ꠜꠘ꠆ꠒ ꠍꠣꠢꠣꠛꠤ ꠕꠣꠇꠤ ꠢꠥꠡꠤꠀꠞ
১১
১ ꠅ ꠝꠥꠝꠤꠘ ꠜꠣꠁ ꠅꠇꠟ,
ꠀꠝꠤ ꠌꠣꠁꠞꠣꠝ,
ꠀꠝꠣꠞ ꠕꠥꠠꠣ ꠛꠦꠀꠈꠟꠤ ꠔꠥꠝꠞꠣ ꠡꠁꠎ꠆ꠎ ꠇꠞꠅ,
ꠀꠞ ꠢꠣꠍꠣꠃ ꠔꠥꠝꠞꠣ ꠀꠝꠣꠞꠦ ꠡꠁꠎ꠆ꠎ ꠇꠞꠞꠣꠄꠅ।
২ ꠀꠟ꠆ꠟꠣꠁ ꠄꠡꠇꠤꠞ ꠎꠣꠟꠣꠄ ꠀꠝꠣꠞ ꠖꠤꠟꠅ ꠔꠥꠝꠞꠣꠞ ꠟꠣꠉꠤ ꠄꠇ ꠎꠣꠟꠣ ꠙꠄꠖꠣ ꠅꠁꠍꠦ।
ꠔꠦ ꠀꠝꠤ ꠄꠇꠎꠘ ꠘꠡꠣꠞ ꠟꠉꠦ ꠔꠥꠝꠞꠣꠞ ꠛꠤꠀꠞ ꠝꠣꠔ-ꠇꠕꠣ ꠑꠤꠇ ꠇꠞꠤ ꠞꠣꠈꠍꠤ,
ꠄꠘ ꠘꠣꠝ ꠀꠟ-ꠝꠍꠤ।
ꠀꠝꠤ ꠌꠣꠁꠞꠣꠝ,
ꠡꠔꠤ ꠇꠁꠘꠣ ꠢꠤꠡꠣꠛꠦ ꠔꠥꠝꠞꠣꠞꠦ ꠔꠣꠘ ꠀꠔꠅ ꠡꠝꠎꠣꠁ ꠖꠤꠔꠣꠝ।
৩ ꠅꠁꠟꠦ ꠀꠝꠤ ꠒꠞꠣꠁꠀꠞ,
ꠢꠃ ꠢꠣꠚꠦ ꠎꠦꠟꠣ ꠇꠥ-ꠛꠥꠖ꠆ꠖꠤ ꠖꠤꠀ ꠛꠤꠛꠤ ꠢꠣꠅꠀꠞꠦ ꠛꠦ-ꠙꠕꠦ ꠘꠤꠍꠤꠟꠉꠤ,
ꠅꠟꠣꠈꠣꠘ ꠔꠥꠝꠞꠣꠞꠦꠅ ꠀꠟ-ꠝꠍꠤꠞ ꠉꠦꠍ ꠕꠣꠇꠤ ꠢꠞꠣꠁꠟꠤꠔ ꠙꠣꠞꠦ,
ꠢꠦ ꠔꠥꠝꠞꠣꠞ ꠖꠤꠟꠞ ꠈꠣꠐꠤ ꠜꠣꠛ ꠀꠞ ꠝꠘꠞ ꠘꠤꠡꠣꠘꠣ ꠀꠟꠣꠁꠟꠤꠛ।
৪ ꠇꠣꠞꠘ ꠀꠝꠞꠣ ꠎꠦ ꠁꠍꠣꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠍꠤ,
ꠅꠁꠘ꠆ꠘ ꠎꠘꠦ ꠎꠦꠛꠟꠣ ꠔꠣꠘꠞꠦ ꠍꠣꠠꠣ ꠖꠥꠍꠞꠣ ꠇꠥꠘꠥ ꠁꠍꠣꠞ ꠇꠕꠣ ꠔꠛꠟꠤꠉ ꠇꠞꠦ,
ꠔꠥꠝꠞꠣ ꠁꠔꠣ ꠝꠣꠘꠞꠣꠄ।
ꠀꠞ ꠔꠥꠝꠞꠣ ꠎꠦ ꠙꠣꠇ ꠞꠥꠢꠥ ꠙꠣꠁꠍ,
ꠅꠃ ꠙꠣꠇ ꠞꠥꠢꠥ ꠍꠣꠠꠣ ꠖꠥꠍꠞꠣ ꠇꠥꠘꠥ ꠞꠥꠢꠥ ꠙꠣꠁꠟꠦ,
ꠛꠣ ꠎꠦ ꠈꠥꠡ-ꠈꠛꠞꠤ ꠔꠥꠝꠞꠣ ꠝꠣꠘꠞꠣꠄ,
ꠁ ꠈꠥꠡ-ꠈꠛꠞꠤ ꠍꠣꠠꠣ ꠖꠥꠍꠞꠣ ꠇꠥꠘꠥ ꠈꠥꠡ-ꠈꠛꠞꠤ ꠢꠥꠘꠟꠦ,
ꠈꠥꠛ ꠈꠥꠡꠤ ꠅꠁꠀꠃ ꠝꠣꠘꠤꠟꠤꠞꠣꠄ।
৫ ꠅꠁꠟꠦ ꠀꠝꠤ ꠝꠘꠅ ꠇꠞꠤ ꠘꠣ,
ꠢꠃ ꠘꠣꠝ-ꠒꠣꠇꠤ ꠍꠣꠢꠣꠛꠤ ꠖꠟ ꠕꠣꠇꠤ ꠀꠝꠤ ꠇꠥꠘꠥꠝꠘ꠆ꠔꠦꠃ ꠢꠥꠞꠥ।
৬ ꠀꠝꠤ ꠎꠥꠖꠤꠅ ꠈꠥꠛ ꠝꠤꠑꠣ ꠝꠤꠑꠣ ꠡꠥꠞꠦ ꠅꠀꠎ ꠇꠞꠔꠣꠝ ꠙꠣꠞꠤ ꠘꠣ,
ꠔꠦꠛꠃ ꠀꠝꠣꠞ ꠔ ꠀꠈꠟ-ꠛꠥꠖ꠆ꠖꠤꠞ ꠇꠝꠔꠤ ꠘꠣꠄ,
ꠁꠔꠣ ꠔ ꠀꠝꠤ ꠢꠇꠟ ꠘꠝꠥꠘꠣꠄ ꠢꠇꠟ ꠢꠣꠟꠔꠦ ꠔꠥꠝꠞꠣꠞꠦ ꠖꠦꠈꠣꠁꠍꠤ।
৭ ꠔꠥꠝꠞꠣꠞ ꠃꠘ꠆ꠘꠔꠤ ꠖꠦꠈꠣꠘꠤꠞ ꠟꠣꠉꠤ ꠀꠝꠤ ꠛꠤꠘꠣ ꠛꠦꠔꠘꠦ ꠀꠟ꠆ꠟꠣꠞ ꠖꠦꠅꠀ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠘꠤꠎꠞꠦ ꠘꠤꠌꠣ ꠇꠞꠍꠤ,
ꠁꠔꠣ ꠇꠥꠘꠥ ꠙꠣꠙ ꠇꠞꠍꠤ ꠘꠤ?
৮ ꠔꠥꠝꠞꠣꠞ ꠈꠦꠎꠝꠔꠞ ꠟꠣꠉꠤ ꠀꠝꠤ ꠅꠁꠘ꠆ꠘ ꠎꠝꠣꠔ ꠅꠇꠟꠞ ꠉꠦꠍ ꠕꠣꠇꠤ ꠡꠣꠁꠎ꠆ꠎ ꠀꠘꠍꠤ,
ꠇꠁꠔꠦ ꠉꠦꠟꠦ ꠔꠣꠞꠣꠞꠦ ꠟꠥꠐꠤꠀ ꠀꠘꠍꠤ।
৯ ꠔꠥꠝꠞꠣꠞ ꠉꠦꠍꠦ ꠞꠅꠀꠞ ꠇꠣꠟꠅ ꠀꠝꠤ ꠎꠦꠛꠟꠣ ꠅꠜꠣꠛꠅ ꠙꠠꠟꠣꠝ,
ꠢꠃ ꠡꠝꠄꠅ ꠀꠝꠤ ꠇꠦꠃꠞꠞ ꠛꠥꠏꠣ ꠅꠁꠍꠤ ꠘꠣ।
ꠇꠣꠞꠘ ꠝꠣꠇꠤꠖꠘꠤꠀ ꠕꠣꠇꠤ ꠎꠦꠔꠣ ꠜꠣꠁꠀꠂꠘ ꠀꠁꠍꠟꠣ,
ꠔꠣꠞꠣ ꠀꠝꠣꠞꠦ ꠡꠣꠁꠎ꠆ꠎ ꠇꠞꠍꠂꠘ।
ꠔꠦ ꠇꠥꠘꠥ ꠢꠣꠟꠔꠦꠃ ꠀꠝꠤ ꠔꠥꠝꠞꠣꠞ ꠛꠥꠏꠣ ꠅꠁꠍꠤ ꠘꠣ,
ꠅꠁꠔꠣꠝꠅ ꠘꠣꠄ।
১০ ꠀꠟ-ꠝꠍꠤꠞ ꠎꠦ ꠢꠇꠤꠇꠔꠤ ꠀꠝꠣꠞ ꠜꠤꠔꠞꠦ ꠀꠍꠦ ꠅꠃ ꠢꠇꠞ ꠛꠟꠦꠃ ꠀꠝꠤ ꠇꠁꠞꠣꠝ,
ꠀꠡ꠆ꠔꠣ ꠉ꠆ꠞꠤꠍ ꠖꠦꠡꠞ ꠇꠥꠘꠥ ꠎꠣꠉꠣꠔꠃ ꠀꠝꠣꠞ ꠁ ꠛꠦꠐꠣꠉꠤꠞꠤ ꠇꠦꠃ ꠛꠘ꠆ꠖ ꠇꠞꠔ ꠙꠣꠞꠔ ꠘꠣꠄ।
১১ ꠀꠝꠤ ꠁꠟꠣ ꠝꠣꠔꠣꠞ ꠇꠣꠞꠘ ꠇꠤꠔꠣ?
ꠀꠝꠤ ꠔꠥꠝꠞꠣꠞꠦ ꠝꠣꠄꠀ ꠇꠞꠤ ꠘꠣ ꠘꠤ?
ꠄꠇ ꠀꠟ꠆ꠟꠣꠄꠃ ꠎꠣꠘꠂꠘ,
ꠀꠝꠤ ꠔꠥꠝꠞꠣꠞꠦ ꠇꠔ ꠝꠣꠄꠀ ꠇꠞꠤ।
১২ ꠘꠤꠎꠞ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠀ ꠎꠦꠉꠥꠁꠘ ꠀꠝꠞꠣꠞ ꠢꠝꠣꠘꠤ ꠅꠁꠔꠣ ꠌꠣꠁꠘ,
ꠁꠔꠣꠄ ꠎꠣꠘꠥ ꠁ ꠡꠥꠎꠥꠉ ꠘꠣ ꠙꠣꠁꠘ,
ꠅꠔꠣꠞ ꠟꠣꠉꠤ ꠀꠝꠤ ꠎꠦꠈꠣꠘ ꠇꠞꠣꠔ ꠀꠍꠤ,
ꠁꠈꠣꠘ ꠇꠞꠣꠔ ꠞꠁꠝꠥꠃ।
১৩ ꠀꠍꠟꠦ ꠔ ꠁꠔꠣ ꠅꠁꠟꠣ ꠜꠘ꠆ꠒ ꠍꠣꠢꠣꠛꠤ ꠀꠞ ꠐꠉ ꠇꠣꠝꠟꠣꠁꠘ।
ꠔꠣꠞꠣ ꠘꠤꠎꠞꠦ ꠀꠟ-ꠝꠍꠤꠞ ꠍꠣꠢꠣꠛꠤ ꠖꠦꠈꠣꠁꠔ ꠇꠞꠤ ꠘꠤꠎꠞ ꠍꠥꠞꠔ ꠛꠖꠟꠤꠟꠣꠄ।
১৪ ꠄꠔꠦ ꠔꠣꠁꠎ꠆ꠎꠥꠛ ꠅꠀꠞ ꠇꠥꠘ꠆ꠔꠣ ꠘꠣꠄ,
ꠁꠛꠟꠤꠍꠦꠅ ꠔ ꠘꠤꠎꠞꠦ ꠘꠥꠞꠞ ꠚꠤꠞꠤꠡ꠆ꠔꠣ ꠖꠦꠈꠣꠘꠤꠞ ꠟꠣꠉꠤ ꠔꠣꠞ ꠍꠥꠞꠔ ꠛꠖꠟꠣꠄ।
১৫ ꠄꠞꠟꠣꠉꠤ ꠎꠦꠉꠥꠁꠘ꠆ꠔꠦ ꠁꠛꠟꠤꠍꠞ ꠈꠦꠎꠝꠔ ꠇꠞꠂꠘ,
ꠔꠣꠞꠣꠅ ꠎꠥꠖꠤ ꠘꠤꠎꠞ ꠍꠥꠞꠔ ꠛꠖꠟꠣꠁꠀ ꠖꠦꠈꠣꠁꠘ ꠔꠣꠞꠣ ꠘꠦꠇ ꠇꠣꠝ ꠇꠞꠞꠣ,
ꠔꠦ ꠔꠣꠁꠎ꠆ꠎꠥꠛ ꠅꠀꠞ ꠇꠤꠔꠣ ꠀꠍꠦ?
ꠔꠣꠞꠣꠞ ꠇꠣꠝꠞ ꠚꠟ ꠔꠣꠞꠣ ꠀꠈꠦꠞꠣꠔꠅ ꠙꠣꠁꠛ।
ꠍꠣꠢꠣꠛꠤ ꠇꠣꠝꠞ ꠟꠣꠉꠤ ꠢꠎꠞꠔ ꠙꠣꠃꠟꠥꠍꠞ ꠎꠥꠟꠥꠝ-ꠇꠡ꠆ꠐ
১৬ ꠀꠝꠤ ꠀꠞꠇꠛꠣꠞ ꠇꠁꠞꠣꠝ,
ꠀꠝꠣꠞꠦ ꠎꠣꠘꠥ ꠇꠦꠃ ꠙꠣꠉꠟ ꠝꠘꠅ ꠘꠣ ꠇꠞꠦ।
ꠀꠞ ꠎꠥꠖꠤ ꠁꠟꠣ ꠝꠘꠅ ꠇꠞꠤꠟꠣꠅ,
ꠔꠦ ꠀꠝꠣꠞꠦ ꠄꠇ ꠙꠣꠉꠟ ꠢꠤꠡꠣꠛꠦꠃ ꠡꠝꠎꠤꠟꠣꠅ,
ꠎꠣꠔꠦ ꠀꠝꠤꠅ ꠕꠥꠠꠣ ꠛꠠꠣꠁ ꠇꠞꠣꠞ ꠡꠥꠎꠥꠉ ꠙꠣꠁ।
১৭ ꠀꠝꠤ ꠅꠈꠘ ꠎꠦꠔꠣ ꠇꠁꠞꠣꠝ,
ꠁꠔꠣ ꠝꠣꠟꠤꠇ ꠁꠍꠣꠞ ꠢꠥꠇꠥꠝꠦ ꠇꠁꠞꠣꠝ ꠘꠣ,
ꠈꠣꠟꠤ ꠘꠤꠎꠞ ꠛꠠꠣꠁ ꠖꠦꠈꠣꠘꠤꠔ ꠉꠤꠀ ꠙꠣꠉꠟꠣꠝꠤ ꠇꠞꠞꠣꠝ।
১৮ ꠛꠃꠔ ꠎꠘꠦ ꠎꠦꠛꠟꠣ ꠖꠥꠘꠤꠀꠛꠤ ꠛꠤꠡꠄ ꠟꠁꠀ ꠛꠠꠣꠁ ꠖꠦꠈꠣꠁꠞꠣ,
ꠔꠦ ꠀꠝꠤ ꠇꠦꠘꠦ ꠖꠦꠈꠣꠁꠔꠣꠝ ꠘꠣ?
১৯ ꠔꠥꠝꠞꠣ ꠔ ꠛꠦꠡꠤ ꠀꠈꠟꠖꠣꠞ,
ꠄꠞꠟꠣꠉꠤ ꠛꠦꠀꠈꠟ ꠅꠇꠟꠞꠦ ꠈꠥꠡ ꠖꠤꠟꠦ ꠡꠁꠎ꠆ꠎ ꠇꠞꠅ।
২০ ꠈꠣꠟꠤ ꠁꠈꠣꠘ ꠘꠣꠄ,
ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠘꠤꠎꠞ ꠉꠥꠟꠣꠝ ꠛꠣꠘꠣꠁꠀ ꠞꠣꠈꠦ,
ꠔꠥꠝꠞꠣꠞꠦ ꠔꠣꠞ ꠡ꠆ꠛꠤꠇꠣꠞ ꠛꠣꠘꠣꠁꠟꠣꠄ,
ꠚꠣꠘ꠆ꠖꠅ ꠚꠣꠟꠣꠄ,
ꠔꠥꠝꠞꠣꠞ ꠃꠙꠞꠦ ꠃꠡ꠆ꠔꠣꠖꠤ ꠇꠞꠦ ꠛꠣ ꠔꠥꠝꠞꠣꠞ ꠉꠣꠟꠅ ꠌꠠ ꠝꠣꠞꠦ,
ꠔꠣ-ꠅ ꠔ ꠔꠥꠝꠞꠣ ꠈꠥꠡꠤ ꠅꠁꠀ ꠡꠁꠎ꠆ꠎ ꠇꠞꠞꠣꠄ।
২১ ꠅꠁꠟꠦ ꠀꠝꠤ ꠈꠥꠛ ꠡꠞꠝꠤꠘ꠆ꠖꠣ ꠅꠁꠀ ꠡ꠆ꠛꠤꠇꠣꠞ ꠇꠞꠤꠀꠞ,
ꠁꠔꠣ ꠛꠦꠙꠣꠞꠦ ꠔꠥꠝꠞꠣꠞ ꠉꠦꠍꠦ ꠀꠝꠞꠣ ꠛꠠ ꠇꠝꠎꠥꠞ ꠀꠍꠟꠣꠝ,
ꠁꠟꠣ ꠘꠦꠔꠣꠉꠤꠞꠤ ꠇꠞꠔꠣꠝ ꠙꠣꠞꠍꠤ ꠘꠣ।
ꠅꠁꠘ꠆ꠘ ꠝꠣꠘꠡꠦ ꠎꠦꠔꠣ ꠟꠁꠀ ꠛꠠꠣꠁ ꠇꠞꠣꠞ ꠡꠣꠅꠡ ꠙꠣꠄ,
ꠀꠝꠣꠞꠅ ꠡꠣꠅꠡ ꠀꠍꠦ ꠁꠔꠣ ꠛꠦꠙꠣꠞꠦ ꠛꠠꠣꠁ ꠖꠦꠈꠣꠘꠤꠞ,
ꠀꠝꠤ ꠈꠣꠟꠤ ꠙꠣꠉꠟꠞ ꠟꠣꠈꠣꠘ ꠁꠔꠣ ꠝꠣꠔꠤꠞꠣꠝ।
২২ ꠎꠦꠔꠣꠄ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠘ,
ꠔꠣꠞꠣ ꠇꠤꠔꠣ ꠁꠛꠞꠣꠘꠤ ꠎꠣꠔꠤꠞ ꠘꠤ?
ꠀꠝꠤꠅ ꠔ ꠔꠣꠞꠣꠞ ꠟꠣꠈꠣꠘ।
ꠔꠣꠞꠣ ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠘꠤ?
ꠀꠝꠤꠅ ꠅꠟꠣ।
ꠔꠣꠞꠣ ꠢꠎꠞꠔ ꠁꠛ꠆ꠞꠣꠢꠤꠝꠞ ꠀꠅꠟꠣꠖ ꠘꠤ?
ꠀꠝꠤꠅ ꠔ।
২৩ ꠔꠣꠞꠣ ꠀꠟ-ꠝꠍꠤꠞ ꠈꠦꠎꠝꠔꠇꠣꠞꠤ ꠘꠤ?
ꠀꠝꠤ ꠀꠞꠅ ꠛꠠ ꠈꠦꠎꠝꠔꠇꠣꠞꠤ।
ꠝꠘꠅ ꠞꠣꠈꠤꠅ,
ꠀꠝꠤ ꠙꠣꠉꠟꠞ ꠟꠣꠈꠣꠘ ꠝꠣꠔꠤꠞꠣꠝ।
ꠀꠝꠤ ꠀꠟ-ꠝꠍꠤꠞ ꠈꠦꠎꠝꠔꠅ ꠟꠣꠉꠤꠀ ꠔꠣꠞꠣ ꠕꠣꠇꠤ ꠛꠃꠔ ꠛꠦꠡꠤ ꠝꠦꠘꠔ ꠇꠞꠍꠤ।
ꠛꠃꠔ ꠛꠣꠞ ꠎꠦꠟ ꠈꠣꠐꠍꠤ,
ꠛꠃꠔ ꠛꠣꠞ ꠝꠣꠁꠞ-ꠗꠁꠞ ꠈꠣꠁꠍꠤ,
ꠀꠞ ꠛꠃꠔ ꠛꠣꠞ ꠝꠃꠔꠞ ꠝꠥꠇꠣꠛꠤꠟꠣ ꠅꠁꠍꠤ।
২৪ ꠁꠢꠥꠖꠤ ꠅꠇꠟꠦ ꠀꠝꠣꠞꠦ ꠙꠣꠌꠛꠣꠞ ꠖꠥꠞꠞꠣ ꠝꠣꠞꠍꠂꠘ,
ꠙꠞꠔꠦꠇ ꠛꠣꠞ ꠃꠘꠥꠌꠣꠟ꠆ꠟꠤꠡꠐꠣ ꠇꠞꠤ ꠖꠥꠞꠞꠣ ꠈꠣꠁꠍꠤ।
২৫ ꠔꠤꠘꠛꠣꠞ ꠀꠝꠣꠞꠦ ꠍꠤꠋꠟꠣꠖꠤ ꠝꠣꠞꠣ ꠅꠁꠍꠦ।
ꠄꠇꠛꠣꠞ ꠀꠝꠣꠞꠦ ꠇꠣꠋꠇꠠ ꠝꠣꠞꠣ ꠅꠁꠍꠦ।
ꠔꠤꠘꠛꠣꠞ ꠀꠝꠣꠞ ꠎꠣꠎ ꠒꠥꠛꠤ ꠉꠦꠍꠤꠟ,
ꠀꠞ ꠄꠇ ꠖꠤꠘ ꠄꠇ ꠞꠣꠁꠔ ꠖꠞꠤꠀꠞ ꠙꠣꠘꠤꠔ ꠜꠣꠡꠣꠁꠟ ꠀꠍꠟꠣꠝ।
২৬ ꠀꠝꠤ ꠛꠃꠔ ꠖꠦꠡ ꠍꠚꠞ ꠇꠞꠍꠤ।
ꠛꠣꠘ-ꠙꠣꠘꠤꠞ ꠀꠔꠅ,
ꠌꠥꠞ-ꠒꠣꠇꠣꠁꠔꠞ ꠀꠔꠅ,
ꠘꠤꠎꠞ ꠎꠣꠔꠤꠞ ꠀꠔꠅ ꠀꠞ ꠜꠤꠘ ꠎꠣꠔꠤꠞ ꠀꠔꠅ ꠀꠝꠤ ꠝꠍꠤꠛꠔꠅ ꠙꠠꠍꠤ।
ꠄꠍꠣꠠꠣ ꠐꠣꠃꠘꠅ,
ꠝꠞꠥꠜꠥꠝꠤꠔ,
ꠖꠞꠤꠀꠔ,
ꠀꠞ ꠜꠘ꠆ꠒ ꠝꠥꠝꠤꠘ ꠅꠇꠟꠞ ꠀꠔꠅ-ꠅ ꠀꠝꠤ ꠝꠍꠤꠛꠔꠅ ꠙꠠꠍꠤ।
২৭ ꠅꠃ ꠖꠥꠈ-ꠝꠍꠤꠛꠔꠞ ꠝꠣꠎꠦꠅ ꠎꠣꠘꠦ-ꠙꠞꠣꠘꠦ ꠝꠦꠘꠔ ꠇꠞꠍꠤ,
ꠛꠃꠔ ꠞꠣꠁꠔ ꠃꠎꠣꠉꠞꠤ ꠇꠞꠍꠤ,
ꠈꠣꠘꠤ-ꠙꠣꠘꠤꠞ ꠟꠣꠉꠤ ꠇꠡ꠆ꠐ ꠙꠣꠁꠍꠤ,
ꠛꠃꠔ ꠃꠙꠣꠡ-ꠈꠣꠙꠣꠡ ꠞꠁꠍꠤ,
ꠡꠤꠔ ꠀꠞ ꠇꠣꠙꠠ-ꠌꠥꠙꠠꠞ ꠅꠜꠣꠛꠦꠅ ꠇꠡ꠆ꠐ ꠙꠣꠁꠍꠤ।
২৮ ꠁꠔꠣ ꠍꠣꠠꠣꠅ ꠀꠟ-ꠝꠍꠤꠞ ꠎꠝꠣꠔ ꠅꠇꠟꠞ ꠟꠣꠉꠤ ꠀꠝꠤ ꠙꠞꠔꠦꠇ ꠖꠤꠘ ꠌꠤꠘ꠆ꠔꠣ ꠇꠞꠤ।
২৯ ꠇꠦꠃ ꠇꠝꠎꠥꠞ ꠅꠁꠟꠦ ꠀꠝꠤ ꠘꠤꠎꠦꠅ ꠔꠣꠞ ꠇꠝꠎꠥꠞꠤꠞ ꠜꠣꠉꠤ ꠅꠁ ꠘꠣ ꠘꠤ?
ꠇꠥꠘꠥ ꠇꠥ-ꠡꠋꠉꠤꠞ ꠔꠣꠟꠅ ꠙꠠꠤꠀ ꠇꠦꠃ ꠉꠥꠘꠣꠞ ꠙꠕꠦ ꠉꠦꠟꠦꠉꠤ,
ꠀꠝꠤ ꠅꠡꠣꠘ꠆ꠔꠤ ꠇꠞꠤ ꠘꠣ ꠘꠤ?
৩০ ꠀꠝꠤ ꠎꠥꠖꠤ ꠛꠠꠣꠁ ꠖꠦꠈꠣꠁꠔꠣꠝ ꠌꠣꠁ,
ꠔꠦ ꠅꠃ ꠇꠝꠎꠥꠞꠤ ꠟꠁꠀꠃ ꠛꠠꠣꠁ ꠇꠞꠝꠥ।
৩১ ꠀꠝꠞꠣꠞ ꠀꠟ꠆ꠟꠣ ꠙꠣꠇ ꠀꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ,
ꠎꠦꠁꠘ ꠢꠣꠝꠦꠡꠣ ꠉꠃꠞꠛ ꠙꠣꠅꠀꠞ ꠟꠣꠈ,
ꠔꠣꠁꠘ ꠘꠤꠎꠦꠃ ꠎꠣꠘꠂꠘ,
ꠀꠝꠤ ꠇꠥꠘ꠆ꠔꠣꠃ ꠝꠤꠍꠣ ꠝꠣꠔꠞꠣꠝ ꠘꠣ।
৩২ ꠖꠣꠝꠦꠡ꠆ꠇꠞ ꠛꠣꠖꠡꠣ ꠀꠞꠤꠔꠣꠞ ꠢꠣꠇꠤꠝ ꠍꠣꠛꠦ ꠀꠝꠣꠞꠦ ꠗꠞꠣꠞ ꠟꠣꠉꠤ ꠖꠣꠝꠦꠡ꠆ꠇ ꠐꠣꠃꠘꠅ ꠙꠣꠞꠣ ꠖꠦꠅꠀꠞ ꠢꠥꠇꠥꠝ ꠖꠤꠍꠟꠣ।
৩৩ ꠅꠁꠟꠦ ꠐꠣꠃꠘꠞ ꠛꠣꠃꠘ꠆ꠒꠞꠤꠞ ꠅꠀꠟꠞ ꠝꠣꠎꠦ ꠎꠦ ꠈꠤꠠꠇꠤ ꠀꠍꠤꠟ,
ꠝꠥꠝꠤꠘ ꠜꠣꠁꠀꠂꠘ꠆ꠔꠦ ꠄꠇ ꠐꠥꠇꠞꠤꠔ ꠇꠞꠤ ꠅꠃ ꠈꠤꠠꠇꠤ ꠛꠣꠄꠖꠤ ꠀꠝꠣꠞꠦ ꠝꠣꠐꠤꠔ ꠟꠣꠝꠣꠁ ꠖꠤꠍꠟꠣ,
ꠅꠃ ꠘꠝꠥꠘꠣꠄ ꠀꠝꠤ ꠔꠣꠘ ꠀꠔ ꠕꠣꠇꠤ ꠜꠣꠉꠤꠍꠤ।