Avaanu vaniniilage indagi dza Nguluvi, valekage mivedzehedze gyawo
7
1 AVafwalisayo pamwinga na vawulanidzi va milagililwe vakeefu avaahumile ku Yelusalemu, vaalundiine pe agenda uYesu. 2 Viiwonaga avanyigendwa vaakwe avangi viiliya ikyakuliya na mawoko agali lupumba, kwe kutigila vasinaa vakalavaga ngita kye lwasakulwaga mu mivedzehedze. 3 AVafwalisayo na Vayahudi vonda, vasaaliyaga ikyakuliya kitakalava amawoko ukufikila mu kisuguluuni, pakuva viinatilaga imivedzehedze gya vakuhwawo. 4 Kangi pe viihuma mu ligulilo, vasaaliyaga kikivedzaga kitakalava amawoko, ukuta vahedze ulupumba.a Viinatilaga imivedzehedze igingi gya vanyakataali, ngita igya kukalafya ifitonga, ifiviya ni fikoongʼolo ifingi ifya fyuma.5 Neke aVafwalisayo na vawulanidzi va milagililwe pe vamulundaniye uYesu, vamuwuudziidze viitigila, “Kye kiki avanyigendwa vaako vasiikolaatidza imivedzehedze gye vatulekiye avakuhwesu, viiliya ikyakuliya na mawoko agali lupumba?” 6 UYesu iihigaga iitigilaga, “Ndakyene wugendela wa muvidzi uIsaya, uNguluvi avaviliye unyeenye nye vakedusi pe aatigiye,
‘Avaanu ava vakuunginiya ulwa pa mulomo hela,
neke kangi inumbula dzaawo dzili kutaali naane.
7 Na pe vakwifuunya ukwangu vakwifwahidza hela,
viiwulanidza imbulanidzo idza milagililwe gya vaanu hela.’b ”
8 Neke uYesu aginage ukulonga atigilage, “Múdzilekile indagi dza Nguluvi,c lino mwikwinatila imivedzehedze gya vaanu.
9 “Kangi unyeenye múweene lunofu ukukaana indagi dza Nguluvi, mwikwinatila imivedzehedze gyenyo. 10 UNguluvi aalongile wugendela wa muvidzi vaakwe uMose ukutigila, ‘Uvaginiyage udaado nu nyoko,’d na, ‘Ye akumuliga udaadiye enewuli ungʼina, uyo akomwage.’e 11 Neke kangi unyeenye mwilonga ukutigila, ‘Umuunu iikwidikwa ukuvalongela avavaha vaakwe ukutigila, “Ikiinu kye ndikali ndikuvapeela ngita kuvatanga, lino ndítawuwe wusembe kwa Nguluvi.” ’ 12 Apo lino musikumuleka umuunu ukumutanga udaadiye nambe ngʼina! 13 Pa kuwulanidza ewo, mwibedalila ilidzwi lya Nguluvi pa kwinatila imivedzehedze gyenyo gye mwikwanuungʼana. Kangi mwikwinatila imivedzehedze igingi gyoloofu ngita igyo, igisiikwidiingʼana ni ndagi dza Nguluvi.”
Ifiinu ifikumuhulila lupumba umuunu
14 UYesu iikemeelaga kangi ililugu lya vaanu, iilongaga ukutigila, “Unyeenye nyivonda mupulikidzage wunofu nu kulufika. 15 Sikookili ikiinu ikiikwingila mugati mwa muunu ukuhuma kwivala ikikumuhulila lupumba. Nda haamu, ikiinu ikiihuma mugati mwa muunu, kye kyene ikikumuhulila lupumba. [ 16 Ye ali na masiikidza agiipulika, apulikage.]”f
17 UYesu pe aaviye álilekile ililugu lya vaanu, iikwingilaga mu nyumba. Avanyigendwa vaakwe vakumuwuudzaga ulwa kiganulo kya kihwananidzo ikyo. 18 Neke avawuudzage atigilage, “Na yuunye musikulufika? Musiidzeela ukutigila sikookili ikiinu ikiikwingila mu lileme lya muunu ikikumuhulila lupumba? 19 Umuunu pe áliye ifiliyo fisiikwingila mu numbula, fiikwingila mu lileme nu kuhuma kwivala.” Pa kulonga ewo, uYesu iidiike ukutigila, ifiliyo fyonda filiiwage.
20 Iitigilaga kangi, “Ikiihuma mugati mu numbula ya muunu, kye kyene ikikumuhulila umuunu avedze lupumba. 21 Mugati mu numbula ya muunu mwe mwene mwe giihuma amahoodzo amaviifu, uwugoni, uwuhiidzi, uwuwuladzi, uwudumuli-noolane, 22 ikyoyo, amalanga, uwudzandzi, uwudobofu wuviifu wa muvili, igiila, amaligo, ulwinunumulo nu wupuva. 23 Imbiifu dzonda idzi dziihuma mu numbula, dze dzeene idzikumuhulila lupumba.”
Ulufuuwo lukomi lwa mwayuuva ye asili Muyahudi
24 UYesu pamwinga na vanyigendwa vaakwe vaahegile apo, viihelelaga ku mbala dza Tilo.g Iikwingilaga mu nyumba yimwinga, asaakeeliye avaanu vadzeele ukutigila ali umo. Kangi aalemiilwe ukufihama. 25-26 Ku luvala ulo aali kwali umwayuuva yumwinga uMugiliki, aali va ku Foyinike ku nyi ya Silya. Pe aapuliike imola dza Yesu, iihelelaga neke iigwisage pa magulu ga Yesu, amugongoolage amunaniye umwalive ye aali nu mubepo umuviifu. 27 UYesu iitigilaga, “Uleke tandi avaana valiye viigute, pakuva si lunofu ukunyamula ikyakuliya kya vaana nu kusopela imbuwa.”h 28 Umwayuuva uyo iitigilaga, “Ulo huulo Mutwave, nadzi mbuwa nadzo dzaadziliya utuwuluwulu twe viigwisa paanyi avaana.” 29 UYesu akumulongelaga iitigilaga, “Pakuva úlongile ulo, lino uhelelage. Umubepo umuviifu gúmuhegile umwaliwo.” 30 Umwayuuva uyo iihegaga iihelelaga ku kaaya, akumuwonaga umwalive ágonile pa wulili, umubepo umuviifu gúmuhegile.
UYesu akumunaniya umukitalonga umudibafu
31 UYesu iihegaga mu mbala dza Tilo, iihelanidzaga mu wudzenge wa Sidoni, iihelelaga ulubali lwa kunena mwa nyandza ya Galilaya, iifikaga mu mbala dza Ndzenge Dzinyikyumi (10). 32 Uko vakumuleetelaga umuunu umudibafu, kangi mukitalonga. Vakumunyilikaga uYesu amuviikile amawoko, ukuta apone. 33 UYesu akumuhedzaga umuunu uyo pa lilugu, akumusindikaga pa lubali apangaya vaanu, iikwingidzaga ifyala mu masiikidza ga mudibafu, iifuunyilaga amati mu kyala, akumubakaga mu lulimi. 34 Iilolaga kukyanya, iihuguvalaga, akumulongelaga iitigilaga, “Efwata!” Kwe kutigila, “Dinduke!” 35 Umusika guugo amasiikidza ga muunu uyo, giidindukaga nu lulimi lwakwe lwiwopokaga, iivangaga ukulonga wunofu. 36 Neke uYesu avakaanidzage vatane ukulonga kwa muunu ye avedzaga. Neke kangi kye aaginaga ukukaanidza, aveene vaaginaga ukutagalidza. 37 Avaanu viidzumaga hiilo viitigilaga, “Álimile dzonda wunofu, pakuva akuvadindula avadibafu vapulikage, avakitalonga valongage wunofu!”