4
1 Na yuunye vatwa, muvalimilage avasutu veenyo uwugolofu nu wunofu, pakuva mwidzeela ukutigila, na yuunye muli nave uMutwa kukyanya.
Indagiilidzo
2 Muumiililage ukulapangila kwa Nguluvi ifigono fyonda, pa ulo muvedzage miiho pamwinga nu kumuhongedza. 3 Mutulapangililage na yuufwe, ukuta uNguluvi atudindulile ingʼaasi ya kulidalika ilidzwi lyakwe, ye mola ya Kilisiti iyaali ku kinyele. Uneene ndídindiilwe wiimila wa mola iyo. 4 Mulapangilage ukutigila, ndivilatulage wunofu ilidzwi ilyo, ngita kye lívagiye ukudalikwa. 5 Muvedzage nu luhalawukagudzi mu migendele gyenyo ku avasili vafuuwa, kangi mulimage inofu umusika gonda gwe muli nago. 6 Amadzwi geenyo gavedzage manyongʼonyafu kangi agiivagila, ukuta mudzeelage ukumuhiga wunofu umuunu ye avedzaga.
Amadzwi ga wusililo
7 UTikiko mufuuwa mwende, mulima-malimo muhuuvilwa, kangi mulimila-vangi muyiisu mwa Mutwa Yesu, uyo ye mwene ye ahadza akuvalongela imola dzangu dzonda. 8 Lwe lwene ndímutumile ukwenyo, ukuta avalongele imola dzeesu nu kuvakangadza inumbula. 9 Iikwadzasa nu Onesimo, umufuuwa muyiisu, muhuuvilwa nu mwende, kangi muunu va kwenyo. Vahadza vakuvalongela dzonda idziilimika apeesu apa.
10 UAlisitaliko, ye ádindiilwe mu ndinde pamwinga naane, akuvahungila. Nayu Maluko umuhidzive va Balanaba, ye mukaanukiye indagiilidzo dzaakwe, akuvahungila. Pe áfikile ukwenyo, mumwanukilage wunofu. 11 UYesu ye iitambulwa Yusito, nave akuvahungila. Avo ve Vayahudi veene mu valima-malimo vayangu, wiimila wa wutwa wa Nguluvi. Avo vávedzile lwe lunyaamadzo ukwangu. 12 UEpafula, muunu va kwenyo, umutovela-ligendwa va Kilisiti Yesu, akuvahungila. Asiitoveka ukuvalapangilila unyeenye ukutigila, mwimage sipi, múkangiye nu kuvedza nu wumasimike mu mikeelelele gyonda igya Nguluvi. 13 Ndikumuwona iipifukila ukulima amalimo wiimila weenyo, nu kwa vaanu va wudzenge wa Lawodikya nu wa Helapoli. 14 ULuka, umuyavi-migoda veesu mwende, nu Dema, vakuvahungila. 15 Muvahungilage avafuuwa vayiisu va ku Lawodikya. Kangi mumuhungilage uNimufwa, mufuuwa muyiisu, pamwinga nu lukombeso ulwitaangʼana pa kaaya yaakwe.
16 Ihaate iyi pe yiivedza yíimbiilwe ukwenyo, muvasindikilage na va lukombeso lwa ku Lawodikya, navo vayiimbe. Neke na yuunye, mwimbe ihaate ye mwánukiye ukwawo. 17 Mumulongelage uAlikipo ukutigila, amaliidzage wunofu amalimo ge ámupeeliye uMutwa Yesu. 18 Uneene Pawulo ndiisimba uluhungilo ulu ni liwoko lyangu yuune. Mwiwukage ukutigila, ndídindiilwe mu ndinde. Ulusungu lwa Nguluvi luvedzage naanye.