Ihaate iyi yaasimbiilwe nu mutume uPawulo. Lwiwoneka ukutigila, uPawulo aasimbile ihaate iyi ngita umwaka gwa makyumi gatayi ni ginyigondza (49), ukuhuma pe iiholwa uYesu Kilisiti, umusika pe iikalaga ku lukombeso lwa Andyokya. Umusika ugo, aaheliye ku wudzenge wa Lisitila nu wa Delibe wiimila wa kudalika iMola iNofu. Indzenge idzo dzaali mugati mu mugoola gwa Galatya. Ifigono ifi, inyi ya Galatya yiitambulwa Wutuluki.

Umusika ugo, vaali poovali aVayahudi na avasili Vayahudi voloofu avaafuuviilwe iMola iNofu, neke kangi kwali na Vayahudi wuli avaasimiilidzaga avafuuwa viinatilage imigendzehedze gyawo gya kusingwa ngita kye vaalimile avakuhwawo. AVayahudi avo vaawulanidzaga ukutigila, lwisakulwa ukwinatila imilagililwe gya Mose, ukuta viidikilwe ukuvedza vagolofu. Uwugulume wa Pawulo wa kusimba ihaate iyi, waali wa kubeedza imbulanidzo dza wudesi idzo.

AVayahudi avo vawudaataniye uwutawulilwe wa Pawulo ukuvedza mutume, lwe lwene iivanga pa kuwukengela uwutume waakwe (1:11–2:14). Kangi iiwulanidza ulwa kwidikilwa ukuvedza mugolofu wugendela wa lufuuwo mwa Yesu Kilisiti, nu wuvangwa ukuhuma mu wusutu wa kwinatila imilagililwe gya Mose. Iikwimila ikihwananidzo kya miikalile gya Abulahamu nu lufuuwo lwakwe, ngita uNguluvi kye amwidikiye ukuvedza mugolofu (2:15–4:31). Uluutu lwa mbulanidzo dzaakwe kye kipindulihidzo kya Kilisiti. Iigina ukuvawulanidza avafuuwa ukutigila, valongodzwage nu Mubepo uMwimike, ndeeni vatanage ukwisiikila kangi uwudobofu wa wumuunu uwa ndzanangifu. Pa wusililo, vawoneesage uwende wa Kilisiti pa kwitanga (5:1–6:18).