7
1 Lino nye vende veesu, pakuva uNguluvi átupeeliye inyuuvidzo idzo, twivaladzage mu dzonda idziilamya imivili ni mibepo gyesu. Tuvedzage viimike wugendela wa kumoogopa uNguluvi.Ulukeelo lwa Pawulo
2 Mutwanukile mu numbula dzeenyo. Sikwali ye túmwanguwe nambe ye túmubuganiidze, enewuli ye túmudzangile. 3 Sindiilonga amadzwi ago, ukuta ndivahige. Ngita kye ndílongile pa kutala, unyeenye muli mugati mu numbula dzeesu, nde tufwilase naanye, enewuli twikalase naanye. 4 Ndiilonga naanye mu wukangafu hiilo, kangi ndiiwona lutogo hiilo wiimila weenyo. Ndínyaamiidzwe hiilo inumbula, nde luvedze twipumuka mu ndzoloofu, múunyambwise ndikeele si kukeela.
5 Umusika pe twafikile ku Makedoniya, sitwapolile. Twapumwiswe imbali dzonda, kwivala kwali na mabaatu, mu numbula dzeesu mwali nu woogofi. 6 Neke kangi uNguluvi ye akuvanyaamadza ávalengewiike, atunyaamiidze pa kwadza kwakwe uTito. 7 Si wugendela wa kwadza uTito hela, nda haamu, na kye mwamunyaamiidze umwene. Atulongiye kye mwasuukiilwe ukuumbona uneene, kangi kye mwihuguvala nu kufulupala wiimila wa neene. Idzo dzíingʼeeliidze mbandu.
8 Nde luvedze ihaate ye ndavasimbiye yavahuguviike, silukuumbava. Nde luvedze pa kutala lwambavile padebe, ndiidzeela ukutigila, yavahuguviike musika mudebe hela. 9 Lino ndili nu lukeelo, si pakuva mwahuguviikwe, nda haamu, pakuva uwuhuguvafu uwo wavahuliye mupele indzanangifu dzeenyo. Mwahuguviikwe ndeviye uNguluvi kye aakeeliye, mu ulo uneefwe sitwavalemiidze luluvedzaga. 10 Uwuhuguvafu uwukumukeeledza uNguluvi, we wuhuguvafu wa muunu uwukumuhulila ukupela, apo wukumuleetela uwupoki kingaya wuvafi wa numbula. Neke kangi uwuhuguvafu uwiikwadza wiimila wa madzwi ga pe naanyi, wiileeta ifuwa. 11 Lolage, uwuhuguvafu uwiikwadza wiimila wa mikeelelele gya Nguluvi, wúvaleetiye uluwumbulilo lukomi. Wúvahambwise ukuvedza nu wusuukwa wukomi wa kulima idziivagila, kwikengela ukutigila, dze mwilima dza ndakyene, kuwuviipila uwuhosi, kumuginiya uNguluvi, ukuvedza nu wusuukwa wa kuumbona, nu kutigila, ye áhokile aanukile uluhombo lwakwe. Mu dzonda idzo, mwiwoneesa ukutigila, mungaya nongwa mu lukaani ulu.
12 Lino, nde luvedze ndavasimbiye ihaate iyo, sindaasimbile wiimila wa muunu ye áhokile, enewuli ye áhokiilwe. Nda haamu, ndaasimbile ukuta mudzeelage yuunye pa miiho ga Nguluvi, ngita kye mwipifukila ukwitawulila ngʼaani wiimila weesu. 13 Wiimila wa idzo, túnyaamiidzwe. Kulutila idzo, twipuliike ulukeelo lukomi pe twaluweene ulukeelo lwa Tito, pakuva unyeenye nyivonda mwamunyaamiidze inumbula yaakwe. 14 Uneene ndavadzumiye unyeenye pa miiho ga Tito, na yuunye musaanyuliye nyoni. Dzonda dze twavalongelaga dzaali dza ndakyene. Luli ndeeni na kye twavadzumiye unyeenye pa miiho ga Tito, nadzo dzaawoniike ukutigila, dza ndakyene. 15 Kangi uwende wa Tito ukwenyo wiigina ukoongelela hiilo, pe iikwiwuka uwiidisi weenyo nyivonda uwa kumwanukila mu kyoga nu kuhilila. 16 Ndíkeeliye hiilo, pakuva lino ndikuvahuuvila mbandu.