Ihaate iyi yaasimbiilwe nu mutume Pawulo umusika pe aali mu ndinde ku wudzenge wa Loma. Lwiwoneka ukutigila, uPawulo aasimbile ihaate iyi ngita umwaka gwa makyumi mutanda nu gumwinga (61), ukuhuma pe iiholwa uYesu Kilisiti. Ihaate iyi amupeeliye umulimila-vangi muyagwe uEpafuladito, ukuta ayisindike ku wudzenge wa Filipi. UPawulo avasimbiye avafuuwa va ku Filipi. Uwudzenge uwo, waali wukomi mu mugoola ugwatambulwaga Makedoniya. UPawulo nu Sila vaasimiike ulukombeso ulwa kutala uko (Malimo ga Vatume 16). Uwende waakwe wiiwoneka ku lukombeso ulu.

Kwali ni kipuga kya Vayahudi wuli avaasimiilidzaga ukutigila, lusiihwana ku vaanu avasili Vayahudi ukupokwa kingaya kusingwa (3:2). Uwugulume wa Pawulo mu haate iyi, waali wa kubeedza amahoodzo ago nu kuvakangadza mu mumuko dzaawo, ukuta vaginage ukukula mu lufuuwo (1:3-30). Akuvawulanidza vaniniilage ikihwananidzo kya Kilisiti (2:1-18). Kangi iikoolela ukuhuma mu miikalile gyakwe, ukutigila viigage imigendele gyakwe, ukuta valuwonage ulukeelo mu lufuuwo lwawo (3:1–4:9). Akuvahongedza aVafilipi wiimila wa lutango lwe vaatumile pe vaapuliike ukutigila, ali mu ndinde (4:10). Aaweene aVafilipi ukutigila, vahanganile pamwinga nave mu malimo ga kutagalidza iMola iNofu. Ihaate iyi yiidzeelanika ukutigila, haate ya lukeelo, wiimila wa lukeelo lwa Pawulo ulwihuma mu lufuuwo lwakwe.