Ihaate iyi ye ya kavili iyaasimbiilwe nu mutume Pawulo, ku lukombeso lwa vafuuwa va ku Kolindo. Aasimbile ngita umwaka gwa makyumi gahaanu ni gihaanu (55) ukufikila umwaka makyumi gahaanu ni gili mutanda (56), ukuhuma pe iiholwa uYesu Kilisiti, pe aali ku Makedoniya (2:13). Avakoola wuli viitigila, uPawulo aasimbile ihaate iyingi iyinya madzwi masali ku lukombeso ulo (2:3-4), neke kangi ihaate iyo yisiiwoneka.

UPawulo iigelaniidze ukuvagendela pe iihelela ku mugoola gwa Yudeya, ukuta avasindikile avafuuwa va ku Yelusalemu ipembe iya kuvatanga. Iilonga ikyamuhuliye ukukowongʼasa uwugelanihidze uwa kuvalingula, nu lukeelo lwakwe wiimila wa mola dzaawo dze amuleetiye umuyagwe uTito (1:1–7:16). Pe peene uPawulo pe amulagiidze uTito ukumutanga mu malimo ga kukwilidza ipembe dza Vakolindo ku vafuuwa ukuhuma ku Yudeya (8:1–9:15). Neke kangi uTito aaleetile mu lukombeso imola dza vaanu avaalongile wuviifu ulwa wutovela-ligendwa waakwe (10:10). Kangi vaali poovali avaanu wuli, ve avakemeelaga uPawulo ukutigila, “Vatume va wudesi” (11:13), avaawuudziidze imbuudzo ulwa ndakyene iya wutume waakwe (3:1). Kangi vaalongile ukutigila, uPawulo iiwoneka mulemwa mu wutovela-ligendwa waakwe nu wa wimiilidzi waakwe wa pembe. Napo kangi, uPawulo akwiginiya mu ngufu dza Nguluvi, idziilima amalimo ga kukwilidza uwulemwa waakwe. Ulo lwe luutu mu mbulanidzo dzaakwe mu haate iyi (11:16–12:10).

Uwugulume wa Pawulo waali wa kuvoolela avaanu, ukuta vawuwone uwutovela-ligendwa waakwe ukutigila, wa ndakyene, ukukengela uwutawulilwe waakwe ngita mutume, ukuvawulanidza ulwa numbula ya wutawudzi, nu kwiginiya mu ngufu dza Nguluvi idziikwilidza uwulemwa waakwe.