3 Lino avaanu avakuunyiga ukutigila, sindili mutume, ndikwikengela pa kulonga idzi. 4 Ongo, uneefwe tusivagiye ukupeelwa ifyakuliya ni finyuwo wiimila wa malimo ga wutume aga? 5 Ongo, uneefwe nayula asivagiye ukutoola umudala ye iifuuwa nu kuheleengʼasa mu lugendo, ngita kye iilima uKefwa^a na vatume vayagwe avangi, pamwinga na vanungʼuve va Mutwa Yesu? 6 Ongo, enewuli ye neene nu Balanaba twiveene ye tusiivagila ukupeelwa ifya kuponela, kangi twisakulwa ukulima amalimo agangi wiimila wa idzo? 7 Ye mukolakyanda yuki, ye iilima amalimo ga wukolakyanda, ye akwihomba mwene? Ye mulimi yuki, ye iikoogeka imisabibu, neke isabibu pe dzítungʼwine atane ukuliya? Kangi ye mudiimi yuki, ye iidiima indiimwa, neke atane ukunyuwa ilidziva lya ndiimwa dzaakwe?

8 Ongo, ndiilonga amadzwi ago ukuhuma mu mahoodzo ga vaanu hela? Ongo, imilagililwe gya Mose^b sigiilonga dziidzo? 9 Mu milagililwe gya Mose lúsimbiilwe ukutigila, “Utanage ukuyiwopa umulomo isenga pe yiisegeya ingana pa lusegeyelo.”^c Ongo, mu madzwi ago uNguluvi iihoodza ulwa senga hela? 10 UNguluvi asiilonga idzo wiimila weesu? Ndeeni kye lugenda! UWusimbe uwo waasimbiilwe wiimila weesu, kwe kutigila, ye iilima umugunda, na ye iibena mu mugunda ugo, vonda avo viihuuvila ukwanukila ulubali lwa mbene. 11 Lino uneefwe túdaliike iMola iNofu ukwenyo, ngita muunu ye iivyala imbeyu. Ongo, lwivedza lutalamu ukwesu ukupeelwa ifiinu fya kuponela ukuhuma ukwenyo, ngita umuunu ye iibena? 12 Ngana avangi viivagila ukupeelwa ifiinu ifyo ukuhuma ukwenyo, uneefwe tusiivagila ukulutila?

Neke kangi sitwadzigiye idzo dze twivagila. Nda haamu, twigugumiidze mu dzonda, ukuta tutane ukutanidza amalimo ga kudalika iMola iNofu ya Kilisiti. 13 Ongo, musiidzeela ukutigila, aviilima amalimo mu tembeli, viiliya ikyakuliya kyawo ukuhuma mu wusembe úwuteekeliilwe mu tembeli iyo? Ongo, musiidzeela ukutigila, navo aviilima amalimo ga kuteekela uwusembe pa kiteekelelo, viikwanukila ulubali lwa wusembe?^d 14 Ndeeni, nayu Mutwa Yesu aalagiidze ukutigila, aviidalika iMola iNofu, vaanukilage ifiinu fya kuponela ukuhuma mu malimo ga kudalika.^e

15 Neke kangi uneene, ndisinaa ndidzigilaga nambe kimwinga mu fiinu ifyo fye ndiivagila ukupeelwa, kangi sindiisimba idzo ukuta mulime ewo ukwangu. Kiba ndifuwe, sindawuli umuunu ye avedzaga aananidze ukuwona lutogo wiimila wa kudalika iMola iNofu kingaya luhombo! 16 Neke kangi sindiiwona lutogo pe ndiidalika iMola iNofu, pakuva uNguluvi yumwene áandagiidze, ukutigila ndidalikage.^f Lukali ukwangu ngana sindiidalika iMola iNofu iyo! 17 Ngana ndikali ndidalikage wiimila wa mikeelelele gyangu, ndikali ndiihuuvilaga uluhombo. Neke kangi si ewo, pakuva uNguluvi áambiikile mu malimo aga mu mikeelelele gyakwe, ukuta ndilimage. 18 Lino uluhombo lwangu kye kiki? Uluhombo lwangu kwe kudalika iMola iNofu kingaya kuhombwa, kingaya kudzigila fye ndiivagila ukupeelwa wiimila wa kudalika Imola iyi.

19 Uneene sindili musutu va muunu ye avedzaga, ndili mwawule. Neke kangi wiimila wa kuvatanga avaanu voloofu vamufuuwage uKilisiti, ndíitawuwe ukuvedza musutu va vaanu vonda. 20 Ku Vayahudi, ndaali ngita Muyahudi, ukuta ndivatange vamufuuwage uKilisiti. Ku avo avali mu wutemi wa milagililwe gya Mose, ndiiviikile paanyi pa milagililwe igyo. Sindiilonga ukutigila, ndili mu wutemi wa milagililwe igyo, nda haamu, ndaalimile ewo, ukuta ndivatangage avo avali paanyi pa milagililwe igyo, vamufuuwage uKilisiti. 21 Ku avasiininiila imilagililwe igyo, ndaali ngita ye asiininiila imilagililwe, ukuta ndivatange vamufuuwage uKilisiti. Sindiilonga ukutigila, sindiininiila imilagililwe gya Nguluvi, nda haamu, ndikugininiila mu wutemi wa Kilisiti. 22 Ku vanya wulemwa, ndaali munya wulemwa, ukuta ndivatange vamufuuwage uKilisiti. Ndiiviikile mu miikalile gyawo, ukuta mu luluvedzaga lula ndivapoke avangi umwawo. 23 Ndiilima dzonda idzo, ukuta ndihange na vangi mu lufuunyo lwa Mola iNofu.

24 Ongo, musiidzeela ukutigila, avaanu aviinyila mu ngwila iya lunyilo ve voloofu, neke kangi ye iikwanukila ingeela yumwinga swe? Lino munyilage ndeeni, ukuta na yuunye mukaanukile ingeela. 25 Avo avali mu ngwila ya lunyilo, viitala tandi ukwidzooveledza mu wupifu imivili gyawo. Viilima idzo ukuta vaanukile ingeela ya musika mudebe hela. Nda haamu, uneefwe twilima ewo, ukuta twanukile ingeela ya mbeepali na mbeepali. 26 Lwe lwene sindiinyila kyaka, kangi sindiitovana ngita umuunu ye iitoodza ifundzi nu ludali pa lubali. 27 Nda haamu, ndiipumusa nu kugudzooveledza umuvili gwangu ukwiwopa ukuta, pe ndiivedza ndívadalikiye avaanu iMola iNofu, uneene ndaali nditane ukukaanwa pa miiho ga Nguluvi ukwanukila ingeela.