Ihaate iyi ye ya kavili iyaasimbiilwe nu mutume Pawulo, ye amusimbiye umunyigendwa vaakwe uTimoti. UPawulo aasimbile ihaate iyi umusika pe aali mu ndinde ku Loma (1:16-17). Aadindiilwe umusika gwe aatemile umutwa ye aatambulwaga Nelo. Imisika igyo, avafuuwa vaapumuswaga mbandu wiimila wa lufuuwo lwawo. Kangi uPawulo aahoodzaga ukutigila, umusika ugo ahadza iikomwa (4:6-8). Umusika ugo, uTimoti aali ku wudzenge wa Efeso iigina ukwimiilila ulukombeso (1:18). Lwiwoneka ihaate iyi yaasimbiilwe ngita umwaka gwa makyumi mutanda nu mutanda (66) ukufikila umwaka gwa makyumi mutanda nu mufungʼati (67), ukuhuma pe iiholwa uYesu Kilisiti.

Uwugulume wa kusimba ihaate iyi, waali wa kumukangadza uTimoti, ukuta iigugumidzage pe iitaangʼana ni nalamu (1:6-8; 2:3-10, 24; 4:2-5). Akumulagidza uTimoti ukutigila, avawulanidzage avafuuwa vavedzage ni migendele minofu, kwe kutigila vaniniilage wunofu imbulanidzo dze víiwulaniidze (2:14). Kangi akumulagidza uTimoti akolaatidzage indakyene ngita kye aawulaniidzwe (1:5, 14), akaanage mbandu imbulanidzo idza wudesi, nda haamu, awulanidzage idza ndakyene (1:13; 4:2-5). Aaniniilage ikyoledzi kya Pawulo mu mbulanidzo dza ndakyene (1:13).