Ihaate iyi yaasimbiilwe nu mutume uPawulo, ku lukombeso lwa vafuuwa va ku Kolindo. UPawulo iikalile ku wudzenge wa Kolindo musika mutaali, mu musika ugo, gwe gwene gwe aasimiike ulukombeso ulo (Malimo ga Vatume 18:1-8, 18). Aasimbile ihaate iyi umusika pe aali ku Efeso, ngita umwaka gwa makyumi gahaanu ni gitayi (54), ukuhuma pe iiholwa uYesu Kilisiti.

Uwudzenge wa Kolindo waali wa wutwa wa Valoma mu mugoola gwa Akaya, kangi mu nyi ya Wugiliki mu ngʼumbungʼumbu ya nyandza ya Mediteleniya. Avagula-wugudzi voloofu ukuhuma imbali dzonda dza nyi, vaahelanidzaga mu wudzenge uwo wiimila wa wugula-wugudzi uwa kugula nu kugudza mu magulilo. Kangi kwali ni tembeli ndzoloofu idza kwifuunyila ifihwananguluvi.

AVakolindo vaabeedzanaga nu kubaagulingʼana mu lukombeso. Kangi vaali vámusimbiye uPawulo ihaate iya kumuwuudza imbuudzo wuli, ngana lunofu ukutoola (7:1-40), enewuli ukuliya inyama íyiteekeliilwe wiimila wa lwifuunyo ulwa fihwananguluvi (8:1-13), imigendzehedze gya lwifuunyo mu lukombeso (11:2-16) ni fipeelwa fya Mubepo uMwimike (12:1-31; 14:1-25). Uwugulume wa Pawulo waali wa kuhiga imbuudzo idzo nu kuvawoneesa imigendele wuli igisikuludzenga ulukombeso. Ulusimiilidzo lwakwe iisaka viidiingʼanage (1:10; 11:18) nu kwidzenga mu lufuuwo (14:3-5, 12, 26), napo kangi vaahoodzaga ulwikagulo lwa vaanu avangi (10:31-33). Uluutu lwa mbulanidzo dzaakwe, lwímiye pa ludzulubuko lwa Kilisiti ku vafuuwa vonda (6:14; 15:1-57). Iiwulanidza ulwa lukombeso ukutigila, avafuuwa ye tembeli ya Nguluvi (3:16-17; 6:19). Akuvahwananidza avafuuwa va lukombeso nu muvili gwa Kilisiti (10:17; 11:29; 12:12-26), nu kuvawulanidza ukutigila, uwende wuvedzage lwe luutu lwa malimo gaawo gonda (13:1-13).