Avalongodzi va Vayahudi viinyilika kangi ikimanyilo
16
1 Ikigono kimwinga, aVafwalisayo na Vasadukayo avangi vaadzile kwa Yesu, vakumugemyaga, ukuta avahuufye ikimanyilo ukuhuma kukyanya ukutigila, átumiilwe nu Nguluvi. 2 UYesu akuvahigaga iitigilaga, “[Pe mwiwona kukyanya kungaya mafunde mwitigila, ‘Kwivedza kunofu.’ 3 Neke kangi pamilaawo mwilonga ukutigila, ‘Ineengʼuli indoonya ngomi yihadza yiitoonya, pakuva kukyanya kuli mafunde matiitu.’ Ndeeni, unyeenye mwidzeela ukuganula ifimanyilo fya kukyanya, neke kangi simwiganula ifimanyilo fya fiinu ifiihumila lino.]a 4 Ikivegalo ikihosi kangi kidumuli-noolane kiisaka ikimanyilo. Kisilaapeelwa ikimanyilo kikivedzaga, nda haamu, ki kimanyilo kya Yona.”b Neke uYesu avalekage, ahegage.Uwuviifu wiitagalila ngita luhaafu
5 Umusika uYesu na vanyigendwa vaakwe pe vaalowiike inyandza ya Galilaya, avanyigendwa viiwonaga váseemiilwe ukunyamula imikaate. 6 UYesu akuvalongelaga iitigilaga, “Mwiyangalilage nu luhaafu lwa Vafwalisayo na Vasadukayo.” 7 Avanyigendwa viivangaga ukulongana veene viitigilaga, “Iilonga ewo, pakuva tusinyamuwe imikaate.” 8 UYesu adzidzeeliye dze vaalongaga, akuvalongelaga iitigilaga, “Unyeenye ye muli nu lufuuwo lukeefuanye! Kye kiki mwilongana nyiveene ulwa mikaate gye musili nagyo? 9 Mwave musikulufika? Musiikwiwuka kye ndavaliisiidze avaanu mbilima dzihaanu (5,000) imikaate gihaanu gila, na mahiivi galinga ga tuwuluwulu ge mwalundiise? 10 Kangi musiikwiwuka kye ndavaliisiidze avaanu mbilima dzitayi (4,000) imikaate mufungʼati (7) na mahiivi galinga ge mwalundiise?c 11 Musikulufika? Idzo dze ndílongile si dza mikaate! Mwiyangalilage nu luhaafud lwa Vafwalisayo na Vasadukayo.” 12 Neke avanyigendwa vaakwe valufikage ukutigila, asaalongile ulwa luhaafu lwa mukaate, nda haamu, aalongile ukutigila, viiyangalilage ni mbulanidzo idza wudesi dza Vafwalisayo na Vasadukayo.
UPetulo iikwidika ukutigila uYesu ye Mesiya
13 UYesu pe aafikile imbali dza ku Kayisalya Filipi, akuvawuudzaga avanyigendwa vaakwe iitigilaga, “Avaanu viitigila uMuswamuve va Muunu ye ani?” 14 Vakumuhigaga viitigilaga, “Vamwinga viitigila ye Yohana uMudzabisi, avangi viitigila ye Eliya,e na vangi viitigila ye Yelemya, enewuli ye yumwinga mu vavidzi avangi.” 15 UYesu akuvawuudzaga kangi iitigilaga, “Neke kangi unyeenye mwitigila yuune ani?” 16 USimoni Petulo akumuhigaga iitigilaga, “Uveeve ve Mesiya, uMuswamuve va Nguluvi ye ali muumi.”
17 UYesu akumulongelaga iitigilaga, “Simoni muswamuve va Yona, úfuunyiliilwe, pakuva sikwali umuunu ye ákuvilatuliye ulo, nda haamu, yu Daada va kukyanya. 18 Uneene ndikukulongela ukutigila, uveeve Petulof uli lutalaawe, na pakyanya pa lutalaawe ulu, ndihadza ndiidzenga ulukombesog lwangu, ni ngufu idza ku wulungu dzisilaludwedza nambi. 19 Uneene ndihadza ndikukupeela ikidindulilo kya wutwa wa kukyanya.h Ndeeni, dzonda dze wiikaanidza pe naanyi, uNguluvi iivedza ákaaniidze kukyanya. Kangi dzonda dze ukudzitawula mwe naanyi, uNguluvi iivedza ádzitawuwe kukyanya.” 20 Neke uYesu avakaanidzage avanyigendwa vaakwe atigilage, vatane ukumulongela muunu ye avedzaga ukutigila umwene ye Mesiya.
UYesu iilonga ulwa kufuwa nu kudzulubuka kwakwe
21 Ukuvangila umusika ugo, uYesu aavangile ukuvalongela avanyigendwa vaakwe ukutigila, munya kuhelela ku Yelusalemu ukupumuswa mbandu na vavaha va Vayahudi, avateekedzi avakomi na vawulanidzi va milagililwe, ukukomwa, kangi pa kigono ikya wudatu ukudzulubuka. 22 UPetulo akumukemeelelaga uYesu pa lubali, iivangaga ukumukenyelai iitigilaga, “Mutwave, idzo dzitane ukukufika uveeve!” 23 Neke kangi uYesu amuseedukilage uPetulo, amulongelage atigilage, “Uhege apa ve Setanoave! Wiidindanidza kuwutalo ingʼaasi yangu, pakuva usiihoodza imikeelelele gya Nguluvi, nda haamu, imikeelelele gya vaanu hela.”
24 Neke uYesu avalongelage avanyigendwa vaakwe atigilage, “Ngana umuunu ye avedzaga iisaka ukuuniniila, iitawulilage ngʼaani, ategulage ikipindulihidzo kyakwe, neke aaniniilage. 25 Kwe kutigila, umuunu ye avedzaga ye iisaka ukuwupoka uwuumi waakwe, uyo alawuyadza, nayu muunu ye akuwuyadza uwuumi waakwe wiimila wa neene, uyo alawupoka. 26 Lukumuwumbulila kiki umuunu, ngana avedze nu wumosi wonda wa lidugulu lyonda, neke kangi ayadze uwuumi uwa mbeepali? Enewuli umuunu atawule kiki, ukuta aanukile uwuumi uwa mbeepali? 27 Pakuva uMuswamuve va Muunu alaadza pamwinga na vanyamwandza vaakwe mu ndolo dza Daadiye. Neke alamuhomba nayula mu kigelelo kya malimo gaakwe. 28 Ndakyene ndikuvalongela ndiitigila, avangi umwenyo ye mwímile apa, vasilaagedza ifuwa pe vasinaa vamuwona uMuswamuve va Muunu, pe iikwadza mu wutwa waakwe.”