UYesu iidzulubuka
16
1 Pa kyamihe, iSabato pe yaaviye yíhelaniidze, uMaliya Magadalena, uSalome nu Maliya ungʼina va Yakobo, viigulaga amafuta amanofu, ukuta vahelele vakagubake umuvili gwa Yesu. 2 Ikigono ikya Mulungu pamilaawo, ilidzuwa pe liihohomoka, viihelelaga ku mombwe. 3 Pe vaali mu ngʼaasi viivangaga ukwilondza veene viitigila, “Ye ani ye ahadza iibiilusa iliganga ilili pa mulyango gwa mombwe?” 4 Iliganga ilyo lyali likomi mbandu. Neke pe vaafikile pa mulyango, viiwonaga iliganga líbiilwiswe lili pa lubali. 5 Viikwingilaga mu mombwe, vakumuwonaga umudiimi yumwinga íikalile ulubali ulwa kundiyo áfwalile umwingila ugwingʼalita. Suwe viikagahalaga mbandu.6 Neke umudiimi uyo avalongelage atigilage, “Mutane ukukagahala! Mukumusakula uYesu uva ku Nasaleti ye akaatoveleliilwe pa kipindulihidzo. Ádzulubwike! Sipwali apa. Mulolage pe vakamugoniike. 7 Lino muhelelage mukavalongele avanyigendwa vaakwe nayu Petulo ukutigila, ‘Ávalonguwe ukuhelela ku Galilaya, uko kwe kwene kwe muhadza mukumuwona ngita kye akavalongiye.’a ”
8 Avamwayuuva avo viihumaga mu mombwe, viihegaga apo lunyilo, kuno viihilila nu koogopa, kangi viiganguka. Vasamulongiye ulo nambe muunu, pakuva voogwipe mbandu.
UYesu akumuhumila uMaliya Magadalena
[ 9 UYesu pe aaviye ádzulubwike ikigono ikya kutala ikya mulungu, akumuhumilaga tandi uMaliya Magadalena, ye mwene uYesu ye amulosiidze imibepo imiviifu mufungʼati (7). 10 Uyo iihelelaga kuvalongela avo avaali pamwinga nu Yesu avaahuguvalaga nu kuvemba. 11 Pe vaaviye vápuliike ukutigila uYesu ali muumi, kangi uMaliya Magadalena ámuweene, vasaafuuviilwe.
UYesu akuvahumila avanyigendwa vavili
12 Pe dzaaviye dzílimiike idzo, uYesu akuvahumilaga mu luhwano ulungi, avanyigendwa vavili avaawuyaga ukwawo ukuhuma ku Yelusalemu. 13 Neke navo vapilukage ukuvalongela avayaawo, avo navo vasavafuuviilwe.
UYesu akuvatuma avanyigendwa
14 Pambele akuvahumilaga avanyigendwa vanyikyumi na yumwinga (11) pe vaali mu kuliya. Akuvakenyelaga ulwa kitafuuwa nu wukiliitafu wa numbula dzaawo, ulwa kitavafuuwa avo avamuweene pe ádzulubwike. 15 Neke uYesu avalongelage atigilage, “Muhelelage ku nyi dzonda mukadalikage iMola iNofu ku figawa fyonda. 16 Ye iifuuwa nu kudzabikwa, alaapokwa. Ye asiifuuwa, alaahigwa. 17 Avo aviifuuwa valaahuufyaga ifimanyilo ifi. Viilosaga imibepo imiviifu mu litaawa lyangu, kangi viilongaga indongele imiya. 18 Viikwibataga amayoka na mawoko gaawo, nde vanyuwe ifiifwisa vasilemala nambi. Vakuvaviikilaga amawoko avatamwa navo viiponaga.”
UYesu iikwinuka kukyanya