৩
১ ꠔꠦ ꠁꠟꠣꠈꠣꠘ ꠛꠦꠙꠣꠞ ꠅꠁꠟꠦ,
ꠛꠘꠤ ꠁꠍꠞꠣꠁꠟ ꠅꠀꠄ ꠛꠣꠠꠔꠤ ꠇꠥꠘꠥ ꠟꠣꠜ ꠀꠍꠦ ꠘꠤ?
ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠔ ꠇꠥꠘꠥ ꠚꠣꠄꠖꠣ ꠀꠍꠦ ꠘꠤ?
২ ꠘꠤꠌ꠆ꠌꠄ ꠀꠍꠦ।
ꠛꠃꠔ ꠘꠝꠥꠘꠣꠞ ꠚꠣꠄꠖꠣ ꠀꠍꠦ।
ꠙꠄꠟꠣ ꠚꠣꠄꠖꠣ:
ꠀꠟ꠆ꠟꠣ ꠙꠣꠇꠦ ꠔꠣꠘ ꠢꠇ꠆ꠇꠟ ꠇꠣꠟꠣꠝ ꠘꠣꠎꠤꠟ ꠇꠞꠍꠂꠘ ꠛꠘꠤ ꠁꠍꠞꠣꠁꠟꠞ ꠉꠦꠍꠦ।
৩ ꠅꠛꠁꠡ꠆ꠡ ꠔꠣꠞꠣꠞ ꠇꠥꠘꠥ ꠇꠥꠘꠥ ꠎꠘꠦ ꠛꠦꠁꠝꠣꠘꠤ ꠇꠞꠍꠦ,
ꠄꠔꠦ ꠇꠤꠔꠣ ꠅꠁꠍꠦ?
ꠔꠣꠞꠣ ꠛꠦꠁꠝꠣꠘꠤ ꠇꠞꠟꠦꠅ ꠀꠟ꠆ꠟꠣ ꠙꠣꠇꠦ ꠇꠥꠘꠥ ꠔꠣꠞꠣꠞ ꠟꠣꠈꠣꠘ ꠛꠦꠁꠝꠣꠘꠤ ꠇꠞꠛꠣ ꠘꠤ?
৪ ꠘꠣꠃꠎꠥꠛꠤꠟ꠆ꠟꠣ!
ꠢꠇꠟ ꠝꠣꠘꠡꠦ ꠝꠤꠍꠣ ꠝꠣꠔꠟꠦꠅ ꠀꠟ꠆ꠟꠣ ꠔ ꠢꠣꠝꠦꠡꠣ ꠢꠇ ꠕꠣꠇꠂꠘ।
ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ:
ꠄꠞꠛꠣꠖꠦꠅ ꠙꠞꠝꠣꠘ ꠝꠤꠟꠛ ꠔꠥꠝꠣꠞ ꠎꠛꠣꠘ ꠡꠑꠤꠇ,
ꠔꠥꠝꠣꠞ ꠙꠇ꠆ꠇꠦ ꠞꠣꠄ ꠎꠣꠁꠛ।
৫ ꠖꠥꠘꠤꠀꠛꠤ ꠝꠣꠘꠡꠦ ꠇꠁꠔ ꠙꠣꠞꠦ,
ꠀꠝꠞꠣꠞ ꠘꠣ-ꠢꠇ ꠇꠣꠝꠦ ꠎꠦꠛꠟꠣ ꠀꠞꠅ ꠙꠞꠤꠡ꠆ꠇꠣꠞ ꠛꠥꠎꠣ ꠎꠣꠄ ꠀꠟ꠆ꠟꠣ ꠙꠣꠇ ꠇꠔ ꠢꠇ,
ꠔꠦ ꠀꠝꠞꠣꠞ ꠘꠣ-ꠢꠇꠦ ꠔꠣꠘ ꠉꠃꠞꠛ ꠅꠀꠞ ꠛꠣꠖꠦꠅ ꠔꠣꠁꠘ ꠀꠝꠞꠣꠞꠦ ꠡꠣꠎꠣ ꠖꠤꠟꠦ ꠁꠔꠣ ꠔꠣꠘ ꠅꠁꠘ꠆ꠘꠣꠄ?
ꠘꠣꠃꠎꠥꠛꠤꠟ꠆ꠟꠣ।
৬ ꠀꠟ꠆ꠟꠣꠄ ꠎꠥꠖꠤ ꠢꠇ ꠁꠘꠍꠣꠚ ꠘꠣ ꠇꠞꠂꠘ,
ꠔꠦ ꠔꠣꠁꠘ ꠇꠤꠟꠣ ꠀꠡ꠆ꠔꠣ ꠎꠉꠔꠞ ꠛꠤꠌꠣꠞ ꠇꠞꠛꠣ?
৭ ꠔꠣꠞꠣ ꠇꠂꠘ,
“ꠀꠝꠣꠞ ꠝꠤꠍꠣ ꠝꠣꠔꠞ ꠝꠣꠎꠖꠤꠃ ꠛꠥꠎꠣ ꠎꠣꠄ,
ꠀꠟ꠆ꠟꠣ ꠙꠣꠇ ꠢꠇ-ꠁꠘꠍꠣꠚꠇꠣꠞꠤ।
ꠀꠞ ꠀꠝꠣꠞ ꠝꠤꠍꠣ ꠝꠣꠔꠦ ꠎꠦꠛꠟꠣ ꠀꠟ꠆ꠟꠣꠞ ꠉꠃꠞꠛ-ꠔꠣꠞꠤꠚ ꠅꠄ,
ꠔꠦ ꠔꠣꠁꠘ ꠀꠝꠣꠞꠦ ꠉꠥꠘꠣꠉꠣꠞ ꠡꠣꠁꠛꠡ꠆ꠔ ꠇꠞꠂꠘ ꠇꠦꠘꠦ?”
৮ ꠁꠈꠣꠘ ꠈꠥꠛ ꠡꠥꠘ꠆ꠖꠞ ꠎꠥꠇ꠆ꠔꠤ।
ꠄꠞꠟꠣꠉꠤ ꠀꠝꠞꠣ ꠇꠁꠔꠣꠝ ꠘꠤ,
“ꠀꠅ,
ꠀꠝꠞꠣ ꠘꠣꠚꠞꠝꠣꠘꠤ ꠇꠞꠣꠔ ꠞꠁ,
ꠎꠣꠔꠦ ꠅꠃ ꠘꠣꠚꠞꠝꠣꠘꠤꠞ ꠝꠣꠎꠖꠤ ꠜꠣꠟꠣ ꠚꠟ ꠝꠤꠟꠦ?”
ꠇꠥꠘꠥ ꠇꠥꠘꠥ ꠝꠣꠘꠡꠦ ꠀꠝꠞꠣꠞ ꠛꠖꠘꠣꠝ ꠉꠣꠁꠀ ꠇꠂꠘ,
ꠀꠝꠞꠣꠅ ꠛꠥꠟꠦ ꠅꠟꠣ ꠔꠣꠟꠤꠝ ꠖꠦꠁ।
ꠁꠔꠣꠄ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠙꠣꠁꠛꠣ।
ꠀꠟ꠆ꠟꠣꠞ ꠖꠞꠛꠣꠞꠅ ꠢꠇꠟ ꠝꠣꠘꠥꠡꠃ ꠖꠥꠡꠤ
৯ ꠅꠈꠘ ꠀꠝꠞꠣ ꠇꠤꠔꠣ ꠇꠁꠔꠣꠝ?
ꠛꠘꠤ ꠁꠍꠞꠣꠁꠟ ꠢꠤꠡꠣꠛꠦ ꠀꠝꠞꠣꠞ ꠢꠣꠟꠔ ꠇꠤꠔꠣ ꠜꠤꠘ ꠎꠣꠔꠤ ꠕꠣꠇꠤ ꠜꠣꠟꠣ ꠘꠤ?
ꠘꠤꠌ꠆ꠌꠄ ꠘꠣ।
ꠀꠉꠦꠃ ꠀꠝꠞꠣ ꠇꠁꠍꠤ,
ꠛꠘꠤ ꠁꠍꠞꠣꠁꠟ ꠀꠞ ꠜꠤꠘ ꠎꠣꠔꠤ ꠢꠇꠟꠃ ꠉꠥꠘꠣꠞ ꠉꠥꠟꠣꠝ।
১০ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
ꠛꠦ-ꠇꠍꠥꠞ ꠛꠟꠔꠦ ꠇꠦꠃ ꠘꠣꠁ,
ꠄꠇꠎꠘꠅ ꠘꠣꠁ;
১১ ꠀꠈꠟꠖꠣꠞ ꠄꠇꠎꠘꠅ ꠘꠣꠁ,
ꠇꠦꠃ ꠀꠟ꠆ꠟꠣꠞ ꠔꠣꠟ꠆ꠟꠣꠡ ꠇꠞꠦ ꠘꠣ।
১২ ꠢꠇꠟ ꠝꠣꠘꠥꠡ ꠛꠦ-ꠙꠕꠤ ꠅꠁꠉꠦꠍꠦ,
ꠢꠇꠟ ꠄꠇꠟꠉꠦ ꠘꠣꠚꠞꠝꠣꠘ ꠅꠁꠉꠦꠍꠦ,
ꠘꠦꠇ ꠇꠣꠝ ꠇꠞꠦ ꠁꠟꠣ ꠇꠦꠃ ꠘꠣꠁ,
ꠄꠇꠎꠘꠅ ꠘꠣꠁ।
১৩ ꠔꠣꠞꠣꠞ ꠝꠥꠈ ꠔ ꠙꠌꠣ ꠟꠣꠡꠞ ꠈꠥꠟꠣ ꠇꠄꠛꠞꠞ ꠟꠣꠈꠣꠘ,
ꠔꠣꠞꠣꠞ ꠎꠤꠜꠦ ꠍꠟ-ꠌꠔꠥꠞꠤ ꠝꠣꠔꠦ,
ꠀꠞ ꠑꠥꠐꠞ ꠔꠟꠦ ꠀꠍꠦ,
ꠢꠣꠚꠞ ꠛꠤꠡ।
১৪ ꠔꠣꠞꠣꠞ ꠉꠟꠣꠞ ꠝꠣꠎꠦ ꠛꠖꠖꠥꠀ ꠀꠞ ꠔꠤꠔ꠆ꠔꠣ ꠝꠣꠔ-ꠇꠕꠣꠄ ꠜꠞꠣ,
১৫ ꠈꠥꠘ-ꠈꠣꠞꠣꠙꠤꠞ ꠟꠣꠉꠤ ꠔꠣꠞꠣꠞ ꠙꠣꠅ ꠀꠉꠥꠀꠁꠟ,
১৬ ꠔꠣꠞꠣꠞ ꠙꠕꠅ ꠈꠣꠟꠤ ꠛꠤꠘꠣꠡ ꠀꠞ ꠀꠢꠣꠎꠣꠞꠤ।
১৭ ꠡꠣꠘ꠆ꠔꠤꠞ ꠙꠕ ꠔꠣꠞꠣ ꠌꠤꠘꠦ ꠘꠣ,
১৮ ꠔꠣꠞꠣꠞ ꠖꠤꠟ ꠕꠣꠇꠤ ꠀꠟ꠆ꠟꠣꠞ ꠒꠞ-ꠈꠚ ꠢꠞꠤꠉꠦꠍꠦ।
১৯ ꠀꠝꠞꠣ ꠎꠣꠘꠤ,
ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠔꠣꠞꠣꠞ ꠟꠣꠉꠤꠃ,
ꠎꠦꠞꠣꠞ ꠉꠦꠍꠦ ꠅꠃ ꠡꠞꠤꠅꠔ ꠖꠦꠅꠀ ꠅꠁꠍꠦ।
ꠎꠣꠔꠦ ꠈꠣꠟꠤ ꠜꠤꠘ ꠎꠣꠔꠤ ꠘꠣꠄ,
ꠡꠞꠤꠅꠔ ꠙꠣꠅꠞꠣ ꠛꠘꠤ ꠁꠍꠞꠣꠁꠟꠅ,
ꠝꠣꠘꠤ ꠀꠡ꠆ꠔꠣ ꠎꠉꠔꠞ ꠇꠦꠃ ꠇꠥꠘ꠆ꠔꠣ ꠝꠣꠔꠤꠛꠣꠞ ꠡꠥꠎꠥꠉ ꠘꠣꠁ,
ꠡꠛꠃ ꠀꠟ꠆ꠟꠣꠞ ꠛꠤꠌꠣꠞꠞ ꠖꠣꠠꠅ ꠙꠠꠦ।
২০ ꠇꠣꠞꠘ ꠡꠞꠤꠅꠔ ꠀꠝꠟ ꠇꠞꠟꠦꠃ,
ꠀꠟ꠆ꠟꠣꠄ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠤꠟꠤꠛꠣ,
ꠁꠟꠣ ꠇꠥꠘ꠆ꠔꠣ ꠘꠣꠄ।
ꠅꠁꠟꠦ ꠡꠞꠤꠅꠔꠞ ꠝꠣꠎꠖꠤꠃ ꠝꠣꠘꠥꠡ ꠉꠥꠘꠣꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠄ।
ꠝꠣꠘꠥꠡ ꠇꠤꠟꠣ ꠛꠦ-ꠇꠍꠥꠞ ꠢꠤꠡꠣꠛꠦ ꠉꠁꠘ꠆ꠘ ꠅꠁꠘ
২১ ꠅꠈꠘ ꠔ ꠀꠟ꠆ꠟꠣ ꠙꠣꠇꠦ ꠙꠕ ꠛꠣꠔꠣꠁ ꠖꠤꠍꠂꠘ,
ꠡꠞꠤꠅꠔ ꠍꠣꠠꠣꠅ ꠔꠣꠁꠘ ꠇꠤꠟꠣ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠢꠤꠡꠣꠛꠦ ꠉꠁꠘ꠆ꠘ ꠇꠞꠂꠘ।
ꠀꠉꠦ ꠔꠣꠁꠘ ꠔꠃꠞꠣꠔ ꠡꠞꠤꠚ ꠀꠞ ꠘꠛꠤ ꠅꠇꠟꠞ ꠇꠤꠔꠣꠛꠅ ꠅꠃ ꠛꠦꠙꠣꠞꠦ ꠁꠡꠣꠞꠣ ꠖꠤꠍꠂꠘ।
২২ ꠅꠃ ꠙꠕ ꠅꠁꠟ,
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠎꠦꠞꠣ ꠁꠝꠣꠘ ꠀꠘꠦ,
ꠅꠃ ꠁꠝꠣꠘꠞ ꠝꠣꠎꠖꠤꠃ ꠀꠟ꠆ꠟꠣꠄ ꠔꠣꠞꠣꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠂꠘ।
ꠁ ꠛꠦꠙꠣꠞꠦ ꠛꠘꠤ ꠁꠍꠞꠣꠁꠟ ꠅꠃꠇ ꠛꠣ ꠜꠤꠘ ꠎꠣꠔꠤ ꠅꠃꠇ ꠢꠇꠟꠃ ꠄꠇ ꠢꠝꠣꠘ।
২৩ ꠇꠣꠞꠘ,
ꠢꠇꠟꠦꠃ ꠉꠥꠘꠣ ꠇꠞꠍꠦ,
ꠀꠟ꠆ꠟꠣꠞ ꠡꠣꠘ-ꠔꠎꠟ꠆ꠟꠤꠔ ꠢꠣꠝꠣꠘꠤꠞ ꠡꠣꠝꠞꠕ ꠇꠦꠃꠞꠞ ꠘꠣꠁ।
২৪ ꠅꠁꠟꠦ ꠁꠍꠣ ꠀꠟ-ꠝꠍꠤꠄ ꠝꠣꠘꠡꠞꠦ ꠉꠥꠘꠣꠞ ꠀꠔ ꠕꠣꠇꠤ ꠛꠣꠌꠣꠘꠤꠞ ꠛꠦꠛꠡ꠆ꠔꠣ ꠇꠞꠍꠂꠘ,
ꠔꠣꠁꠘ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠢꠤꠡꠣꠛꠦ ꠝꠣꠘꠡꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠣꠞ ꠙꠕ ꠇꠞꠍꠂꠘ।
২৫ ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ,
ꠀꠟ-ꠝꠍꠤꠄ ꠔꠣꠞꠣꠞ ꠟꠣꠉꠤ ꠘꠤꠎꠞ ꠟꠃꠞꠦ ꠇꠚꠞꠣꠞ ꠇꠥꠞꠛꠣꠘꠤ ꠖꠤꠀ ꠀꠟ꠆ꠟꠣ ꠙꠣꠇꠞꠦ ꠈꠥꠡꠤ ꠇꠞꠍꠂꠘ।
ꠅꠃ ꠘꠝꠥꠘꠣꠄ ꠀꠟ꠆ꠟꠣꠄ ꠖꠦꠈꠣꠁꠍꠂꠘ,
ꠎꠥꠖꠤꠅ ꠔꠣꠘ ꠘꠤꠎꠞ ꠍꠛꠞꠉꠣꠞꠤꠞ ꠟꠣꠉꠤ ꠝꠣꠘꠡꠞ ꠙꠥꠞꠣꠘꠣ ꠉꠥꠘꠣꠞ ꠡꠣꠎꠣ ꠖꠤꠔꠦ ꠖꠦꠞꠤ ꠇꠞꠞꠣ,
ꠔꠦꠛꠃ ꠔꠣꠁꠘ ꠢꠇ-ꠁꠘꠍꠣꠚꠇꠣꠞꠤ।
২৬ ꠀꠞ ꠅꠈꠘ ꠔꠣꠁꠘ ꠁꠔꠣ ꠖꠦꠈꠣꠁꠍꠂꠘ,
ꠎꠣꠔꠦ ꠙꠞꠝꠣꠘ ꠅꠄ,
ꠔꠣꠁꠘ ꠘꠤꠎꠦ ꠢꠇ-ꠁꠘꠍꠣꠚꠇꠣꠞꠤ ꠀꠞ ꠎꠦꠞꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠂꠘ,
ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠂꠘ।
২৭ ꠄꠞꠛꠣꠖꠦꠅ ꠝꠣꠘꠡꠦ ꠛꠠꠣꠁ ꠖꠦꠈꠣꠘꠤꠞ ꠇꠥꠘ꠆ꠔꠣ ꠀꠍꠦ ꠘꠤ?
ꠘꠣ,
ꠇꠥꠘ꠆ꠔꠣꠃ ꠘꠣꠁ।
ꠇꠦꠘꠦ ꠘꠣꠁ?
ꠝꠣꠘꠡꠦ ꠡꠞꠤꠅꠔ ꠝꠣꠘꠦ ꠇꠞꠤ ꠔꠣꠞ ꠛꠠꠣꠁ ꠇꠞꠣꠞ ꠇꠥꠘ꠆ꠔꠣ ꠘꠣꠁ ꠘꠤ?
ꠘꠣ,
ꠀꠍꠟ ꠇꠕꠣ ꠅꠁꠟ,
ꠁꠝꠣꠘꠞ ꠝꠣꠎꠦ ꠛꠠꠣꠁ ꠇꠞꠣꠞ ꠎꠣꠉꠣ ꠘꠣꠁ।
২৮ ꠀꠝꠞꠣ ꠎꠣꠘꠤ,
ꠀꠟ꠆ꠟꠣꠄ ꠝꠣꠘꠡꠞꠦ ꠔꠣꠞ ꠁꠝꠣꠘꠞ ꠟꠣꠉꠤꠃ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠂꠘ,
ꠡꠞꠤꠅꠔ ꠝꠣꠘꠣꠞ ꠟꠣꠉꠤ ꠘꠣꠄ।