02 Tutakat ukwakwarii dehaay,

<<Ukwaasana een yhindi tudir'aatiib eefeenaayi firaayii tamnayeet toona adgirnay.

03 Laakiin been whindi tudir'aati bitik eefeeb nuun.

Ukwaasana oon whindi hooy bantamayneet toonaawwa,

bantehayeet toonaawwa sooya hoon.

Oon barooh hooy tamnayeek niyaayyeet toona sooya hoon.>>

tidi.

04 Ukwakwar tutakatii dehaay,

<<Baraak sidik iiyyi kitdiina!

05 Beet tooyin baraak been whindi simaarii tamteeneeb naan iikti tindiyeeb Ukwaasana ikteen.

Naan tid'iineeb tooyin beet rhi tiyadna.

Ukwaasanaayt baraakna han toomaagwa tooshboowwa iikan tiyadna.>>

idi ukwakwar.

06 Tutakat whindi firaay nafir akay rhita,

aree igw'adee dehaay daawriib akay rhita,

kanaant han hooy s'ayaamta.

Malya naat hooy yaksitaayt tamta.

Utakooh oodar iifiib han naat hooy tehi.

Baruu han tamiya.

07 Been oodoor mhallooyaah aagw'ad ifdagna.

Baraah raboobaab iiktiineet toona igarooyoohna rhiyaan.

Malya Tiini hindiit rat taktakeeb yhaayidna,

igarooyoohna haay ikwibisna.

08 Malya uutakwa tutakatuuhwa W'ankwana Ukwaasana tudir'aatiib l'a door hiireeree imaasiwna.

Beenhoob baraah imhaniit tudir'aati hindi bitik W'ankwana Ukwaasanaay dh'imiyaan.

09 Laakiin W'ankwana Ukwaasana ootak waliikiya,

<<Yhaa,

keeta hook?>>

idi.

10 Uutak <<Barook tudir'aatiib hiireeree amaasiwhoob,

ani rabooba iifi akay winneet arkwi,

malya hoosook dh'iman.>>

idi.

11 Ukwaasana <<Raboobaab tiiktiyeet toona kak tikana?

Baruuk whindi ani hooy baatamaana iideeb hooy tamta han?>>

idi.

12 Uutak <<Tutakat baruuk ani geeb daastaneet batuuh been whindii naat hooy tehiiheeb,

ani aree taman.>>

idi.

13 W'ankwana Ukwaasana tutakatii dehaay,

<<Tuun batuuk saktaneet naanaatu?>>

idi.

Tutakat <<Aneeb ukwakwar itilheeb,

whindi simaarii naat hooy taman.>>

tidi.

14 W'ankwana Ukwaasana ukwakwarii dehaay,

<<Beet toona sakta akay,

baruuk kasteeh umalaaliit tidhhaniyaati bitik atoo'itaab iikti tindiya.

Kassooh umidhhanook uf'iisook itrifif tindiya,

whaash tami tindiya.

15 Baruukwa tuun tutakatwa taktak iirib tiyadna.

Ufraayuukwa batiiyuuh uufiraaywa diima ashoob iiktiin iyadna.

Baraah ugirmook iith'ana iyadna.

Baruuk aree bareeyeeh itiigasi iith'a tindiya.>>

idi.

16 Ukwaasana t'a aree tutakatii dehaay,

<<Ufiraayi door winneet lhami tindii,

laakiin batuuk diima utakook hiriw tindii.

Baruuh batiiyook kehii had'aab iikti indi.>>

idi.

17 Ukwaasana utakii dehaay,

<<Baruuk tutakati bhali tisnaakira.

Whindi hooy baatamaana adiyaab hooy tamta akay,

bariiyook sabbii tuubuur atoo'itaat iikti tindi.

Kassooh umidhhanook tubuutii m'ariit marriyee dehaay winneet gallabami tindiya.

18 Tuubuur naweetwa miskiitwa dehook yaksi tindi.

Baruuk aree tudir'aati hindiyee tami tindiya.

19 Baruuk m'ariit marriyee dehaay ibakii duufi tindiya.

Whaashii daamta,

masi whaash beeti it'igir tinidyeeb hadiit duufi tindiya.

Whaashii yakamta,

whaash beeti it'igir tindiya.>>

idi.

20 Aadam tutakatooh Hawwaab iisim.

Batuuh kassooh oodehay deetooh akaya tiid.

21 Malya W'ankwana Ukwaasana reewi saraayee halaakaab shagaamiyaayt,

Aadamwa tutakatoohwa istookw.

22 W'ankwana Ukwaasana <<Uutak t'aa gaal hinin t'iiteeb iki.

Baruuh tooshboohwa toomaagwa ikteen iki.

Baruuh diima midhhan biimariyi jillaay ibakii whindi umidhhan iniiw biikatiimeet toonaati.>>

idi.

23 Aflaay W'ankwana Ukwaasana ootak tudir'a Adanee mhaliya.

Baruuh hooy mhalamaab iiktiyeeb whaash aree is'ad.

24 Ukwaasana umidhhan iniiw whindi salal ingw'iidni jillaay Karoobiimwa,

b'adhadh talawiibwa tudir'aati dheefaay daasiya.