Yasuu'a ootak w'ayi ayaab iiktiyeeb mheeliya
3
1 Sabt weet aree Iyahuudi diini gaw shuumiyaayt,
oodehay agriisiya.
Been umhiiniib tak w'ayi umayikwa ayaab iiktiyi iifi.
2 Ifariisiwwa udiini koojaawwa Yasuu'a iishbibna,
ootak toosab mheeliini han kamheeliya!
Afreeb s'abuuk yhiriwna.
3 Yasuu'a Ootak w'ayi ayaab iiktiyeenaay dehaay,
<<Udehayi suurii asa gada!>>
idi.
4 Oont'a Yasuu'a Ifariisiiwwa udiini koojaayee dehaaywa,
<<Yhaana!
Tusabtiib tudaayiinaayti sakti daayiib han tumaagnaay?
Taki madar daayiib han,
taki mishidhhaan?>>
idiit bareeh raatiya.
Laakiin gaal han kwinhaab kiiki.
5 Een bareeyooh y'akrirwa w'amaag niyaawwa rhiyanihoob winneet gadaba ishbibt,
malya utakii dehaay,
<<W'ayook fidhidha!>>
idi.
Uutak w'ayooh ifidhidhihoob,
w'ayi in'ir.
6 Beenhoob Ifariisiiwwa Yhiiroodiyaawwa ifir'aniit,
kak Yasuu'a iidirneeb immakakaarna.
Gwida dehay Yasuu'a iramna
7 Yasuu'aawwa tikwiriyaatooh Jaliileeb ubharii dehaay y'agirihoob,
gwida dehay Yahuudaaywa Jaliileewwa iramna.
8 Been oomhiin gwida dehay Yahuudyaawwa,
Alguduseewwa,
Aduumiyaaywwa,
Tirooswa,
Siidooniiwwa ubhari dar iifiint madiinaateewwa,
bariiyooh usakana maasiwaa iifiinayt eeyaan.
9 Uudehay gwuudiya aree bariiyooh kehii biikwakwootsamiini jillaay toonaatii,
tikwiriya Falluukaat dehaay isoomiirneet toona sooya.
10 Gwida dehay oonaay suurii mheelaabuuyt,
kassaah tilhanay iibriin bariiyooh itehiti yhariwna.
11 Aajin hooy iifiineeb,
Yasuu'a rhiineeb oodoor whaashiib whii dhibiit waliikiin,
<<Baruuk W'ankwnanaay Oorwa.>>
iidna.
12 Laakiin Yasuu'a oodehay dehaay biisooyayneet toona bareeh sooya.
Yasuu'a ilinguuma itamna malu waasiya
13 Yasuu'a ribaab reewiyaayt,
iyhiriweeb waliikiya.
Baraah han dehaay eeyaan.
14 Baruuh tamna maloob hooy waasiyaayt,
geeb daayiineet toona yhariw,
<<Ilinguumiya>> isim.
Usakana udaayiib sooyiineet toona hooy yhiriw akay bareeh waasiya.
15 Eejin haay mhaliineet takweet aree yhii.
16 Een bareeh waasiya:
Sim'oon tari <<Butroos>> simaab iiktiyeebwa,
17 Yaaguub Sabadi oorwa,
Yuhanna Yaaguubiib oosanwa.
Een bareeh tuthiwti ar iisim.
18 Andariyaaswa,
Filiibuswa,
Baartooloomiyooswa,
Mattaawwa,
Toomaaswa,
Yaaguub Alfaa'iyoosi oorwa,
Taddaawooswa,
Sim'oon Kananaayooswa.
19 Yuudaas W'iskaaryuuti malya Yasuu'a yaandiinyaabwa iiktiin.
Yasuu'aawwa Beelsabuulwa
20 Malya Yasuu'a gaw shuumiya.
Shaawti gwida dehay beentooy kwimiyaan,
Yasuu'aawwa tikwiriyaatuuhwa tum'ari haay tamiineet fursa han inawna.
21 Yasuu'iib indhiwa een imaasiwnihoob,
barooh haaleeb hooy daayaneeb hiisiyaaniit haay giigiineet toona yhariwna.
22 Laakiin diini kooja gali Algudusee eeyaaniit,
<<Barooh Ba'alsabuul hooy eefi,
Ba'alsabuul eejini had'a eejin far'iiniib.>>
idiin.
23 Yasuu'a bareeh waliikiyaayt mitaalee sooya,
<<Kak uubliis oobliis far'i?
24 Tehad'aayi kat'amtiniyeek kit'ammarraay.
25 Gwidaat kit'i hooy eefeeneeb uugaw kiitikwakw.
26 Uubliis han ugarooyooh finaayiit,
malu mhiin daayiiniyeek,
kak tehad'aayeetuuh hayaaytini?
Shaawti tingadi.
27 Akra tak gadh'amaanaay gaw shuumiit umraayooh maraayiini tak kiiyhaay.
Hankaab laakiin barooh haakwriit maraayi biidiyeek,
kiiyhi.
Barooh hankwiireek,
laakiin iniin.
28 Oosdik andi hookna,
kastuuh udehayiit tumaagnaaywa ukifuuri bhaliiwwa afoomi iyadna.
29 Laakiin Eeshuuk Itageega hooy kanfiir,
afoomi kiidi.
Baruuh shahagwaabu,
diima afoomi kiidi.>>
idi.
30 Yasuu'a een haay iideeb usabab,
baraah <<Jin hooy eefeen.>>
iidna.
31 Yasuu'a tuundeewwa isanaawwa eeyaaniit barraab ingadna.
Nafar gaal dehaay diigwatiyaaniit waliiksiyaan.
32 Uudehay barooh kwalal bariiyooh dehaay,
<<Deetuukwa isanaayaakwa barraab ingadiin,
eerheek yhariwna.>>
idiin.
33 Yasuu'a <<Deetuuwwa isanaayaawwa aayga?>>
idi.
34 Malyaab oodehay barooh kwalaalnaay nakamiyaayt,
<<Aniib isanaawwa tuundeewwa tooy eefeena!
35 Ukwaasanaay ibhaliyee shagaameen uudehay aniib isanaawwa tuundeewwa bareeh ikatiin.>>
idi Yasuu'a.