Imbulanidzo dza fikuvadzi nu kupyanila
17
1 UYesu avalongiye avanyigendwa vaakwe aatigiye, “Ingemyo idziihula avaanu ukuyaga, koodzili ifigono fyonda. Neke kangi ali nu lukali umuunu ye iihula ingemyo idzo! 2 Ngali kiba umuunu uyo akali apingwe mu singo ulwala lukomi nu kutoodzwa mu nyandza, sindawuli imumuko idzilamufika pa kumuhulila yumwinga mu vadebe ava ayage! 3 Lino mwiyangalilage, ukuta mutane ukululima ulo!“Umuyago pe ákwanguwe inongwa, umuwungage, ngana iitigila, ‘Ndípelile,’ umupyanilage. 4 Nde avedze ákuhokiye kalimufungʼati (x7) mu kigono kimwinga, nu kupiluka ukwako kangi na kangi iitigila, ‘Ndípelile,’ uveeve umupyanilage!”
Ulufuuwo
5 Neke avatume vala vamulongelage uMutwa vatigilage, “Utoongelehedze ulufuuwo!” 6 UMutwa iitigilaga, “Ngana mukali muvedzage nu lufuuwo ludebe, ngita akapeke kadoodo hiilo ka lilongoti, ngali mukali mukulilongela ilibiki ilitoni ili ukutigila, ‘Wiipuke ukiiyogeke mu nyandza!’ nalyo likali likuviidika.”
Amalimo ga mulima-malimo
7 “Tutigile umuyeenyo yumwinga ali nu mulima-malimo ye iilima, apangi iidiima ingʼolo. Ye ani ye akumulongela umulima-malimo, pe áhumile kulima amalimo, ukutigila, ‘Waadze kisaatu wiikale uliye ikyakuliya’? 8 Asiilima ewo nambi, nda haamu iitigila, ‘Uunelekele ikyakuliya, kangi uunovele iligendwa, ukufikila umusika pe ndiimala ukuliya nu kunyuwa, neke na yuuve uliye nu kunyuwa.’ 9 Ongo, ahadza akumuhongedza umulima-malimo, pakuva álimile dze akamulagiidze? Nambi! 10 Luli ewo nu kwenyo, pe múmalile ukudzilima dzonda dze avalagiidze uNguluvi ukudzilima, apo mutigilage, ‘Uneefwe tuli valimila-vangi ye tusivagiye, túlimile idzo dze twivagila ukudzilima.’ ”
UYesu iinaniya avanya kinyamuvili likyumi limwinga
11 UYesu pe aahelelaga ku Yelusalemu, aagendiye pagatinagati pa mugoola gwa Samalya nu gwa Galilaya. 12 Pe iikwingila mu luvala lumwinga, iitaangʼanaga na vamwadaada likyumi limwinga (10) avanya kinyamuvili. Avaanu avo, viikwimaga kutaali nu mwene,a 13 vakumukemeelaga mbandu viitigilaga, “Yesu Mutwave, utusungukile!” 14 UYesu pe avaweene, akuvalongelaga iitigilaga, “Muhelelage mukiiwoneese ku vateekedzi.” Pe vali mu ngʼaasi viihelela, viivalalaga.
15 Umuyaawo yumwinga, pe iiweene ukutigila ánaniidzwe, iipilukaga kisaatu kwa Yesu, kuno akumulumba uNguluvi mu sawuti ngomi. 16 Iifugamaga pa magulu ga Yesu, akumuhongedzaga. Umuunu uyo aali Musamalya. 17 UYesu iiwuudzaga iitigilaga, “Vasivaliidzwe avaanu vonda vanyikyumi? Avangi vanyigondza (9) vagenda kwi? 18 Sikwali ye ápilwike kumulumba uNguluvi, yu mugendzi uyu swe?” 19 Neke uYesu amulongelage atigilage, “Wiime, uhelelage, ulufuuwo lwako lúkunaniidze!”
Ukwadza kwa wutwa wa Nguluvi
20 Ikigono kimwinga, aVafwalisayo vamuwuudziidze uYesu viitigilaga, “Uwutwa wa Nguluvi wiikwadza ndali?” UYesu akuvahigaga iitigilaga, “Uwutwa wa Nguluvi wusiikwadzila mu fimanyilo ifiiwoneka pa miiho. 21 Nambe vaanu vasilaalonga ukutigila, ‘Lolage! Wuli apa!’ apangi, ‘Wuli kula!’ pakuva uwutwa wa Nguluvi wuli mugati umwenyo.”
22 Kangi akuvalongelaga avanyigendwa vaakwe iitigilaga, “Filaadza ifigono fye mulaadoboka ukuvedza nu Muswamuve va Muunu, nambe mu kigono kimwinga, neke kangi musilakiwona. 23 Avaanu valavalongela ukutigila, ‘Lolage! Yula kula!’ apangi, ‘Uyu apa!’ mwali mutane ukuvafuuwa, nambe kuvaniniila. 24 Ndívalongiye idzo, pakuva umusika pe alaavedza iipiluka uMuswamuve va Muunu, alaadza ngita lumuli lwa libalamusi, kye lwimulika imbali dzonda kukyanya. 25 Neke kangi uMuswamuve va Muunu munya kupumuka mu ndzoloofu nu kukaanwa na vaanu va kivegalo iki.
26 “Ngita kye lwali mu figono fya Nwaka,b lulaavedza ewo mu figono fya Muswamuve va Muunu. 27 Mu figono fya Nwaka, avaanu vaaliyaga nu kunyuwa, vaatoolaga nu kutawuka, ukufikila ikigono uNwaka pe iingiye mu ngalavala. Wiihumilaga uwulava wukuvatipulaga vonda.c
28 “Kangi mu figono fya Loti, lwali ndeeni. Avaanu vaaliyaga nu kunyuwa, vaagulaga nu kugudza, vaayaalaga nu kudzenga. 29 Neke kangi ikigono ikyo uLoti pe aahumile ku Sodoma, umooto mukali hiilo ukuhuma kukyanya gwatoonyile ngita ndoonya, gwitipulaga avaanu vonda.d 30 Lulaavedza ewo mu kigono ikyo, uMuswamuve va Muunu pe alaavilatulwa pa weelu.
31 “Ikigono ikyo, umuunu ye ali kukyanya ku likiingʼa lya nyumba,e iikage nu kunyila, aali atane ukwingila mu nyumba, ukuta anyamule ifiinu fyakwe ifili mugati. Ndeeni, ye ali ku mugunda, aali atane ukupiluka ku kaaya kunyamula kikivedzaga. 32 Mwiwukage idzaahumiye kwa mudala va Loti.f 33 Umuunu ye iisaka ukuwupoka uwuumi waakwe, uyo alawuyadza. Neke kangi umuunu ye avedzaga ye akuwuyadza, uyo alawupoka.
34 “Ndikuvalongela ukutigila, ikilo ya kigono ikyo, avaanu vavili valaavedza vágonile pamwinga pa wulili, yumwinga alaanyamulwa, uyungi alaalekwa. 35 Ikigono ikyo, avamwayuuva vavili valaavedza mu kuhaalula pamwinga, yumwinga alaanyamulwa, uyungi alaalekwa. [ 36 Avaanu vavili valaavedzasa mu kulima ku mugunda, yumwinga alaanyamulwa, uyungi alaalekwa.]”g
37 Avanyigendwa vakumuwuudzaga viitigilaga, “Mutwave, dzeene idzo dzilaalimika kwiya?” Akuvahigaga mu luselengo iitigilaga, “Pe gugenda umufimba, baaho pe giilundanila amambungu.”h