Ukwitanga ukulima inofu
6
1 Vafuuwa vayangu, ngana mumuwone umuunu ágwiliye mu ndzanangifu, unyeenye ye mwilongodzwa nu Mubepo uMwimike, mumupilusage kuno muli ni numbula ya wuleele. Neke kangi mwiyangalilage, ukuta na yuunye mutane ukugemywa ukuniniila amalimo gaakwe. 2 Mwitangage mu nalamu yuunye mwa yuunye, uko kwe kwene ukugiidika imilagililwe gya Kilisiti.a 3 Neke kangi, ngana umuunu akwiwona iivagila ukulutila avangi, kangi asikuvatanga avayagwe, uyo akwidzanga mwene. 4 Nayula agelandzage amalimo gaakwe. Ngana gawoneke manofu, apo ahadza iivedza nu wiimilo uwa kwilumba kingaya kwivaganidza nu yungi, 5 pakuva nayula iivagila ukutegula ikitegulo kyakwe yumwene. 6 Napo kangi, umuunu ye iiwulanidzwa ilidzwi lya Nguluvi, amugavilage umuwulanidzi vaakwe ifinofu fye ali nafyo.7 Mutanage ukudzangwa, uNguluvi asiibedwa. Fye ávyalile umuunu, fye fyene fye ahadza iibena. 8 Umuunu ye iivyala ukuwukeeledza uwumuunu waakwe wa ndzanangifu, ukuhuma mu wumuunu uwo ahadza iibena uwaanangifu. Neke kangi ye iivyala ukumukeeledza uMubepo uMwimike, ukuhuma mwa Mubepo uyo ahadza iibena uwuumi uwa mbeepali. 9 Lino tutane ukufulugala pa kulima inofu, pakuva umusika úguviikiilwe nu Nguluvi pe gúfikile, tuhadza twibena inofu ngana tusiidendewuka. 10 Neke lino, umusika guguvedzaga gwe tuli nago, tuvalimilage inofu avaanu vonda, hiilo avafuuwa vayiisu.
Amawungo ga wusililo
11 Mulolage kye ndísimbile mu kikelo kikomi, kangi ni liwoko lyangu yuune. 12 AVayahudi wuli aviisaka ukuginikwa na Vayahudi vayaawo wugendela wa wusinge wa muvili, vakuvagagiilidza unyeenye ukusingwa. Viilima ewo ukuta viiyefye ni mumuko, idzikuvaadzila avaanu aviidalika imola dza wupoki wugendela wa kipindulihidzo kya Kilisiti. 13 Nambe vaveene avo aviisingwa, vasiininiila imilagililwe. Nda haamu, viisaka unyeenye musingwe imivili, ukuta viilumbe ku Vayahudi avangi ukutigila, músingiilwe. 14 Neke kangi uneene nditane ukuvedza nakyo kikivedzaga kya kuwona lutogo, nda haamu, yi fuwa ya Mutwa veesu uYesu Kilisiti pa kipindulihidzo. Wugendela wa kutovelelelwa kwakwe pa kipindulihidzo, ifiinu fya mwe naanyi umu si kiinu ukwangu, na yuune si kiinu pe naanyi. 15 Kungaya luwumbulilo ukusingwa nambe wukitasingwa, uluwumbulilo luli pa kugawa wupiyab swe. 16 Aviininiila amadzwi ago, ulutengamaso nu lupyana lwa Nguluvi fivedzage navo, avo ve vaanu va ndakyene va Nguluvi.c