ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ২৪ ꠘꠝ꠆ꠛꠞ ꠍꠤꠙꠣꠞꠣ
ꠖꠥꠍꠞꠣ ꠢꠣꠘ꠆ꠘꠣꠘ
ꠍꠣꠟꠣꠝ ꠎꠣꠘꠣꠘꠤ
১
১ ꠀꠝꠤ ꠢꠃ ꠝꠥꠞꠛ꠆ꠛꠤꠄ ꠁꠔꠣ ꠟꠦꠈꠞꠣꠝ,
ꠀꠟ꠆ꠟꠣꠞ ꠙꠍꠘ꠆ꠖꠞ ꠢꠃ ꠛꠦꠉꠝ ꠍꠣꠄꠛꠣꠘꠤ ꠀꠞ ꠔꠣꠘ ꠀꠅꠟꠣꠖ ꠅꠇꠟꠞ ꠉꠦꠍꠦ।
ꠀꠟ꠆ꠟꠣꠁ ꠢꠇꠞ ꠈꠣꠔꠤꠞꠦ ꠀꠝꠤ ꠎꠣꠞꠣꠞꠦ ꠝꠢꠛ꠆ꠛꠔ ꠇꠞꠤ,
ꠈꠣꠟꠤ ꠀꠝꠤ ꠘꠣꠄ,
ꠀꠞꠅ ꠎꠔ ꠝꠣꠘꠡꠦ ꠀꠟ꠆ꠟꠣꠁ ꠢꠇ ꠎꠣꠘꠍꠂꠘ ꠔꠣꠞꠣ ꠢꠇꠟꠦ ꠎꠣꠞꠦ ꠝꠢꠛ꠆ꠛꠔ ꠇꠞꠂꠘ,
ꠅꠃ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ।
২ ꠅꠃ ꠢꠇ ꠔ ꠅꠈꠘ ꠀꠝꠞꠣꠞ ꠜꠤꠔꠞꠦ ꠛꠡꠔ ꠇꠞꠦ ꠀꠞ ꠢꠞ-ꠢꠣꠝꠦꠡꠣ ꠀꠝꠞꠣꠞ ꠟꠉꠦ ꠞꠁꠛ।
৩ ꠢꠇ ꠀꠞ ꠝꠢꠛ꠆ꠛꠔꠞ ꠈꠣꠔꠤꠞꠦ,
ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠅꠃ ꠛꠣꠚꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ,
ꠄꠁꠘꠃ ꠁꠍꠣ ꠀꠟ-ꠝꠍꠤ,
ꠄꠞꠣꠞ ꠔꠞꠚ ꠕꠣꠇꠤ ꠞꠢꠝꠔ,
ꠝꠦꠢꠦꠞꠛꠣꠘꠤ ꠀꠞ ꠡꠣꠘ꠆ꠔꠤ ꠀꠝꠞꠣꠞ ꠟꠉꠦ ꠞꠁꠛ।
ꠢꠇꠦ ꠀꠞ ꠝꠢꠛ꠆ꠛꠔꠦ ꠌꠟꠅ
৪ ꠉꠣꠁꠛꠤ ꠛꠣꠚꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ,
ꠢꠃ ꠢꠥꠇꠥꠝ ꠝꠣꠚꠤꠇ ꠀꠙꠘꠣꠞ ꠇꠄꠎꠘ ꠙꠥꠀ-ꠙꠥꠠꠤꠘ ꠀꠟ꠆ꠟꠣꠁ ꠢꠇꠞ ꠙꠕꠦ ꠌꠟꠦꠞ ꠖꠦꠈꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ।
৫ ꠅ ꠝꠣꠄꠀꠞ ꠍꠣꠄꠛꠣꠘꠤ,
ꠀꠙꠘꠣꠞ ꠉꠦꠍꠦ ꠀꠝꠣꠞ ꠄꠇꠐꠣ ꠅꠘꠥꠞꠥꠗ ꠀꠍꠦ,
ꠀꠝꠞꠣ ꠎꠣꠘꠥ ꠙꠞꠔꠦꠇꠦ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠤ।
ꠀꠞ ꠅꠃ ꠎꠦ ꠅꠘꠥꠞꠥꠗ ꠀꠝꠤ ꠇꠞꠤꠀꠞ,
ꠁꠐꠣ ꠔ ꠘꠄꠀ ꠇꠥꠘꠥ ꠢꠥꠇꠥꠝ ꠘꠣꠄ,
ꠛꠞꠋ ꠝꠥꠟꠅ ꠕꠣꠇꠤꠃ ꠀꠝꠞꠣ ꠅꠃ ꠢꠥꠇꠥꠝ ꠙꠣꠁꠍꠟꠣꠝ।
৬ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠣꠃ ꠅꠁꠟ ꠝꠢꠛ꠆ꠛꠔ।
ꠔꠥꠝꠞꠣ ꠙꠄꠟꠣ ꠕꠣꠇꠤ ꠎꠦ ꠢꠥꠇꠥꠝꠞ ꠇꠕꠣ ꠢꠥꠘꠤꠀ ꠀꠁꠞꠣꠄ,
ꠅꠟꠣꠈꠣꠘ ꠝꠢꠛ꠆ꠛꠔꠞ ꠙꠕꠦ ꠌꠟꠅ।
৭ ꠖꠥꠘꠤꠀꠔ ꠅꠈꠘ ꠛꠃꠔ ꠟꠣꠈꠣꠘ ꠗꠥꠇꠣꠛꠣꠎ ꠛꠣꠞꠅꠁꠍꠂꠘ।
ꠎꠦꠔꠣꠄ ꠇꠂꠘ,
ꠝꠣꠘꠥꠡ ꠍꠥꠞꠔꠦ ꠢꠎꠞꠔ ꠁꠍꠣ ꠀꠟ-ꠝꠍꠤ ꠖꠥꠘꠤꠀꠔ ꠀꠁꠍꠂꠘ ꠘꠣ,
ꠁꠟꠣ ꠝꠣꠔ ꠎꠦꠞꠣ ꠝꠣꠔꠦ ꠄꠞꠣ ꠅꠁꠟ ꠢꠃ ꠗꠥꠇꠣꠛꠣꠎ ꠀꠞ ꠈꠣꠘꠦ-ꠖꠞ꠆ꠎꠣꠟ।
৮ ꠔꠦ ꠔꠥꠝꠞꠣ ꠢꠥꠡꠤꠀꠞ ꠞꠁꠅ,
ꠎꠣꠔꠦ ꠔꠥꠝꠞꠣꠞ ꠝꠦꠘꠔꠞ ꠚꠟ ꠘꠣ ꠀꠞꠣꠁꠀ ꠡꠥꠟ꠆ꠟꠀꠘꠣ ꠙꠥꠞꠥꠡ꠆ꠇꠣꠞ ꠇꠣꠝꠣꠁꠔꠣꠄ ꠙꠣꠞ।
৯ ꠎꠦꠔꠣ ꠝꠣꠘꠡꠦ ꠀꠟ-ꠝꠍꠤꠞ ꠖꠦꠅꠀ ꠔꠣꠟꠤꠝꠞ ꠡꠤꠝꠣ ꠙꠣꠞꠅꠁ ꠎꠣꠁꠘ,
ꠔꠣꠘ ꠔꠣꠟꠤꠝꠞ ꠜꠤꠔꠞꠦ ꠞꠂꠘ ꠘꠣ,
ꠔꠣꠞꠣꠞ ꠖꠤꠟꠞ ꠜꠤꠔꠞꠦ ꠀꠟ꠆ꠟꠣ ꠘꠣꠁ।
ꠅꠁꠟꠦ ꠎꠦ ꠝꠣꠘꠥꠡ ꠔꠣꠘ ꠔꠣꠟꠤꠝꠞ ꠃꠙꠞꠦ ꠕꠤꠞ ꠞꠄ,
ꠔꠣꠞ ꠖꠤꠟꠞ ꠝꠣꠎꠦ ꠉꠣꠁꠛꠤ ꠛꠣꠚ ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ,
ꠁ ꠖꠥꠁꠅꠎꠘꠃ ꠀꠍꠂꠘ।
১০ ꠇꠥꠘꠥ ꠃꠡ꠆ꠔꠣꠖ ꠔꠥꠝꠞꠣꠞ ꠉꠦꠍꠦ ꠀꠁꠟꠦ ꠢꠦ ꠎꠥꠖꠤ ꠅꠃ ꠟꠣꠈꠣꠘ ꠔꠣꠟꠤꠝ ꠘꠣ ꠖꠦꠄ,
ꠔꠦ ꠔꠣꠞꠦ ꠍꠣꠟꠣꠝ ꠇꠞꠤꠅ ꠘꠣ,
ꠀꠞ ꠔꠥꠝꠞꠣꠞ ꠛꠣꠠꠤꠔ ꠀꠡꠞꠄꠅ ꠖꠤꠅ ꠘꠣ।
১১ ꠔꠣꠞꠦ ꠎꠦꠉꠤꠄ ꠍꠣꠟꠣꠝ ꠇꠞꠛ,
ꠢꠦ ꠔ ꠅꠉꠥꠞ ꠛꠖ ꠇꠣꠝꠞ ꠜꠣꠉꠤ ꠅꠁꠛ।
ꠛꠤꠖꠣꠄꠁ ꠍꠣꠟꠣꠝ
১২ ꠔꠥꠝꠞꠣꠞ ꠉꠦꠍꠦ ꠔ ꠀꠝꠣꠞ ꠀꠞꠅ ꠛꠃꠔ ꠇꠕꠣ ꠟꠦꠈꠣꠞ ꠀꠍꠤꠟ,
ꠅꠁꠟꠦ ꠇꠣꠉꠎ-ꠇꠟꠝꠦ ꠢꠇꠟꠔꠣ ꠟꠦꠈꠔꠣꠝ ꠌꠣꠁꠞꠣꠝ ꠘꠣ।
ꠛꠞꠋ ꠀꠝꠣꠞ ꠈꠤꠀꠟ ꠅꠁꠟ,
ꠀꠝꠤ ꠘꠤꠎꠦ ꠀꠁꠀ ꠔꠥꠝꠞꠣꠞ ꠟꠉꠦ ꠛꠁꠀ ꠍꠣꠝꠘꠣ-ꠍꠣꠝꠘꠤ ꠉꠚ ꠇꠞꠝꠥ,
ꠔꠦꠃ ꠢꠇꠟꠞ ꠜꠤꠔꠞꠞ ꠈꠥꠡꠤ ꠝꠤꠐꠛ।
১৩ ꠀꠙꠘꠣꠞ ꠎꠦ ꠛꠁꠘꠞꠦ ꠀꠟ꠆ꠟꠣꠄ ꠙꠍꠘ꠆ꠖ ꠇꠞꠍꠂꠘ,
ꠔꠣꠘ ꠀꠅꠟꠣꠖ ꠅꠇꠟꠦ ꠀꠙꠘꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
ꠀꠝꠤꠘ॥