Ihaate iyi yaasimbiilwe nu mutume Pawulo ngita umwaka gwa makyumi gahaanu nu mutanda (56), enewuli makyumi gahaanu nu mufungʼati (57), ukuhuma pe iiholwa uYesu Kilisiti (12:1–15:33). Umusika ugo, uPawulo aali asinaa ahelela ku wudzenge wa Loma (1:13; 15:23, 28). Aasakaga ukupiluka ku Yelusalemu, ukuta akasindike ipembe ku vafuuwa. Ukuhuma ku Yelusalemu, aasakaga ukuhelela ku Loma nu kudzumbanidza ukuhelela ku Sipaniya (15:23-25). Avasimbiye avafuuwa va lukombeso lwe vaali Vayahudi na avasili Vayahudi.

Ikiwumbuko kya haate iyi, ye Mola iNofu ya wupoki ku vaanu vonda avakumufuuwa uYesu Kilisiti. UPawulo iikoolela wunofu uwugulume waakwe uwa kudalika iMola iNofu (1:16-17). UPawulo iivanga ukuwulanidza ulwa ligooga lya Nguluvi, ulwa ndzanangifu ni fiveleko fyakwe. Avaanu vonda vali ni ndzanangifu, ngana vali ni milagililwe, enewuli vasili ni milagililwe, kangi kungaya wupoki wugendela wa milagililwe (1:18–3:20), nda haamu, avaanu vonda viikwidikilwa ukuvedza vagolofu wugendela wa kumufuuwa uYesu (3:21-31). Iilonga ikihwananidzo kya Abulahamu, ye ali daada va vonda avakumufuuwa uYesu (4:1-25). UYesu avateepwidze avafuuwa nu Nguluvi, ukuta viime wugendela wa lusungu (5:1-11). Iihwananidza uAdamu ye avaleetiye ifuwa, nu Yesu ye akuvaleetela uwuumi uwa mbeepali (5:12-21). Iihwananidza imiikalile igya wusutu wiimila wa ndzanangifu, ni miikalile igya wuvangwa wiimila wa wulongodzi wa Mubepo uMwimike (6:15–8:39). Iiwoneesa ukutigila, uNguluvi ye muhuuvilwa, asinaa adzumbaga ulufingo lwakwe nu Isilaheli, pakuva umwene ye munya lupyana (9:1–11:36). Akuvalagidza ulwa migendele gyawo, ngita vaanu ávapituwe ukwikala wugendela wa wulongodzi wa Mubepo uMwimike mu wende wa Kilisiti (12:1–15:33). Akuvahungila avanyalukolo vaakwe mu wudzenge wa Loma aviilimasa nave amalimo pa kumutovela iligendwa uKilisiti (16:1-24).