Ihaate iyi yaasimbiilwe nu mutume Pawulo umusika pe aali mu ndinde ku wudzenge wa Loma. UPawulo aasimbile ihaate iyi, ngita umwaka gwa makyumi mutanda (60), enewuli makyumi mutanda nu gumwinga (61), ukuhuma pe iiholwa uYesu Kilisiti. Asaafikile ku wudzenge wa Kolosayi (2:1), neke kangi umulimila-vangi muyagwe uEpafula aafikile ku Vakolosayi kuvadalikila iMola iNofu (1:7). Lwiwoneka uEpafula alusimiike ulukombeso lwa Kolosayi nu lwa Lawodikya. Uwudzenge uwo, waali pagati pa ndzenge dza Kolosayi ni Efeso. Uwudzenge wa Kolosayi waali mu mugoola gwa Asya, lino ye nyi iya Wutuluki.

Kwali na Vayahudi wuli avaawulanidzaga ukutigila, uNguluvi asikuviidika avafuuwa avasisingiilwe na avasiininiila imilagililwe wuli igya Vayahudi. Kangi kwali na Vagiliki wuli avaweene uwuhosi wa lidugulu, lwe lwene vaafuuviilwe ukutigila, uNguluvi asaagavile ilidugulu. Kangi vaafuuwaga ukutigila, umuvili gwa muunu umuhosi, lwe lwene uYesu asaali nu muvili ugwa wumuunu nambe kwikala mwe naanyi.

Uwugulume wa Pawulo waali wa kuvawoneesa uwudesi wa mbulanidzo idzo, nu kuviiwusa indakyene ya malimo ga Kilisiti. Aahigile pa kusimiilidza uwuvina wa Kilisiti ukutigila, umwene ye Nguluvi, uwugavi wa figawa fyonda wuli paanyi pa wutawulilwe waakwe (1:15-23). Iigina ukulonga ukutigila, avafuuwa víidiikwe wugendela wa wunyalumwinga waawo nu Kilisiti, na mugati umwakwe moodzili inofu dzonda idza luhalawukagudzi nu wuwuya (2:1-23). Kangi iisimiilidza ukutigila, vali nawo uwuteepudzi nu Nguluvi wiimila wa Kilisiti, neke lino valekage imiikalile igya wuhosi, ukuta vavedzage ni miikalile imipiya gya kumukeeledza uNguluvi (3:1-17), kangi vaniniilage imigendele iminofu mu nyumba (3:18–4:6).