Indagiilidzo ku fipinga ifili mu lukombeso
5
1 Utanage ukumukabusa umugogolo, nda haamu, umuginiyage ngita daado. Avadiimi uvalimilage ngita vanungʼuwo. 2 Uvalimilage avamwayuuva avagogolo ngita vayuuwo, na vahindza uvalimilage mu wunofu wonda ngita vahaadzawo. 3 Uvaginiyage avamwayuuva avangaya lutango ávafwiliilwe na vagoosi. 4 Neke kangi umwayuuva umufwile ye avedzaga ye ali na vaana na viidzukulu avo, viiwulanidzage ukumutovela iligendwa uNguluvi pa kuvatanga avali mu nyumba dzaawo. Ndeeni, viipilusa lwe vavalimiye avavaha vaawo, pakuva uNguluvi iikeela ewo. 5 Umwayuuva umufwile nu mugoosi, ye angaya muunu va kumutanga, uluhuuvilo lwakwe uyo luli kwa Nguluvi swe, akwifuunya nu kulapangila kwa Nguluvi ikilo nu muunyi, ukuta amutange. 6 Neke kangi umwayuuva umufwile ye iikeela uwudobofu wa nyi, uyo áfuwe mu numbula, nde avedze iiwoneka muumi. 7 Uvapeelage avafuuwa indagiilidzo idzi, ukuta vatanage ukuvedza nu lugomehedzo. 8 Ngana umuunu ye avedzaga asikuvaloleela avanyangʼolo vaakwe, hiilo va mu nyumba yaakwe, uyo iivedza álukaanile ulufuuwo, kangi iivedza muviifu ukulutila ye asiifuuwa.9 Umufwile nu mugoosi ye iivagila ukuviikwa mu mbalilo, ukuta aanukilage ulutango, avedzage ni myaka ukuvangila makyumi mutanda (60), kangi avedzage yula ye akali mudala va mugoosi yumwinga.a 10 Oolelwage wunofu mu malimo gonda amanofu, ngita ukuvalela avaana vaakwe wunofu, ukuvasangila, ukuvaanukila wunofu avafuuwa vagendzi,b kangi ukuvatanga avali mu nalamu, ukwitawulila ngʼaani yumwene mu malimo gonda amanofu. 11 Kangi avabuhu avafwile na vagoosi, utanage ukuvaviika mu mbalilo iya vafwile, pakuva uwudobofu wa muvili pe wukuvalema ukulutila ukwitawulila ngʼaani kwa Kilisiti, apo vahadza viisaka ukutawuka kangi. 12 Wiimila wa ulo, viivedza nu luhigo, pakuva válulekile uluhuuvidzo lwawo kwa Kilisiti, ulwa kusigala kitatawuka kangi. 13 Pamwinga na ulo, vakwiwulanidza uwugata pe viihelanidza inyumba ni nyumba. Si wugata weene hela, nda haamu, uwuheesi, ukuhanga mu malimo ge viilima avangi nu kulonga isidzivagiye. 14 Napo kangi, ndiisaka avabuhu avafwile avo, vatawukage, vavegalage avaana nu kuloleela inyumba dzaawo, ukuta vatane ukumupeela umutavangwa uwiimilo wa kuvaliga. 15 Lino avafwile avangi váyagile, vábapiye kwa Setano. 16 Neke kangi, ngana umwayuuva umunya lufuuwo ali na vamwayuuva avafwile na vagoosi mu lukolo lwakwe, avatangage ukuta ulukombeso lutane ukudodelwa. Apo pe peene ulukombeso lwivedza nu ludali ulwa kuvatanga avafwile avangaya lutango ndakyene.
17 Avavaha va lukombeso aviilongodza wunofu, vaginwage nu kuhombwa wunofu,c hiilo avo avakwitawulila ukudalika nu kuwulanidza. 18 Pakuva mu Wusimbe uWiimike lúsimbiilwe ukutigila, “Utanage ukuyiwopa umulomo isenga pe yiisegeya ingana pa lusegeyelo.”d Kangi lúsimbiilwe ukutigila, “Umulima-malimo iivagila ukuhombwa uluhombo lwakwe.”e
19 Utanage ukwidikila ukupulikidza inongwa wiimila wa muvaha va lukombeso, ngana kungaya woolesi wa vaanu vavili enewuli vadatu. 20 Nda haamu, avavaha aviigina ukulima uwuhosi, uvakenyelage pa vaanu avangi, ukuta avangi voogope.
21 Ndikukulagidza pa miiho ga Nguluvi, na pa miiho ga Kilisiti Yesu na vanyamwandza avahaagulwa ukutigila, wiinatilage indagiilidzo idzo, utanage ukuhiga kisaatu kitayidzeela indakyene yonda, utanage ukwimila lubali mu malimo gonda ge wiilima. 22 Utanage ukwangufya ukumwimika umuunu mu malimo ga Mutwa, pakuva ngana umwimike umuhosi mu malimo ago, na yuuve wiivedza wíyingiidze mu ndzanangifu yaakwe. Uveeve uvedzage mugolofu.
23 Ukuvangila lino, ulekage ukunyuwa ululenga lwene, unyuwage idifwayif padebe wiimila wa wutamwa waako wa lileme, ni fitamwa ifingi fye wiitamika kavilikavili.
24 Utanage ukwangufya ukuviimika avaanu mu malimo ga Mutwa, pakuva avaanu avangi, indzanangifu dzaawo dzili pa weelu hela, dzikuvalongola ku luhigo. Neke kangi avaanu avangi, indzanangifu dzaawo dzikuvaniniila kumbele ukwawo. 25 Luli ndeeni na malimo amanofu giiwoneka pa weelu hela, neke ágafihiime galaavedza pa weelu.