Umusimbi va kitabu iki ye mutume uYohana. Uyu aali ye yumwinga mu vanyigendwa va Yesu vanyikyumi na vavili (12). Aali munyigendwa “ye eendiilwe nu Yesu” (13:23; 21:20). Uyo ye musimbi va haate dzidatu idziitambulwa mu litaawa lyakwe, pamwinga nu Luvilatulo lwa Yesu Kilisiti. UYohana avasimbiye aVayahudi pamwinga na vaanu vonda ngita umwaka gwa makyumi ligondza (90), ukuhuma pe iiholwa uYesu Kilisiti.

Uwugulume wa Yohana waali wa kuwoneesa ukutigila, uYesu ye Muswamuve va Nguluvi, ukuta avaanu vamufuuwage (20:31). Ikitabu iki kiikagulika mu ndongele mufungʼati (7) dza Yesu idziivanga ukutigila, “Uneene yuune” (6:35; 8:12; 10:7, 11; 11:25; 14:6; 15:1). UYohana iivanga pa kumutambudza uYesu ngita Lidzwi, nu kulonga ulwa wugulume uwa malimo ga Yesu mwe naanyi (1:1-18). Asaasimbile imola dzonda idza miikalile gya Yesu, nda haamu, ooleliye ifimanyilo fye aalimile uYesu pamwinga ni mbulanidzo dzaakwe (2:1–12:50). UYesu aawulaniidze hiilo ulwa wunyalumwinga waakwe nu Daadiye ye amutumile pe naanyi. Aawoneesiidze indzanangifu dza pe naanyi, lwe lwene aVayahudi vamukaanile uYesu nu wubeedzi waawo waaginaliye. Kangi Yesu avalagiidze avanyigendwa vaakwe pe yisinaa yifika ifuwa yaakwe nu kuvawulanidza ulwa malimo ga Mubepo uMwimike (13:1–17:26). Uwoolesi waakwe wiimaliidza ni mola dza kuhigwa uYesu nu kutovelelelwa pa kipindulihidzo, na kye aadzulubwike ukuhuma ku wulungu nu kuvahumila avanyigendwa vaakwe nyakoloofu (18:1–21:25).