IMola INofu ya Yesu Kilisiti
ngita kye yaasimbiilwe nu
Matayo uMwimike
Ikipelela kya Yesu Kilisiti
1
1 Aga ge mataawa ga kipelela kya Yesu Kilisitia ye aahumile mu kipelela kya mutwa Dawudi ni kya Abulahamu.2 UAbulahamu amuvegiye uIsaka,
uIsaka akumuvegalaga uYakobo,
uYakobo akumuvegalaga uYuda na vanungʼuve.
3 UYuda akumuvegalaga uPelesi nu Sela kwa Tamali,
uPelesi akumuvegalaga uHesiloni,
uHesiloni akumuvegalaga uAlamu,
4 uAlamu akumuvegalaga uAminadabu,
uAminadabu akumuvegalaga uNasoni,
uNasoni akumuvegalaga uSalumoni.
5 USalumoni akumuvegalaga uBohasi kwa Lahabu,
uBohasi akumuvegalaga uObedi kwa Luti,
uObedi akumuvegalaga uYese,
6 uYese akumuvegalaga umutwa Dawudi.
UDawudi akumuvegalaga uSelemani kwa mwayuuva ye aali mudala va Uliya.b
7 USelemani akumuvegalaga uLehobohamu,
uLehobohamu akumuvegalaga uAbiya,
uAbiya akumuvegalaga uAsafu,
8 uAsafu akumuvegalaga uYehosafwati,
uYehosafwati akumuvegalaga uYolamu,
uYolamu akumuvegalaga uOsya.
9 UOsya akumuvegalaga uYotamu,
uYotamu akumuvegalaga uAhasi,
uAhasi akumuvegalaga uHesekya,
10 uHesekya akumuvegalaga uManase,
uManase akumuvegalaga uAmoni,
uAmoni akumuvegalaga uYosya.
11 UYosya akumuvegalaga uYekoniya na vanungʼuve. Umusika ugu, aVaisilaheli vaasindiikwe ku wugalulano ku nyi ya Babeli.
12 AVaisilaheli pe vaaviye vágaluliilwe kula ku Babeli,
uYekoniya akumuvegalaga uSalatyeli,
uSalatyeli akumuvegalaga uSelubabeli,
13 uSelubabeli akumuvegalaga uAbyudi,
uAbyudi akumuvegalaga uElyakimu,
uElyakimu akumuvegalaga uAsoli.
14 UAsoli akumuvegalaga uSadoki,
uSadoki akumuvegalaga uAkimu,
uAkimu akumuvegalaga uElyudi,
15 uElyudi akumuvegalaga uElyasali,
uElyasali akumuvegalaga uMatani,
nu Matani akumuvegalaga uYakobo.
16 UYakobo akumuvegalaga uYosefu, umugoosi va Maliya.
UMaliya uyo ye ngʼina va Yesu ye iikemeelwa Mesiya.c
17 Neke ukuvangila uAbulahamu ukufikila kwa mutwa Dawudi, kwali ni fivegalo finyikyumi ni fitayi (14). Kangi ukuvangila uDawudi ukufikila aVaisilaheli pe viisindikwa ku wugalulano ku Babeli, kwali ni fivegalo finyikyumi ni fitayi. Kangi ukuhuma pe viisindikwa ku wugalulano ukufikila umusika gwa kuholwa kwa Kilisiti, kwali ni fivegalo finyikyumi ni fitayi.
Ukuholwa kwa Yesu Kilisiti
18 Ukuholwa kwa Yesu Kilisiti kwali endee. Ungʼina va Yesu ilitaawa lyakwe Maliya, aabaanyiilwe nu Yosefu. Umusika ugo pe aali asinaa atawuka, aawoniike ukutigila, ali nu wuvaha wugendela mwa Mubepo uMwimike. 19 Neke kangi uYosefu umufwike vaakwe,d aali mugolofu pa miiho ga Nguluvi, lwe lwene asaaweene lunofu ukumuyeyewusa uMaliya pa lilugu, neke ahoodzage ukumuleka kinyele.
20 Pe aaviye áhoodziidze idzo, umunyamwandzae va Mutwa Nguluvi akumuwonekelaga mu lulooto. Akumulongelaga iitigilaga, “Yosefu, ye úhumile mu kipelela kya mutwa Dawudi, utane ukoogopa ukumutoola uMaliya, pakuva uwuvaha we ali nawo, ápeeliilwe wugendela mwa Mubepo uMwimike. 21 Ahadza iivegala umwana umudiimi, na yuuve umupeelage ilitaawa Yesu,f pakuva ye mwene ye alavapoka avaanu vaakwe ukuhuma mu ndzanangifu dzaawo.”
22 Dzonda idzo dzaahumiye ukuta likwile ilidzwi lya Mutwa Nguluvi, lye aalongile wugendela wa muvidzi ukutigila, 23 “Lolage! Umuhindza ye asimudzeeliye umugoosi alaavedza nu wuvaha, alaavegala umwana umudiimi! Navo valamupeela ilitaawa Imanweli.”g Ikiganulo kyakwe kwe kutigila, uNguluvi pamwinga naafwe.