔꠣ ꠛꠤꠌꠣꠞ ꠔꠥꠝꠤ ꠢꠤꠇꠟꠣꠄ ꠇꠤꠟꠣ?
ꠔꠥꠝꠣꠞ ꠎꠥꠀꠙ ꠖꠤꠛꠣꠞ ꠇꠥꠘꠥ ꠙꠕ ꠀꠍꠦ ꠘꠤ?
ꠇꠣꠞꠘ ꠔꠥꠝꠤ ꠘꠤꠎꠦ ꠎꠦ ꠅꠙꠞꠣꠗ ꠇꠞꠞꠣꠄ,
ꠅꠃ ꠄꠇꠁ ꠅꠙꠞꠣꠗꠦ ꠔꠥꠝꠤ ꠀꠞꠇ ꠎꠘꠞꠦ ꠖꠥꠡꠤ ꠇꠁꠞꠣꠄ।
ꠔꠦ ꠁ ꠖꠥꠡ ꠔꠥꠝꠣꠞ ꠃꠙꠞꠦꠅ ꠙꠠꠦꠞ ꠘꠣ ꠘꠤ?
২ ꠀꠝꠞꠣ ꠔ ꠎꠣꠘꠤ,
ꠎꠦꠞꠣ ꠁꠟꠣꠈꠣꠘ ꠅꠙꠞꠣꠗ ꠇꠞꠦ,
ꠀꠟ꠆ꠟꠣꠄ ꠢꠇ ꠁꠘꠍꠣꠚ ꠝꠣꠚꠤꠇ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠖꠤꠛꠣ।
৩ ꠅ ꠝꠣꠘꠥꠡ ꠎꠣꠔꠤ,
ꠎꠦ ꠇꠣꠝ ꠔꠥꠝꠤ ꠘꠤꠎꠦꠅ ꠇꠞꠅ,
ꠅꠃ ꠄꠇꠁ ꠇꠣꠝꠞ ꠟꠣꠉꠤ ꠔꠥꠝꠤ ꠀꠞꠇ ꠎꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠅ,
ꠔꠦ ꠇꠦꠝꠘꠦ ꠛꠥꠎꠟꠣꠄ,
ꠔꠥꠝꠤ ꠀꠟ꠆ꠟꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠁꠟꠤꠛꠣꠄ?
৪ ꠔꠥꠝꠤ ꠔ ꠀꠟ꠆ꠟꠣ ꠙꠣꠇꠞ ꠅꠡꠦꠡ ꠝꠦꠢꠦꠞꠛꠣꠘꠤ,
ꠔꠣꠘ ꠗꠂꠎ꠆ꠎ-ꠡꠇ꠆ꠔꠤ ꠀꠞ ꠍꠛꠞꠉꠣꠞꠤꠞꠦ ꠄꠟꠣꠝꠤ ꠇꠞꠞꠣꠄ।
ꠔꠣꠘ ꠝꠦꠢꠦꠞꠛꠣꠘꠤꠄ ꠔꠥꠝꠣꠞꠦ ꠈꠣꠟꠤ ꠔꠃꠛꠣ ꠇꠞꠣꠞ ꠙꠕꠦ ꠐꠣꠘꠤꠀ ꠘꠦꠄ,
ꠁꠈꠣꠘ ꠚꠣꠃꠞꠤꠟꠤꠍ ꠘꠤ?
৫ ꠅꠁꠟꠦ ꠔꠥꠝꠣꠞ ꠙꠣꠡꠣꠘ ꠖꠤꠟ ꠀꠞ ꠔꠃꠛꠣ ꠘꠣ ꠇꠞꠣꠞ ꠝꠘꠜꠣꠛꠞ ꠟꠣꠉꠤ,
ꠔꠥꠝꠣꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ ꠖꠟꠣ ꠇꠞꠤ ꠕꠁꠞꠣꠄ,
ꠀꠟ꠆ꠟꠣꠄ ꠎꠦꠖꠤꠘ ꠉꠎꠛ ꠎꠣꠁꠞ ꠇꠞꠛꠣ,
ꠢꠇ ꠛꠤꠌꠣꠞ ꠇꠞꠛꠣ,
ꠢꠃ ꠖꠤꠘꠞ ꠟꠣꠉꠤ ꠡꠣꠎꠣ ꠖꠟꠣ ꠇꠞꠞꠣꠄ।
৬ ꠔꠣꠁꠘ ꠙꠞꠔꠦꠇ ꠝꠣꠘꠡꠞꠦ ꠎꠣꠞꠎꠤꠞ ꠇꠣꠝꠞ ꠚꠟ ꠖꠤꠛꠣ।
৭ ꠎꠦꠞꠣ ꠗꠂꠎ꠆ꠎ ꠗꠞꠤꠀ ꠘꠦꠇ ꠇꠣꠝꠞ ꠝꠣꠎꠖꠤ ꠀꠟ꠆ꠟꠣꠁ ꠔꠣꠞꠤꠚ,
ꠁꠎ꠆ꠎꠔ,
ꠀꠞ ꠈꠄꠢꠤꠘ ꠎꠤꠘ꠆ꠖꠦꠉꠤ ꠔꠣꠟ꠆ꠟꠣꠡ ꠇꠞꠦ,
ꠀꠟ꠆ꠟꠣꠄ ꠔꠣꠞꠣꠞꠦꠃ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠛꠣ।
৮ ꠅꠁꠟꠦ ꠎꠦꠞꠣ ꠘꠤꠎꠞ ꠈꠣꠁꠡꠞ ꠛꠡꠦ ꠌꠟꠦ,
ꠀꠟ꠆ꠟꠣꠁ ꠢꠇꠞ ꠛꠤꠞꠥꠖ꠆ꠖꠦ ꠞꠄ,
ꠘꠣꠚꠞꠝꠣꠘꠤꠞ ꠙꠇ꠆ꠇꠦ ꠕꠣꠇꠦ,
ꠔꠣꠞꠣꠞ ꠃꠙꠞꠦ ꠀꠟ꠆ꠟꠣꠁ ꠖꠥꠈ-ꠝꠍꠤꠛꠔ,
ꠉꠎꠛ ꠀꠞ ꠟꠣꠘ꠆ꠘꠔ ꠀꠁꠛ।
৯ ꠙꠞꠔꠦꠇ ꠘꠣꠚꠞꠝꠣꠘꠞ ꠃꠙꠞꠦ ꠁꠔꠣ ꠀꠁꠛ,
ꠙꠄꠟꠣ ꠛꠘꠤ ꠁꠍꠞꠣꠁꠟꠞ ꠃꠙꠞꠦ,
ꠛꠣꠖꠦ ꠜꠤꠘ ꠎꠣꠔꠤꠞ ꠃꠙꠞꠦ।
১০ ꠅꠁꠟꠦ ꠎꠦꠞꠣ ꠘꠦꠇ ꠇꠣꠝ ꠇꠞꠦ,
ꠔꠣꠞꠣ ꠙꠞꠔꠦꠇꠦ ꠔꠣꠞꠤꠚ,
ꠁꠎ꠆ꠎꠔ ꠀꠞ ꠡꠣꠘ꠆ꠔꠤ ꠙꠣꠁꠛ।
ꠙꠄꠟꠣ ꠛꠘꠤ ꠁꠍꠞꠣꠁꠟꠦ, ꠛꠣꠖꠦ ꠜꠤꠘ ꠎꠣꠔꠤꠄ ꠙꠣꠁꠛꠣ।
১১ ꠀꠟ꠆ꠟꠣꠞ ꠖꠞꠛꠣꠞꠅ ꠔ ꠙꠇ꠆ꠇꠙꠣꠔꠤꠞ ꠇꠥꠘꠥ ꠇꠣꠞꠛꠣꠞ ꠘꠣꠁ,
ꠢꠇꠟꠃ ꠢꠝꠣꠘ।
১২ ꠡꠞꠤꠅꠔꠞ ꠛꠣꠁꠞꠦ ꠞꠁꠀ ꠎꠦꠔꠣ ꠝꠣꠘꠡꠦ ꠉꠥꠘꠣ ꠇꠞꠍꠦ,
ꠔꠣꠞꠣ ꠛꠤꠘꠣꠡꠅ ꠅꠁꠛꠣ ꠡꠞꠤꠅꠔ ꠍꠣꠠꠣ,
ꠀꠞ ꠡꠞꠤꠅꠔꠞ ꠜꠤꠔꠞꠦ ꠞꠁꠀ ꠎꠦꠞꠣ ꠉꠥꠘꠣ ꠇꠞꠦ,
ꠅꠃ ꠡꠞꠤꠅꠔ ꠝꠣꠚꠤꠇꠃ ꠔꠣꠞꠣꠞ ꠛꠤꠌꠣꠞ ꠅꠁꠛ।
১৩ ꠎꠦꠔꠣ ꠝꠣꠘꠡꠦ ꠡꠞꠤꠅꠔꠞ ꠛꠄꠀꠘ ꠈꠣꠟꠤ ꠢꠥꠘꠦ,
ꠀꠟ꠆ꠟꠣꠞ ꠘꠎꠞꠅ ꠔ ꠔꠣꠞꠣ ꠛꠦ-ꠇꠍꠥꠞ ꠘꠣꠄ,
ꠅꠁꠟꠦ ꠎꠦꠞꠣ ꠡꠞꠤꠅꠔ ꠀꠝꠟ ꠇꠞꠦ,
ꠔꠣꠞꠣꠃ ꠈꠣꠟꠤ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠅꠁꠛꠣ।
১৪ ꠜꠤꠘ ꠎꠣꠔꠤ ꠅꠇꠟꠦ ꠀꠟ꠆ꠟꠣꠁ ꠇꠥꠘꠥ ꠡꠞꠤꠅꠔ ꠘꠣ ꠙꠣꠁꠟꠦꠅ,
ꠔꠣꠞꠣ ꠎꠦꠛꠟꠣ ꠄꠝꠘꠦꠃ ꠡꠞꠤꠅꠔ ꠝꠣꠚꠤꠇ ꠌꠟꠂꠘ,
ꠅꠃ ꠡꠝꠄ ꠔꠣꠞꠣꠞ ꠛꠤꠛꠦꠇꠃ ꠡꠞꠤꠅꠔ ꠛꠘꠤꠎꠣꠄ।
১৫ ꠄꠔꠦ ꠖꠦꠈꠣ ꠎꠣꠄ,
ꠡꠞꠤꠅꠔ ꠝꠣꠚꠤꠇ ꠎꠦꠔꠣ ꠇꠞꠣ ꠎꠞꠥꠞ,
ꠁꠔꠣ ꠔꠣꠞꠣꠞ ꠖꠤꠟꠞ ꠛꠤꠛꠦꠇꠞ ꠝꠣꠎꠦ ꠟꠦꠈꠣ ꠀꠍꠦ।
ꠔꠣꠞꠣꠞ ꠛꠤꠛꠦꠇꠦ ꠔꠣꠞꠣꠞ ꠇꠣꠝꠞ ꠡꠣꠇ꠆ꠇꠤ ꠖꠦꠄ,
ꠇꠥꠘꠥ ꠇꠥꠘꠥ ꠡꠝꠄ ꠔꠣꠞꠣꠞ ꠛꠤꠛꠦꠇꠦ ꠔꠣꠞꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠦ,
ꠀꠞ ꠇꠥꠘꠥ ꠇꠥꠘꠥ ꠡꠝꠄ ꠔꠣꠞꠣꠞ ꠙꠇ꠆ꠇꠦꠅ ꠡꠣꠄ ꠖꠦꠄ।
১৬ ꠔꠦ ꠀꠟ꠆ꠟꠣꠄ ꠎꠦꠖꠤꠘ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠢꠇꠟ ꠝꠣꠘꠡꠞ ꠟꠥꠇꠣꠁꠟ ꠀꠝꠟꠞ ꠛꠤꠌꠣꠞ ꠇꠞꠛꠣ,
ꠢꠃ ꠖꠤꠘꠃ ꠁꠔꠣ ꠎꠣꠁꠞ ꠅꠁꠛ।
ꠀꠞ ꠀꠝꠤ ꠅꠈꠘ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀꠞ,
ꠅꠃ ꠝꠣꠚꠤꠇꠃ ꠛꠤꠌꠣꠞ ꠅꠁꠛ।
ꠛꠘꠤ ꠁꠍꠞꠣꠁꠟ ꠀꠞ ꠡꠞꠤꠅꠔ
১৭ ꠔꠥꠝꠤ ꠎꠦꠛꠟꠣ ꠘꠤꠎꠞ ꠙꠞꠤꠌꠄ ꠖꠤꠞꠣꠄ ꠛꠘꠤ ꠁꠍꠞꠣꠁꠟ ꠇꠁꠀ,
ꠔꠥꠝꠤ ꠢꠎꠞꠔ ꠝꠥꠍꠣꠞ ꠡꠞꠤꠅꠔꠞ ꠃꠙꠞꠦ ꠜꠞꠡꠣ ꠇꠞꠞꠣꠄ ꠀꠞ ꠀꠟ꠆ꠟꠣꠞ ꠝꠣꠄꠀꠞ ꠛꠘ꠆ꠖꠣ ꠇꠁꠀ ꠛꠠꠣꠁ ꠖꠦꠈꠣꠁꠞꠣꠄ।
১৮ ꠔꠦ ꠀꠟ꠆ꠟꠣꠄ ꠔꠥꠝꠣꠞ ꠉꠦꠍ ꠕꠣꠇꠤ ꠇꠤꠔꠣ ꠀꠡꠣ ꠇꠞꠂꠘ,
ꠔꠥꠝꠤ ꠇꠤꠔꠣ ꠇꠞꠔꠣꠄ,
ꠁꠈꠣꠘ ꠔ ꠔꠥꠝꠤ ꠎꠣꠘꠅꠃ,
ꠡꠞꠤꠅꠔ ꠕꠣꠇꠤ ꠔꠥꠝꠤ ꠁꠔꠣꠞ ꠔꠣꠟꠤꠝ ꠙꠣꠁꠍ।
১৯ ꠔꠥꠝꠤ ꠝꠘꠦ ꠝꠘꠦ ꠇꠁꠞꠣꠄ,
ꠀꠝꠤ ꠔ ꠀꠘ꠆ꠖꠣꠞꠦ ꠙꠕ ꠖꠦꠈꠣꠁꠀꠞ,
ꠀꠘ꠆ꠖꠣꠞꠤꠔ ꠎꠦꠔꠣ ꠀꠍꠂꠘ,
ꠁꠔꠣꠞ ꠉꠦꠍꠦ ꠀꠝꠤ ꠘꠥꠞꠞ ꠞꠥꠡꠘꠤ।
২০ ꠛꠦꠀꠈꠟꠞꠦ ꠢꠦꠖꠣꠄꠅꠔ ꠇꠞꠤꠀꠞ,
ꠢꠥꠞꠥꠔ꠆ꠔꠣꠂꠘꠞꠦ ꠔꠣꠟꠤꠝ ꠖꠤꠀꠞ।
ꠔꠥꠝꠤ ꠛꠥꠎꠞꠣꠄ,
ꠡꠞꠤꠅꠔꠞ ꠜꠤꠔꠞꠦ ꠢꠇ ꠀꠞ ꠀꠈꠟ-ꠛꠥꠖ꠆ꠖꠤ ꠀꠍꠦ।
২১ ꠁꠔꠣ ꠈꠥꠛ ꠜꠣꠟꠣ ꠇꠕꠣ,
ꠅꠁꠟꠦ ꠔꠥꠝꠤ ꠎꠦꠛꠟꠣ ꠅꠁꠘ꠆ꠘ ꠝꠣꠘꠡꠞꠦ ꠢꠤꠇꠣꠁꠞꠣꠄ,
ꠔꠦ ꠘꠤꠎꠦꠅ ꠁꠔꠣ ꠢꠤꠇꠅ ꠘꠣ ꠇꠦꠘꠦ?
ꠔꠥꠝꠤ ꠝꠣꠘꠡꠞꠦ ꠇꠁꠞꠣꠄ,
ꠌꠥꠞꠤ ꠇꠞꠤꠅ ꠘꠣ,
ꠅꠁꠟꠦ ꠔꠥꠝꠤ ꠘꠤꠎꠦꠃ ꠌꠥꠞꠤ ꠇꠞꠞꠣꠄ ꠘꠣ ꠘꠤ?
২২ ꠝꠣꠘꠡꠞꠦ ꠇꠁꠞꠣꠄ,
ꠎꠤꠘꠣ ꠇꠞꠤꠅ ꠘꠣ,
ꠅꠁꠟꠦ ꠔꠥꠝꠤ ꠘꠤꠎꠦ ꠇꠥꠘꠥ ꠎꠤꠘꠣ ꠇꠞꠞꠣꠄ ꠘꠣ ꠘꠤ?
ꠔꠥꠝꠤ ꠔ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤꠞꠦ ꠊꠤꠘ꠆ꠘꠣꠁꠞꠣꠄ,
ꠢꠤꠞꠛꠣꠞ ꠘꠤꠎꠦꠃ ꠝꠥꠞ꠆ꠔꠤꠞ ꠝꠘ꠆ꠖꠤꠞꠞꠦ ꠟꠥꠐ-ꠔꠞꠣꠎ ꠇꠞꠞꠣꠄ ꠘꠣ ꠘꠤ?
২৩ ꠎꠦ ꠡꠞꠤꠅꠔ ꠟꠁꠀ ꠔꠥꠝꠤ ꠛꠠꠣꠁ ꠇꠞꠞꠣꠄ,
ꠁ ꠡꠞꠤꠅꠔꠞ ꠃꠟꠐꠣ ꠌꠟꠤꠀ ꠔꠥꠝꠤ ꠘꠤꠎꠦꠃ ꠀꠟ꠆ꠟꠣꠞꠦ ꠅꠡꠝ꠆ꠝꠣꠘ ꠇꠞꠞꠣꠄ ꠘꠣ ꠘꠤ?
২৪ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
“ꠔꠥꠝꠞꠣꠞ ꠌꠣꠟ-ꠌꠟꠘ ꠖꠦꠈꠤꠀ ꠜꠤꠘ ꠎꠣꠔꠤ ꠅꠇꠟꠦ ꠀꠟ꠆ꠟꠣꠞ ꠘꠣꠝꠞꠦ ꠛꠦꠁꠎ꠆ꠎꠔ ꠇꠞꠦꠞ।”
২৫ ꠢꠥꠘꠅ,
ꠔꠥꠝꠤ ꠎꠥꠖꠤ ꠡꠞꠤꠅꠔ ꠝꠣꠘꠤꠀ ꠌꠟꠅ,
ꠔꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠖꠣꠝ ꠀꠍꠦ,
ꠀꠞ ꠡꠞꠤꠅꠔ ꠝꠣꠚꠤꠇ ꠘꠣ ꠌꠟꠟꠦ,
ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟꠦꠅ ꠎꠦꠔꠣ,
ꠘꠣ ꠇꠞꠣꠁꠟꠦꠅ ꠅꠔꠣ।
ꠀꠟ꠆ꠟꠣꠞ ꠘꠎꠞꠅ ꠔꠥꠝꠤ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠛꠦ-ꠖꠤꠘꠞ ꠟꠣꠈꠣꠘ।
২৬ ꠅꠈꠘ ꠝꠍꠟꠝꠣꠘꠤ ꠘꠣ ꠇꠞꠣꠁꠀꠅ ꠎꠥꠖꠤ ꠇꠦꠃ ꠡꠞꠤꠅꠔ ꠝꠣꠘꠤꠀ ꠌꠟꠦ,
ꠔꠦ ꠀꠟ꠆ꠟꠣꠄ ꠔꠣꠞꠦ ꠝꠍꠟꠝꠣꠘꠤ ꠇꠞꠣꠁꠟ ꠇꠁꠀ ꠡꠝꠎꠤꠔꠣ ꠘꠣꠄ ꠘꠤ?
২৭ ꠀꠞ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠝꠣꠘꠡꠦ ꠎꠦꠛꠟꠣ ꠡꠞꠤꠅꠔ ꠝꠣꠘꠤꠀ ꠌꠟꠦ,
ꠔꠦ ꠟꠤꠈꠤꠔ ꠡꠞꠤꠅꠔ ꠙꠣꠁꠀ ꠀꠞ ꠝꠍꠟꠝꠣꠘꠤ ꠇꠞꠣꠁꠀꠅ ꠎꠥꠖꠤ ꠔꠥꠝꠤ ꠄꠞ ꠃꠟꠐꠣ ꠌꠟꠅ,
ꠔꠣꠁꠟꠦ ꠢꠃ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠛꠦꠐꠣꠄ ꠔꠥꠝꠣꠞꠦ ꠖꠥꠡꠤꠔ ꠘꠣꠄ ꠘꠤ?
২৮ ꠛꠤꠡꠄꠐꠣ ꠛꠥꠎꠞꠣꠄ ꠘꠤ?
ꠈꠣꠟꠤ ꠘꠣꠝꠦ ꠛꠘꠤ ꠁꠍꠞꠣꠁꠟ ꠅꠁꠟꠦꠃ ꠇꠦꠃ ꠀꠍꠟ ꠛꠘꠤ ꠁꠍꠞꠣꠁꠟ ꠘꠣꠄ।
ꠡꠞꠤꠟꠞ ꠅꠋꠉ ꠇꠣꠐꠤꠀ ꠝꠍꠟꠝꠣꠘꠤ ꠇꠞꠣꠁꠟꠦꠅ ꠔ,
ꠀꠍꠟ ꠝꠍꠟꠝꠣꠘꠤ ꠅꠄ ꠘꠣ।
২৯ ꠅꠁꠟꠦ ꠝꠘ ꠕꠣꠇꠤ ꠎꠦꠞꠣ ꠛꠘꠤ ꠁꠍꠞꠣꠁꠟ,
ꠔꠣꠞꠣꠃ ꠀꠍꠟ ꠛꠘꠤ ꠁꠍꠞꠣꠁꠟ।
ꠁꠔꠣ ꠇꠥꠘꠥ ꠟꠤꠈꠤꠔ ꠀꠁꠘ-ꠇꠣꠘꠥꠘꠞ ꠛꠦꠙꠣꠞ ꠘꠣꠄ,
ꠖꠤꠟꠞ ꠜꠤꠔꠞꠞ ꠞꠥꠢꠣꠘꠤ ꠛꠦꠙꠣꠞ।
ꠖꠤꠟꠞ ꠝꠍꠟꠝꠣꠘꠤꠃ ꠅꠁꠟ ꠀꠍꠟ ꠝꠍꠟꠝꠣꠘꠤ।
ꠎꠉꠔꠞ ꠝꠣꠘꠡꠦ ꠄꠞꠣꠞ ꠔꠣꠞꠤꠚ ꠘꠣ ꠇꠞꠟꠦꠅ,
ꠀꠟ꠆ꠟꠣꠄ ꠔꠣꠞꠤꠚ ꠇꠞꠂꠘ।