Shaawti Haabiil reewiigaab ikee,

Gaabiil dir'aateegaab iki.

03 B'eeb gaal Gaabiil tudir'aatii karaamaat Ukwaasanaayt ifir'a.

04 Haabiil han t'anooteesooh awwal tifriinaatii hoob dhhaab yharidaayt,

toosha tehooy daayikaat karaamaat ifir'a.

Ukwaasana Haabiiliit toofir'a winneet areeya.

05 Laakiin Ukwaasana Gaabiilwa tufir'atoohwa areeyaab kiiki.

Oont'a Gaabiil winneet yhasi,

tehasiyaaytuuh ifiireeb lawti.

06 Ukwaasana Gaabiilii dehaay,

<<Barook naan hook daayaatu?

Winneet gadabaab tikatiyeek haalooku?

07 Daayiina gwibbaab tiiktiyeek eekuuttiya.

Daayiina d'iyaab tiiktiyeek ani tufir'atook gabbalami,

t'a laakiin igadab whadhaayt dehook fariin iyadna.

Tumaagnaay kwidhsaa hook tindi,

fagaramaat ibakii dehaay ansirama.>>

idi.

08 Malya Gaabiil usanooh Haabiilii dehaay,

<<Yakaa,

bak tudir'a niibi!>>

idi.

Tudir'a iktimnihoob Gaabiil oosan Haabiilii dehaay fariyaayt idir.

09 Ukwaasana Gaabiilii dehaay,

<<Usanuuk Haabiil naad eefi?>>

idi.

Gaabiil <<Ani akteen han?

Ani bariiyooh gw'aadana naan aki?>>

idi.

10 Ukwaasana <<Baruuk usaniyook naanhooy bak saktaa?

Usanook tidira.

Bariiyuuh uubooy toobuuti kehii aneeb waliikiya eefi.

11 Usanook tidira.

Ubooyuuh toobuutiib ifaf akay,

oont'a whaashii atoo'itaabwa.

Shaawti toon tudayaay aad kitdiya.

12 Toon tudayaay t'andiyeek han,

naat han hooy imaar kitdiya.

Amseenee fidnaab shaawti gaw iid'i kitdiya.

Mhiin mhiiniika tiyyaayeeb ookiik hawriiki tindiya.>>

idi.

13 Gaabiil Ukwaasanaay dehaay,

<<Ujasaayu winneet akraabu,

kaa'adgiran!

14 Amsi whaashii sankwiyaheeb,

aflaay bariisook dh'imaa andi.

Gaw anu ani ibakii mhiin mhiinka hawriiki andi.

Aneeb rhiini takka idaarheeb indi.>>

idi.

15 Laakiin Ukwaasana <<Kiiki!

Barook indiir ootak asarama doora bariiyook ujasaay mhakwal jasaayi andi.>>

idi.

Aflaay Ukwaasana Gaabiili kehii alaamaat gaal han haay biidariyeet hooy id'i.

16 Laakiin Gaabiil Ukwaasanaay isgi.

Nood iidni haash Adaneeb oomhiib iifiinaay ikwiri.

17 Gaabiil tutakatiyooh geeb diwiya.

Batuuh tinkwiit,

Eenook tifri.

Gaabiil malya madiinaat iid'ir.

Toon tumadiina baruuh Eenook w'ooriyooh deha iisim.

18 Eenook oor ifri,

w'oorooh Iiraad iidna.

Iiraad han oor ifri,

w'oorooh Mhuyaa'eel iidna,

Mhuyaa'eel aree Meetushaa'eeli baaba iikti,

Meetushaa'eel aree Laamik ifri.

19 Laamik maloot m'at id'ir.

Bateeh Adaahwa Sillaahwa iidna.

20 Adaah Jabal tifri.

Baruuh oodehay kheemaateeb ikwiir ireewkina hooba iikti.

21 Bariiyooh oosan Jubaal iidna.

Jubaal kasseeh been ubaasankwoowwa ambiilhooy th'anaywa baaba iikti.

22 Sillaah han oor iibri.

Barooh Tuubaal Gaabiil iidna.

Baruuh kasteeh teeda diyaateewwa balooywa iid'a.

Masi oot N'amaat iidneet han iibriin.

23 Yint gaat Laamik tim'ateeh timalootee deha,

<<Adhami oor jarhiyaheeb akay,

barooh adir.

24 Gaabiil andiir indiib,

asarama doora jasaamiini iyadneek,

Laamik indiir aree,

asarama tamuunwa asarama doora jasaami indi.>>

idi.

25 Aadam tutakatiyooh geeb masi diwiya.

Batuuh oor tifri.

Barooh Sheet iisimna.

Batuuh <<Ukwaasana weer oor yhiiheeb,

Gaabiil idireeb Haabiili mhiin oor weer yhiiheeb!>>

tidi.

26 Sheet han oor iibri.

Barooh Anoosh iisimna.

Been oodoor uudehay Ukwaasanaay dehaay sileeliyaan.