Ihaate iyi yaasimbiilwe nu mutume Pawulo. Pe aasimbaga ihaate iyi, aali pamwinga na vayagwe uSilivano nu Timoti. Avasimbiye avafuuwa avaali ku wudzenge wa Tesalonike. Ihaate iyi yaasimbiilwe ngita umwaka gwa makyumi gahaanu nu gumwinga (51), ukuhuma pe iiholwa uYesu Kilisiti. UPawulo iikalaga ku Kolindo pe aasimbile ihaate ya kutala ku lukombeso lwa Tesalonike, lwe alusimiike umusika gwa lugendo lwakwe ulwa kavili ulwa kudalika iMola iNofu (Malimo ga Vatume 17:1-10). Mu lukombeso ulo, kwali na Vayahudi vakeefu na Vagiliki voloofu.

Uwende wa Pawulo waawoniike ku lukombeso ulo, lwe lwene amutumile umuyagwe uTimoti, ukuta amusindikile imola ukuhuma ku Vatesalonike. UTimoti iipilukaga kwa Pawulo ukumulongela imola inofu dza lufuuwo ni miikalile gya vafuuwa (2:17–3:13). UPawulo pe aaviye ápuliike amadzwi ago, iikeelaga hiilo, akuvasimbilaga ihaate iya kuvalumba (1:2-10). Akuvasimbila imiikalile gye iikalaga uko umusika pe aali pamwinga navo (2:1-16), akuvoongelehedza imbulanidzo idzingi idza kuvakangadza mu lufuuwo, kwe kutigila imola dza kwadza kwa Mutwa Yesu ulwa kavili kye kulaavedza (4:13–5:11). Kangi akuvawulanidza ukutigila, viigelanidzage ulwa kigono ikyo mu migendele gya kumukeeledza uNguluvi (4:1-12; 5:12-22).