Uwugolofu wugendela wa lufuuwo
3
1 Unyeenye Vagalatya, ndakyene muli vapuva! Ye ani ye ávahaviye? Ndavadalikiye kitafiha pawutalo apeenyo ulwa kutovelelelwa uYesu Kilisiti pa kipindulihidzo. 2 Lwe ndiisaka ukudzeela ukuhuma kwenyo lwe ulu. Ongo, mwanukiye uMubepo uMwimike pakuva mwinatiye imilagililwe gya Mose? Ongo, enewuli mwanukiye uMubepo uMwimike, pakuva mwafuuviilwe iMola iNofu ye mwapuliike? 3 Unyeenye muli vapuva wuli? Mwavangile imiikalile gya Wukilisiti mu ngufu dza Mubepo uMwimike. Kye kiki lino mwisaka ukumala mu ngufu dza muvili? 4 Ongo, mwagendiye imumuko ndzoloofu idzo mu ngufu ya Mubepo uMwimike lwahela? 5 Ongo, uNguluvi akuvapeela uMubepo uMwimike nu kuhuufya ifilole umwenyo, pakuva mwikwinatila imilagililwe gya Mose, enewuli pakuva mwifuuwa iMola iNofu ye mwapuliike?6 Muhoodzage imola ya kuhwesu uAbulahamu. UWusimbe uWiimike wiitigila, “Umwene amufuuviilwe uNguluvi, mu ulo uNguluvi akumwidikilaga ukuvedza mugolofu.”a 7 Lino muludzeelage ukutigila, avaana va ndakyene va Abulahamu ve vaanu avakumufuuwa uNguluvi! 8 IMola iNofu iyi, ukutigila uNguluvi ahadza akuviidikila ukuvedza vagolofu avasili Vayahudi wugendela wa lufuuwo, yaaviliilwe kataali mu Wusimbe uWiimike, uNguluvi pe amulongiye uAbulahamu ukutigila, “Wugendela wa veeve, avaanu va nyi dzonda vahadza viifuunyililwa.”b 9 Lwe lwene, avaanu vonda avakumufuuwa uNguluvi, viifuunyililwa pamwinga nu Abulahamu, ye aafuunyiliilwe wiimila wa lufuuwo lwakwe.
Sikoowuli uwugolofu wugendela wa malimo ga milagililwe
10 Neke kangi vonda aviihuuvila ukwinatila imilagililwe gya Mose vanya luleko, pakuva uWusimbe uWiimike wiitigila, “Umuunu ye asikudzuumiilila nu kudzilima dzonda ídzisimbiilwe mu Kitabu kya Milagililwe,c álekeliilwe ululeko.”d 11 Ndakyene, sikwali umuunu ye iikwidikilwa ukuvedza mugolofu pa miiho ga Nguluvi wugendela wa kwinatila imilagililwe, pakuva uWusimbe uWiimike wiitigila, “Umugolofu iinana wugendela wa lufuuwo.”e 12 Neke kangi imilagililwe gya Mose gisiihuuvila ulufuuwo, nda haamu, giihuuvila ukwinatila amalimo, ngita uWusimbe uWiimike kye wiitigila, “Umuunu ye iilima imilagililwe ngita kye gigenda, ahadza iinana.”f
13 UKilisiti atukombwidze ukuhuma mu luleko lwa milagililwe pe aatoveleliilwe pa kipindulihidzo, ndeeni aanyamuwe ululeko ulo wiimila weesu. Lwe lwene uWusimbe uWiimike wiitigila, “Ye avedzaga ye átoveleliilwe pa mubiki, munya luleko.”g 14 Lino, idzo dzaalimiike ukuta ulufuunyo lwe aapeliilwe uAbulahamu, luvafikile avasili Vayahudi, wugendela mwa Kilisiti Yesu. Neke lino tusiilemwa ukumwanukila uMubepo uMwimike, ye aahuuviidze uNguluvi ukutupeela mu lufuuwo mwa Yesu Kilisiti.
Imilagililwe nu luhuuvidzo
15 Vafuuwa vayanguanye, muleke ndivalongele ikihwananidzo kya miikalile gya figono fyonda. Avaanu pe viifinga ulufingo umwawo nu kulwidika, sikwali umuunu ye iisunga afingule enewuli oongeledze ulufingo ulungi. 16 Lino uNguluvi amupeeliye inyuuvidzo uAbulahamu pamwinga ni kipelela kyakwe. UWusimbe uWiimike wusiitigila, “Ni fipelela fyako,” kwe kutigila avaanu voloofu, nda haamu, “Ni kipelela kyako,”h kwe kutigila umuunu yumwinga, ye Kilisiti. 17 Lwe ndiisaka ukulonga lwe ulu, ukutigila uNguluvi aaviikile ulufingoi lwakwe myaka magana gatayi na makyumi gadatu (430), ukuhuma pe gisinaa giviikwa imilagililwe gya Mose. Neke lino, imilagililwe igyo giilemwa ukufingula ulufingo ulo, kangi gisiihedza uluhuuvidzo lwakwe. 18 Ngana avaanu viihuuvila ukwinatila imilagililwe, ukuta vaanukile ilipwela, apo vasiihuuvila uluhuuvidzo lwa Nguluvi. Neke kangi mu lusungu lwakwe, uNguluvi amupeeliye uAbulahamu ilipwela wugendela wa luhuuvidzo lwakwe.j
19 Neke lino, uwugulume wa milagililwe waali kiki? Imilagililwe gyongeliye ukuta givawoneese avaanu ukutigila, vali mu ndzanangifu, ukufikila yula uva kipelela kya Abulahamu pe aafikile, yula uNguluvi ye aali áhuuviidze. Imilagililwe gyaviikiilwe wugendela wa munyamwandza,k nu muteepudzi uMose.l 20 Umuteepudzi iisakulwa ngana poovali avaanu vavili, neke kangi uNguluvi yumwinga, uyo ye mwene ye amuhuuviidze uAbulahamu kitavedza pwali umuunu va kuvateepula.
Uwugulume wa milagililwe
21 Ongo, neke lino imilagililwe gikwiluwa ni nyuuvidzo dza Nguluvi? Nambi naludoodo hela! Pakuva ngana uNguluvi aali áviikile imilagililwe igikuvapeela avaanu uwuumi uwa mbeepali, apo ngali víidikiilwe ukuvedza vagolofu wugendela wa kwinatila imilagililwe. 22 Nda haamu, sikoogili imilagililwe ngita igyo. UWusimbe uWiimike wiitigila, avaanu vonda mu nyi váwopiilwe ni ndzanangifu ukuta avaanu avakumufuuwa uYesu Kilisiti, vaanukile dze aahuuviidze uNguluvi.
23 Ulufuuwo mwa Kilisiti pe lwali lusinaa lufika, uneefwe twawopiilwe mu wutemi wa milagililwe. Twawopiilwe ukufikila ulufuuwo mwa Yesu Kilisiti pe lwivilatulwa. 24 Neke imilagililwe gitwimiililage ukufikila uKilisiti pe aafikile, ukuta twidikilwe ukuvedza vagolofu wugendela wa lufuuwo. 25 Lino umusika gwa lufuuwo mwa Kilisiti gúfikile, lwe lwene tusiigina ukuvedza paanyi pa wimiilidzi wa milagililwe.
26 Lino, wugendela wa lufuuwo mwa Kilisiti Yesu, unyeenye nyivonda muli vaana va Nguluvi, 27 pakuva unyeenye nyivonda ye múdzabiikwe, muli vamwinga nu Kilisiti, ndeeni mwihwanana ngita múmufwalile uKilisiti. 28 Apo sikoogili imilekanile kwa Muyahudi nambe Mugiliki, umusutu nambe mwawule, umwadaada nambe mwayuuva. Unyeenye nyivonda vamwinga, pakuva múkamiingʼiiswe nu Kilisiti Yesu. 29 Neke lino, pakuva muli mwa Kilisiti, unyeenye muli va kipelela kya Abulahamu, kangi vanya lipwela lya luhuuvidzo lwa Nguluvi.