Umusimbi va kitabu iki ye mutume Matayo, ye aali Muyahudi, kangi yumwinga va vanyigendwa va Yesu vanyikyumi na vavili (12). UYesu amukemeeliye uMatayo ukuvedza munyigendwa vaakwe, umusika pe aalimaga amalimo ga wuhaki-pembe (10:1-4). UMatayo aasimbile ikitabu iki ngita mu myaka gya makyumi mutanda (60), ukufikila makyumi mufungʼati (70), ukuhuma pe iiholwa uYesu Kilisiti.

Uwugulume waakwe waali wa kuvawoneesa aVayahudi ukutigila, uYesu ye Mesiya, kwe kutigila Mupoki ye aahuuviidze uNguluvi ukumutuma ukwawo. Lwe lwene iivanga pa kulonga ukutigila, uYesu aahumile mu lukolo lwa Vayahudi voloofu (1:1-17). Iiwoneesa wugendela wa vavidzi va Lufingo uLulovela ukutigila, uYesu aakwiliidze uwuvidzi uwo. Mu kitabu kya Matayo, uYesu iilonga ifihwananidzo fyoloofu ifya wutwa wa Nguluvi, we iitambula kutigila wutwa wa kukyanya. Uwugulume wa fihwananidzo ifyo kwe kuwoneesa ukutigila, uwutwa wa Nguluvi we wa vaanu vonda avakumufuuwa.

Ikitabu iki kiivanga ukulonga imola ya kuholwa kwa Yesu (1:18–2:23), ukudzabikwa nu kugemywa kwakwe (3:13–4:11). Kangi kiilonga ulwa wulimila-vangi waakwe uwa kudalika, ukuwulanidza nu kuvananiya avatamwa mu mugoola gwa Galilaya (4:12–18:35). Ikitabu iki kiilonga ndawuli uYesu kye aagendaga ukuhuma ku Galilaya, kuhelela ku wudzenge wa Yelusalemu (19:1–20:34). Kangi kiilonga idzamuhumiye uYesu mu mulungu gwa wusililo, ukufikila ukutovelelelwa pa kipindulihidzo nu kudzulubuka kwakwe (21:1–28:20).