ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠕꠣꠇꠤ ꠔꠣꠟꠤꠝ
৪
১ ꠔꠦ ꠀꠝꠞꠣꠞ ꠈꠣꠘ꠆ꠖꠣꠘꠞ ꠝꠥꠟ ꠛꠣꠚ ꠢꠎꠞꠔ ꠁꠛ꠆ꠞꠣꠢꠤꠝꠞ ꠎꠤꠘ꠆ꠖꠦꠉꠤꠞ ꠛꠦꠙꠣꠞꠦ ꠇꠤꠔꠣ ꠇꠁꠔꠣꠝ?
ꠔꠣꠁꠘ ꠇꠤꠔꠣ ꠙꠣꠁꠟꠣ?
২ ꠡꠞꠤꠅꠔ ꠝꠣꠘꠣꠞ ꠟꠣꠉꠤꠃ ꠎꠥꠖꠤ ꠔꠣꠘꠞꠦ ꠛꠦ-ꠇꠍꠥꠞ ꠇꠁꠀ ꠉꠘꠣ ꠅꠄ,
ꠔꠦ ꠔꠣꠁꠘ ꠘꠤꠎꠞ ꠛꠠꠣꠁ ꠖꠦꠈꠣꠁꠔꠣ ꠙꠣꠞꠂꠘ,
ꠅꠁꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠔ ꠘꠣꠄ।
৩ ꠇꠣꠞꠘ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
“ꠁꠛ꠆ꠞꠣꠢꠤꠝꠦ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠣꠄ,
ꠀꠟ꠆ꠟꠣꠄ ꠔꠣꠘꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠟꠣ।”
৪ ꠇꠣꠝꠟꠣꠄ ꠇꠣꠝ ꠇꠞꠤꠀ ꠎꠦ ꠛꠦꠔꠘ ꠙꠣꠄ,
ꠁꠇꠐꠣ ꠇꠥꠘꠥ ꠖꠣꠘ ꠘꠣꠄ,
ꠁꠇꠐꠣ ꠔꠣꠞ ꠙꠣꠅꠘꠣ ꠝꠎꠥꠞꠤ।
৫ ꠅꠁꠟꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞ ꠀꠝꠟꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ,
ꠈꠣꠟꠤ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ,
ꠎꠦꠁꠘ ꠉꠥꠘꠣꠉꠣꠞꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠂꠘ,
ꠔꠦ ꠔꠣꠞ ꠁꠝꠣꠘꠞ ꠟꠣꠉꠤ ꠢꠦ ꠈꠣꠟꠣꠍ ꠙꠣꠄ।
৬ ꠀꠞ ꠘꠤꠎ ꠀꠝꠟ ꠍꠣꠠꠣ ꠀꠟ꠆ꠟꠣ ꠙꠣꠇꠦ ꠎꠣꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠍꠂꠘ,
ꠢꠎꠞꠔ ꠖꠣꠃꠖꠦꠅ ꠔꠣꠞꠦ ꠘꠦꠇ-ꠇꠙꠣꠟꠤ ꠇꠁꠍꠂꠘ।
ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠔꠣꠁꠘ ꠇꠁꠞꠣ,
৭ ꠘꠦꠇ-ꠇꠙꠣꠟꠤ ꠔꠣꠞꠣꠃ,
ꠎꠦꠞꠣꠞ ꠘꠣꠚꠞꠝꠣꠘꠤꠞꠦ ꠝꠣꠚ ꠇꠞꠣ ꠅꠁꠍꠦ,
ꠝꠣꠛꠥꠖ-ꠝꠃꠟꠣꠄ ꠎꠦꠞꠣꠞ ꠉꠥꠘꠣꠞꠦ ꠀꠞ ꠢꠤꠡꠣꠛꠅ ꠗꠞꠔꠣ ꠘꠣꠄ।
৮ ꠘꠦꠇ-ꠇꠙꠣꠟꠤ ꠢꠃ ꠎꠘ,
ꠎꠣꠞ ꠉꠥꠘꠣꠞꠦ ꠀꠟ꠆ꠟꠣꠄ ꠔꠣꠞ ꠀꠝꠟ-ꠘꠝꠣ ꠕꠣꠇꠤ ꠇꠣꠐꠤ ꠖꠤꠍꠂꠘ।
৯ ꠔꠦ ꠘꠦꠇ-ꠇꠙꠣꠟꠤ ꠈꠣꠟꠤ ꠔꠣꠞꠣꠞꠦꠃ ꠇꠅꠀ ꠅꠁꠍꠦ ꠘꠤ,
ꠎꠦꠞꠣꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠅꠁꠍꠦ?
ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠝꠣꠘꠡꠞꠦꠅ ꠇꠅꠀ ꠅꠁꠍꠦ ꠘꠣ ꠘꠤ?
ꠅꠄ,
ꠔꠣꠞꠣꠞꠦꠅ ꠘꠦꠇ-ꠇꠙꠣꠟꠤ ꠇꠅꠀ ꠅꠁꠍꠦ।
ꠇꠣꠞꠘ ꠀꠟ꠆ꠟꠣꠞ ꠇꠣꠟꠣꠝꠅ ꠙꠣꠁꠍꠤ,
ꠢꠎꠞꠔ ꠁꠛ꠆ꠞꠣꠢꠤꠝꠞ ꠁꠝꠣꠘꠞ ꠟꠣꠉꠤꠃ,
ꠀꠟ꠆ꠟꠣꠄ ꠔꠣꠘꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠟꠣ।
১০ ꠇꠥꠘ ꠡꠝꠄ ꠇꠞꠟꠣ?
ꠝꠍꠟꠝꠣꠘꠤ ꠇꠞꠣꠘꠤꠞ ꠀꠉꠦ,
ꠘꠣ ꠛꠣꠖꠦ?
ꠘꠤꠌ꠆ꠌꠄ,
ꠝꠍꠟꠝꠣꠘꠤ ꠇꠞꠣꠘꠤꠞ ꠀꠉꠦꠃ ꠅꠁꠍꠟꠣ।
১১ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠀꠉꠦꠃ ꠀꠟ꠆ꠟꠣꠄ ꠔꠣꠘꠞꠦ ꠁꠝꠣꠘꠞ ꠟꠣꠉꠤ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠍꠟꠣ,
ꠀꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠀꠍꠤꠟ ꠄꠞ ꠙꠞꠝꠣꠘ ꠛꠣ ꠘꠤꠡꠣꠘꠣ।
ꠄ ꠕꠣꠇꠤ ꠛꠥꠎꠣ ꠎꠣꠄ,
ꠝꠍꠟꠝꠣꠘꠤ ꠘꠣ ꠖꠤꠟꠦꠅ,
ꠈꠣꠟꠤ ꠁꠝꠣꠘꠞ ꠟꠣꠉꠤ ꠎꠦꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠗꠞꠣ ꠅꠄ,
ꠔꠣꠞꠣꠞ ꠝꠥꠟ ꠛꠣꠚ ꠅꠁꠟꠣ ꠢꠎꠞꠔ ꠁꠛ꠆ꠞꠣꠢꠤꠝ।
১২ ꠝꠍꠟꠝꠣꠘꠤ ꠇꠞꠣꠘꠤꠞ ꠀꠉꠦ ꠢꠎꠞꠔ ꠁꠛ꠆ꠞꠣꠢꠤꠝꠞ ꠁꠝꠣꠘ ꠎꠦꠟꠣꠈꠣꠘ ꠀꠍꠤꠟ,
ꠝꠍꠟꠝꠣꠘꠤ ꠇꠞꠣꠁꠀ ꠎꠔ ꠝꠣꠘꠡꠦ ꠅꠃ ꠁꠝꠣꠘꠦ ꠌꠟꠦ,
ꠔꠣꠞꠣꠞꠅ ꠝꠥꠟ ꠛꠣꠚ ꠅꠁꠟꠣ ꠅꠃ ꠁꠛ꠆ꠞꠣꠢꠤꠝ।
ꠁꠝꠣꠘꠞ ꠛꠟꠦꠃ ꠀꠟ꠆ꠟꠣꠁ ꠅꠀꠖꠣ ꠙꠥꠞꠘ
১৩ ꠀꠟ꠆ꠟꠣ ꠙꠣꠇꠦ ꠅꠀꠖꠣ ꠇꠞꠍꠟꠣ,
ꠢꠎꠞꠔ ꠁꠛ꠆ꠞꠣꠢꠤꠝ ꠀꠞ ꠔꠣꠘ ꠈꠣꠘ꠆ꠖꠣꠘꠞꠦ ꠁ ꠖꠥꠘꠤꠀꠞ ꠖꠈꠟꠖꠣꠞꠤ ꠖꠤꠛꠣ।
ꠡꠞꠤꠅꠔ ꠝꠣꠘꠣꠞ ꠟꠣꠉꠤ ꠁ ꠅꠀꠖꠣ ꠇꠞꠣ ꠅꠁꠍꠦ ꠘꠣ,
ꠛꠞꠋ ꠁꠛ꠆ꠞꠣꠢꠤꠝꠞ ꠁꠝꠣꠘꠞ ꠟꠣꠉꠤꠃ ꠔꠣꠘꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠤꠀ ꠅꠃ ꠅꠀꠖꠣ ꠇꠞꠍꠟꠣ।
১৪ ꠡꠞꠤꠅꠔ ꠝꠣꠘꠤꠀ ꠇꠦꠃ ꠎꠥꠖꠤ ꠖꠈꠟꠖꠣꠞꠤ ꠙꠣꠁꠟꠣꠄ,
ꠔꠦ ꠔ ꠁꠝꠣꠘ ꠛꠦꠇꠣꠝꠣ ꠛꠘꠤꠎꠣꠄ ꠀꠞ ꠀꠟ꠆ꠟꠣꠞ ꠅꠀꠖꠣꠞꠅ ꠇꠥꠘꠥ ꠖꠣꠝ ꠞꠄ ꠘꠣ।
১৫ ꠡꠞꠤꠅꠔꠦ ꠔ ꠀꠟ꠆ꠟꠣꠞ ꠉꠎꠛ ꠟꠣꠝꠣꠄ।
ꠀꠍꠟ ꠇꠕꠣ ꠅꠁꠟ,
ꠎꠦꠈꠣꠘꠅ ꠡꠞꠤꠅꠔ ꠘꠣꠁ,
ꠁꠘꠅ ꠡꠞꠤꠅꠔ ꠜꠋꠉꠞ ꠇꠕꠣꠅ ꠘꠣꠁ।
১৬ ꠄꠞꠟꠣꠉꠤ ꠁ ꠅꠀꠖꠣ ꠈꠣꠟꠤ ꠝꠣꠘꠡꠞ ꠁꠝꠣꠘꠞ ꠝꠣꠎꠖꠤ ꠙꠥꠞꠣ ꠇꠞꠣ ꠅꠄ,
ꠎꠣꠔꠦ ꠁꠐꠣ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠢꠤꠡꠣꠛꠦ ꠞꠄ।
ꠔꠦ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘꠞ ꠉꠦꠍꠦ ꠎꠦ ꠅꠀꠖꠣ ꠇꠞꠣ ꠅꠁꠍꠦ,
ꠁꠈꠣꠘ ꠘꠤꠌ꠆ꠌꠄ ꠙꠥꠞꠣ ꠇꠞꠣ ꠅꠁꠛ।
ꠈꠣꠟꠤ ꠡꠞꠤꠅꠔ ꠝꠣꠘꠞꠣ ꠅꠇꠟꠞ ꠟꠣꠉꠤꠃ ꠙꠥꠞꠘ ꠇꠞꠣ ꠅꠁꠔ ꠘꠣꠄ,
ꠎꠦꠞꠣ ꠁꠛ꠆ꠞꠣꠢꠤꠝꠞ ꠁꠝꠣꠘꠞ ꠟꠉꠦ ꠡꠞꠤꠇ,
ꠔꠣꠞꠣꠞ ꠟꠣꠉꠤꠅ ꠁ ꠅꠀꠖꠣ ꠙꠥꠞꠣ ꠇꠞꠣ ꠅꠄ।
১৭ ꠀꠟ꠆ꠟꠣꠞ ꠇꠣꠟꠣꠝꠅ ꠎꠦꠟꠣ ꠟꠦꠈꠣ ꠀꠍꠦ,
“ꠀꠝꠤ ꠔꠥꠝꠣꠞꠦ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠛꠣꠘꠣꠁꠟꠣꠝ।”
ꠅꠃ ꠢꠤꠡꠣꠛꠦ ꠀꠟ꠆ꠟꠣꠞ ꠘꠎꠞꠅ ꠁꠛ꠆ꠞꠣꠢꠤꠝ ꠅꠁꠟꠣ ꠀꠝꠞꠣ ꠢꠇꠟꠞ ꠝꠥꠟ ꠛꠣꠚ।
ꠎꠦꠁꠘ ꠝꠞꠣꠞꠦ ꠎꠤꠘ꠆ꠖꠦꠉꠤ ꠖꠦꠁꠘ ꠀꠞ ꠎꠦꠔꠣ ꠅꠀꠞ ꠘꠣꠄ,
ꠅꠔꠣ ꠅꠀꠁꠔꠣ ꠙꠣꠞꠂꠘ,
ꠢꠃ ꠀꠟ꠆ꠟꠣꠞ ꠃꠙꠞꠦ ꠔꠣꠁꠘ ꠁꠝꠣꠘ ꠀꠘꠍꠟꠣ।
১৮ ꠅꠃ ꠁꠛ꠆ꠞꠣꠢꠤꠝꠦ ꠎꠦꠛꠟꠣ ꠀꠅꠟꠣꠖ ꠙꠣꠅꠀꠞ ꠇꠥꠘꠥ ꠀꠡꠣ ꠇꠞꠣꠞ ꠇꠕꠣ ꠘꠣꠄ,
ꠢꠃ ꠡꠝꠄꠅ ꠔꠣꠁꠘ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠤꠀ ꠁꠝꠣꠘꠦ ꠝꠎꠛꠥꠔ ꠞꠁꠍꠂꠘ।
ꠀꠟ꠆ꠟꠣꠄ ꠔꠣꠘꠞꠦ ꠇꠁꠍꠟꠣ,
“ꠔꠥꠝꠣꠞ ꠈꠣꠘ꠆ꠖꠣꠘꠞꠦ ꠀꠝꠤ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ।”
ꠀꠞ ꠅꠃ ꠇꠕꠣꠞ ꠃꠙꠞꠦ ꠔꠣꠁꠘ ꠁꠝꠣꠘ ꠀꠘꠟꠣ।
১৯ ꠄꠇ-ꠡ ꠛꠍꠞ ꠛꠄꠅꠡꠞ ꠁꠛ꠆ꠞꠣꠢꠤꠝꠦ ꠎꠥꠖꠤꠅ ꠛꠥꠎꠍꠤꠟꠣ,
ꠢꠥꠞꠥꠔ꠆ꠔꠣ ꠎꠘꠝ ꠖꠦꠅꠀꠞ ꠈꠦꠝꠔꠣ ꠀꠞ ꠔꠣꠘ ꠘꠣꠁ,
ꠔꠣꠘ ꠛꠤꠛꠤ ꠍꠣꠄꠞꠣꠞꠅ ꠢꠥꠞꠥꠔ꠆ꠔꠣ ꠅꠀꠞ ꠛꠄꠅꠡ ꠡꠦꠡ ꠅꠁꠉꠦꠍꠦ,
ꠔꠦꠛꠃ ꠔꠣꠘ ꠁꠝꠣꠘ ꠝꠎꠛꠥꠔ ꠀꠍꠤꠟ।
২০ ꠀꠟ꠆ꠟꠣꠞ ꠅꠀꠖꠣꠞ ꠛꠦꠙꠣꠞꠦ ꠔꠣꠘ ꠝꠘꠅ ꠇꠥꠘꠥ ꠡꠘ꠆ꠖꠄ ꠀꠁꠍꠦ ꠘꠣ,
ꠛꠞꠋ ꠔꠣꠁꠘ ꠁꠝꠣꠘꠦ ꠀꠞꠅ ꠝꠎꠛꠥꠔ ꠅꠁꠀ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ।
২১ ꠁꠛ꠆ꠞꠣꠢꠤꠝꠦ ꠙꠥꠞꠣꠙꠥꠞ ꠄꠇꠤꠘ ꠇꠞꠟꠣ,
ꠀꠟ꠆ꠟꠣꠄ ꠎꠦ ꠅꠀꠖꠣ ꠇꠞꠍꠂꠘ,
ꠁꠔꠣ ꠙꠥꠞꠣ ꠇꠞꠣꠞ ꠈꠦꠝꠔꠣꠅ ꠔꠣꠘ ꠀꠍꠦ।
২২ ꠅꠃ ꠇꠣꠞꠘꠦꠃ ꠔꠣꠘ ꠁꠝꠣꠘꠞ ꠟꠣꠉꠤ ꠔꠣꠘꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠤꠟ।
২৩ “ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠤꠟ,”
ꠁꠈꠣꠘ ꠈꠣꠟꠤ ꠁꠛ꠆ꠞꠣꠢꠤꠝꠞ ꠟꠣꠉꠤ ꠟꠦꠈꠣ ꠅꠁꠍꠦ ꠘꠣ,
২৪ ꠀꠝꠞꠣꠞ ꠟꠣꠉꠤꠅ ꠟꠦꠈꠣ ꠅꠁꠍꠦ।
ꠁꠝꠣꠘꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠞꠣꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠛꠣ,
ꠇꠣꠞꠘ ꠎꠦ ꠀꠟ꠆ꠟꠣꠄ ꠀꠝꠞꠣꠞ ꠝꠣꠟꠤꠇ ꠁꠍꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠟꠣ,
ꠀꠝꠞꠣ ꠔꠣꠘ ꠃꠙꠞꠦꠃ ꠁꠝꠣꠘ ꠀꠘꠍꠤ।
২৫ ꠀꠝꠞꠣꠞ ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠅꠃ ꠁꠍꠣꠞꠦ ꠝꠃꠔꠞ ꠀꠔꠅ ꠔꠥꠟꠤ ꠖꠦꠅꠀ ꠅꠁꠍꠤꠟ,
ꠀꠞ ꠀꠝꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣꠞ ꠟꠣꠉꠤ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠤꠟ।