Umusimbi va kitabu iki ye Luka. Uyu asaali Muyahudi, neke kangi aali Mugiliki, mwimbi ye aali mufuuwa (Vakolosayi 4:10-14). Kangi umuunu uyu ye mwene ye aasimbile ikitabu kya Malimo ga Vatume. Ifitabu fyonda fivili ifi amusimbiye umuunu ye aatambulwaga Tyofilo. ULuka aalimile amalimo ga kudalika iMola iNofu pamwinga nu Pawulo. Lwiwoneka uLuka aasimbile ikitabu iki ngita umwaka gwa makyumi mufungʼati (70), ukuhuma pe iiholwa uYesu Kilisiti.

ULuka aasimbile imola ndzoloofu ukuwoneesa ukutigila, uwugulume wa Mola iNofu ya Yesu Kilisiti waali wa kufika ku vaanu vonda. Iiwoneesa ulo, pe iikoolela ulukolo lwa Yesu (3:23-38). Aasimbile imola ndzoloofu ídzisimbiilwe na vasimbi Matayo, Maluko nu Yohana, ngita ukuholwa kwa Yohana uMudzabisi nu waana wa Yesu. Ikitabu iki kiidzeelanika wiimila wa mola idza wende wa Nguluvi ku vaanu aviibedwa, ngita aVasamalya, avahaki-pembe, avahangala, avamwayuuva na vangi avasaali Vayahudi.

ULuka iivanga pa kulonga imola idza kuholwa kwa Yesu, uwulimila-vangi wa Yohana uMudzabisi, nu kugemywa kwa Yesu (1:5–4:13). Iigina nu wulimila-vangi wa Yesu. UYesu aawulaniidze ulwa wutwa wa Nguluvi, kangi aahuufiidze ifilole ifya kunaniya nu kulosa imibepo. Kangi mu ngʼaasi kuhelela ku Yelusalemu uYesu aawulaniidze kye lwisakulwa ukumuniniila (4:21–21:38). ULuka iilonga ndawuli uYesu kye aahigiilwe nu kufuwa pa kipindulihidzo, kangi iimaliidza ni mola idza kudzulubuka kwakwe (22:1–24:53).