4 UYesu adzidzeeliye dzonda dze vaasakaga ukumulimila. Neke ahelelage kuvawuudza avaanu avo atigilage, “Mukumusakula ani?” 5 Avo vakumuhigaga viitigilaga, “Tukumusakula uYesu umuhuma ku Nasaleti.” UYesu akuvahigaga iitigilaga, “Uneene ye mwene.” UYuda ye aahelelaga kumusutula uYesu, aali íimile pamwinga navo. 6 UYesu pe avalongiye ukutigila, “Uneene ye mwene,” avakolakyanda avo viipilukaga kimbelembele, viiguwaga paanyi. 7 UYesu akuvawuudzaga kangi iitigilaga, “Mukumusakula ani?” Avo vakumuhigaga viitigilaga, “Tukumusakula uYesu umuhuma ku Nasaleti.” 8 UYesu akuvalongelaga iitigilaga, “Ndívalongiye ukutigila, uneene ye mwene. Ngana mukuusakula uneene, apo muvaleke avaanu ava viihelelelage.” 9 UYesu aalongile ewo, ukuta likwile ilidzwi lye aali álongile ukutigila, “Ndisinaa ndiyadza nambe yumwinga mu vonda ve waameeliye.”^a

10 Neke uSimoni Petulo ye aali ni lipanga, alihoonolage, amumyatulage ilisiikidza ilya kundiyo umulimila-vangi va muteekedzi umuvina. Umulimila-vangi uyo aatambulwaga Maliko. 11 UYesu akumulongelaga uPetulo iitigilaga, “Upiluse ilipanga lyako mu wugono waakwe. Ongo, usiidzeela ukutigila, ndili munya kunywela ikinywelo kya mumuko kye áameeliye uDaada?”

12 Neke umukomi va vakolakyanda, pamwinga ni kipuga kyakwe, na vakolokolooni va tembeli, vamwibatage uYesu nu kumupinga. 13 Vakumusindikaga kwa Anasi, ye aali mukwive va Kayafwa. UKayafwa uyo aali muteekedzi umuvina mu mwaka ugo. 14 Kangi uKayafwa uyo ye mwene aali ávalongiye avalongodzi va Vayahudi ukutigila, lwivedza luwumbulilo ngana umuunu yumwinga afuwe wiimila wa vaanu vonda.^b

15 USimoni Petulo nu munyigendwa uyungi, vamuniniilaga uYesu kumbele. Umunyigendwa uyungi uyo, pakuva aadzeelaniike nu muteekedzi umuvina, iingiye nu Yesu mu lipaala lya nyumba ya muteekedzi umuvina. 16 Neke kangi uPetulo iimage piivala, biihi nu mulyango. Umunyigendwa uyo ye aadzeelaniike nu muteekedzi umuvina, iihumaga kwivala. Iilonganaga nu muhindza yumwinga ye aali mukolokolooni pa mulyango, neke amwidikilage uPetulo iingile mu lipaala. 17 Neke umuhindza umukolokolooni uyo, amuwuudzage uPetulo atigilage, “Na yuuve siye yumwinga mu vanyigendwa va muunu uyu?” UPetulo akumuhigaga iitigilaga, “Nambi, siye neene.” 18 Avalimila-vangi na vakolokolooni va tembeli avo, vaali vákodziidze umooto gwa mukala, pakuva kwali ni ngʼaala, vootaga. UPetulo nave aali íimile pamwinga navo, iikoota.

19 Neke umuteekedzi umuvina uAnasi uyo, amuwuudzage uYesu ulwa mola dza vanyigendwa vaakwe nu lwa mbulanidzo dzaakwe. 20 UYesu akumuhigaga iitigilaga, “Umusika gonda ndikiilongaga ku vaanu vonda pa weelu, ndikiiwulanidzaga avaanu mu nyolanilo dzeenyo na mu lipaala lya tembeli, mwe vakiilundanilaga pamwinga aVayahudi vonda. Sindikiilongaga luluvedzaga ku kinyele. 21 Lino, kye kiki ukuumbuudza uneene? Uvawuudzage avo avakiipulikidzaga pe ndikiiwulanidzaga. Avo vádzidzeeliye dze ndikiilongaga nu kuwulanidza.”

22 UYesu pe aalongile idzo, umukolokolooni yumwinga va tembeli ye aali íimile biihi nave, akumudzagulaga ni kivaate, akumuwuudzaga iitigilaga, “Lwivagila ukumuhiga ewo umuteekedzi umuvina?” 23 UYesu akumuhigaga iitigilaga, “Ngana ndílongile wuviifu, apo woolelele uwuviifu wangu. Neke kangi, ngana ndílongile ulwa ndakyene, kye kiki ukuunova?” 24 UYesu pe apila mupinge ndeeni, uAnasi iilagidzaga ukutigila, vamunyamule, vahelele nave kwa Kayafwa, umuteekedzi umuvina.

25 Umusika ugo, uSimoni Petulo aali íimile iikoota umooto. Avaanu wuli vakumuwuudzaga viitigilaga, “Ongo, na yuuve siye yumwinga mu vanyigendwa va muunu uyu?” UPetulo iikaanaga iitigilaga, “Nambi, siye neene.” 26 Neke kangi yumwinga mu valimila-vangi va muteekedzi umuvina, ye aali munyalukolo va muunu yula ye aamyatuliilwe ilisiikidza nu Petulo, amuwuudzage atigilage, “Ongo, siye veeve ye ndikakuweene uli pamwinga nu Yesu mu mugunda?” 27 UPetulo iikaanaga kangi iitigilaga, “Siye neene.” Baaho indzogolo yiivikaga.

28 Neke pamilaawo pe kúkiye, avalongodzi va Vayahudi vamunyamulage uYesu ukuhuma kwa Kayafwa, vahelelage nave ku litengule lya mutemi va Valoma, ilitaawa lyakwe Pilato.^c Neke kangi avalongodzi avo vatanage ukwingila mugati umo, ukuta vatane ukuvedza lupumba,^d nu kulemwa ukuliya ikyakuliya kya kyaka kya Paasaka. 29 Neke umutemi Pilato uyo, ahumage kwivala kwe vaali, avawuudzage atigilage, “Umuunu uyu áhokile nongwa yiki ye mukumutaaha?” 30 Vakumuhigaga viitigilaga, “Ngana umuunu uyu akali avedze angaya nongwa, ngali sitwadzile nave ukwako.” 31 UPilato akuvalongelaga iitigilaga, “Apo mumunyamule yuunye, mukamuhige wugendela wa milagililwe gyenyo.” Neke kangi vamuhigage vatigilage, “Uneefwe tungaya wutawulilwe wa kumuhiga umuunu ye avedzaga ukutigila afuwe.” 32 Idzo dzaahumiye ukuta, amadzwi ge aalongile uYesu ukuwoneesa kye ahadza iifuwa, gakwile.

33 Neke uPilato iingilage kangi mugati mu litengule, alagidzage ukutigila, vamuleete uYesu ukwakwe, amuwuudzage atigilage, “Ongo, uveeve ve Mutwa va Vayahudi?” 34 UYesu akumuhigaga iitigilaga, “Ongo, dze ukuumbuudza dziihuma mu mahoodzo gaako, enewuli avangi vákulongiye imola dzangu?” 35 UPilato akumuhigaga iitigilaga, “Ongo, uneene ndili Muyahudi? Avaanu vaako pamwinga na vateekedzi avakomi, ve veene ávakuleetile ukwangu ukuta ndikuhige. Úlimile kiki?” 36 UYesu akumuhigaga iitigilaga, “Uwutwa wangu si wa mwe naanyi umu. Ngana wukali wuvedzage wa mwe naanyi umu, apo avatovela-ligendwa vangu ngali váanengiye, ukuta nditane ukusutulwa mu mawoko ga Vayahudi. Neke kangi lino, uwutwa wangu si wa mwe naanyi umu.” 37 UPilato akumuwuudzaga iitigilaga, “Ongo, neke lino, uveeve ve mutwa?” UYesu akumuhigaga iitigilaga, “Yuuve ye úlongile ukutigila, uneene ndili mutwa. Wiimila wa ulo, uneene ndaaholiilwe mwe naanyi, kangi ndáadzile, ukuta ndiyoolelele indakyene. Umuunu ye avedzaga ye iininiila indakyene, akugapulikidza amadzwi gangu.” 38 UPilato akumuwuudzaga iitigilaga, “Indakyene kye kiki?”

UPilato aaviye álongile ulo, iihumaga kwivala pamwinga nu Yesu, akuvalongelaga avalongodzi va Vayahudi iitigilaga, “Uneene sindikuyiwona inongwa yiyivedzaga ya kumutaaha umuunu uyu. 39 Neke kangi muli ni mivedzehedze ukutigila, uneene ndivadindulile umudindilwa yumwinga mu musika gwa kyaka kya Paasaka. Lino mwisaka ndivadindulile uMutwa va Vayahudi?” 40 Neke vayooyage vatigilage, “Nambi! Utane ukutudindulila umuunu uyo, nda haamu, utudindulile uBalaba.” UBalaba aadindiilwe mu ndinde wiimila wa kuyigaluka isilikaale.