UPawulo akumunyamula uTimoti
16
1 UPawulo nu Sila viifikaga ku Delibe, pambele viihelelaga ku Lisitila, kwe iikalaga umunyigendwa yumwinga ye aatambulwaga Timoti. Ungʼina aali Muyahudi ye amufuuwaga uYesu, neke kangi udaadiye aali Mugiliki. 2 UTimoti aalongwaga wunofu na vafuuwa vayagwe va ku Lisitila na ku Ikoniyo. 3 UPawulo aasakaga aheleengʼase nu Timoti mu lugendo. AVayahudi vonda va uko, valudzeelaga ukutigila, udaadiye va Timoti aali Mugiliki, neke uPawulo amusingage uTimoti ukuta vamwidike. 4 UPawulo na vayagwe, pe vaahelanidzaga mu wudzenge nu wudzenge, vavalongelaga avafuuwa imilagililwe igyaviikiilwe na vatume na vavaha va lukombeso lwa Yelusalemu, ukutigila vagiinatilage. 5 Ndeeni, avafuuwa va ngʼombeso idzo vaaginaga ukukangala mu lufuuwo, kangi avaanu vaaginaga ukoongelela imbalilo yaawo ikigono ni kigono. UPawulo akufiwona ifiwoneko
6 UMubepo uMwimike avakaaniidze uPawulo na vayagwe ukutigila, kitadalika ilidzwi lya Nguluvi mu nyi ya Asya. Neke vahelanidzage mu nyi ya Filigya ni ya Galatya. 7 Pe vaafikile pa wulekanilo wa nyi ya Misya, vaasakaga ukwingila mu nyi ya Bitiniya, neke kangi uMubepo va Yesu atanage ukuvatawula. 8 Neke vahelanidzage mu nyi ya Misya, viikage ku wudzenge wa wudzabukilo wa Tolowa. 9 Pakilo, uPawulo akukiwonaga ikiwoneko, akumuwonaga umwadaada va ku Makedoniya íimile, akumugongoola iitigila, “Lowoke, waadze ku Makedoniya, ututange.” 10 UPawulo aaviye ákiweene ikiwoneko ikyo, umusika guugo tukwigelanidzagaa ukuhelela ku Makedoniya, pakuva twalufikile ukutigila, uNguluvi átukemeeliye tukavadalikile avaanu avo iMola iNofu.
ULidya akumufuuwa uYesu
11 Neke tuhegage ku Tolowa mu meli, tuhelelage ngʼaani ukufikila ku ligunguli lya Samosilake. Ikigono ikya kavili twifikaga ku wudzenge wa Neyapoli. 12 Apo, tukuyilekaga imeli, twigendaga ukufikila ku Filipi,b uwudzenge uwaali wukomi mu mugoola gwa Makedoniya, we viikalaga aValoma. Tukwikalaga mu wudzenge uwo figono fikeefu.
13 Pa kigono ikya Sabato, twihumaga kwivala ya wudzenge, twihelelaga ku ngʼumbungʼumbu ya mukoga, kwe twahuuvilaga ukupawona apoono pe vaalapangilaga aVayahudi kwa Nguluvi. Tukwikalaga twilongana na vamwayuuva avaalundiine apo. 14 Yumwinga mu avo avatupulikidzaga, aatambulwaga Lidya, umuhuma ku wudzenge wa Tyatila. Uyo aalimaga amalimo ga kugudza imyenda gya mulangalanga. Asaali Muyahudi, neke kangi aaniniilaga ulufuuwo lwa Kiyahudi. UPawulo pe avadalikiye iMola iNofu, uLidya iipulikidzaga wunofu, nu Mutwa Yesu akumudindulaga inumbula yaakwe, iifuuwaga. 15 Nave iidzabikwaga pamwinga na vaanu va nyumba yaakwe, akutulaalikaga tuhelele ukwakwe, iitigilaga, “Ngana múumbwene ndakyene ukutigila, ndímufuuviilwe uMutwa Yesu, apo suwe tuhelele mukiikale mu nyumba yangu.” Akutugongoolaga mbandu ukufikila pe twihelela.
UPawulo nu Sila mu ndinde
16 Ikigono kimwinga, umusika pe twihelela apoono pa kulapangilila, twitaangʼanaga nu muhindza yumwinga mulimila-vangi, ye aali nu mubepo umuviifu ugwamupelaga ingufu dza wulagudzi. Aveene nave vaasavilaga amagoobeli goloofu wugendela wa wulagudzi waakwe. 17 Umuhindza uyo atuniniilaga uneefwe nu Pawulo, kuno iiyova iitigila, “Avaanu ava ve vatovela-ligendwa va Nguluvi uMukomi, vakuvadalikila ingʼaasi ya kupokwa!” 18 Aalimaga ewo ifigono fyoloofu. Neke ikigono kimwinga, uPawulo aviipage mbandu, aseedukage, alilongelage ilibepo iliviifu ilyo atigilage, “Ndikukulagidza mu litaawa lya Yesu Kilisiti, uhume mwa muhindza uyu!” Baaho ilibepo ilyo likumuhumaga.
19 Aveene nave umuhindza uyo, pe vaaweene ukutigila, uluhuuvilo lwawo ulwa kusavila amagoobeli lúyagile, vakuviibataga uPawulo nu Sila. Vakuvalulundaga ukufikila ku ligulilo pawutalo pa vatemi va wudzenge. 20 Vakuvasindikaga pawutalo pa vatemi, vakuvataahaga viitigilaga, “Avaanu ava viihula lyowo likomi mu wudzenge weesu, navo Vayahudi. 21 Viiwulanidza imivedzehedze gyawo, gye tuli mwiko twe Valoma ukugiidika, nambe kugininiila.”
22 Ililugu lya vaanu ilyalundiine liikwimaga, likuvayuutamilaga uPawulo nu Sila. Neke avatemi valagidzage imyenda gya Pawulo nu Sila gideemulwe, kangi vatowe ifiboko. 23 Vaaviye vávatovile hiilo, vakuvadindilaga mu ndinde. Neke avatemi vamulagidzage umukolokolooni ukutigila, avaloleelage wunofu. 24 Vaaviye vámulagiidze ewo, umukolokolooni nave akuviingidzaga mu kiyumba ikya kugati hiilo, akuvapatikaga amagulu gaawo mu libiki likomi.
25 Yaaviye yífikile ikilogati, uPawulo nu Sila vaalapangilaga kwa Nguluvi nu kwimba indzimbo dza kumuginiya, avadindilwa avangi vavapulikidzaga. 26 Kitinuhidza, ikilindima kikomi kya nyi, kiideguulidzaga uwaalo wa ndinde. Baaho indzidzi dzonda dziidindukaga dzeene hela, ni minyololo gyonda gye vavawopiye avadindilwa giiwopokaga. 27 Umukolokolooni va ndinde iilamukaga, iiwonaga indzidzi dzili mwadzi. Iihoonolaga ilipanga lyakwe ukuta iikome, pakuva aahoodziidze ukutigila, avadindilwa vonda viivedza ványilile. 28 Neke kangi uPawulo amukemeelage ni sawuti ngomi atigilage, “Utane ukwikoma! Twivonda tuli muumu.”
29 Umukolokolooni va ndinde iinyilikaga imuli dzileetwe. Iinyililaga mu kiyumba kya ndinde ikyo, akwigwisaga pawutalo pa Pawulo nu Sila, kuno iihilila. 30 Neke avahumyage piivala, avawuudzage atigilage, “Vatwa vangu, ndilime kiki ukuta ndaanukile uwupoki?” 31 Vakumuhigaga viitigilaga, “Umufuuwage uMutwa Yesu, nave ahadza akukupoka pamwinga na vaanu va mu nyumba yaako.” 32-34 Akuvasindikaga uPawulo nu Sila ukwakwe, vakumuwulanidzaga umwene na vonda va mu nyumba yaakwe ilidzwi lya Mutwa Yesu. Iidzabikwaga pamwinga navo vonda, umusika guugo pakilo akuvakalafyaga uPawulo nu Sila ifivamba fyawo nu kuvapeela ifiliyo. Iikeelaga mbandu pamwinga na vonda avaali mu nyumba yaakwe, pakuva vámufuuviilwe uNguluvi.
35 Kwaviye kúkiye, avatemi viitumaga avakolakyanda kwa mukolokolooni va ndinde, vakumulongelaga viitigilaga, “Uvadindulile avaanu avo, viihelelelage.” 36 Umukolokolooni akumulongelaga uPawulo iitigilaga, “Avatemi váandagiidze ukutigila, ndivadindulile. Lino muhume kwivala, muhelelage mútengamiine.”
37 Neke kangi uPawulo avalongelage avakolakyanda atigilage, “Avatemi vakaalagiidze tutowe mbandu pa miiho ga vaanu kitatuhiga, navo vakutudindilaga mu ndinde, nde tuvedze uneefwe tuli vavanda va Loma.c Lino, kye kiki viisaka ukutuhumya kinyele? Nambi! Vaadze vaveene vatuhumye!” 38 Avakolakyanda vakuvagotolelaga idzo avatemi, neke avatemi voogopage pe vaapuliike ukutigila, uPawulo nu Sila vavanda va ku Loma. 39 Neke vaadzage ukuhongedza, vavahumyage mu ndinde, nu kuvagongoola ukutigila, vahege mu wudzenge waawo. 40 UPawulo nu Sila, pe vaaviye váhumile mu ndinde, viihelelaga ku kaaya ya Lidya. Mugati umo, viitaangʼanaga na vafuuwa vayaawo, vakuvakangadzaga inumbula dzaawo, neke vahegage pa Filipi.