23
1 UPawulo akuvangʼanukilaga amiiho avanya kiwungu avo, akuvalongelaga iitigilaga, “Vanyalukolo vangu, ukufikila ineengʼuli iyi ndiikalaga nu lwikagulo lunofu pa miiho ga Nguluvi.” 2 Umuteekedzi umuvina uAnaniya aaviye ápuliike ulo, akuvalongelaga aviimile biihi nu Pawulo ukutigila, vamupaadise ni ngandza ku mulomo. 3 Neke uPawulo amulongelage atigilage, “UNguluvi ahadza akukutova uveeve, ye uli ngita lukandzi ulubake ingeesi!a Uveeve wíikalile apa kuunyiga ngita wiigendela imilagililwe, neke kangi uveeve wiidzumba imilagililwe pe wiitigila ndipaadiswe!”4 Avaanu aviimile biihi nu Pawulo vakumulongelaga viitigilaga, “Ongo, usiikoogopa ukumuliga umuteekedzi umuvina va Nguluvi?” 5 UPawulo akuvahigaga iitigilaga, “Vanyalukolo vangu, sindikiidzeelaga ukutigila, uyo ye muteekedzi umuvina, pakuva lúsimbiilwe ukutigila, ‘Utane ukumulonga fivi umutemi va vaanu vaako.’b ”
6 UPawulo pe aadzeeliye ukutigila, mu kiwungu ikyo moovali aVasadukayo pamwinga na Vafwalisayo, iinywilidzaga ukulonga iitigilaga, “Vanyalukolo vangu, uneene ndili Mufwalisayo, mwana va Mufwalisayo. Ndiihigwa, pakuva ndiihuuvila ukutigila, ávafuwe valaadzulubuka.” 7 Aaviye ámalile ukulonga ulo, aVafwalisayo na Vasadukayo viivangaga ukwibeedza, ikiwungu kyonda kikwigavasaga pavili. 8 AVasadukayo viitigila, uludzulubuko lwa ávafuwe sikooluli, avanyamwandza sikoovali, nambe mibepo. Neke kangi aVafwalisayo viifuuwa ukutigila, dzonda idzo koodzili.
9 Neke lihumilage lyowo likomi, avangi mu vawulanidzi va milagililwe va kiwungu kya Vafwalisayo, viimage kuno vakwibeedza hiilo viitigila, “Situkuwuwona uwuviifu wuwuvedzaga kwa muunu uyu. Apangi mubepo enewuli munyamwandza álongile nave.” 10 Amabaatu giiginaga mbandu, umuvina va vakolakyanda iikoogopaga ukutigila, uPawulo iisunga ahaatulingʼaswe fipidzafipiidza. Iilagidzaga avakolakyanda vaakwe ukutigila, viingile pagatinagati pa lilugu, ukuta vamuhedze uPawulo nu kumusindika ku lilinga lya vakolakyanda.
11 Ikilo yiiyo, uMutwa Yesu iikwimaga biihi nu Pawulo, akumulongelaga iitigilaga, “Wiikangadze inumbula! Úundzooleliye apa pa Yelusalemu, ndeeni uli munya kuundzoolela na ku Loma.”
Uluyiigo lwa kumukoma uPawulo
12 Kwaviye kúkiye, aVayahudi vamwinga vaakoongʼiine kinyele. Viiyiigaga ukutigila, vasiiliya nambe kunyuwa kikivedzaga, ukufikila pe viivedza vámukomile uPawulo. 13 Avaanu avaayiigile ukululima ulo, vaalutiye makyumi gatayi (40). 14 Neke vahelelage ku vateekedzi avakomi na vavaha va Vayahudi, vavalongelage vatigilage, “Túyiigile ukutigila, tusiiliya nambe kunyuwa kikivedzaga, ukufikila pe twivedza túmukomile uPawulo. 15 Lino unyeenye pamwinga ni kiwungu, mumulongele umuvina va vakolakyanda avaleetele uPawulo. Muvedzage ngita mwisaka ukukomandza wunofu inongwa ye múmutaahiye. Uneefwe tuhadza tukumwalukila mu ngʼaasi, nu kumukoma pe iivedza asinaa afika apa.”
16 Umwipwave va Pawulo akulupulikaga ulukaani lwa kumwalukila. Iihelelaga ku lilinga lya vakolakyanda, akumulongelaga uPawulo. 17 Neke uPawulo amukemeele umukomi yumwinga va vakolakyanda, amulongelage atigilage, “Umusindike umuvinano uyu kwa muvina veenyo, ali nu lukaani lwa kumulongela.” 18 Umukomi uyo akumusindikaga umuvinano uyo kwa mukomi va vakolakyanda, akumulongelaga iitigilaga, “UPawulo umudindilwa uyo, áangʼemeeliye nu kuunyilika ukutigila, ndikuleetele umuvinano uyu, ali nu lukaani lwa kukulongela.” 19 Umuvina va vakolakyanda uyo akumwibataga iliwoko umuvinano uyo, akumusindikaga pa kinyele, akumuwuudzaga iitigilaga, “Uli nu lukaani luki lwe wiisaka uundongele?”
20 Umuvinano uyo akumulongelaga iitigilaga, “AVayahudi víidiingʼiine ukutigila, kilaawo vakunyilike uvasindikile uPawulo pa kiwungu. Vahadza vakukudzanga ukutigila, viisaka vakomandze inongwa ye vámutaahiye. 21 Lino uveeve utane ukuviidikila, pakuva koovali avamwadaada ávalutiye makyumi gatayi, víigelaniidze ukumwalukila uPawulo mu ngʼaasi. Váyiigile ukutigila, vasiliya nambe kunyuwa kikivedzaga, ukufikila pe viivedza vámukomile. Lino víigelaniidze, viiloleela kye wiilamulila.” 22 Neke umuvina va vakolakyanda uyo amulongelage umuvinano uyo atigilage, “Utane ukumulongela muunu ye avedzaga ukutigila, úundongiye ulukaani ulu.” Akumutawulaga ahelelage.
UPawulo iisindikwa kwa mutemi Feliki
23 Neke umuvina va vakolakyanda uyo, avakemeelage avakomi vavili va vakolakyanda, avalongelage atigilage, “Muvagelanidze avakolakyanda magana gavili (200) avahadza viigenda lwa magulu, avangi makyumi mufungʼati (70) avahadza viihelela ni fwalasi, na vangi magana gavili aviinyamula imigoha. Avakolakyanda vonda avo, vahadza viihega pa kivalilo kya wudatu pakilo, ukuhelela ku wudzenge wa Kayisalya.c 24 UPawulo nave, mumupeelage ifwalasi idza kumusindika wunofu kwa mutemi uFeliki.”d
25 Neke umuvina uyo asimbage ihaate iyiitigila,
26 “Feliki ve mutambule mbandu, mutemi va mugoola, uneene yuune Kilawudyo Lusya, ndikukuhungila. 27 AVayahudi vakamwibiite umuunu uyu, vakiisakaga ukumukoma. Pe ndikaadzeeliye ukutigila, umwene Muloma, ndikaaheliye na vakolakyanda vangu kumupoka. 28 Ndikiisakaga ukuyikagula inongwa ye vámutaahile aVayahudi, neke ndimusindike pa miiho ga kiwungu kyawo. 29 Ndiiwonaga átaahiilwe wiimila wa ngʼaani dza milagililwe gyawo. Neke kangi si lukaani lwe iivagila ukudindilwa nambe kukomwa. 30 Pe ndikaaviye ndípuliike imola iyiitigila víigelaniidze ukumukoma, umusika guugo ndiilamulaga ukumuleeta ukwako, kangi ndikavalagiidze avakumutaaha valeete uwutaahe waawo ukwako.”
31 Avakolakyanda avo vamunyamuwe uPawulo ngita kye vaalagiidzwe, vakumusindikaga ikilo yiiyo ku wudzenge wa Andipatili. 32 Ikigono ikya kavili, avakolakyanda avaagendile lwa magulu viipilukaga ku lilinga lyawo, vakuvalekaga avayaawo avaahovile ifwalasi vahelelage nu Pawulo. 33 Pe vaafikile pa Kayisalya, viitawulaga ihaate kwa mutemi va mugoola, vakumutawulaga nayu Pawulo. 34 Umutemi uyo aaviye íimbile ihaate iyo, akuvawuudzaga iitigilaga, “Umuunu uyu iihuma mugoola guki?” Pe vamulongiye ukutigila, uPawulo iihuma ku Kilikya, 35 akumulongelaga iitigilaga, “Inongwa yaako ndihadza ndiipulikidza pe viivedza váfikile avakukutaaha uveeve.” Iilagidzaga ukutigila, vamuloleele uPawulo mu litengule lya Helode.e