UYesu akumunaniya umubofu
9
1 Ikigono kimwinga, uYesu pe aahelanidzaga, amuweene umwadaada yumwinga ye aaholiilwe mubofu. 2 Avanyigendwa vaakwe vakumuwuudzaga viitigilaga, “Muwulanidzaave, umuunu uyu aaholiilwe mubofu wiimila wa ndzanangifu dza ani? Dza muunu uyu, enewuli dza vavaha vaakwe?”a 3 UYesu akuvahigaga iitigilaga, “Uyo asaaholiilwe mubofu wiimila wa ndzanangifu dzaakwe, enewuli dza vavaha vaakwe. Nda haamu, aaholiilwe ewo, ukuta amalimo ga Nguluvi gawoneke ku vaanu mu miikalile gyakwe. 4 Twivagila ukulima amalimo ga Nguluvi ye áanumile pe kwave muunyi. Ikilo yiikwadza, sikwali umuunu ye iilima amalimo. 5 Umusika pe ndipila mwe naanyi umu, ndili lumuli ku vaanu vonda.”6 UYesu pe aaviye álongile idzo, iifuunyaga amati pa muganga, iikandaga akadope, akumumyandikaga mu miiho umubofu uyo. 7 Neke amulongelage umubofu uyo atigilage, “Uhelele ukakalave mu liseela lya Silowamu.” Silowamu kwe kutigila, ye átumiilwe. Neke umubofu uyo ahelelage kukalava, apilukage iilola.
8 Neke avafudiingʼano vaakwe na vangi avamuwonaga pa kutala pe iinyilika-nyilika, viiwuudzage vatigilage, “Umuunu uyu siye yula ye akiikaliige iinyilika-nyilika?” 9 Avangi viitigilaga, “Umuunu uyu ye mwene.” Avangi viitigilaga, “Nambi uyu siye mwene, nda haamu, áhwaniine nave.” Umwene akuvalongelaga iitigilaga, “Ye neene.” 10 Neke vamuwuudzage vatigilage, “Ngana ndakyene ye veeve, lino amiiho gaako gádindwike wuli?” 11 Umwene akuvahigaga iitigilaga, “Umuunu ye iitambulwa Yesu, áfuunyile amati pa muganga, iikandaga akadope, akuumyandikaga mu miiho. Neke aandongelage atigilage, ‘Uhelele ukakalave ku liseela lya Silowamu.’ Neke ndihelelage kukalava, ndivangage ukulola.” 12 Avaanu vakumuwuudzaga viitigilaga, “Umuunu uyo ali kwiya?” Umwene akuvahigaga iitigilaga, “Uneene sindiidzeela.”
AVafwalisayo vakumuwuudza ye akali mubofu
13 Avaanu avo vakumusindikaga ku Vafwalisayo umuunu ye akali mubofu pa kutala. 14 Ikigono ikyo kye aakandile akadope uYesu nu kumudindula amiiho umubofu uyo, kyali kigono ikya Sabato. 15 Neke aVafwalisayo navo vamuwuudzage umuunu uyo vatigilage, “Úvangile wuli ukulola?” Akuvahigaga iitigilaga, “Umuunu yumwinga áamyandiike akadope mu miiho, ndiikalavaga, lino ndiilola.” 16 Neke avangi mu Vafwalisayo vatigilage, “Umuunu uyo asiihuma kwa Nguluvi, pakuva asiigendela imilagililwe gya Sabato.” Neke kangi avangi vatigilage, “Iilemwa wuli umunya ndzanangifu ukuhuufya ifimanyilo ngita ifi?” Neke valekeengʼanage veene mwa veene.
17 AVafwalisayo vakumuwuudzaga kangi umuunu uyo viitigilaga, “Uveeve wiitigila kiki ulwa muunu uyo ye ákudinduwe amiiho gaako?” Umwene akuvahigaga iitigilaga, “Uneene ndiiwona umuunu uyo muvidzi.” 18 Neke kangi avalongodzi va Vayahudi vatane ukufuuwa kutigila umuunu uyo ye aaholiilwe mubofu, lino iilola. Apo vakuvakemeelaga avavaha vaakwe. 19 Vakuvawuudzaga viitigilaga, “Uyu ye muswamu-veenyo ye mwitigila aaholiilwe mubofu? Ngana luli ewo, lino ávangile wuli ukulola?” 20 Avavaha vaakwe vakuvahigaga viitigilaga, “Uneefwe twidzeela ukutigila ndakyene uyu ye muswamu-veesu, kangi ukutigila aaholiilwe mubofu. 21 Neke kangi tusiidzeela kye ávangile ukulola, kangi tusimudzeeliye umuunu ye ámudinduwe amiiho gaakwe. Mumuwuudze yumwene, pakuva ali muunu muvina, iilonga yumwene.” 22 Avavaha vaakwe vaalongaga ewo, pakuva vavoogopaga avalongodzi va Vayahudi. Avalongodzi vaali víidiingʼiine ukutigila, umuunu ye avedzaga ye iikwidika ukutigila uYesu ye Mesiya, iidagwa ukuhuma mu luholanilo. 23 Lwe lwene avavaha vaakwe vaalongile ukutigila, “Pakuva ali muunu muvina, mumuwuudze yumwene.”
24 Neke avalongodzi va Vayahudi vamukemeelage ulwa kavili, uyo ye akali mubofu pa kutala, vamulongelage vatigilage, “Uyiige kwa Nguluvi ukutigila wiilonga ndakyene! Uneefwe twidzeela ukutigila umuunu uyo ye ákunaniidze, mulima-ndzanangifu.” 25 Umwene akuvahigaga iitigilaga, “Uneene sindiidzeela ukutigila, umuunu uyo mulima-ndzanangifu. Lwe ndiidzeela lumwinga swe ukutigila, ndikali mubofu, lino ndiilola.” 26 Neke vamuwuudzage vatigilage, “Umuunu uyo ákulimiye kiki? Ákudinduwe wuli amiiho gaako?” 27 Umwene akuvahigaga iitigilaga, “Uneene ndívalongiye imola idzo, neke kangi musipulikiidze. Lino, kye kiki mwisaka ndivalongele kangi? Na yuunye mwisaka ukuvedza vanyigendwa vaakwe?”
28 Neke aveene vamuligage vatigilage, “Uveeve ye mwene umunyigendwa vaakwe! Uneefwe tuli vanyigendwa va Mose. 29 Twidzeela ukutigila uNguluvi aalongile nu Mose, neke kangi ulwa muunu uyo tusiidzeela kwe iihuma.”
30 Umuunu uyo ye aali mubofu akuvahigaga iitigilaga, “Uneene ndiidzuma mbandu! Unyeenye musiidzeela kwe iihuma, neke kangi áandinduwe amiiho gangu! 31 Twidzeela ukutigila, uNguluvi asiipulika indapangilo dza vanya ndzanangifu,b nda haamu, iipulika indapangilo dza muunu ye akumoogopa nu kulima dze iikeela umwene. 32 Ukuhuma pe liigawa ilidugulu, tusinaa tupulikaga ukutigila umuunu ádinduwe amiiho ga muunu ye aaholiilwe mubofu. 33 Ngana umuunu uyo asihumile kwa Nguluvi, apo ngali álemiilwe ukulima kikivedzaga.” 34 Aveene vakumuhigaga viitigilaga, “Uveeve waaholiilwe nu kulelwa mu ndzanangifu. Wiihoodza ukutigila wiivagila ukutuwulanidza!” Neke vamudagilage kwivala ya luholanilo.
Uwubofu wa numbula
35 UYesu pe aapuliike ukutigila, avalongodzi va Vayahudi vámudagile umuunu uyo ye akali mubofu, iihelelaga kumutemula. Pe amuweene, akumuwuudzaga iitigilaga, “Uveeve ukumufuuwa uMuswamuve va Muunu?” 36 Umuunu uyo akumuhigaga iitigilaga, “Mutwave, uMuswamuve va Muunu ye ani? Uundongele, ukuta ndimufuuwe.” 37 UYesu akumuhigaga iitigilaga, “Úmuweene, kangi ye iilonga naave ye mwene.” 38 Umuunu uyo iitigilaga, “Ndiifuuwa Mutwave.” Neke amugondamilage uYesu.
39 Neke uYesu amulongelage atigilage, “Uneene ndaadzile pe naanyi apa ukuhiga, ukuta avabofu valolage, avakwiwona viilola, vavedzage vabofu.” 40 AVafwalisayo avangi avaali pamwinga nave, pe vaapuliike amadzwi ago, vakumuwuudzaga viitigilaga, “Wiihambula uneefwe tuli vabofu?” 41 UYesu akuvahigaga iitigilaga, “Ngana mukali muvedzage vabofu, ngali musili ni ndzanangifu. Neke kangi, pakuva mwitigila mwilola, lino uNguluvi asivapyanila indzanangifu dzeenyo.”