Yasuu'a tak garbamaab mheeliya
2
1 Shalikt yinaati har'ii Yasuu'a Kafarnaahuum beeti y'agar.
Uudehay baruuh ugawiib iifiyeet toona imaasiwna.
2 Gwida dehay immararaayna,
kassuuh uumhiin udheefa hadiit itab.
Yasuu'a bareeyooh kehii W'ankwanaay ibhali hadiidi.
3 Been oodoor am'adhdha tak n'aali kehii fadhig da fiyakee haay eeyaan.
Ootak haay shuumiit,
Yasuu'i suurii daastiib yhiriwna.
4 Laakiin dehayi gwuudti sabbii,
ishuumti adigirat iribnihoob,
ootak ugawi mooy haay reewiyaan.
Malya oogaw umooyii itl'aniit,
been ootak n'aali kehii haayee udehayi bitikii hoogsiyaan,
aree Yasuu'i suurii daasiyaan.
5 Yasuu'a been w'iimaan rhiyanihoob,
<<Yhaa!
Tumaagnaay tubariituuk afoomaati.>>
idi.
6 Beenhoob aan udiini kooja iifiinayt,
7 <<Uun ikifuuri bhali hadiidiini aabu?
W'ankwana ookina baakaay,
weer tumaagnaay afooyiini aabu?>>
igin'ii idiin.
8 Laakiin Yasuu'a bareeh igin'aayeeb tiifiit toona ikan,
<<Naan igin'iyookna teekwinna?
9 <Tumaagnaaytuuk afoomaatu> uumiyaad laamakaab han,
hana <Yhaa!
Asa gadaat,
un'aalook yaksaat giigaa!>
uumiyaad,
naan laamakaatu?
10 Laakiin W'aadami Oor tubuutiib tumaagnaay haay afooyiinyi akrir ibari.
Beet toona batiktiinna aseharriiw hookna akay,
een ibhali adi.>>
idi.
11 Yasuu'a beenaay dehaay,
<<Yhaa!
un'aalook yaksaat ugawook baya!>>
idi.
12 Uutak igidiyeesooh kassooh oodehayi suurii yakiyaayt,
tumadhamtooh yakisiya.
W'ankwana hamdee ugawooh ibi.
Kassuuh uudehay naat igamna.
Akra mirkwaay dehaay dhibiya,
W'ankwana yhamidna,
aree <<Beet toona t'iiteena rhaab kinki!>>
idiin.
Yasuu'a Laawi waliikiya
13 Yasuu'a Jaliileeb eeyami kwayaay dehaay y'agar.
Kassuuh uudehay bariiyooh kehii immararaayna.
Baruuh han bareeh agriisiya.
14 Malya Yasuu'a hasamee tilbaat tamanaab Laawiib Alfaa'iiyoos iidni umaktab utilbaatiinaay s'ee rhiya.
Oon utakii dehaay,
<<Ramaheeb!>>
idihoob,
Ulaawi yakiyaayt,
naatka ingad y'isht,
iram.
15 Baruuh Yasuu'a Ulaawi gawiib m'ariit tamiya.
Tilbaat tamanaabwa maagtikinaawwa han baroohwa tikwiriyaatiyooh geebwa tamiyaan.
Barooh iitram han gwida geeb iifiin.
16 Yahuudaay udiini koojaawwa Ifariisiiwwa rhiyaanihoob yhaseeniit,
Yasuu'iit tikwiriyaatii dehaay,
<<Kak itilbaat tamanaayi geebwa timaagnay sakeen udehayi geebwa tamteenaa?>>
idiiniit raatiyaan.
17 Yasuu'a imaasiwihoob,
bareeyooh dehaay,
<<Uudehay w'akra hakiimii dehaay kiishinhana,
eelhaab nuun.
Ani oodehay timaagnay sakeen tuubsanyee dehaay y'aabu nuun,
tudaayiinaay sakeennee dehaay y'aab kaaki.>>
idi.
Yasuu'a tubaaskiitiib hadiidiya
18 Baliin Yuhannaay tikwiriyaawwa,
Ifariisiiwwa baaskiitiin.
Gali Yasuu'ii dehaay eeyaaniit,
<<Yuhannaayt tikwiriyaawwa Ifariisiiwwa baaskiiteen.
Laakiin bareeyaakna tikwiriya kak tameen,
gw'een?>>
idiin.
19 Yasuu'a <<Idoobaayi ar idoobeeb haayee kak baaskiiteen?
Udooba gwad haayee baaskiiteenee dehaay ka'adgiryaan.
20 Yint gaat laakiin udooba hooy giigiinyi daayiini.
Baliin imb'eeyeeb aree baaskiiteen.
21 Tak silhaayt gayi halaakii fir'atiit,
sh'iya halaakiib kiiyhayid.
Whalak ugayi shatatamiini,
tusilhaay whalak ugaayiinaay kehii han kitshiboob.
22 Aat gayiit hamiit aateeb kiimshawwaayna.
Tiy'a tigayiit tehamiit'a thawseen,
taakna aree kiishiboobna,
tehawat han eemigna.
Tiy'a tigayiit laakiin nhas hawattiib laadim daayeen.
Hamiit aat limda tak tigayiit kiiyhamid,
tehamiit iseheeyiis.>>
idi.
Tusabti Ankwana
23 Sabt gaat Yasuu'a harrooyt dir'aati bitik sakee,
tikwiriya gangaraab gal ikit'ana.
24 Fariisi gwadi bariiyooh dehaay,
<<Yhaa,
t'aadaateeyoon <Tusabtiib baasakaana!>
diyaab iiktiineet toona naanhooy sakteena?>>
idiin.
25 Yasuu'a een Ifariisiyee dehaay,
<<Daawid y'araweeyooh geeb yharagwihoob sakiyaneet toona agriiyaab kitteena han?
26 Abii'asaar ufagiiri oowwinnaay udamaaniib,
Daawid W'ankwanaay oogaw shuumiyaayt,
hadhiib fagiiriya nuun,
uudehay uuraaw biitamayneeb tamiya.
Aree y'araweeh igeeb iifiin han tamisiyaneet toona agriiyaab kitteena han?>>
idi.
27 Malyaab Yasuu'a bareeyooh dehaay,
<<Tuusab udehayi jillaay daamaati nuun,
uudehay tusabti jillaay daamaab kiikeen.
28 W'aadami Oor han tusabti Ankwana ikati.>>
idi.