Ulusungu lwa Nguluvi ku Vaisilaheli
11
1 Lino ndiiwuudza ukutigila, uNguluvi ávalekile avaanu vaakwe? Nambi naludoodo! Uneene yuune ndili Muisilaheli, ukuhuma mu kipelela kya Abulahamu ni kipelela kya Benyamini.a 2 UNguluvi asavalekile avaanu vaakwe ve avahaaguwe ukuhuma kataali. Mwidzeela ndakyene uWusimbe uWiimike ngita kye wiilonga ulwa Eliya, kye avataahile aVaisilaheli pa miiho ga Nguluvi. 3 Iitigilaga, “Mutwave, avaanu ava vavakomile avavidzi vaako, nu kwananga ikiteekelelo kyako. Lino ndísigiye ndimwene, napo kangi viisaka ukuungʼoma na yuune!”b 4 UNguluvi amuhigile kiki? Aatigiye, “Ndíisigiidze avaanu mbilima mufungʼati (7,000) avasikwifuunya kwa Baali.”c5 Luli ewo na liilino ukutigila, poovali aVaisilaheli vakeefu aviisigalila ve ávahaaguwe uNguluvi wiimila wa lusungu lwakwe. 6 Neke kangi, ngana váhaaguliilwe wiimila wa lusungu lwa Nguluvi, vasiipokwa wiimila wa malimo ge válimile. Ngana vakali vahaagulwe wiimila wa malimo ge válimile, apo ulusungu ulo ngali si lusungu kangi. 7 Lino tutigile kiki? AVaisilaheli vaatemuliye mu wusuukwa ukuvedza vagolofu, viilemwaga, neke kangi avaahaaguliilwe nu Nguluvi avo, ve veene áviidikiilwe ukuvedza vagolofu. UNguluvi akuvahambusaga avangi vavedzage ni numbula ngʼiliitafu, 8 ngita uWusimbe uWiimike kye wiitigila,
“UNguluvi avahambwise vavedzage ngita vaanu ávahoyamiidzwe ni tulo,
ávadindile amiiho, ukuta vatanage ukulola,
kangi ávadibiidze amasiikidza, ukuta vatanage ukupulika,
ndeeni kye vagenda ukufikila ineengʼuli.”d
9 Umutwa Dawudi nave aatigiye,
“Umusika pe viikeelanila ingʼeelanilo dzaawo,
uNguluvi adzipitulage dzivedzage kyambi,
nu mutego gwa kugwilidza nu kuvapedza.
10 Amiiho gaawo gatilivalage,
ukuta valemwage ukulola,
ni migongo gyawo giduudzamage,
mu mumuko dza mbeepali.”e
Ulufuunyo ku avasili Vaisilaheli
11 Lino ndiiwuudza kangi ukutigila, ongo, aVaisilaheli pe viikuviidze, vaaguwe nu kutipuka mbandu? Nambi naludoodo! Nda haamu, wiimila wa kumukaana uNguluvi, uwupoki wavaadziye na avasili Vaisilaheli, ukuta aVaisilaheli vavawonelage giila avasili Vaisilaheli. 12 Lino avaanu va nyi dzonda viikwanukila uwoloofu wa fuunyo, pakuva aVaisilaheli vamukaanile uNguluvi, kangi avasili Vaisilaheli viikwanukila uwoloofu wa fuunyo wiimila wa kuguwa kwa Vaisilaheli. Neke lino, aVaisilaheli pe viipituka nu kumufuuwa uNguluvi, avaanu vonda valaanukila ifuunyo ndzoloofu kulutila!
13 Lino ndiilonga naanye ye musili Vaisilaheli. Uneene ndili mutume ukwenyo, kangi ndikuwuginiya uwulimila-vangi we áameeliye uNguluvi. Neke kangi wugendela wa wulimila-vangi uwo, 14 ndiihuuvila ukutigila, apangi ndihadza ndikuvahulila aVaisilaheli vayangu vawonage giila wiimila wa lufuunyo lwenyo, ukuta avangi umwawo vapokwe. 15 UNguluvi pe avakaanile aVaisilaheli vayangu, avateepwidze naanye ye musili Vaisilaheli. Ngana luli ewo, uNguluvi pe alaviidikila aVaisilaheli kangi, lulaavedza ngita ávadzulubwise ukuhuma ku wulungu! 16 Ngana umuunu akumutawulila uNguluvi ulwamulo lwa mukaate gwakwe ukuvedza wusembe, apo imikaate gyakwe gyonda giivedza miimike.f Kangi, ngana imidela gya mibiki giivedza miimike, apo naga mahandzo gaakwe giivedza miimike.
17 Unyeenye ye musili Vaisilaheli, muli ngita mahandzo ga museyituni gwa mudaasi. AVaisilaheli vali ngita mahandzo agangi ga museyituni úguyaaliilwe. Amahandzo ago gádumuliilwe, na mahandzo agangi ga museyituni gwa mudaasi gánungiilwe. Lino unyeenye mwihanga mu kyakuliya kya midela gya museyituni úguyaaliilwe. 18 Wiimila wa idzo, mutanage ukubeda amahandzo ágadumuliilwe. Mwiwukage ukutigila, imidela gisikwisipila ukwenyo, nda haamu, unyeenye mukwisipila mu midela. 19 Apangi muhadza mwitigila, “Amahandzo ago gaadumuliilwe, ukuta uneene ndinungwe.” 20 Ndakyene ago gaadumuliilwe wiimila wa wukitafuuwa, neke kangi uveeve uli ngita kye ugenda wiimila wa lufuuwo lwako. Lino ulaaleka wiinunumule, nda haamu, wiiyangalilage. 21 Ndiilonga ulo, pakuva ngana uNguluvi avapedziidze aVaisilaheli avaali mahandzo ga mubiki úguyaaliilwe, iisunga alime ewo nu kwako.
22 Mulolage, uNguluvi kye ali munofu kangi musali! Umwene ali musali ku avo avamukaanile, neke kangi ukwako munofu, ngana wiigina ukuwuhuuvila uwunofu waakwe. Ngana uleke ukufuuwa, na yuuve ulaadumulwa. 23 AVaisilaheli avo navo, ngana vapilukile ukumufuuwa uNguluvi, viinungwa kangi mu museyituni úguyaaliilwe, pakuva uNguluvi akuvanunga kangi. 24 Uveeve ye usili Muisilaheli, uli ngita lihandzo lya museyituni ugwa mudaasi. Waadumuliilwe nu kunungwa mu museyituni úguyaaliilwe, ikyo kye kiinu kigendzi ukulimika. Uludzeelage ukutigila, kwa Nguluvi si malimo matalamu ukumununga kangi uMuisilaheli mu museyituni gwakwe ugo.
UNguluvi ali nu lusungu ku vaanu vonda
25 Vafuuwa vayangu, ndiisaka mukidzeelage ikinyele kya wugulume wa Nguluvi, ukuta mutanage ukwiwona muli vanya luhalawukagudzi. UNguluvi avahambwise aVaisilaheli avangi vavedzage ni numbula ngʼiliitafu, ukufikila pe wulaakwila uwoloofu wa avasili Vayahudi ávamufuuviilwe uNguluvi. 26 Wugendela wa ulo, aVaisilaheli vonda valaapokwa, ngita kye aalongile uNguluvi mu Wusimbe uWiimike, ukutigila,
“UMupoki alaahumila ku wudzenge wa Sayuni,
alaahambusa ikipelela kya Yakobo kitane ukumukaana uNguluvi.
27 Ulu lwe lufingo lwangu navo ululaakwilidzwa,
umusika pe ndilavapyanila indzanangifu dzaawo.”g
28 AVaisilaheli vali vatavangwa va Nguluvi, pakuva vaakaanile iMola iNofu ya Yesu. Ulo lúhulile iMola iNofu yaadze ukwenyo ye musili Vaisilaheli. Neke kangi uNguluvi apila akuveenda aVaisilaheli avo, pakuva avahaaguwe avakuhwawo nu kufinga ulufingo navo. 29 Wiimila wa ulo, avaanu ve ávawonuwe nu kuvahaagula uNguluvi, asiigayawuka ukwawo. 30 Pakataali unyeenye musamwidikaga uNguluvi, neke kangi lino mwikwanukila ulupyana lwa Nguluvi, pakuva aVaisilaheli vasamwidiike umwene. 31 AVaisilaheli navo ndeeni, lino vasikumwidika uNguluvi, ukuta ngita uNguluvi kye akuvapyanila unyeenye, ndeeni kye alavapyanila navo. 32 Pakuva uNguluvi avaviikile avaanu vonda vavedzage vadindilwa ulwa kitamwidika, ukuta avapyanile vonda.
UNguluvi alumbwage
33 Lolage uwoloofu wa wumosi nu luhalawukagudzi lwa Nguluvi,
nu wuwuya waakwe fingaya kigelelo!
Sikwali umuunu ye iidzeela uluhigo lwakwe,
kangi ukuniniila ingʼaasi idza wulimi waakwe idzisili woolelelo!
34 “Ye ani ye iidzeela amahoodzo ga Mutwa Nguluvi?
Enewuli ye ani umutangilidzi vaakwe va mahoodzo?”h
35 “Ye ani ye amupeeliye uNguluvi ikiinu,
kye iivagila uNguluvi ukumugomohedza umuunu uyo?”i
36 UNguluvi ye mwene ye aagavile ifiinu fyonda.
Ukugendela mwa mwene, ifiinu fyonda fiigina ukuvedza poofili,
kangi ifiinu fyonda poofili wiimila wa ndolo dzaakwe.
UNguluvi apeelwage indolo mbeepali na mbeepali! Eena.