UPawulo akumuhuuvila uKilisiti mwene
3
1 Lino vafuuwa vayangu, mukeelage mu numbula wiimila wa wunyalumwinga weenyo mwa Mutwa Yesu! Sindiifulugala ukuvasimbila kangi amadzwi gaagala, pakuva gahadza giiloleela ulufuuwo lwenyo.2 Muvedzage miiho ni mbuwa dzila,a kwe kutigila, avaanu vala aviilima wuhaluka, kangi viikangadza imivedzehedze gya kusingab mu lwa muvili! 3 Uneefwe ve vaanu ávasingiilwe, pakuva tusiihuuvila amalimo ga muvili ukuta twanukile uwupoki. Kangi tukwifuunya kwa Nguluvi wugendela mwa Mubepo vaakwe, nu kuwona lutogo wiimila wa Kilisiti Yesu. 4 Ndiilonga idzo, napo kangi ndiivagila ukuhuuvila amalimo ga muvili. Umuunu ye avedzaga ye iihoodza ukutigila, iivagila ukuhuuvila amalimo ga muvili, ndiivagila kulutila. 5 Uneene ndaasingiilwe pa kigono ikya munaana (8) ukuhuma pe ndiiholwa, kangi uneene ndili Muisilaheli ukuhuma ulukolo lwa Benyamini, kangi ndili Muebulaniya va mugati pa kuholwa. Mu malimo ga kwinatila imilagililwe gya Vayahudi, ndaali Mufwalisayo. 6 Umusika ugo, ndaapifukilaga mbandu ukuvalongodza avangi ukwinatila imilagililwe, ukufikila ukuluhulila imumuko ulukombeso. Ndiiwonaga ukutigila, ndili mugolofu pa kwinatila imilagililwe, kangi ndaali mungaya lugomehedzo luluvedzaga.
7 Neke kangi dzonda idzo dze ndaawonaga ukutigila, luwumbulilo, lino ndikudziwona naagwa, pakuva ndikumuniniila uKilisiti. 8 Si dziidzo hela, ndiiwona dzonda ukuvedza naagwa ukwangu, ukuteganidza nu wutalamu uwa kulutila ukumudzeela uKilisiti Yesu, uMutwa vangu. Wiimila waakwe ndídzilekile dzonda, kangi ndikudziwona ngita mapalagata ukuta ndimusave uKilisiti, 9 nu kuvedza mugati umwakwe. Ndingaya wugolofu wugendela wa kwinatila imilagililwe, neke kangi ndiihuuvila uwugolofu wugendela wa lufuuwo mwa Kilisiti. Uwugolofu uwo, wiihuma kwa Nguluvi wugendela wa lufuuwo.
Ukupifukila ukufikila ku wusililo
10 Ndiisaka ukumudzeela hiilo uKilisiti ni ngufu dza ludzulubuko lwakwe, nu luhangano lwa lupumuko lwakwe, ukuta ndihwanane nave mu fuwa yaakwe, 11 kangi ndivedze yumwinga mu vaanu avo ve alavadzulubusa uNguluvi ukuhuma ku wulungu.
12 Uneene sindiitigila ndáanukiye dzonda idzo, enewuli ukutigila ndívedzile mukwilifu. Nambi! Neke kangi ndiipifukila ukufikila ndaanukile idzo, lwe lwene uKilisiti Yesu aanyaaguwe ndivedzage vaakwe.
13 Vafuuwa vayiisu, sindikwiwona ukutigila, ndáanukiye idzo. Neke kangi lwe ndiilima, ndiiseemwa amadzwi ágahelaniidze, ndiikangalila amadzwi ga kuwutalo. 14 Ndiipifukila ulugendo ukuta ndikafike ku wusililo, ukwanukila uluwonolo lwe áangʼemeeleliye uNguluvi uko kukyanya wugendela mwa Kilisiti Yesu.
15 Lino uneefwe twivonda ye túkangiye mu lufuuwo, twidiingʼane mu mola idzi. Ngana muli na mahoodzo ágalekiine na idzo, uNguluvi ahadza akuvavilatulila mudzikagule kye dzigenda. 16 Ulukomi hiilo lwe ulu ukutigila, tuniniilage mu miikalile gyesu ndawuli uNguluvi kye átuvilatuliye.
17 Vafuuwa vayangu, nyivonda mwigage imigendele gyangu. Kangi mwiwulanidzage ku vaanu aviininiila imigendele gyesu. 18 Ngita kye ndavalongiye nyakoloofu, lino lwe lwene ndiiwiila ukuvalongela na moohodzi ukutigila, poovali avaanu voloofu aviiwoneesa ukutigila, ve vatavangwa va kipindulihidzo kya Kilisiti. 19 Avo viilongodzwa nu wudobofu wa muvili, vakwiginiya mu malimo gaawo ga nyoni, kangi amahoodzo gaawo, gali mu fiinu fya mu nyi. Uwusililo wa vaanu avo kwe kutipulwa.
20 Neke kangi uneefwe, uweeneka weesu kwe kukyanya. Tukumudzindila uMupoki veesu mu wusuukwa, uMutwa Yesu Kilisiti aadze ukuhuma kukyanya. 21 Uyo ye mwene ye alaahambusa imivili gyesu iminyonyovafu gihwanane nu muvili gwakwe gwa ndolo. Alaalima idzo mu ngufu dza kuviika ifiinu fyonda paanyi pa wutawulilwe waakwe.