Avahaagulwa va Nguluvi
9
1 Lwe ndiisaka ukulonga lwa ndakyene, nayu Yesu Kilisiti iidzeela ulo. Kangi, wiimila wa kulongodzwa nu Mubepo uMwimike, ulwikagulo lwangu lukuumboneesa ukutigila, sindiilonga wudesi. 2 Ndakyene, ndili nu wuhuguvafu nu wuvafi uwusiisila mu numbula yangu 3 wiimila wa Vaisilahelia vayangu. Ngana gikali givedzage gye mikeelelele gyangu, ngali ndíidikiye ukulekelwa indeko nu kubaagulwa nu Kilisiti, ngana ukulima ewo kukali kuhambusage avayangu vamufuuwage uKilisiti. 4 Avo ve veene aVaisilaheli, ve avahaaguwe uNguluvi vavedzage vaana vaakwe, akuvawoneesaga indolo dzaakwe nu kufinga ulufingo navo. Kangi avapeeliye imilagililwe gyakwe ni nyuuvidzo dzaakwe, akuvalongelaga kye lwisakulwa ukwifuunya ukwakwe. 5 AVaisilaheli avo, fye fipelela ukuhuma ku vakuuhu uAbulahamu, uIsaka nu Yakobo.b Nayu Kilisiti aali Muisilahelic mu lwa muvili. Umwene ye mukomi va fyonda, kangi Nguluvi ye iilumbwa mbeepali na mbeepali! Eena.6 Napo kangi, sindiilonga ukutigila, uNguluvi álemiilwe ukukwilidza inyuuvidzo dzaakwe ku Vaisilaheli. Nambi, pakuva si Vaisilaheli vonda avali vahaagulwa va Nguluvi. 7 Kangi si Vaisilaheli vonda aviikwidikilwa ukuvedza vaana va ndakyene va Abulahamud wiimila wa kipelela kyawo. Nda haamu, uNguluvi amuhuuviidze uAbulahamu ukutigila, “Ikipelela kyako kiliidikilwa ukuhuma kwa Isaka.”e 8 Uwooleledzi waakwe uwo kwe kutigila, avahaagulwa va Nguluvi si vaana vonda va Abulahamu avaaholiilwe ulwa muvili, nda haamu, ve vaana avaaholiilwe wiimila wa luhuuvidzo lwa Nguluvi.f 9 Pakuva ulwene uluhuuvidzo lwatigiye, “Ndilaapiluka ku mwaka, umusika ngita ugu, uSala alaavegala umwana mudiimi.”g
10 Kangi si luulo hela, nda haamu, uLebeka nave aavegiye avaana vavili vanya wungungu kwa kuhwesu uIsaka. 11-12 Napo kangi, umusika pe vasinaa vaholwa avanya wungungu avo, kangi pe vasinaa valima kikivedzaga, kivedze kinofu enewuli kiviifu, uNguluvi amulongiye uLebeka ukutigila, “Umuvele alamulimilaga umukwangudzi.”h Ulo lwiwoneesa ukutigila, uNguluvi akumuhaagula umuunu kulingʼaana nu wugulume waakwe, si kulingʼaana na malimo ga muunu uyo. 13 Ngita kye lúsimbiilwe mu Wusimbe uWiimike ukutigila, “UYakobo ndamuhaaguwe, neke kangi uEsawo ndamusuulile.”ij
UNguluvi iilima ngita kye iikeela
14 Lino tutigile kiki? Tutigile uNguluvi si mugolofu? Nambi naludoodo! 15 Pakuva amulongiye uMose ukutigila, “Uneene ndikumupyanila umuunu ye ndíkeeliye ukumupyanila, kangi ndikumusungukila umuunu ye ndíkeeliye ukumusungukila.”k 16 Neke lino, uNguluvi akumuhaagula umuunu wiimila wa lupyana lwakwe, si wiimila wa mikeelelele enewuli uwupifu wa muunu uyo. 17 Pakuva mu Wusimbe uWiimike, uNguluvi amulongiye uFwalawo ukutigila, “Ndakutemiidze uvedzage mutwa, ukuta wugendela waako ndivawoneesage avaanu ingufu dzangu, kangi, ukuta ilitaawa lyangu litagalidzwage mu nyi yonda.”l 18 Neke lino, uNguluvi akumupyanila umuunu ngita kye iikeela ukumupyanila, kangi umuunu uyungi akumuhambusa ukuvedza munya mabula ngita kye iikeela uNguluvi yumwene.
19 Apangi wiitigila, “Ngana luli ewo, kye kiki uNguluvi akutugomehedza? Ye ani ye iisunga atanidze imikeelelele gya Nguluvi?” 20 Neke kangi ve muunuave, uveeve uli ani uva kwibeedza nu Nguluvi? Ikiviya íkiwumbiilwe kiisunga kimuwuudze umuwufi kitigile, “Kye kiki waambumbile endee?”m 21 Umuwufi va fiviya iiwumba ifiviya fivili ukuhuma mu lidope limwinga. Ikiviya kimwinga kivedzage kya malimo ga luginiyo, ni kingi kya malimo agangaya luginiyo. Ndakyene wiidzeela ukutigila, umuwufi uyo ali nu wutawulilwe wa kulimila ilidope ilyo ngita kye iikeela.
22 Ndeeni kye lugenda nayu Nguluvi. Umwene aakeeliye ukuvawoneesa iligooga ni ngufu dzaakwe, neke kangi iigugumiidze ulwa vaanu avamuviifiidze, avaanu avaavagiye ukutipulwa. 23 Aalimile ewo, ukuta awoneese indolo dzaakwe ku vaanu ve aasakaga ukuvapyanila, avaanu ve avagelaniidze ukuhuma pa wutalilo, ukuta vaanukilage indolo dzaakwe. 24 Avaanu avo ye neefwe ye atukemeeliye uNguluvi, si kuhuma mu Vayahudi veene, nda haamu, nu kuhuma mu avasili Vayahudi. 25 Ulu lwe lwene lwe iilonga uNguluvi mu haate ya muvidzi uHoseya ukutigila,
“Avaanu avasili vangu,
ndilavakemeela, ‘Vaanu vangu.’
Avaanu ve sindikuveenda,
ndilavakemeela, ‘Vende vangu.’ ”n
26 Kangi,
“Apo pe vaakemeelwaga ukutigila, ‘Unyeenye si vaanu vangu,’
apo valaakemeelwaga ukutigila, ‘Vaana va Nguluvi ye ali muumi.’ ”o
27 Umuvidzi Isaya nave iilonga ulwa Vaisilaheli ukutigila,
“Nde luvedze aVaisilaheli vali voloofu ngita muganga gwa mwani ya nyandza,
napo kangi vakeefu hela aviisigala valaapokwa.
28 Pakuva uMutwa Nguluvi alavatipulila ngʼaani avaanu mwe naanyi, kitahwelelela.”p
29 Kangi ngita kye aalongile kataali umuvidzi Isaya ukutigila,
“Ngana akali avedzage si Mutwa uMunya Ngufu Dzonda, ukusigalidza ikipelela kyesu,
ngali túsilile ngita avaanu va wudzenge wa Sodoma nu wa Gomola.”q
Uwukitafuuwa wa Vaisilaheli
30 Wiimila wa idzo, tulonge kiki? Kwe kutigila, avaanu avasili Vaisilaheli vasaapifukilaga ulwa kuvedza vagolofu, neke kangi uNguluvi aviidikilage ukuvedza vagolofu pa kumufuuwa uKilisiti. 31 AVaisilaheli vaapifukilaga ukuniniila imilagililwe, ukuta viidikilwe ukuvedza vagolofu, napo kangi vasiidikiilwe. 32 Kye kiki vasiidikiilwe? Vasiidikiilwe pakuva vaahuuvilaga amalimo gaawo, vasamuhuuvilaga uNguluvi. Apo vakwikuvadzaga mu liganga ilya kukuvadza.r 33 Ngita kye aalongile uNguluvi mu Wusimbe uWiimike, pe aatigiye,
“Mulolage, ku wudzenge wa Sayunis uko, ndiiviika iliganga iliikuvadza.
Ili lye liganga lye viikuvala avaanu,
lwe lutalaawe ulwihula avaanu vaguwage.
Umuunu ye avedzaga ye akumufuuwa uyo ye ali liganga ilyo,
asilaayeyewuka nambe kigono kimwinga!”t