ꠍꠣꠢꠣꠛꠤ ꠢꠤꠡꠣꠛꠦ ꠢꠎꠞꠔ ꠙꠣꠃꠟꠥꠍꠞ ꠅꠗꠤꠇꠣꠞ (১০:১-১৩:১৪)
ꠀꠟ꠆ꠟꠣꠞ ꠈꠦꠎꠝꠔꠅ ꠢꠎꠞꠔ ꠙꠣꠃꠟꠥꠍ
১০
১ ꠅ ꠝꠥꠝꠤꠘ ꠜꠣꠁꠀꠂꠘ,
ꠀꠟ-ꠝꠍꠤꠞ ꠘꠞꠝ ꠀꠞ ꠖꠄꠀꠟꠥ ꠜꠣꠛꠞ ꠇꠕꠣ ꠁꠀꠖ ꠇꠞꠤꠀ,
ꠀꠝꠤ ꠙꠣꠃꠟꠥꠍꠦ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ,
ꠝꠣꠘꠡꠦ ꠇꠂꠘ,
ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁ,
ꠅꠃ ꠡꠝꠄ ꠀꠝꠤ ꠛꠥꠟꠦ ꠒꠞꠣꠁ ꠒꠞꠣꠁ ꠕꠣꠇꠤ,
ꠀꠞ ꠢꠞꠤꠀ ꠉꠤꠀ ꠢꠣꠞꠟꠦ ꠡꠣꠅꠡꠤ ꠅꠁꠎꠣꠁ।
২ ꠔꠦ ꠎꠦꠞꠣ ꠝꠘꠅ ꠇꠞꠦ,
ꠀꠝꠞꠣ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠎꠤꠘ꠆ꠖꠦꠉꠤ ꠇꠣꠐꠣꠁꠀꠞ,
ꠔꠣꠞꠣꠞ ꠟꠉꠦ ꠎꠔꠈꠣꠘ ꠡꠣꠅꠡ ꠖꠦꠈꠣꠘꠤ ꠖꠞꠇꠣꠞ,
ꠀꠝꠤ ꠌꠣꠁꠞꠣꠝ,
ꠀꠝꠤ ꠀꠅꠀꠞ ꠛꠣꠖꠦ ꠎꠣꠘꠥ ꠅꠔꠈꠣꠘ ꠡꠣꠅꠡ ꠖꠦꠈꠣꠘꠤ ꠘꠣ ꠟꠣꠉꠦ।
৩ ꠀꠝꠞꠣ ꠎꠥꠖꠤꠅ ꠞꠇ꠆ꠔ-ꠝꠣꠋꠡꠞ ꠝꠣꠘꠥꠡ,
ꠅꠁꠟꠦ ꠀꠝꠞꠣ ꠎꠦ ꠟꠣꠠꠣꠁ ꠇꠞꠞꠣꠝ,
ꠁꠔꠣ ꠔ ꠇꠥꠘꠥ ꠞꠇ꠆ꠔ-ꠝꠣꠋꠡꠞ ꠟꠣꠠꠣꠁ ꠘꠣꠄ।
৪ ꠖꠥꠘꠤꠀꠛꠤ ꠍꠤꠙꠣꠁꠄ ꠎꠦꠔꠣ ꠅꠡꠔ꠆ꠞ-ꠡꠡꠔ꠆ꠞ ꠖꠤꠀ ꠟꠣꠠꠣꠁ ꠇꠞꠂꠘ,
ꠀꠝꠞꠣ ꠔ ꠁꠔꠣ ꠖꠤꠀ ꠟꠣꠠꠣꠁ ꠇꠞꠤ ꠘꠣ,
ꠀꠟ꠆ꠟꠣꠁ ꠛꠟꠦ ꠀꠝꠞꠣꠞ ꠅꠡꠔ꠆ꠞ-ꠡꠡꠔ꠆ꠞꠄ ꠙꠣꠠꠞ ꠃꠙꠞꠞ ꠛꠣꠋꠇꠣꠞꠅ ꠜꠣꠋꠉꠤꠟꠔ ꠙꠣꠞꠦ।
৫ ꠀꠝꠞꠣꠞ ꠅꠡꠔ꠆ꠞꠖꠤ ꠝꠣꠘꠡꠞ ꠛꠣꠘꠥꠀꠐ ꠎꠥꠇ꠆ꠔꠤ ꠛꠤꠘꠣꠡ ꠇꠞꠤ,
ꠀꠞ ꠀꠟ꠆ꠟꠣꠞꠦ ꠌꠤꠘꠣꠞ ꠙꠕꠦ ꠎꠔ ꠟꠣꠈꠣꠘ ꠛꠣꠗꠣ-ꠛꠤꠊꠘꠄ ꠖꠤꠟꠞꠦ ꠀꠐꠇꠣꠁꠀ ꠞꠣꠈꠦ,
ꠁꠔꠣꠞꠦꠅ ꠛꠤꠘꠣꠡ ꠇꠞꠤ।
ꠝꠣꠘꠡꠞ ꠝꠘꠞ ꠢꠇꠟ ꠇꠥ-ꠌꠤꠘ꠆ꠔꠣꠞꠦ ꠈꠦꠖꠣꠁꠀ ꠢꠣꠞꠤ ꠀꠟ-ꠝꠍꠤꠞ ꠔꠟꠦ ꠀꠘꠤ।
৬ ꠔꠦ ꠔꠥꠝꠞꠣ ꠎꠦꠛꠟꠣ ꠡꠥꠟ꠆ꠟꠀꠘꠣ ꠛꠣꠁꠖ꠆ꠖ ꠅꠁꠀ ꠔꠣꠘ ꠔꠟꠦ ꠀꠁꠛꠣꠄ,
ꠢꠃ ꠡꠝꠄ ꠎꠦꠔꠣ ꠅꠛꠣꠁꠖ꠆ꠖ ꠞꠁꠛꠣ,
ꠁꠔꠣꠞꠦ ꠡꠣꠎꠣ ꠖꠤꠛꠣꠞ ꠟꠣꠉꠤ ꠀꠝꠞꠣ ꠎꠥꠁꠔ ꠅꠁꠝꠥ।
৭ ꠔꠥꠝꠞꠣ ꠔ ꠈꠣꠟꠤ ꠀꠝꠞꠣꠞ ꠛꠣꠁꠞꠞ ꠍꠥꠞꠔ ꠖꠦꠈꠍ।
ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞꠦ ꠀꠟ-ꠝꠍꠤꠞ ꠃꠝ꠆ꠝꠔ ꠝꠘꠅ ꠇꠞꠦ,
ꠔꠦ ꠔꠣꠞ ꠌꠤꠘ꠆ꠔꠣ ꠇꠞꠣ ꠎꠞꠥꠞ,
ꠢꠦ ꠎꠣꠘ ꠃꠝ꠆ꠝꠔ,
ꠀꠝꠞꠣꠅ ꠔ ꠔꠣꠘ ꠃꠝ꠆ꠝꠔ।
৮ ꠀꠍꠟꠦ ꠝꠣꠟꠤꠇ ꠁꠍꠣꠄ ꠀꠝꠞꠣꠞꠦ ꠎꠦ ꠅꠗꠤꠇꠣꠞ ꠖꠤꠍꠂꠘ,
ꠁ ꠛꠦꠙꠣꠞꠦ ꠀꠝꠤ ꠇꠤꠍꠥ ꠛꠠꠣꠁ ꠖꠦꠈꠣꠁꠟꠦꠅ ꠔ ꠡꠞꠝꠤꠘ꠆ꠖꠣ ꠅꠁꠔꠣꠝ ꠘꠣꠄ।
ꠇꠣꠞꠘ ꠁ ꠅꠗꠤꠇꠣꠞꠞ ꠃꠖ꠆ꠖꠦꠡ꠆ꠡ ꠅꠁꠟ,
ꠔꠥꠝꠞꠣꠞꠦ ꠉꠠꠤꠀ ꠔꠥꠟꠣ,
ꠇꠥꠘꠥ ꠈꠦꠔꠤ ꠇꠞꠣ ꠘꠣꠄ।
৯ ꠀꠝꠣꠞ ꠁ ꠟꠦꠈꠣ ꠙꠠꠤꠀ ꠝꠘꠅ ꠇꠞꠤꠅ ꠘꠣ,
ꠀꠝꠤ ꠌꠤꠑꠤ ꠖꠤꠀ ꠔꠥꠝꠞꠣꠞꠦ ꠒꠞ ꠖꠦꠈꠣꠁꠞꠣꠝ।
১০ ꠇꠥꠘꠥ ꠇꠥꠘꠥ ꠝꠣꠘꠡꠦ ꠝꠣꠔꠂꠘ,
“ꠔꠣꠘ ꠟꠦꠈꠣ ꠌꠤꠑꠤꠘ꠆ꠔꠦ ꠖꠤꠟꠅ ꠒꠦꠇ꠆ꠇꠣ ꠝꠣꠞꠦ,
ꠁꠔꠣ ꠡꠇ꠆ꠔꠤꠡꠣꠟꠤ ꠌꠤꠑꠤ,
ꠅꠁꠟꠦ ꠔꠣꠁꠘ ꠇꠣꠘ꠆ꠖꠣꠔ ꠀꠁꠟꠦ ꠖꠦꠈꠣ ꠎꠣꠄ,
ꠔꠣꠁꠘ ꠇꠝꠎꠥꠞ ꠀꠞ ꠅꠀꠎ-ꠘꠍꠤꠅꠔꠅ ꠝꠥꠐꠦꠃ ꠉꠞꠝ ꠘꠣꠄ।”
১১ ꠅꠔꠣ ꠝꠣꠘꠡꠞꠦ ꠎꠣꠘꠣꠘꠤꠞ ꠟꠣꠉꠤ ꠇꠁꠞꠣꠝ,
ꠀꠝꠞꠣ ꠖꠥꠞꠁ ꠕꠣꠇꠤ ꠌꠤꠑꠤꠞ ꠝꠣꠎꠖꠤ ꠎꠦꠔꠣ ꠟꠦꠈꠞꠣꠝ,
ꠍꠣꠝꠘꠦ ꠀꠁꠟꠦ ꠑꠤꠇ ꠅꠟꠣꠃ ꠇꠞꠝꠥ।
১২ ꠔꠥꠝꠞꠣꠞ ꠝꠣꠎꠞ ꠇꠥꠘꠥ ꠇꠥꠘꠥ ꠎꠘꠦ ꠔꠣꠞ ꠘꠤꠎꠞ ꠔꠣꠞꠤꠚ ꠉꠣꠄ।
ꠔꠣꠞꠣꠞ ꠟꠉꠦ ꠔ ꠀꠝꠞꠣꠞ ꠔꠥꠟꠘꠣ ꠌꠟꠦ ꠘꠣ,
ꠛꠣ ꠔꠣꠞꠣꠞ ꠖꠟꠞ ꠡꠖꠁꠡ꠆ꠡ ꠅꠁꠔꠦꠅ ꠡꠣꠅꠡ ꠇꠞꠤ ꠘꠣ।
ꠔꠣꠞꠣ ꠔ ꠘꠤꠎꠦ ꠘꠤꠎꠦ ꠎꠦꠔꠣ ꠜꠣꠟꠣ ꠝꠘꠅ ꠇꠞꠂꠘ,
ꠅꠔꠣꠞ ꠟꠉꠦꠃ ꠔꠣꠞꠣꠞ ꠔꠥꠟꠘꠣ ꠇꠞꠂꠘ,
ꠅꠔꠣꠖꠤꠃ ꠛꠤꠌꠣꠞ ꠇꠞꠂꠘ,
ꠛꠥꠎꠞꠣꠄ ꠘꠤ,
ꠁꠔꠣ ꠇꠔ ꠛꠠ ꠀꠝ꠆ꠝꠇ!
১৩ ꠢꠥꠘꠅ,
ꠀꠝꠞꠣꠞ ꠎꠔꠈꠣꠘ ꠛꠠꠣꠁ ꠇꠞꠣ ꠃꠌꠤꠔ,
ꠄꠞ ꠛꠦꠡꠤ ꠇꠞꠔꠣꠝ ꠘꠣꠄ,
ꠛꠞꠋ ꠀꠟ꠆ꠟꠣꠄ ꠀꠝꠞꠣꠞ ꠇꠣꠝꠞ ꠎꠦ ꠡꠤꠝꠣꠘꠣ ꠑꠤꠇ ꠇꠞꠤ ꠖꠤꠍꠂꠘ,
ꠀꠝꠞꠣ ꠄꠞ ꠜꠤꠔꠞꠦ ꠞꠁꠀꠃ ꠛꠠꠣꠁ ꠇꠞꠝꠥ,
ꠁ ꠡꠤꠝꠣꠘꠣꠞ ꠜꠤꠔꠞꠦ ꠔꠥꠝꠞꠣꠅ ꠀꠍ।
১৪ ꠄꠞꠟꠣꠉꠤ ꠀꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠉꠦꠍꠟꠣꠝ,
ꠅꠃ ꠡꠝꠄ ꠡꠤꠝꠣꠞ ꠛꠣꠞꠣ ꠔ ꠉꠦꠍꠤ ꠘꠣ।
ꠔꠥꠝꠞꠣꠞ ꠉꠦꠍꠦ ꠔ ꠢꠇꠟ ꠙꠄꠟꠣ ꠀꠝꠞꠣꠃ ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠉꠦꠍꠟꠣꠝ।
১৫ ꠄꠍꠣꠠꠣ ꠙꠞꠞ ꠇꠣꠝ ꠟꠁꠀ ꠀꠝꠞꠣ ꠉꠃꠞꠛ ꠇꠞꠤꠀꠞ ꠘꠣ,
ꠁꠔꠣ ꠇꠞꠟꠦ ꠡꠤꠝꠣꠞ ꠛꠣꠞꠣ ꠅꠁꠟ ꠅꠘꠦ।
ꠀꠝꠞꠣ ꠀꠡꠣ ꠇꠞꠤꠀꠞ,
ꠔꠥꠝꠞꠣꠞ ꠁꠝꠣꠘꠤ ꠛꠟ ꠛꠣꠠꠣꠞ ꠟꠉꠦ ꠟꠉꠦ ꠔꠥꠝꠞꠣꠞ ꠝꠣꠎꠦ ꠀꠞꠅ ꠛꠃꠔ ꠇꠣꠝ ꠇꠞꠔꠣꠝ ꠙꠣꠞꠝꠥ।
১৬ ꠢꠃ ꠡꠝꠄ ꠔꠥꠝꠞꠣꠞ ꠉꠦꠍ ꠕꠣꠇꠤ ꠀꠞꠅ ꠖꠥꠞꠞ ꠖꠦꠡꠣꠁꠘ꠆ꠔꠅ ꠉꠤꠀ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠔꠣꠝ ꠙꠣꠞꠝꠥ।
ꠔꠦꠃ ꠇꠥꠘꠥ ꠝꠣꠘꠡꠦ ꠇꠁꠔ ꠙꠣꠞꠔ ꠘꠣꠄ,
ꠙꠞꠞ ꠇꠣꠝ ꠟꠁꠀ ꠀꠝꠞꠣ ꠛꠠꠣꠁ ꠇꠞꠤꠀꠞ।
১৭ ꠅꠁꠟꠦ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
“ꠎꠦ ꠝꠣꠘꠡꠦ ꠛꠠꠣꠁ ꠇꠞꠦ,
ꠢꠦ ꠝꠣꠟꠤꠇ-ꠝꠃꠟꠣꠞꠦ ꠟꠁꠀ ꠛꠠꠣꠁ ꠇꠞꠃꠇ।”
১৮ ꠇꠣꠞꠘ ꠘꠤꠎꠞ ꠡꠥꠘꠣꠝ ꠘꠤꠎꠦ ꠉꠣꠁꠟꠦꠃ ꠙꠞꠝꠣꠘ ꠅꠄ ꠘꠣ ꠢꠦ ꠜꠣꠟꠣ ꠝꠣꠘꠥꠡ,
ꠛꠞꠋ ꠝꠣꠟꠤꠇ-ꠝꠃꠟꠣꠄ ꠎꠣꠞ ꠡꠥꠘꠣꠝ ꠉꠣꠁꠘ,
ꠢꠦ-ꠃ ꠜꠣꠟꠣ ꠢꠤꠡꠣꠛꠦ ꠙꠞꠝꠣꠘ ꠅꠄ।